1 Korintus 11
11
1Nari undo Kristusag nelepto ul palamna saog uro a'undi babe nanag nelepto ulamlulom.
Allah omekto winip tangtobag ulamnepne sembe
2Nari samenag a'un yubu ambarelamsisinge wali ka'elamlum. Wene babe nari ambatsirop yubu ni ekon tan koma salero ul palamlomne sembe, “Wali ulamlom,” aro kiplamsin. 3Aghana, “Allah yubu lero winip tangtobag ulamapne sembe el talulom,” aro wene ambatnuahin. Nengabo ni sembe Kristus poneko usog wamla. Apna kelabo ni sembe nengabo usog wamla. Tanena Kristus poneko sembe Allah usog wamla. 4Nengabo etneri el usog kalup tangka nimi whingag Allahag mololamna to, Allah yubu silimu tipto lelamna to tanena, el usog Kristus poneko paliag nemban koma umag nenerop. 5-6Apna kelabo etneri el usog kalup tan koma nimi whingag Allahag molorop to, Allah yubu silimu tipto lerop to tanena, el usog ela'ange poneko paliag nemban koma umag nenerop. Kelabo nhon usog hong kereptangtop to, usog hong kareptangtop tanena, kel eneko eldangkel ali nenep tanep. Undop pagha tanena, kel enekori usog kalup tanep. Nimi whingag kelabo usog kalup tangtop kom kelna, usog hong kereptangtop saog urop kel wamla ane sembe, usog kalup tangtop kom tanena, usog hong kereptangtop kel wamle.#11:5-6 Yunani nimiap Roma nimiapti ul palamekne sunsunum uro, kelabo usog hong laplolamekpa, wea siriklamsiog. Nengabori kelabo tolamsiekpa, kelabori ag sisa nhon agha usog kalulamek. Nengabori torop kel nhondi usog kalurop kom tanena, kel enekori ela'ange teba'en aro eldangkel paliag nenep tangtopba, ela'angeri kel eneko laplobi agha limnep. Yunani nimiap Roma nimiap sembe kelabo usog kalup tangtop kom tanena, nengabori kel eneko kembi agha, “Nengabori torop komdi, kel eneko saelbanun,” sembanep. 7-9Ane sembe nengabori nimi whingag lelamna tanena, nimi enekona usog kalup tan koma yubu lemnep. Allahri nengabo sam sunulamogti, “Na nong yameap seneragnaap sunsunum uro nimi sumbanun,” seogti sumbaogpa, nengabo ponekori el sumbaogne Allah paliag nembanepneog wamla. Aghana kelabo anekona, nengaboag agha tobogti, kelabo sumbaogpa, nengabo yepto paliag nembanepne wamla. Nengabo sumbaog nena, “Kelabo yeplul,” aro kelabo lagto tobogneag agha nengabo sumbaog kom aghana, “Nengabo yeplul,” aro nengabo lagto tobogneag agha kelabo sumbaog. 10Ane sembe imagnang malaikat Allah whingag sindam nimi kalup tangto wamang saog uro,#Yesaya 6:2 kelabo babe yubu lenne ka'ebanepneog wamangne sembe sindam nimi usog kalup taheng. 11Undop aghana, nu Saelba Uhiropneap ma'ap tangkamap tanena, nengabo kelabo a'eptangkom agha nhon mo wamnep kom. 12A'eptangkom agha nhon mo wamnep kom sen nena, Allahri nengaboag agha tobogti, kelabo sumbaog saog uro, nengabo ot kelabori mangaropne pere agha wamnep. Aghana ni Allahri saeag agha wamla.
13A'undam nimi sembe seneraglapmundi, tam karebalulom. A'undi seneraglapmunneag agha, “Kelabori usog kalup tan koma nimi whingag Allahag molorop tanena, sunsunum to kom to,” aro seneraglamlom? 14Nimiri sop-sop ul piropne kembiag agha nu el tanep. Nengabo usog hong we uro laplorop tanena, ali nenep tangtop. 15Aghana kelabo sembe Allahri usog hong we uro wamnepne kelaboag tatsiog andarina, kelabo usog kalup tanep. Kelabo usog hong we uro pongorop tanena, nimiri kel eneko sembe kemerop kel sembanep. 16Nimi nhondi tam nene sembe, “Undo seneraglamna kom,” sembanep aghana, nuri ul palamapne babe, Allahri weplamsilba, winil dalamang nimiri ul palamangne babe ot nari lemnange sunsunum uro ul palamap. Orange ul pirop kom.
Yesus tebaogne seneragto kwaneng rotiap maghap telamnepne sembe ambatsiogha
17Nen tipto tam nhon sembe a'unag yubu ambatnuahin nena, “Walinge ulamlom,” aro omekahinep komdi lemnuan. A'un nikag winil dalamlomdi, nimi wali yepsinepne ulamsom aghana, olog malinge ulamlomne sembe lemnuan. 18Alnirobagna, nimiri ambarelamneang yubu ka'elamnaba, a'un winil dalamlomdi, a'un mamun waptangto a'el dalamlomne sembe nimiri yubu ambarelamneangba ka'elamna. A'un waptangto a'el dalamlomne sembe ka'elamna yubu enekona, “Sik to kom to,” aro wana phende nenelamnel aghana, “Sikne lelamang tiog,” aro seneraglamna. 19Yo sik, na el wamnangena, a'undi seneragnaag a'ero-a'ero seneragnepneog wamla andarina, a'un mibi agha, “Nimi etne agha sik nimi wamang,” aro el tangtopne lag tahilul. 20-21Undo wamnep aghana, a'un mamun a'eptangto ulamlomne sembe ka'elamnoba a'un, “Kwaneng nhon tukap,” aro winil dalamlomag agha, a'un nimi niri, “Na sam tel pineba, orangeri amik kwaneng tukang,” aropne agha ulamlom. Nimi nhon kwaneng yo wamnepba, orangeri mag yonge aboap sembe teropneag agha nenek salerop nimi saog tanep. Ane sembe nu Saelba Uhiropne ponekori samenag, “Undo nanag seneraglapmundi, kwaneng pogto telamlulom,” aro aruksiropne sunsunum uro telamlom kom. 22A'un kwaneng yo, mag yo uahinba, a'undi ae lomag kwaneng mag tenep kom te? Saeagha orog nimi sembe ali nenelamsilomdi, Allahri kelmabo me winip tangtop nimi sembe teba'en nenelamsiloa saog uro ulamlom. Undo unulamlomne sembe nari a'un omekahinep senelamlom te? Undo unulamlomne agha nari a'un omekahinun kom.
23Nari a'un omekahinep komne tam nene sembe. Nu Saelba Uhiropne ponekori yubu nanag ambatneogpa, a'unag babe tipto ambarelamsino. Yubu tipto ambarelamsino yubuna undo. Nu Saelba Uhiropne Yesus pan khelamog sum eneko ae imbaogpa, kwaneng roti tobogti, 24“Wali tatsilam,” aro Yesusti Allah kibogti, roti khebaog. Kwaneng roti kheplamogti, “Nari nong ane a'un sembe tarelamsin. Wene kwaneng roti telamap saog uro a'undi amik telapmun sum babe na sembe ekon tan koma seneraglamnumundi ulamlulom,” aro ambatsiog.#Matius 26:26; Markus 14:22; Lukas 22:19 25Kwaneng roti tatsiogpa teekpa, roti tatsiogne saog uro mag anggur lolterop mag ma'i babe tobogti ambarelamsiogti, “Mag anggur lolterop mag ma'i ane nari enengag agha Allahap wendog yubu nikne kaupnepne sembe a'unag tarelamsin. Mag ene amik telapmun sum babe na sembe ekon tan koma seneraglamnumundi telamlulom,” aro ambatsiog.#Matius 26:27-28; Markus 14:23-24; Lukas 22:20 26“Seneraglamnumundi telamlulom,” seogne sunsunum uro kwaneng eneap mag eneap telamlomne pere agha nu Saelba Uhiropne poneko tebaogne lag nenero ambarelamsilom. El tebaogne lag nenero ambarelamsilomne neneko el anam samoro yan komag tipto seneragto telamsut.
27Nu Saelba Uhiropne ponekori, “Undo nanag seneragto kwanengap maghap telamlulom,” seog ane sembe, nimi etneri kwaneng ene to, mag ene to elag wali uro seneragna koma salik-malik terop tanena, nu Saelba Uhiropne nongap eneng lambaogneap teba'en senero malia urop. 28Anam ten komag nimi nhon eldamne wanaag kemel dalamleri, “Sikne ulamna to, kom to?” aro mipna miptale taneogna, kwaneng roti kheptobaap maghap telamlul. 29Undo mipna miptangto telamlulom nena tam nene sembe. Nimi etneri kwaneng rotiap maghap tero, “Nu Saelba Uhiropneri nong seneragto telamap,” aro seneragna koma terop tanena, kwaneng rotiap maghap teropne pere agha eldamneag tam paip tangtop. 30A'undi seneragna koma telamlom ina agha a'un nimi maikno nong pesa talamlomdi, naikna naiklamlom. A'un nimi yogne babe olog maikno teplamong. 31Aghana nundam nimi wali uro kemel dalamseberi, “Sikne ulamna to, kom to,” aro tam karepna agha sikne ulamsebe tanena, Allahri nunag tam pipsiso kom. 32Aghana nu Saelba Uhiropne ponekori nu sembe tam kemero karebarelamsilne pere agha nu el nenero wenelamsil. Nu el nenero wenelamsil andarina, amik tam kemero karebatsileri, tam paliro opsinep sum eneko mog so'oag urop nimiap nhon ma'aro nu opsilul kom.
33Ane sembe, nangkabo, nu Saelba Uhiropneag seneragto, “Kwaneng nhon tukap,” aro winil dalapmundi, a'un mamun ora nimi tiro kwaneng nhon nikag telamlulom. 34“Tam a'unag pelengkatsileag,” aro wembanuahin. Wenelamsin nena, a'un nikag winip tangtop sum eneko taleba, nimi nhon kwaneng yo ulamleba, eldi aeag sam kwaneng telamle andarina, a'un winip tangtobag aneko salik-malik uro aboap sembe kwaneng telamlul kom. Amik a'unag yaneri, yogne babe nen tipto o'obahineri, yubu ambatsinun.
လက္ရွိေရြးခ်ယ္ထားမွု
1 Korintus 11: kklKOS
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023 (Active), Wycliffe Bible Translators, Inc. All rights reserved.