Johani 18
18
Yesu aa kwatiwa
(Mat 26.47-56; Mar 14.43-50; Luk 22.47-53)
1Yesu ou a manine ku amba eyi, wa thzire nerongwa yenthzi mu thsambwadiya thzo muronga wa Kedironi. Oko kwekarire dikanda, Yesu nerongwa yenthzi a kengeninemo.
2Uno honi Judasi oyu wa mu ombire, naye wa dimukire ethzo ndau, pakuninga ci Yesu shime aa ka ciwanenangako nerongwa yenthzi rorungi. 3Judasi ngou a thzire oko ku dikanda o ku na tangerera thsipani thso mashwarare nakwakunyunga Tembere awa tundire kwakuru o mapurisita nAfarithsi. A shimbire tumbarambara, mataci nerwithsa.
4Yesu ko ku dimuka yoihe eyi nga ya tendaharire ku kwenthzi, wa wa shambawerire no ku wepura ci: “Edye oyu mu fota?”
5A mu tawire ci: “Yesu wa Nazareta.” Yesu wa wa tawire ci: “Yame.” Judasi oyu wa mu ombire wemanineno. 6Yesu ou a wa amberire ci: “Yame,” a hukire thsirerenyima no ku wera pashi. 7Wa wepurire karo ci: “Edye oyu mu fota?”
A ambire ci: “Yesu wa Nazareta.”
8Yesu wa wa tawire ci: “Ni na mi tongwera ci: ‘Yame.’ Uno honi ngeci yame oyu mu fota, mu thsie awa a thze.” 9Eyi shime ya tendaharire ci i citombore neyi a ambire ci: “Kowa no ni pa kwithsa shaanga yofoci oyu naa yongo.”
10Simoni Peturu wekarire no mwere. Ngou a u shwamunine no ku teta ditwi dyo ku rudyo dya mupika mupurisita shokuru. Dithzina dyoyo mupika po nedi Maliko. 11Yesu wa amberire Peturu ci: “O shwameke mwere woe mu ndaro thzao. Ene ka ni roerire ku nwa mu nganja thzo makando ethzi naa ni pa Tata?”
Yesu aa twariwa kwa mupurisita shokuru
12Mashwarare no muendithsi wo nakwakunyunga no tupathso to Majuda ngou a kwatire Yesu no ku mwanga. 13A tangire ku mu twara kwa Anasi, hemwenya Kayafa, oyu wekarire mupurisita shokuru oo mwaka. 14Kayafa yodiyo wa thsiururire Majuda ci ku di nawa ci munu yofoci a fere anu.
Peturu aa hamura Yesu
(Mat 26.69-70; Mar 14.66-68; Luk 22.55-57)
15Simoni Peturu no thsirongwa thsimweya a shupwerire Yesu. Pakuninga ci thsiya thsirongwa thsimweya thsa dimukiwire kwa mupurisita shokuru, thsengenine na Yesu mu dirapa dya mupurisita shokuru. 16Peturu aye wa thsiarire pa thsero thzo dirapa, unone thsiya thsirongwa thsimweya thsiya thsa dimukiwire kwa mupurisita shokuru thsa punine pora. Thsa ambire noya mbuyamaana wa nyungire pa thsero, ngou engenithsire Peturu. 17Oya mbuyamaana wa nyungire pa thsero wa amberire Peturu ci: “Ene kadi nowe o thsirongwa thsoyu munu?”
Wa ambire ci: “Dyombo, kadi no thsirongwa thsenthzi.”
18Angamba nakwakunyunga a fakarire mudiro o pa makara pakuninga ci shime kwomborire nene, emanine no ku u paka mu kaci o kwa yota. Peturu wemanineno naye o ku yota mudiro.
Mupurisita shokuru aepura Yesu
(Mat 26.59-66; Mar 14.55-64; Luk 22.66-71)
19Mupurisita shokuru ngou epurire Yesu keyi yerongwa yenthzi nerongithsa yenthzi. 20Yesu wa tawire ci: “Na ni rongithsa kaye thsitonwameho. Shime na ni rongithsanga thsikati thsothsihe mu masinagoge no mu Tembere omu a na ciwanenanga Majuda wahe. Kwithsa eyi na ni amba ku mukunda. 21Ine eyi o ni pwera? O wipure awa na yuvu eyi na ni wa ambera, a na dimuka eyi na ni amba.”
22Yesu ou a ambire eyi, yumweya kwakwakunyunga oyu wemanine po pepi wa mu furire mbanda mu rupara no ku amba ci: “Ene dyo na roera ku tawa mupurisita shokuru kengeyo?”
23Yesu wa tawire ci: “Ngeci eyi ni na amba po kwipithsa, o pe ombangi weyi i nepa. Uno honi ngeci ni na amba nawa ne, ine honi eyi o ni furera?”
24Anasi ngou a tumithsire Yesu kwa Kayafa mupurisita shokuru o ku nangiwa.
Peturu aa hamura Yesu karo
(Mat 26.71-75; Mar 14.69-72; Luk 22.58-62)
25Simoni Peturu wemanine apo o ku yota mudiro. A mwipurire ci: “Ene kadi nowe o thsirongwa thsoyu munu?” Peturu wa hamurire, wa ambire ci: “Dyombo, kadi no thsirongwa thsenthzi.”
26Yumweya wangamba mupurisita shokuru, mwapa oya mukwerume a tetire ditwi Peturu, wa ambire ci: “Kadi shime naa ka ku mona o ku di nenthzi mu dikanda, nji kadi kengeyo?” 27Uno honi Peturu wa hamurire karo, popo ñombwe weyire.
Yesu pa meho a Pilatu
(Mat 27.1-2,11-14; Mar 15.1-5; Luk 23.1-5)
28Ngou a tundithsire Yesu mu nthzio thza Kayafa no ku mu twara ku marombe a Pilatu. Nedi mathsikuthsiku. Majuda a kanine kwingena mu marombe, inene eyo nga ya wa thsirekire, karo nga ka tawethziwire ku dya Paseka. 29Pilatu ngou a punenine kukwo. Wa wepurire ci: “Ene murandu mwine ou mu thzekithsera oyu munu?”
30A mu tawire ci: “Nga kwithsa ethsi a nepithsa nga ka tu mu retire ku koe.” 31Pilatu wa wa amberire ci: “Mu mu shimbe yoyamwe mu mu rature kokuthza ko murao wenu.”
Majuda a mu amberire ci: “Atwe ka tu tawethziwire kwipaa munu.” 32Eyi ya tendaharire ci i citombore no maywi a Yesu o ku monithsa mushovo o kufa oku a fire.
33Pilatu ngou a hukire mu marombe enthzi no kwithsa Yesu. Wa mwipurire ci: “Ene yowe o Fumu o Majuda nji?” 34Yesu wa tawire ci: “Ene ethzi ngudi ne thzoe nji, nji kwa di awa a na ku tongwera keyi yange?”
35Pilatu wa tawire ci: “Ene waa anekera ci no Mujuda? Anuoe nakuru o mapurisita wodiyo a na ku reta ku kwange. Ine eyi o na kwama?”
36Yesu wa tawire ci: “Kutumina kwange kadi ko kano kaye. Kutumina kwange nga ko kano kaye, anduthziange nga a na ni rwera ci na piwa ku Majuda. Uno honi, kutumina kwange kadi ko kano kaye.”
37Pilatu wa mwipurire ci: “Apo honi ne o fumu nji?” Yesu wa tawire ci: “O na amba, no fumu. Eyo yodiyo nerekiwerire no ku keya mu kaye ku na pa ombangi keyi yoshemwa. Munu yomuhe oyu di noshemwa aa teerera diywi dyange.”
Anu aa romba ku wa punithsera Barabasi
(Mat 27.15-31; Mar 15.6-20; Luk 23.13-25)
38Pilatu wa mwipurire ci: “Oshemwa ne ine?” Munyima thzo ku amba eyi, wa hukire pora ku Majuda ku ka wa ambera ci: “Ka ni mu wanenine murandu. 39Unone ko thsithsemwa thsenu naa roera ku mi rukurwera thsinthzinda thsofoci pa Paseka. Ene mwaa fota ci ni mi rukurwere Fumu o Majuda?”
40A yoomokire ci: “Dyombo! Kadi oyo, twaa fota Barabasi!” Uno honi Barabasi aye nedi thsikeremi.
လက္ရွိေရြးခ်ယ္ထားမွု
Johani 18: mho
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©2023 The Seed Company