Lukas 3
3
Yohanesti Allah yubu ambatto nimi maghag pelengelamsiogha
(Matius 3:1-12; Markus 1:1-8; Yohanes 1:19-28)
1Roma nimi sembe yubu sia lenne Kaisar si Tiberius ponekori saelba ulamsiog. Hengkun naual tarabare saelbamsiogpa, el umag yubu eptopne gubernur nimi nubunge Yudea so'o saelbamogne Pontius Pilatus poneko wamog. Wamogpa Kaisar Tiberius umagnang Herodesti Galilea so'oag nimi sembe yubu sia lero saelba ulamsiogpa, Herodes elkae Filipusna Iturea so'oag nimiap, Trakhonitis so'oag nimiap sembe yubu sia lero saelba ulamsiog. Kaisar umagne Lisaniasna Abilene so'oag nimi sembe yubu sia lero saelba ulamsiog. 2Memnang Allah sembe palirop nang sikini yabo nubunang Hanasap, elyamal Kayafasap wamdek ko'o hengkun enekoag agha, Yohanes Zakharia elme pai aldesag wamogpa, Allahri yubu lero Yohanesag ambarog. 3Ane sembe Yohanes mag Yordan sip nimi ni wamekne Allahri yubu eneko ambatto tongolamsiog. Yohanes ponekori yubu ambarelamsiogti, “A'undi mali-malia wanaag seneragto ulamlomne lipsimunba, maghag pelengkipsinun. Maghag pelengkipsineba, a'undi mali-malia ulamlomne Allahri tam wailag nembalul,” aro ambarelamsiogti, maghag pelengelamsiog.
4Samenag Allah yubu silimu tiptopne Yesaya ponekori mome toro pibogpa, nimiri wa'amogto pibek. Allahri samenag Yohanes sembe lebogne Yesaya poneko el taogti, nen tipto mome tobog nena,
“Pognenge poneko pai aldesag pileri,
yubu haum aro nimi yoplamsileri,
‘Nu Saelba Uhiropne yanepne sembe ina yarelamlulom.
El yanep ina porog nenelamlulom.
5Whaboghag nikniro sameplapmundi,
yim wamlengeap main wamlengeap sopto sameplamlulom.
Ina ingkis webel pirobag porog nenelapmundi,
ina kuruktobag khopto sameplamlulom.
6Nimi mog so'oag nimi niri Allahri nimi wali talulamsilne ibukang,’ selul,”
aro Yesaya ponekori Allah yubu mome toro pibog.#Yesaya 40:3-5
7Nimi maikno, “Nu maghag pelengkipsilul,” aro Yohanes yaghag yalamek. Yohanesti sinag yubu ambarelamsiogti, “A'un yo urop nimi wamlomne nimi ohirop paghae mangaroba saog wamlom! Nimi etneri a'unag wenehiro, ‘Allahri a'unag wana yori opsileag aro elemag pululom,’ aro wembahioba yalom? 8A'un el uro wamsut! Wene Allahri kirik tane wamlange ane babe Abrahamdi mangaro likto piroba nembahinep!#Yesaya 51:1-2 Ane sembe a'undi wanaag alniro, ‘Nunisang Abrahamdi mangaroba mangkahiekne, hae wali wamap,’ aro seneraghal dalamseng kom. A'undi wanaag malinge seneragto ulamlomne lipsimundi, Allahri senenne saelba ulamlulom. Undo saelba ulapmundi, kal wana walinge maurop kal saog uro Allahri seneropne sunsunum uro ulamlulom. 9Kal nhon wana walinge maurop kom kal ni khaepto aukag tobogto tamnepneog wamla. Yae kal khaepto yarengap telbaneba wene babe weroba wamla,” aro Yohanesti ambarelamsiog.
10Wene aro ambatsiogpa, nimi tanekori, “Undop agha nuri huroba hulamukap?” aro haibaek.
11Wene aro haibaekpa Yohanestina, “Nimi nhondinge nimi nongag enektop ag phende wamsile tanena, nhon nenekona saeagha orog nimiag tarelamlulom. Nimi etneringe tenaba wamla tanena, kwaneng orog nimi sembe pogto tarelamlulom,” aro ambatsiog.
12Roma nimi sembe kamna poloro torop nang babe Yohanes yaghag yalamek. Sin nimi taneko babe, “Yohanesti maghag pelengkipsilul,” aro yalamekti hailamekti, “Nai, yubu amohiropne, nuri hulamukap?” aro Yohanes hailamek.
13Wene aro haibaekpa, Yohanesti sinag samoro, “Ot a'uni yabori a'unag aruklamsiikti, ‘Kamna nun umag nimiri saeagha toro tongolamsululom,’ alamikne sunsunum uro nimiag tipto, ‘Tatne,’ aro aruklamsululom. Nen phiro paliag nembi agha, ‘Tatne,’ aro nimiag aruklamsiseng kom,” aro Yohanesti ambarelamsiog.
14Yin salerop nang tanekori babe Yohanesag yingkina hailamekti, “Nuna welaro? Nurina sa'a ulamukap?” aro haibaek.
Wene aro haibaekpa, Yohanesti yin salerop nang tanekoag, “A'undi nimiag wero log nenero sikindinge aba taluro topsiseng kom. Apna, ‘Nimiringe nanag taho,’ aro minirop yubu loloro nonoghaheng kom. Aghana a'undi nimi yeplapmunne sembe kamna tatsilenge tobi agha a'undi, ‘Na saeag wamlange sunsunum,’ senelamlulom,” aro ambarog.
15Wene aro sop-sop ambarelamsiog abeneko pere, nimi tanekori hairo lel dalamekti, “Kristus yalul alamekne poneko nang-nangaro wamap nena, Yohanes pone yanepne sembe lelamek to, kom to?” aro wanaag hairo lel dalamek.
16Wene alamekne sembe Yohanesti nimi niag samoro ambarelamsiogti, “Nari mag aneag agha a'un maghag pelengelamsin aghana, amik nimi nubunge nhon, nanap sunum komne yalul. El mikip sirikne yaleba, na nimi ologne wamnangeri eldi yan wangana haing lopnepne babe nanap sunurop kom. El nubunge yalulne ponekori Allah Eldamne Yame Walingeap auk poghap a'unag pelengkatsilul.#Pogsiog Nang 2:3-4 17Eldi saeag wamlangena, ‘Wana walinge aghabog polop taleba tomnun,’ aro kelopto weptop kal salelamlari, werobag aneko awe tolamlul. Wana walinge kwaneng roti wana gandum eldi palirop aeag tobongkiplul aghana, kwaneng roti a'esekange ni sarangkanep kom auk enekoag taplul,” aro ambatsiog. 18Yohanesti Allah yubu walinge ambarelamsiogti, yubu nhon saog, nhon saog yubuag agha yubu walingeag agha yubu yangaro olnoro ambarelamsiog.
19Wene aro ambarelamsiog aghana, Yohanes ponekori Herodes yubu sia lenne Galilea mog so'o saelbamogne ponekoag babe, “Malia uaom,” aro wembaog. “Malia uaom,” seog nena Herodes ponekori elkaeri toamog kel Herodias kel eneko, Herodesti pelepto tobog. Herodias kel eneko tobogneap, yoaba yogne maikno ulamogneap, ni taneko sembe Yohanesti Herodesag, “Malia ulamlam,” aro wembaog. 20Wembaog aghana, Herodesti yonge nhon nen ma'aro ulamogti, Yohanes salero sae kaupto kop aeag tobongkibog.
Yohanesti Yesus maghag pelengkaogha
(Matius 3:13-17; Markus 1:9-11; Yohanes 1:32-34)
21Herodesti Yohanes anam sae kaupto saelban komag, Yohanes ponekori nimi ni maikno taneko maghag pelengelamsiogti, Yesus babe maghag pelengkaog. Pelengkaogpa Yesusti Allahag molona molbaoghag agha im phoro, 22Allah Eldamne Yame Walinge winang yalma nong saog taogti, Yesus nong alibag kulukul aog. El alibag kuluklamog abeneko imag agha yubu nhon lelamogti, “Anna Name nari o'ona senero angkenne, na wana awi nenelamnelam,” al toghog.
Yesus ilisang yabori mangarobari likto piogha
(Matius 1:1-17)
23Yesus nimi whingag alnibaog nena, el mangkaogha hengkun taibuka taubuka teng nhon epto wilindi saog uro yabiogpa, alniro nimi whingag Allah yubu ambarelamsiog. Yesus mangaro yabiogne sembe nimiri seneraglamek nena, Yesus ili Yusup aro seneraglamek.
Yusup ili Eli, 24Eli ili Matat,
Matat ili Lewi, Lewi ili Malkhi,
Malkhi ili Yanai, Yanai ili Yusup,
25Yusup ili Matica, Matica ili Amos,
Amos ili Nahum, Nahum ili Hesli,
Hesli ili Nagai, 26Nagai ili Maat,
Maat ili Matica, Matica ili Simei,
Simei ili Yosekh, Yosekh ili Yoda,
27Yoda ili Yohanan, Yohanan ili Resa,
Resa ili Zerubabel, Zerubabel ili Sealtiel,
Sealtiel ili Neri, 28Neri ili Malkhi,
Malkhi ili Adi, Adi ili Kosam,
Kosam ili Elmadam, Elmadam ili Er,
29Er ili Yesua, Yesua ili Elieser,
Elieser ili Yorim, Yorim ili Matat,
Matat ili Lewi, 30Lewi ili Simeon,
Simeon ili Yehuda, Yehuda ili Yusup,
Yusup ili Yonam, Yonam ili Elyakim,
31Elyakim ili Melea, Melea ili Mina,
Mina ili Matata, Matata ili Natan,
Natan ili Daud, 32Daud ili Isai,
Isai ili Obed, Obed ili Boas,
Boas ili Salmon, Salmon ili Nahason,
33Nahason ili Aminadab, Aminadab ili Admin,
Admin ili Arni, Arni ili Hezron,
Hezron ili Peres, Peres ili Yehuda,
34Yehuda ili Yakub, Yakub ili Ishak,
Ishak ili Abraham, Abraham ili Terah,
Terah ili Nahor. 35Nahor ili Serug,
Serug ili Rehu, Rehu ili Peleg,
Peleg ili Eber, Eber ili Salmon,
36Salmon ili Kenan, Kenan ili Arpakhsad,
Arpakhsad ili Sem, Sem ili Nuh,
Nuh ili Lamekh, 37Lamekh ili Metusalah,
Metusalah ili Henokh, Henokh ili Yared,
Yared ili Mahalaleel, Mahalaleel ili Kenan.
38Kenan ili Enos, Enos ili Set,
Set ili Adam,
Adam ili Allah.
လက္ရွိေရြးခ်ယ္ထားမွု
Lukas 3: kklKOS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023 (Active), Wycliffe Bible Translators, Inc. All rights reserved.