मरकुस 3
3
ईसु सुकला हात वाळा माणुस काजे वारु करे
(मत्ती 12:9-14; लुका 6:6-11)
1ईसु पछु तींद्रा यहुदीन भक्तीन घर मां गुयु; चां एक माणुस हतलु, तेरु हात सुकी गुयलु, 2थुड़ाक फरीसी माणसे ईसु पर झुटु ईल्जाम लागाड़नेन तकाय रवला, ने चु आरामेन दाहड़ान नीयम तुड़ीन, जु मांदला काजे वारु करे, की नी करे असा करीन चे भाळी रवला। 3ईसु सुकला हात वाळा माणुस सी कह्यु, “माणसेन ईचमां उबु हय जां।” 4ने ईसु माणसे काजे पुछ्यु, “काय आरामेन दाहड़े नीयमेन अनसारे वारु करनु की बुरो करनु वारु छे, जीवेक बचाड़नु की मारनु वारु छे?” बाकुन चे माणसे हुगात हय रवला। 5चे मन मां बेसका उदास हतला, करीन ईसु बेसकु दुखी हय गुयु, ने चे रीसवायन चारेमेर तीनु काजे देख्यु। ने ईसु तीना काजे कह्यु “तारु हात लांबु कर।” ने चु हात लांबु कर्यु, ने तेरु हात वारु हय गुयु। 6तत्यार फरीसी माणसे बाहार जाय्न तत्यारुत हेरोदेस राजान माणसे बेसका असा वीच्यार करने बाजी गुया, की हामु ईसुक कसा करीन मारजे।
दरीया धड़े गड़दी
7ईसु तेरा चेला पुठ्ये गलील दरीया भीणी गुयु, ने तत्यार गलील ईलाका वाळा मट्लु टुळु ईसु पछळ-पछळ आवतेला। 8ने ईसुन मटला काम सामळीन यहुदीया, ने यरुसलेम, ने इदुमीया, यरदन नदीन पली धड़ वाळा ने सुर ने सेदा ईलाका वाळा माणसे वारु काम करे करीन माणसेन मटु टुळु तेरे धड़े आयु। 9ईसु तेरा चेला काजे कह्यु “माणसेन टुळु बेसकु छे करीन मारे वाटे एक ढंड्यो तीयार करु काहाकी मे दड़पाय नी सको।” 10काहाकी ईसु बेसका माणसेक वारु करलु, तेरेमां दीसरा बी मांदला माणसे वारु हवणे करीन ईसु काजे छीमणे धकलाय्तात जातला। 11भुतड़ा लागला माणसे ईसु काजे देखता वार मां तेरे अगळ पड़ जातला, ने आयड़ीन कवतेला की, “तु भगवानेन पुर्यु छे।”
12ने ईसु तीनुक चेतायु की, मेसेक उजन्तु घुण करु करीन कह्यु।
ईसु बारे नेवताळाक नेवाड़े
(मत्ती 10:1-4; लुका 6:12-16)
13पछेन ईसु एक बयड़ा पर जाती रयु, ने गमे तीनाक तेरे धड़े बुलायु; ने चे तेरे धड़े आया। 14तत्यार ईसु बारे जणा मारे पुठ्ये रहु, करीन नेवाड़ लेदु ने तीनुक नेवताळान काम छे करीन नाव देदु, ने चे परचार करने गुया, 15ने माणसे मां सी भुतड़ा नीकाळनेन हक आपीन मकल्यु।
16चे जे छे: सीमोन तेरो नाव चु पतरस राख्यु, 17ने जब्दीन पुर्या याकुब ने याकुबेन भाय युहन्नु, तींद्रा नाव हयु, बुअनरगीस मतलब गाजणे वाळान पुर्यु राख्यु, 18ने अन्दीरीयास ने फीलीप्पुस, ने बरतुल्मे, ने मत्ती ने थोमा, ने हलफाईन पुर्यु याकुब, ने तद्दे ने अळी सीमोन कनानी चु देसेन सेवा करने वाळु हतलु, 19ने यहुदा ईस्करीयोती चु ईसु काजे धुकु दीन धराड़ देदलु।
ईसु ने बालजबुल
(मत्ती 12:22-32; लुका 11:14-23—12:10)
20तत्यार बयड़ा मां सी ईसु घर आयु। ने चां बी माणसे बेसका भेळा हय गुया; ईसु ने तेरा चेला काजे रुटा खाणेन बी टेम नी जड़ी। 21जत्यार हेरा कुटुम वाळा ईसुन बारामां माणसे असा कवतेला की “ईसु संक्यु हय गुयु।” असा करीन ईसुन घरना ईसु काजे घर बुलावणे करीन चाल पड़्या।
22यरुसलेम सी आवला थुड़ाक नीयमेन मास्तर्या बी कह्तेला की, “हेरे मां ते भुतड़ा छे,” ने “जु ईसु भुतड़ा काजे ढासाड़ने करीन डाहला भुतड़ान साहरु लीन भुतड़ा काजे माणसेम सी नीकाळे।”
23तेरेमां ईसु तीनु काजे धड़े बुलायन दाखलु दीन तीनुक कह्यु, “भुतड़ु कसु भुतड़ा काजे नीकाळी सके? 24कदी काहनाक देस टुट जाय ने लड़ाय हवे, ती च राज कसों संय रय सके? 25ने कदी काहनाक घरेन माणसे मां लड़ाय हवे, ती चो घर कसों संय रय सके? 26तेरेमां कदी भुतड़ान राज टुट जाय, ती तेरो राज्य कसों बणीन रवसे? तीनाक ते मरनु पड़से।
27“बाकुन काहनु बी माणुस काहनाक ताकतवाळान घर मां भरायन तेरो समान कसु लुटसे, तत्यार लग की चु पेहेल तीना ताकतवाळा काजे बांदी नी लेय; तीत तेरा घर काजे लुट सके।
28“मे तुंद्रे सी छाचलीन कहं, की माणसेन आखा पाप ने नाव-बद्दी करे, तेरी माफी जड़ जासे, 29बाकुन जु काहनुक चुखली-आत्मान नाव-बद्दी करसे, तीनुक कदी पापेन माफी नी जड़े, बाकुन चु जलम पापेन गुनेगार रवसे।” 30“काहाकी चे असा कह्तेला की ईसु मां भुतड़ान आत्मा भराय रय।”
ईसुन माय ने भायस
(मत्ती 12:46-50; लुका 8:19-21)
31तत्यार ईसुन माय ने भायस आया, ने बाहरुत उबा रय्न ईसु काजे बुलावणे करीन घर मां दीसरा काजे मकल्या। 32माणसे तेरे आड़े-धड़े बसी रवला, चे कह्या “देख तारी माय ने तारा भायस ने बहणस्या तुसेक बाहार हेरी रया।”
33ईसु जपाप आप्यु, “मारी माय ने मारु भायस कुण छे?” 34ने ईसु चां आड़े-धड़े बसी रवला, तींद्रे चारे मेर भाळीन कह्यु “सामळु, जे अतरात मारी माय ने मारु भायस छे। 35जे कुय भगवानेन मरजी पर चाले, चु मारु भायस ने मारी बहणीस ने माय छे।”
လက္ရွိေရြးခ်ယ္ထားမွု
मरकुस 3: BSP25
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bhilali Bible ©The Word for the World International and Bhilali Bhasha Samiti, Warvani, (M.P.) 2025.
मरकुस 3
3
ईसु सुकला हात वाळा माणुस काजे वारु करे
(मत्ती 12:9-14; लुका 6:6-11)
1ईसु पछु तींद्रा यहुदीन भक्तीन घर मां गुयु; चां एक माणुस हतलु, तेरु हात सुकी गुयलु, 2थुड़ाक फरीसी माणसे ईसु पर झुटु ईल्जाम लागाड़नेन तकाय रवला, ने चु आरामेन दाहड़ान नीयम तुड़ीन, जु मांदला काजे वारु करे, की नी करे असा करीन चे भाळी रवला। 3ईसु सुकला हात वाळा माणुस सी कह्यु, “माणसेन ईचमां उबु हय जां।” 4ने ईसु माणसे काजे पुछ्यु, “काय आरामेन दाहड़े नीयमेन अनसारे वारु करनु की बुरो करनु वारु छे, जीवेक बचाड़नु की मारनु वारु छे?” बाकुन चे माणसे हुगात हय रवला। 5चे मन मां बेसका उदास हतला, करीन ईसु बेसकु दुखी हय गुयु, ने चे रीसवायन चारेमेर तीनु काजे देख्यु। ने ईसु तीना काजे कह्यु “तारु हात लांबु कर।” ने चु हात लांबु कर्यु, ने तेरु हात वारु हय गुयु। 6तत्यार फरीसी माणसे बाहार जाय्न तत्यारुत हेरोदेस राजान माणसे बेसका असा वीच्यार करने बाजी गुया, की हामु ईसुक कसा करीन मारजे।
दरीया धड़े गड़दी
7ईसु तेरा चेला पुठ्ये गलील दरीया भीणी गुयु, ने तत्यार गलील ईलाका वाळा मट्लु टुळु ईसु पछळ-पछळ आवतेला। 8ने ईसुन मटला काम सामळीन यहुदीया, ने यरुसलेम, ने इदुमीया, यरदन नदीन पली धड़ वाळा ने सुर ने सेदा ईलाका वाळा माणसे वारु काम करे करीन माणसेन मटु टुळु तेरे धड़े आयु। 9ईसु तेरा चेला काजे कह्यु “माणसेन टुळु बेसकु छे करीन मारे वाटे एक ढंड्यो तीयार करु काहाकी मे दड़पाय नी सको।” 10काहाकी ईसु बेसका माणसेक वारु करलु, तेरेमां दीसरा बी मांदला माणसे वारु हवणे करीन ईसु काजे छीमणे धकलाय्तात जातला। 11भुतड़ा लागला माणसे ईसु काजे देखता वार मां तेरे अगळ पड़ जातला, ने आयड़ीन कवतेला की, “तु भगवानेन पुर्यु छे।”
12ने ईसु तीनुक चेतायु की, मेसेक उजन्तु घुण करु करीन कह्यु।
ईसु बारे नेवताळाक नेवाड़े
(मत्ती 10:1-4; लुका 6:12-16)
13पछेन ईसु एक बयड़ा पर जाती रयु, ने गमे तीनाक तेरे धड़े बुलायु; ने चे तेरे धड़े आया। 14तत्यार ईसु बारे जणा मारे पुठ्ये रहु, करीन नेवाड़ लेदु ने तीनुक नेवताळान काम छे करीन नाव देदु, ने चे परचार करने गुया, 15ने माणसे मां सी भुतड़ा नीकाळनेन हक आपीन मकल्यु।
16चे जे छे: सीमोन तेरो नाव चु पतरस राख्यु, 17ने जब्दीन पुर्या याकुब ने याकुबेन भाय युहन्नु, तींद्रा नाव हयु, बुअनरगीस मतलब गाजणे वाळान पुर्यु राख्यु, 18ने अन्दीरीयास ने फीलीप्पुस, ने बरतुल्मे, ने मत्ती ने थोमा, ने हलफाईन पुर्यु याकुब, ने तद्दे ने अळी सीमोन कनानी चु देसेन सेवा करने वाळु हतलु, 19ने यहुदा ईस्करीयोती चु ईसु काजे धुकु दीन धराड़ देदलु।
ईसु ने बालजबुल
(मत्ती 12:22-32; लुका 11:14-23—12:10)
20तत्यार बयड़ा मां सी ईसु घर आयु। ने चां बी माणसे बेसका भेळा हय गुया; ईसु ने तेरा चेला काजे रुटा खाणेन बी टेम नी जड़ी। 21जत्यार हेरा कुटुम वाळा ईसुन बारामां माणसे असा कवतेला की “ईसु संक्यु हय गुयु।” असा करीन ईसुन घरना ईसु काजे घर बुलावणे करीन चाल पड़्या।
22यरुसलेम सी आवला थुड़ाक नीयमेन मास्तर्या बी कह्तेला की, “हेरे मां ते भुतड़ा छे,” ने “जु ईसु भुतड़ा काजे ढासाड़ने करीन डाहला भुतड़ान साहरु लीन भुतड़ा काजे माणसेम सी नीकाळे।”
23तेरेमां ईसु तीनु काजे धड़े बुलायन दाखलु दीन तीनुक कह्यु, “भुतड़ु कसु भुतड़ा काजे नीकाळी सके? 24कदी काहनाक देस टुट जाय ने लड़ाय हवे, ती च राज कसों संय रय सके? 25ने कदी काहनाक घरेन माणसे मां लड़ाय हवे, ती चो घर कसों संय रय सके? 26तेरेमां कदी भुतड़ान राज टुट जाय, ती तेरो राज्य कसों बणीन रवसे? तीनाक ते मरनु पड़से।
27“बाकुन काहनु बी माणुस काहनाक ताकतवाळान घर मां भरायन तेरो समान कसु लुटसे, तत्यार लग की चु पेहेल तीना ताकतवाळा काजे बांदी नी लेय; तीत तेरा घर काजे लुट सके।
28“मे तुंद्रे सी छाचलीन कहं, की माणसेन आखा पाप ने नाव-बद्दी करे, तेरी माफी जड़ जासे, 29बाकुन जु काहनुक चुखली-आत्मान नाव-बद्दी करसे, तीनुक कदी पापेन माफी नी जड़े, बाकुन चु जलम पापेन गुनेगार रवसे।” 30“काहाकी चे असा कह्तेला की ईसु मां भुतड़ान आत्मा भराय रय।”
ईसुन माय ने भायस
(मत्ती 12:46-50; लुका 8:19-21)
31तत्यार ईसुन माय ने भायस आया, ने बाहरुत उबा रय्न ईसु काजे बुलावणे करीन घर मां दीसरा काजे मकल्या। 32माणसे तेरे आड़े-धड़े बसी रवला, चे कह्या “देख तारी माय ने तारा भायस ने बहणस्या तुसेक बाहार हेरी रया।”
33ईसु जपाप आप्यु, “मारी माय ने मारु भायस कुण छे?” 34ने ईसु चां आड़े-धड़े बसी रवला, तींद्रे चारे मेर भाळीन कह्यु “सामळु, जे अतरात मारी माय ने मारु भायस छे। 35जे कुय भगवानेन मरजी पर चाले, चु मारु भायस ने मारी बहणीस ने माय छे।”
လက္ရွိေရြးခ်ယ္ထားမွု
:
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bhilali Bible ©The Word for the World International and Bhilali Bhasha Samiti, Warvani, (M.P.) 2025.