Tujila 5
5
Yananiya Safeila Ghuala
1Da nie kunyi nierei Yananiya giene. Biereiini Safeila giene. Ghuala ghazhane huidene 2baerse ghulazhi goyadene gouji feiliegha, psedulai shitulai melie jiewo. Enei biereiniye mejiene. 3Beduru kieliewo, "Yananiya, yale chii zhughede Ibilisi duruzhi Shenlinyi piendane? Ghazhane huisan baerni yale goujinie feilieghawo? 4Ghazhane uye huikude ghazhashi chinughun pushonu? Ede huise baerne chi zozhu giezhola? Chi yale intui giezho? Chi kunni ese piendazho. Hudai piendazho." 5Yananiya ene kielienyi chenliedene fura bou, ho sirawo. Chenliesan kunla man hende ayizho. 6Giedun nasuchighan kunla bosi ire, hhei boui goudaghadene qienlie khirei bulawo.
7Ghuran zhuntou daose biereini irewo. Ene shiqinni dou ulie mejiene. 8Beduru hhende asawo, "Chi made kielie, ta ghazha huisan baershi enezighan onu?" "Jiu enezighan wo."
9 Beduru kieliewo, "Ta ghuala yale hhantulazhi Ezhanni ruhherni shiine? Zhanguijii chii bulasan kunla ede wijien konde irewo, chiiye qienlie khighane."
10Ingie hhe bierei deigo Bedurui kon konde fura bou, ho sirawo. Hhe nasuchighan kunla oro ire fuguseini chanladene, qienlie echi zhanguijiini kanzide bulawo. 11Jien jiohuini kunla, pse ene shiqinyi chenliesan kunla man hende ayizho.
Shitula Ghudureqi Xienjighazho
12Ezhan shitulai tungo giezhi bexinlai dunda ghudureqi, fugie shiqin olon giewo. Xianxin giesan kunla Sulumane zoulande heqide man hhantulazho. 13Bexinla man hhelai zanchen giezhoma, kunlase ayizhi hhelare hhantula dazho. 14Ezhanyi xianxin giesan ere kun, biereila yebeiseye olodozho. 15Niezhan kunla da gientulai qienliezhi geidoude khirei chon, ruzi jiere jiezho. Sumulase Beduru yozhi daokude xiujieniliuzhe hhelai jiere kuse giezho. 16Pse Yelusalen zhouwini xianlase olon kunla gientu, zannan ruhher heisanlai uduru ire man goudaghawo.
Shitulai Biizho
17Zui fugie buwa, hhei lienshoulani Sadugai kunla hende dubiliedene 18shitulai barei agi bafanzide khawo. 19Xienidei Ezhanyi qienxien bafanzi wijienyi niezhi hhelai uduru khizhegha kieliewo, 20"Ta mechide echidene ene amin ogiku daolii bexinlade man kielie." 21Ingiese shitula ene kielienyi chenliedene ogheikude mechide echizhi kunlade sughazho. Zui fugie buwa, lienshoularene kuzhedene zui fugie fayenni kun, Isilieni zhanlaolai uruzhi irewo. Kun peizhi bafanzise shitulai lai iregha giezho. 22Mechini sagheisan kunla bafanzide echise kun nieda uwo. Ingie khareizhi ire kieliewo, 23"Bijien echise bafanzi wijien yama ese giezho. Sagheisan kun wijien ghadane wo. Wijienyi niese sudoro kun nieda uwo." 24Mechini sagheisan duizhan, fugie buwa ene kielienyi chenliedene ghanirazhi matugie imutui gholuwo giezho. 25Nie kun iredene kieliewo, "Ta bafanzide bareisan kunla ede mechide beidene bexinlade sughazho." 26Ingie duizhan mechini sagheisan kunlai uduruzhi shitulai barei irewo. Bexinla hhelai tashighala eghikuse ayizhi khidunde ese giezho.
27Hhela shitulai barei ire zui fugie fayen sudoro beigha zui fugie buwa hhelade asazho, 28"Bijien tande hende jingao giezhi ene kunyi niereghala kunlai bu surugha giezhi kieliewo. Ta daoline nie Yelusalende kielie kurughadene dou alasan ene kunni chusunni zhanni bijienyi jiere beilieghane." 29Beduru, pse shitula kieliewo, "Hudai shunjizhi kunyi ulie shunjise indanji wo. 30Mai xienrenni Huda ta mutun jiere guaidene alasan Ersai aminne olughawo. 31Huda hhei undudaghazhi borun miendene khighawo. Hhei honshan, jiuichen danlaghazhi Isilie kunni geizhen gieghazhi zuini mienliene giezho. 32Bijien ene shiqinlade ganzhen beine. Hudai shunjisan kunlade ogisan Shenlinye ganzhen beine."
33Zui fugie fayenni kunla enei chenliedene hende hokuzhi hhelai alane giezho. 34Nie Falisai kunyi niereini Jiamalie giene. Hheshi nie jinwun loushi wo, kunla man hhei zunjine. Zui fugie fayende bosi ire kunlade fenfulazhi shitulai ghadane niecha khireigha giewo. 35Ingie kunlade kieliewo, "Isilie kunla, ta ene kunlai xioxin giezhi chuli gie. 36Eqighandei Duda bosi ire goyane fugie wo giezho. Hhei daghasan kun 400 wine. Hhei alasenu daghasan kunlai man sanda widazhi yama widawo. 37Hhense khuinashi hukou denji giekude Jialilini Yuda bexinlai yela giezhi goyane daghaghawoma, hhe fuguse daghasan kunla man sanda widawo. 38Ede bi tande kielieye, ta ene kunlase gholodo. Hhelai bu gonji. Hhelai jihua, giesanlashi kunse irese widane. 39Hudase iresan enbese ta hhelai widagha dane. Ta kenen Hudare duitou gholune."
Zui fugie fayenni kunla hhei kieliei shunjidene 40shitulai uru ire idun eghidene Ersai niereghala bu kielie gie andaghawo. 41Shitula Ersai nierede oluzhi jiuren giese pei shidane giezhi hende bayasudene zui fugie fayense likai giewo.
42Hhela niudunie mechide, go gielade ese beidene Ersashi Mexiha wo giezhi kunlade sughazhi gouxioxini chonjizho.
လက္ရွိေရြးခ်ယ္ထားမွု
Tujila 5: sce
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020-2024 River Street Publishing.