Marëkë 5
5
Jesu 'ba nyɔɔ 'doo ‑balʋsusu ‑gälɩ
Matiö 8.28-34; Lukë 8.26-39
1'Ünya 'prɛrɛ 'niea 'pɛ ‑mɩdee ‑gälɩ, Gadaranyüüa#5.1 Gadaranyüü: Grɛɛkë ‑kätɩpɔɔkɩ ‑mɩdooa 'mlɩ 'ü ‑jɩjra: Gɛraseenyüü. Nyüülü 'nyɩa' juifë bä 'üa bätä. ‑tʋtʋ ‑gälɩ. 2Jesu 'ciea' ‑gɔlʋ 'lɩ nɩ, ‑jää nyɔɔ 'doo ‑frepasusu bäa' 'lɩ nɩ, ‑jää 'ɔ sɔ 'dasi 'lɩ ‑bɛ 'ɔ 'jrara 'ɔɔn 'klɩ. 3'Dasi 'lɩ nyɔɔlɔ kʋ. Nyɔɔ 'nyɩ 'lɩ ‑a bɩa ɔ kpasa 'ɔɔn ‑a ji 'ɔmä kpasradii 'lɩwlɛ, ‑bakää 'ü nö 'cɩa 'mʋgbɛ; 4'be ‑srɩ ‑mɩdoo 'lɩ nɩ, 'ü 'paa 'ɔa 'dari 'lɩ 'cɩ, 'kä 'ü 'paa 'ɔɔn detukpölɩ, ‑maa 'ɔ ma köklö 'kɩlɩ 'kä 'ɔ ma 'böblö detukpülü ‑tɩa. Nyɔɔ ‑ma 'nyɩ 'ɔɔn mlɩ ‑a bɩa. 5'Kuyi nyra 'dʋgbëa ‑tɔrʋpɩɔ 'ɔ ‑piie 'plɔʋplɔʋ, ‑srɩ ‑bɛ ‑gbia, 'ɔ 'kpöö, ‑bɛ 'ɔ 'babla 'ɔa nyufa 'täkë.
6Jesu 'ciea' ‑gɔlʋ 'lɩ nɩ, 'ɔ ‑ka tʋŋlɔlɩdɛrɩ nyɔɔlɔ nya 'jä 'ɔɔn, 'ɔnya fɔ 'ɔnya ji 'ɔa 'klɔɔtrʋ kotifli 'pa, 7'ɔnya 'kpölɩkä: «Wii 'plɛɛ bä 'nyraa ‑mɔ 'sɔa ‑tɔrʋpɩɔ le, 'Wʋsi Nyɔsʋaa 'Jʋ Jesu? 'N bibie ‑mɩ Nyɔsʋaa 'nyrɩklɩa ‑gʋ, ‑nyɩ nʋ 'mɩ ‑gbi ‑gba!» 8‑Bɛ Jesu ‑ka 'pa ɩ wii: «'Cie nyɔɔlɔ 'lɩ, ‑mɔ ‑taa ‑frepasulu!» 9Jesu nya 'bete nyɔɔlɔ: «‑Asɩ ‑na 'nyrɩ bä le?» 'Iibäa' nyɔɔlɔ nɩ: «Ana ‑sümlökʋa ‑gʋ, 'na 'nyrɩ bä 'Kɔkɔmlɛ.» 10'Ɔ kʋ Jesu 'klɩ ‑bɛ 'ɔ bibie 'ɔɔn, 'ɔnyɩ prɛ ‑sisili 'inyɩ tʋŋlɔ 'lɩ 'üa 'bre dɛrɩ.
11'Ia 'taɩn 'lɩ 'bösaru#5.11 'bösaru: Juifë nɩnɩa ‑balʋ bä 'ään 'lɩ. 'Üa ‑kpa bäsaa. Ama mi 'ia 'mlɩ 'jäkalɩ nɩ, nyüülü 'nyɩa' juifë bä 'üa ‑tʋtʋ ‑gälɩ i nrörö. Levitiikë 11.7; Deteronɔɔmë 14.8. 'kɔkɔmlɛ bä ɩ ‑plɩɩ 'dʋgba 'wli, u jö ɩ dɛɛ. 12Domüü bibie Jesu ɔ: «Prɛrɛ amɩ 'bösarulu kɔkɔa' ‑nyɛɛ 'lee 'ua ‑tɔrʋpɩɔ, amä 'uun 'lɩcecre.» 13Jesu nya 'nyie. ‑Frepasisi nya 'cie nyɔɔlɔ 'lɩ, 'inya pa 'bösarulu 'lɩ; 'ua 'bösarua ‑diigbööa 'samaa dɛɛa 'fɩɔ (2 000) nya ‑gbugblo 'dʋgba, 'unya böblö 'nie 'lɩ; 'nie nya 'bla 'uun.
14'Bösarulua ‑gbaglaaranyüü nya fɔ 'ünya mi 'iin bätäa nyüü nyra 'kpafë 'wʋa nyüü ‑gbalakalɩ, 'ünya ji wiili nröröa' 'lɩ 'jäkalɩ. 15'Ü 'tɔa' Jesu ‑gba, 'ünya 'jä nyɔɔlɔ domüü ma bäa' 'lɩ, 'ɔ 'sroo 'lɩpadɛɛ ‑bɛ 'ɔ kʋwälɩ, domüü ‑kanyɩ 'ɔɔn 'lɩ ‑a bä; 'ia ŋalɛ nya 'bla 'üün. 16Nyüülü bäa' ‑plɩɩ ‑bɛ 'i nönröa' nɩ, 'üü 'saralɩ ‑mëlëë wiili jräa' nyɔɔlɔ domüü ma bäa' 'lɩ nyra 'bösarulua ‑gä. 17'A ‑plɩɩ 'ü kʋ, 'ünya bibie Jesu ɔ sɔ 'üa 'bre.
18'Ɔ 'jraaa' ‑gɔlʋ 'lɩ nɩ, nyɔɔlɔ bʋbɔsisi ma bäa' 'lɩ nɩ, bibie 'ɔɔn bibie, 'ɔ nyra 'ɔɔn 'mä 'wʋnyɛrɛ. 19Jesu 'nyɩ 'nyie ‑a 'nyie, ‑maa 'ɔ ‑gbala 'ɔɔn: «Mi ‑na ‑nyɛɛ, 'saralɩ ‑na nyüü 'cɩcagbili kä 'fɩɔ 'Pläkänyɔɔ nʋa' ‑mɩ ‑gba, nyra 'sɩrɩ 'ɔ 'jäa' ‑na nyatɛrɩ.» 20Nyɔɔlɔ nya mi, 'jrʋpalä kä 'fɩɔ Jesu ‑fɛɛɛrɛa' 'ɔa 'kläa 'mlɩ nɩ, 'ɔnya 'saralɩ 'ia 'fɩɔ bätë ‑pʋa ‑tʋtʋ ‑gälɩ, 'i 'ü 'daraa' Dekapɔlë#5.20 Dekapɔlë: Dekapɔlëa ‑gbaa bä «bätë ‑pʋ». Bätë ‑pʋa ‑tʋtʋa 'pɛ ‑mɩdee bä Galileea 'niea bei ‑wälɩ, ‑tɛ 'jrʋ jaa'.. 'Inya kala 'ia nyüüa 'fɩɔ plɛ 'klɩ.
Jesu ‑si ‑wusu nyra jäjä 'wʋ
Matiö 9.18-26; Lukë 8.40-56
21Jesu nyra 'ɔa 'wʋnyɛrɛnyüü nya nʋ ‑gɔlʋ, 'ünya 'pɩ 'nie. 'I 'ɔ bä ɩ; nyüü 'kɔkɔmlɛ nya trara 'ɔɔn 'klɩ. 22‑Jää juifëa 'sraaplanyukua 'wliklɩanyɔɔ 'doo 'jäa' 'ɔɔn nɩ, 'ɔnya blö 'ɔɔn bei 'wʋ; 'ɔɔ 'ü 'dara Jairusë, 23'ɔnya bibie 'ɔɔn: «'Na 'ŋlëkayria nëmä jä, ji ‑a ‑piie 'ɔɔn klʋgbë ‑gälɩ 'ɔmä 'pʋ 'ɔ ‑pɩ jä!» 24Jesu nyra 'ɔɔn nya mi, ‑bɛ nyüü 'kɔkɔmlɛ prɛ 'ɔɔn dɛrɩ, 'üa ‑sümlökʋa ‑gʋ, 'ü 'kakla 'ɔɔn 'klɩ.
25'Ŋlʋʋ 'doo bä ɩ 'üa ‑tɔrʋpɩɔ ‑toru 'cie 'ɔɔn 'lɩ, 'ia ‑sɩ ‑pʋ ‑sɩ 'sɔɔ. 26'Ɔ kätɛ 'ɔnya 'jä ‑sʋɩ, ‑dɔtë sɩara 'ɔɔn, 'ɔ 'sa 'ɔa käkädiia 'fɩɔ, ‑maa 'ɔnyɩ 'lɩ 'cɩcasa ‑a 'ba; 'lɩklüa 'doo 'ɔa fugba 'paa. 27‑Bɛ 'ɔ 'nua' Jesua 'nyrɩ 'wli nɩ, 'ɔnya ja 'ɔa dɛrɩ nyüüa ‑tɔrʋpɩɔ 'ɔnya ‑fɛ 'ɔa 'lɩpadɛɛ ‑gba. 28‑Jää 'sɩ 'ɔ ‑gbaa' 'ɔa plɛklɩ nɩ: «Ama nya ɩ dɩɛ 'ɔa 'lɩpadii ‑gbafɛ, 'nyaa 'pʋa.» 'A 'ia ‑gʋ 'ɔ ‑fɛ Jesua 'kotu ‑gba. 29'A ‑plɩɩ ‑torulu kʋ dotro 'unya 'nyüglö; 'ɔa 'mʋgbɛ 'jäa' 'ɔa 'jajɛa 'mlɩ nɩ, 'ɔ jresaa 'ɔ 'a 'pʋ. 30Jesu nya jre 'iin dotro 'sɩrɩ 'klü 'ciea' 'ɔɔn 'lɩ. 'Ɔ ‑siea' kälɩ, ‑jria 'ɔ 'bete: «Nyɔɔ 'plɛɛ ‑fɛ 'na 'lɩpadɛɛ ‑gba le?» 31'Iibäa' 'ɔa 'wʋnyɛrɛnyüü nɩ: «‑Jää nyüü 'ü 'kakla ‑mɩ 'klɩ, ‑bɛ ‑beete: ‹Ɔ ‑fɛ 'mɩ ‑gba le?› » 32Jesu ‑gölöa' 'ɔa ‑gba 'ɔ tɩtrɛkä 'ɔmä ɔ nʋa' 'iin 'jä. 33‑Bɛ 'ŋlʋʋlɔ jrea' wiili ‑sia' nɩ, ŋalɛ 'blaa 'ɔɔn ‑bɛ 'ɔ tɩtrɛ, 'ɔnya ji 'ɔɔn bei 'wʋ blö; 'ɔnya ‑gbala 'ɔɔn 'cɩcasaa 'fɩɔ. 34Jesu nya ‑gbala 'ɔɔn: «'Na 'jʋ, ‑na nyɔsʋaplɛtorokʋ 'a ‑mɩ 'pʋɔ#5.34 'a ‑mɩ 'pʋɔ: 'Aiɛ «'a ‑mɩ 'lɩmlɩba»., mi, abɩa ‑na fugbaa 'mlɩ flɛrɛ! ‑Wusulu 'blaaa' ‑mɩ nɩ, 'u ‑kanyɩ 'bla ‑mɩ.»
35Jesu ‑ka 'paa ɩ wii ‑bɛ nyüü sɔ 'sraaplanyukua 'wliklɩanyɔɔlɔa ‑gbööli 'ünya ji nyɔɔlɔ ‑gbala: «‑Na 'ŋlëkayria 'a ɔ jä; dɛplɛɛ kä ‑gʋ ‑ka 'yagba 'sɔɔwʋ 'Kpɩkpɩanyɔɔ le?» 36‑Maa Jesu 'nyɩ 'iin 'nyakli dɛrɩ ‑a fa; 'ɔnya ‑gbala 'wliklɩanyɔɔlɔ: «Ŋalɛ 'nyɩ 'bla ‑mɩ, toro Nyɔsʋaa 'doo plɛ!» 37Jesu 'nyɩ 'nyie ‑a 'nyie nyɔɔ 'mä 'ɔɔn ‑gälɩ ‑mɛ, ‑maa Piɛɛrë, Jaakë nyra 'ɔa ‑wlajʋ Jaan, 'ɔ nyra 'üün mi. 38'Ünya 'tɔ 'sraaplanyukua 'wliklɩanyɔɔlɔa ‑gbööli. Jesu nya 'jä nyüülü jia' 'dügböli, 'ü 'wuö ‑bɛ 'ü 'paa 'popowle ‑gböösa. 39'Ɔnya pa 'ɔnya ‑gbala 'üün: «Dɛplɛɛ kä 'dugua ‑yrɛ 'a nö 'saa 'a trara le? 'Ŋlëkayrialɔ 'nyɩ jä ‑a jä, 'mʋmɔ 'ɔ 'mʋmɔ!» 40Ü ‑gölöa' srörö 'ü srörö 'ɔmɩ. 'Ɔ bea' nyüülüa 'fɩɔ ‑fälɩ nɩ, 'ɔɔ, 'ŋlëkayrialɔa tʋ, 'ɔa 'yio, nyra nyüülü jaraa' 'ɔɔn, 'ünya pa ‑tɛ 'lɩ 'jʋlɔ bäa'. 41'Ɔ dɔrɔa' 'jʋlɔa 'darʋ 'wʋ, 'ɔnya ‑gbala 'ɔɔn: «Talita kumi#5.41 Talita kumi: Waklöölä kʋa' ‑pɩ, Arameenyüüa wii bäsaa.!» 'Ia ‑gba bä: «'Ŋlëkayria, 'mɔɔ ‑gbala ‑mɩ, sɔwʋ!» 42'Köklesaplɩɩ 'wʋ 'ŋlëkayrialɔ sɔ, ‑bɛ 'ɔ 'nyɛnyɛ kä. 'Ɔa ‑sɩ ‑pʋ ‑sɩ 'sɔɔ. 'I prɛ 'üa ‑gälɩa 'ku. 43'Ɔnya blöplɛ 'ɔnya ‑gbala 'üün, 'sɩrɩ 'ü ‑pɩa' 'iin nyɔɔ 'doo ‑gbala. 'Ɔnya ‑gbala 'üün ü ‑nyɩ 'ŋlëkayrialɔ jijrɛ 'ɔmä dɛɛji.
လက္ရွိေရြးခ်ယ္ထားမွု
Marëkë 5: Bakwé
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Wycliffe Bible Translators, Inc.