Johani 17
17
Yesu aa ciromberera
1Yesu ou a manine ku amba eyo wa diamenine ku wiru no ku amba ci: “Tata, thsikati thsi na kumu. O pe kutethzima Mwanoe ci naye Mwanoe a ku pe kutethzima. 2Inene no mu pa okoro peuru thzanu wahe ci a pe mwoyo o diyere anu wahe awa no mu pa. 3Honi ou po o mwoyo o diyere, ci a ku dimuke, owe o Nyambi yofoci o shemwa, no ku dimuka Yesu Krisitu oyu no tumu. 4Na ni reta ci o piwe kutethzima mu kaye, ko ku mana ekwama eyi no ni pa ci ni i kwame. 5Pano honi, Tata, o ni pe kutethzima pa meho oe kuya nekarire nako noe kaye o ku ka shime kumbiwa.
Yesu aa romberera erongwa yenthzi
6“Na ni ku hokora kwanu awa no ni pa kwanu o muno mu kaye. Ekarire anuoe. No wa ni pa, karo na hengeka diywi dyoe. 7Pano honi aa dimuka ci eyi no ni pa yoihe yaa tunda ku koe. 8Inene na ni wa pa maywi aa no ni pa, karo naa tambura. Na dimuka yoshemwa ci ku koe na ni tundu no ku tawa ci yowe no ni tumu.
9“Naa wa romberera. Ka ni rombererire kaye, unone naa romberera awa no ni pa, inene oe. 10Anuange wahe anuoe nowe, karo anuoe name anuange, karo naa piwa kutethzima mu mwo. 11Pano ka ni di honi mu kaye, unone awo shimbi ekarera mu kaye, karo ame naa keya ku koe. Tata o Mukenu, o wa nyunge kokoro o dithzina dyoe, dithzina edi no ni pa ci ekare thsofoci, eci edi tu di atwe thsofoci. 12Ou na nikarano na ni wa nyungu kokoro o dithzina dyoe edi no ni pa. Na ni wa mamera, kwithsa shaanga yofoci kukwo oyu na a yongo, shime yofoci oyu na roera ku nongithsiwa, ci Mañoro a citombore.
13“Uno honi naa keya ku koe, karo naa amba eyi enu uno ni shime mu kaye, ci a yare thsinyanyu thsange mu micima thzo. 14Na ni wa pa diywi dyoe, karo anu o kaye aa wa thzimba, inene awo kadi cingwa o kano kaye eci edi ni di ame ci kadi no mukwa kano kaye. 15Ka ni rombire ci o wa tundithse mu kaye, unone naa romba ci o wa nyunge koyu o Mumango. 16Kadi akwa kaye eci edi ni di ame ci kadi no mukwa kaye. 17O wa kenithse koshemwa. Diywi dyoe po oshemwa. 18Eci edi wa ni tumine mu kaye, name ni na wa tumu mu kaye. 19Karo mukaciko, naa cipa nothsinda kwikara thsiyambero thsothsikenu ci a kenithsiwe mushemwa.
Yesu aa romberera akwakutawa wahe
20“Ka ni rombererire awa pohuma, unone naa romberera nowa a ku tawa ku kwange mukaci kombangi wo. 21Tata, naa rombera ethsi ci nga wahe ekare thsofoci, eci dyodi o di mu mwange name mu moe. Nawo ekare mu mwetu, ci kaye nga ka tawe ci yowe no ni tumu.
22“Na ni wa pa kuya kutethzima no ni pa ci nawo ekare thsofoci eci edi tu di natwe thsofoci. 23Ame nikare mu mwo, nowe o wikare mu mwange, ci nga a cikwate pofoci ko kuyara, ci kaye ka ku dimuke ci yowe no ni tumu no ku dimuka ci o mukwa ku wa shima eci dyodi wa ni shima. 24Tata, naa romba ci awo no ni pa a kwikare nange oku ni di, ci a mone kutethzima kwange oku no ni pa, inene wa ni shimine no kaye o ku ka shime kumbiwa.
25“Tata o Muwawa, shaanga ci kaye ka ka ku dimuka, ame ni na ku dimuka, nowa nawo a na dimuka ci yowe no ni tumu. 26Na ni ku hokora kukwo, karo kenge na ku twara ku rupara ku tenda kengeyo, ci thsishimo thsoe ku kwange thsikare mu mwo, name nikare mu mwo.”
လက္ရွိေရြးခ်ယ္ထားမွု
Johani 17: mho
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©2023 The Seed Company