नेवताळान काम 5
5
हनन्या ने सफीरा
1हनन्या नावेन एक अदमी ने आपसी घरवाळी सफीरा खेत वेचणेन बारामां वीच्यार कर्या अळतेन एक खेत वेच देदु। 2चु खेतेन दामेन एक वाटु आपसु राख लेदु जी वात तेरी घरवाळीक बी मालुम हतली, ने चु दीसरु हीस्सु लावीन नेवताळान पाय मां मेक देदु। 3अतरा मां पतरस कह्यु, “हनन्या! तु भुतड़ा काजे तारा मन पर काहा राज करने देदु, ने भुतड़ान जी वात काहा मान लेदु की तु चुखली-आत्मा काजे लुच्चाय मेल ने खेत वेचलु तीना दामेन सी ईतराक रुप्या बचाड़ीन मेल ले? 4वेचायणेन पेहले च खेत तारो नी हतलो काय? ने तीना वेचायला खेतेन दाम पर तारु हक नी हतलु काय? तु आपसा मन मां असलु वीच्यार काहा आवणे देदु? तु माणसेक नी, बाकुन भगवानेक झुट मेक्लु छे।” 5हनन्या ची वात सामळ्युत ने हीट पड़्यु ने तेरु जीव नीकळी गुयु। ने जे बी एरे बारामां सामळ्या, चे बेसका बीही गुया। 6अळतेन थुड़ाक जुवान्या उठीन हनन्या धड़ेक हाकलीन सीवड़ीन पुथल्या मां वेलट्या, ने बाहर ली जाय्न वोगे कर देदा।
7ज हयो, तीनी वातेन बारामां हनन्यान घरवाळी काजे मालुम नी हतलो, तीनेक घंटा हय गुया ने अळतेन ची पतरस हतलु तीना घरमां आवी। 8तत्यार पतरस तीनीक जु सवाल पुछ्यु, “मेसेक बताड़, तुहुंं च खेत अतरात पयस्या मां वेचला काय?” ची जपाप आपी, “हव, अतरात पयस्या मां वेचला।”
9तेरु जपाप सामळीन पतरस तीनी काजे कह्यु, “तुहुंं दुय जणा मालीक भगवानेन चुखली-आत्मा काजे पारखणे करीन एक मन्या हय्न काहा राजी हय गुया सामळु! जे माणसे तारा धेणी काजे अळावीन वगे करने गुयला, चे पछा आवीन झपले उबा हय रया, ने हय चे तुसेक बी वगे करने बाहर ली जासे।” 10जी वात सामळतेत ची पतरसेन पायेम हीट पड़ी, ने मर गुय, ने चे जुवान्या घरमां आवीन तीनीक मरली देख्या, ने चे तीनीक बी ईछीन बाहर ली जाय्न तेरा धेणीन मसाण धड़ेत अळावीन वगे कर देदा। 11तेरेसी आखी मंडळीन माणसे ने जी वात सामळीन बीही गुया।
वारु कामेन सहलाणी ने भाती-भातीन मटा-मटा काम
12ईसुन नेवताळान साहरे बेसका वारु कामेन सहलाणी ने मटा-मटा काम माणसे मां देखाव पाड़्यु, ने आखा ईसुन नेवताळान काम एक मन्या हय्न सुलेमानेन खपड़ी मां भेळा हवतेला। 13बाकुन दीसरा माणसे काजे ईसुन नेवताळान काम पुठ्ये भेसकायणे वारु नी लागतेलो बाकुन चे ईसुन नेवताळान काम काजे चे बेसका वारु छे करीन कवतेला। 14बाकुन ईसु पर भुरसु करन्या बेसका अदमी ने बायरा आवीन मालीक ईसुन मां जादास-जादा अदु हवता गुया। 15जत्यार पतरस जां मायन नीकळीन गुयु ती मांदला माणसे पर पतरसेन साहळु काहना ने काहनाक पर पड़से ने पड़से करीन माणसे, मांदला काजे सयड़क धड़े लावीन खाट्ली पर ने झुळना मां टुपाड़ीन मेल देदला 16ने यरुसलेम सहरेन आड़े-धड़ेन सहर वाळा बी मांदला काजे भुतड़ा आत्मा लागला माणसे काजे लावतेला ने चे आखा वारु हय जातला।
ईसुन नेवताळाक एला पाड़े
17ज आखो देखीन भगवानेन डाहलु पुजारु, ने सदुकी पंथवाळा तेरा आखा सात-संगात वाळा बेसका कुहरायणे बाजी गुया। 18ने चे ईसुन नेवताळान काम काजे धरीन जेल मां कुंडी देदा। 19बाकुन मालीक भगवानेन एक सरग वाळु भगवानेन अघली वात बताड़ने वाळु, जेलेन झपलु उगाड़ देदु, ने चु तीनाक बाहर ली जाय्न कह्यु, 20“जावु, ने मंदीरेम उबा हय्न ईनी नवली जीवाय्न बारामां आखी वात माणसेक सामळावु।” 21ने ईसुन नेवताळान काम सरग वाळा भगवानेन अघली वात बताड़ने वाळान वात सामळीन संदारो हवतात मंदीर मां जाय्न नवली जीवाय्न वात सामळावणे बाजी-गुया।
तत्यार भगवानेन डाहलु पुजारु, ने सदुकी पंथवाळा तेरा आखा सात-संगात वाळा आवीन यहुदी माणसेन बसक ने ईस्रायली जातीन आखा पुडारी काजे भेळा कर्या, ने सीपायड़ाक कय मकल्या की तुहुंं जेल सी ईसुन नेवताळान काम काजे ली आवु। 22बाकुन जत्यार सीपायड़ा चां पुग्या, ती चे ईसुन नेवताळान काम तीनुक जेल मां नी जड़्या। ती चे सीपायड़ा पछा आवीन भगवानेन डाहला पुजारा ने सदुकी पंथवाळा ज कह्या, 23“हामु जाय्न देख्या ती जेलेम वारु छत करीन बंद कर मेकलो हतलो, ने झपले पहरु देण्या झपले पहरु देदा जाय्न उबा हय रवला; बाकुन जत्यार हामु मांही गुया, ती चां सारा काहना नी हतलो।” 24ची वात सामळीन मंदीरेन राखवाळ्या डखी ने भगवानेन डाहला पुजारी फीकुर मां पड़ गुया, ने ची वीच्यार करने बाजी गुया, “हय आपणु काय करजे।” 25तीनेत टेमे काहनुक आवीन तीनुक जी खबर आप्यु, “देख, तीनु माणसे काजे तुहुंं जेल मां कुंडी देदला, चेत माणसे मंदीर मां उबा हय्न माणसेक नवली जीवाय्न बारामां सीकाड़ने बाजी रया।” 26तत्यार मंदीरेन राखवाळ्या सीपायड़ान डखी, आपसा सीपायड़ा काजे लीन गुयु ने ईसुन नेवताळान काम काजे धर लायु। बाकुन माणसे हामुक दगड़ाट देसे, करीन तीनुक जबरान धरीन नी लायु, काहाकी चे माणसेक देखीन बीहतेला।
27चे ईसुन नेवताळान काम काजे लावीन मट्ली बठक अगळ उबा कर देदा; ने भगवानेन डाहलु पुजारु ईसुन नेवताळान काम सी सवाल पुछ्यु, 28“हामु तुहुंं काजे बेसका कयड़ा चेताड़ीन हुकुम आप्ला की ‘तुहुंं ईसुन नाव लीन माणसेक घुण सीकाड़जु?’ तेबी तुहुंं आखा यरुसलेम सहर मां ईसुन नाव लीन सीकाड़ने बाजी गुया, ने ईसुन लुहीन गुनु हामरे मुणका पर पाड़ने हींड रया।”
29पतरस ने ईसुन नेवताळान चु जपाप आप्या, “माणसेन हुकुम सी भगवानेन हुकुम पाळनु बेसको वारु छे। 30तीना ईसु काजे तुहुंं कुरुस पर चड़ावीन खीळा ठुकीन मार नाख्ला, तीना ईसु काजे आपणा डाहा-डाहान भगवान मर्या-सर्याम सी जीवाड़ देदु। 31ईनात ईसु काजे भगवान मालीक ने पापेम सी छुड़ावणे वाळु ठेहरावीन, आपसे जेवड़्ये आन्गे बठाड़ीन मट्लु हक आप देदु, ने चु ईस्रायली जातीन माणसे काजे पापे भीणी सी मन फेरवीन, भगवान भीणी वळनेन ताकत ने पापेन माफी आपे। 32ईनी आखी वातेन गवा हामु छे, ने चुखली-आत्मा बी छे, ने चु चुखली-आत्मा, भगवान तीनु माणसेक आपलु छे, जे भगवानेन हुकुम काजे पाळे।”
33जी वात सामळीन चे बेसका रीसाय गुया, ने ईसुन नेवताळान काम काजे मार नाखणेन वीच्यार कर्या। 34यहुदी माणसेन मट्ली बसक मां गमलीयेल नावेन एक फरीसी माणुस हतलु, चु मुसान साहरे लिखली सास्तुरेन कायदा सीकाड़न्यु मास्तर हतलु, ने तेरी ईज्जत आखा करतेला। चु यहुदी माणसेन बसक उबु हय्न हुकुम आप्यु की “ईनु ईसुन नेवताळाक ईतरीक वार लग बाहर ली जावु।” 35ने अळी चु बसक मायन ईस्रायली माणसेक कह्यु, “ए ईस्रायली जातीन माणसे, तुहुंं ईनु माणसे साते ज काय करने हींड रया, च वारु वीच्यार करीन करजु। 36काहाकी ईनु दाहड़ा सी पेहले थीयुदास नावेन एक माणुस ज कवतु जाय्न उबु हयु, ‘मे काही छे’ ने च्यारेक सोव माणसे तेरे पर भुरसु करीन तेरे पुठ्ये चाल पड़्या, बाकुन तीनाक काहनुक मार नाख्यु; ने दत्रा बी माणसे तेरे पुठ्ये हतला, चे आखा रावण्या-तीवण्या हय्न सर गुया। 37अळतेन माणसेन गिन्तीन टेम आवी, तीने टेमे गलील जीला मां रवण्यु यहुदा उजेंतु हयु। चु ईतराक माणसे काजे तेरे भीणी कर लेदु। बाकुन तीनाक बी काहनुक मार नाख्यु। ने तेरे पर भुरसु करन्या बी रावण्या-तीवण्या हय गुया 38तेरेसी मे तुहुंं काजे कहं की तुहुंं ईनु ईसुन नेवताळान काम सी छेटा रवणु, ने हींद्रा काम मां आड़ा मां देवायु, काहाकी हींद्री युजना ने काम माणसे वगे सी हसे ती ची आपसीत सर जासे। 39बाकुन कदी जी युजना भगवान सुदी सी हसे, ती तुहुंं हीनुक कदी सारी नी सकु; ने तुहुंं भगवानेन वीरुद हय्न तेरे साते लड़ायण्या बी गीणायसु।”
तत्यार चे बसक मायन ईस्रायली माणसे गमलीयेलन वात मान लेदा। 40ने चे, ईसुन नेवताळान काम काजे बुलावणे मकल्या ने जत्यार तीनुक ली आया ती तीनुक ठुक्या; ने तीनुक जु हुकुम आपीन कह्या, “ईसुन नाव लीन कुय साते वात घुण करु।” ने अळतेन तीनुक छुड़ देदा। 41ने ईसुन नेवताळान काम जी वात सामळीन ज कवता जाय्न खुस हय्न मट्ली सभा मां सी जाती रया, “कम सी कम हामरी ईसुन नावे नाव-बद्दी ते हयी।” 42चे दाहड़ीत मंदीर मां, ने घर-घर जाय्न ईसुन वात सामळावता रया, ने ईसुन ची खुस-खबर सामळावता गुया की “ईसुत मसी छे।”
လက္ရွိေရြးခ်ယ္ထားမွု
नेवताळान काम 5: BSP25
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bhilali Bible ©The Word for the World International and Bhilali Bhasha Samiti, Warvani, (M.P.) 2025.
नेवताळान काम 5
5
हनन्या ने सफीरा
1हनन्या नावेन एक अदमी ने आपसी घरवाळी सफीरा खेत वेचणेन बारामां वीच्यार कर्या अळतेन एक खेत वेच देदु। 2चु खेतेन दामेन एक वाटु आपसु राख लेदु जी वात तेरी घरवाळीक बी मालुम हतली, ने चु दीसरु हीस्सु लावीन नेवताळान पाय मां मेक देदु। 3अतरा मां पतरस कह्यु, “हनन्या! तु भुतड़ा काजे तारा मन पर काहा राज करने देदु, ने भुतड़ान जी वात काहा मान लेदु की तु चुखली-आत्मा काजे लुच्चाय मेल ने खेत वेचलु तीना दामेन सी ईतराक रुप्या बचाड़ीन मेल ले? 4वेचायणेन पेहले च खेत तारो नी हतलो काय? ने तीना वेचायला खेतेन दाम पर तारु हक नी हतलु काय? तु आपसा मन मां असलु वीच्यार काहा आवणे देदु? तु माणसेक नी, बाकुन भगवानेक झुट मेक्लु छे।” 5हनन्या ची वात सामळ्युत ने हीट पड़्यु ने तेरु जीव नीकळी गुयु। ने जे बी एरे बारामां सामळ्या, चे बेसका बीही गुया। 6अळतेन थुड़ाक जुवान्या उठीन हनन्या धड़ेक हाकलीन सीवड़ीन पुथल्या मां वेलट्या, ने बाहर ली जाय्न वोगे कर देदा।
7ज हयो, तीनी वातेन बारामां हनन्यान घरवाळी काजे मालुम नी हतलो, तीनेक घंटा हय गुया ने अळतेन ची पतरस हतलु तीना घरमां आवी। 8तत्यार पतरस तीनीक जु सवाल पुछ्यु, “मेसेक बताड़, तुहुंं च खेत अतरात पयस्या मां वेचला काय?” ची जपाप आपी, “हव, अतरात पयस्या मां वेचला।”
9तेरु जपाप सामळीन पतरस तीनी काजे कह्यु, “तुहुंं दुय जणा मालीक भगवानेन चुखली-आत्मा काजे पारखणे करीन एक मन्या हय्न काहा राजी हय गुया सामळु! जे माणसे तारा धेणी काजे अळावीन वगे करने गुयला, चे पछा आवीन झपले उबा हय रया, ने हय चे तुसेक बी वगे करने बाहर ली जासे।” 10जी वात सामळतेत ची पतरसेन पायेम हीट पड़ी, ने मर गुय, ने चे जुवान्या घरमां आवीन तीनीक मरली देख्या, ने चे तीनीक बी ईछीन बाहर ली जाय्न तेरा धेणीन मसाण धड़ेत अळावीन वगे कर देदा। 11तेरेसी आखी मंडळीन माणसे ने जी वात सामळीन बीही गुया।
वारु कामेन सहलाणी ने भाती-भातीन मटा-मटा काम
12ईसुन नेवताळान साहरे बेसका वारु कामेन सहलाणी ने मटा-मटा काम माणसे मां देखाव पाड़्यु, ने आखा ईसुन नेवताळान काम एक मन्या हय्न सुलेमानेन खपड़ी मां भेळा हवतेला। 13बाकुन दीसरा माणसे काजे ईसुन नेवताळान काम पुठ्ये भेसकायणे वारु नी लागतेलो बाकुन चे ईसुन नेवताळान काम काजे चे बेसका वारु छे करीन कवतेला। 14बाकुन ईसु पर भुरसु करन्या बेसका अदमी ने बायरा आवीन मालीक ईसुन मां जादास-जादा अदु हवता गुया। 15जत्यार पतरस जां मायन नीकळीन गुयु ती मांदला माणसे पर पतरसेन साहळु काहना ने काहनाक पर पड़से ने पड़से करीन माणसे, मांदला काजे सयड़क धड़े लावीन खाट्ली पर ने झुळना मां टुपाड़ीन मेल देदला 16ने यरुसलेम सहरेन आड़े-धड़ेन सहर वाळा बी मांदला काजे भुतड़ा आत्मा लागला माणसे काजे लावतेला ने चे आखा वारु हय जातला।
ईसुन नेवताळाक एला पाड़े
17ज आखो देखीन भगवानेन डाहलु पुजारु, ने सदुकी पंथवाळा तेरा आखा सात-संगात वाळा बेसका कुहरायणे बाजी गुया। 18ने चे ईसुन नेवताळान काम काजे धरीन जेल मां कुंडी देदा। 19बाकुन मालीक भगवानेन एक सरग वाळु भगवानेन अघली वात बताड़ने वाळु, जेलेन झपलु उगाड़ देदु, ने चु तीनाक बाहर ली जाय्न कह्यु, 20“जावु, ने मंदीरेम उबा हय्न ईनी नवली जीवाय्न बारामां आखी वात माणसेक सामळावु।” 21ने ईसुन नेवताळान काम सरग वाळा भगवानेन अघली वात बताड़ने वाळान वात सामळीन संदारो हवतात मंदीर मां जाय्न नवली जीवाय्न वात सामळावणे बाजी-गुया।
तत्यार भगवानेन डाहलु पुजारु, ने सदुकी पंथवाळा तेरा आखा सात-संगात वाळा आवीन यहुदी माणसेन बसक ने ईस्रायली जातीन आखा पुडारी काजे भेळा कर्या, ने सीपायड़ाक कय मकल्या की तुहुंं जेल सी ईसुन नेवताळान काम काजे ली आवु। 22बाकुन जत्यार सीपायड़ा चां पुग्या, ती चे ईसुन नेवताळान काम तीनुक जेल मां नी जड़्या। ती चे सीपायड़ा पछा आवीन भगवानेन डाहला पुजारा ने सदुकी पंथवाळा ज कह्या, 23“हामु जाय्न देख्या ती जेलेम वारु छत करीन बंद कर मेकलो हतलो, ने झपले पहरु देण्या झपले पहरु देदा जाय्न उबा हय रवला; बाकुन जत्यार हामु मांही गुया, ती चां सारा काहना नी हतलो।” 24ची वात सामळीन मंदीरेन राखवाळ्या डखी ने भगवानेन डाहला पुजारी फीकुर मां पड़ गुया, ने ची वीच्यार करने बाजी गुया, “हय आपणु काय करजे।” 25तीनेत टेमे काहनुक आवीन तीनुक जी खबर आप्यु, “देख, तीनु माणसे काजे तुहुंं जेल मां कुंडी देदला, चेत माणसे मंदीर मां उबा हय्न माणसेक नवली जीवाय्न बारामां सीकाड़ने बाजी रया।” 26तत्यार मंदीरेन राखवाळ्या सीपायड़ान डखी, आपसा सीपायड़ा काजे लीन गुयु ने ईसुन नेवताळान काम काजे धर लायु। बाकुन माणसे हामुक दगड़ाट देसे, करीन तीनुक जबरान धरीन नी लायु, काहाकी चे माणसेक देखीन बीहतेला।
27चे ईसुन नेवताळान काम काजे लावीन मट्ली बठक अगळ उबा कर देदा; ने भगवानेन डाहलु पुजारु ईसुन नेवताळान काम सी सवाल पुछ्यु, 28“हामु तुहुंं काजे बेसका कयड़ा चेताड़ीन हुकुम आप्ला की ‘तुहुंं ईसुन नाव लीन माणसेक घुण सीकाड़जु?’ तेबी तुहुंं आखा यरुसलेम सहर मां ईसुन नाव लीन सीकाड़ने बाजी गुया, ने ईसुन लुहीन गुनु हामरे मुणका पर पाड़ने हींड रया।”
29पतरस ने ईसुन नेवताळान चु जपाप आप्या, “माणसेन हुकुम सी भगवानेन हुकुम पाळनु बेसको वारु छे। 30तीना ईसु काजे तुहुंं कुरुस पर चड़ावीन खीळा ठुकीन मार नाख्ला, तीना ईसु काजे आपणा डाहा-डाहान भगवान मर्या-सर्याम सी जीवाड़ देदु। 31ईनात ईसु काजे भगवान मालीक ने पापेम सी छुड़ावणे वाळु ठेहरावीन, आपसे जेवड़्ये आन्गे बठाड़ीन मट्लु हक आप देदु, ने चु ईस्रायली जातीन माणसे काजे पापे भीणी सी मन फेरवीन, भगवान भीणी वळनेन ताकत ने पापेन माफी आपे। 32ईनी आखी वातेन गवा हामु छे, ने चुखली-आत्मा बी छे, ने चु चुखली-आत्मा, भगवान तीनु माणसेक आपलु छे, जे भगवानेन हुकुम काजे पाळे।”
33जी वात सामळीन चे बेसका रीसाय गुया, ने ईसुन नेवताळान काम काजे मार नाखणेन वीच्यार कर्या। 34यहुदी माणसेन मट्ली बसक मां गमलीयेल नावेन एक फरीसी माणुस हतलु, चु मुसान साहरे लिखली सास्तुरेन कायदा सीकाड़न्यु मास्तर हतलु, ने तेरी ईज्जत आखा करतेला। चु यहुदी माणसेन बसक उबु हय्न हुकुम आप्यु की “ईनु ईसुन नेवताळाक ईतरीक वार लग बाहर ली जावु।” 35ने अळी चु बसक मायन ईस्रायली माणसेक कह्यु, “ए ईस्रायली जातीन माणसे, तुहुंं ईनु माणसे साते ज काय करने हींड रया, च वारु वीच्यार करीन करजु। 36काहाकी ईनु दाहड़ा सी पेहले थीयुदास नावेन एक माणुस ज कवतु जाय्न उबु हयु, ‘मे काही छे’ ने च्यारेक सोव माणसे तेरे पर भुरसु करीन तेरे पुठ्ये चाल पड़्या, बाकुन तीनाक काहनुक मार नाख्यु; ने दत्रा बी माणसे तेरे पुठ्ये हतला, चे आखा रावण्या-तीवण्या हय्न सर गुया। 37अळतेन माणसेन गिन्तीन टेम आवी, तीने टेमे गलील जीला मां रवण्यु यहुदा उजेंतु हयु। चु ईतराक माणसे काजे तेरे भीणी कर लेदु। बाकुन तीनाक बी काहनुक मार नाख्यु। ने तेरे पर भुरसु करन्या बी रावण्या-तीवण्या हय गुया 38तेरेसी मे तुहुंं काजे कहं की तुहुंं ईनु ईसुन नेवताळान काम सी छेटा रवणु, ने हींद्रा काम मां आड़ा मां देवायु, काहाकी हींद्री युजना ने काम माणसे वगे सी हसे ती ची आपसीत सर जासे। 39बाकुन कदी जी युजना भगवान सुदी सी हसे, ती तुहुंं हीनुक कदी सारी नी सकु; ने तुहुंं भगवानेन वीरुद हय्न तेरे साते लड़ायण्या बी गीणायसु।”
तत्यार चे बसक मायन ईस्रायली माणसे गमलीयेलन वात मान लेदा। 40ने चे, ईसुन नेवताळान काम काजे बुलावणे मकल्या ने जत्यार तीनुक ली आया ती तीनुक ठुक्या; ने तीनुक जु हुकुम आपीन कह्या, “ईसुन नाव लीन कुय साते वात घुण करु।” ने अळतेन तीनुक छुड़ देदा। 41ने ईसुन नेवताळान काम जी वात सामळीन ज कवता जाय्न खुस हय्न मट्ली सभा मां सी जाती रया, “कम सी कम हामरी ईसुन नावे नाव-बद्दी ते हयी।” 42चे दाहड़ीत मंदीर मां, ने घर-घर जाय्न ईसुन वात सामळावता रया, ने ईसुन ची खुस-खबर सामळावता गुया की “ईसुत मसी छे।”
လက္ရွိေရြးခ်ယ္ထားမွု
:
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bhilali Bible ©The Word for the World International and Bhilali Bhasha Samiti, Warvani, (M.P.) 2025.