रोमी 9
9
को़न्ज्योक्की मीस्सीर् दम्बे दम्लु १-२९
1-2यहुदी ज्यी़क्की ङे फम पी़न् घयेक्की ढीक्ल ङ छीगङ् दो़न्दो़त् ॱसीम्ब दुक्प धङ् ॱसीम्डा युङ्गुक्। हीगो खुङ्देन् हीन्। ङ ख्रीष्ट्तङ् मत् ढेब यो़क्केन् झ्यीनी ॱएलम मीत् ज्यक्। हीगो खुङ् हीम्बल धम्बे थुगी तो़न्न, सङ् ङेन् च्यो़त् ॱस्यीगेन् ङे ॱसीम्गी धक्पर् झ्यीक्केन् बेत्। 3ङीक्की ज्यी़त् हुबल फेङ्गो़त्न, बोर ङरङ्ल को़न्ज्योक्की ॱमो़त्मु सुक्न ख्रीष्ट्तङ् या ढेन अक्, घल ढेन ढे ॱनो़ब दुक्। 4हुब इस्राएली बेत्। हुब को़न्ज्योक्की रोरङ्गी भीज हीम्बल दम्न खोङ्गी तो़त्वङ्गी फक् ॱनङ बेत्। हुबदङ् कगो़त् धम्स्यक् गज्येन् स्यक्प बेत्। हुबल छ्यो़डीम् ॱनङ बेत्। हुबल छ्यक् छ्यो़प्प पुबे लेमु धङ् छ्यो़त्तुम्गी केच्च्य गज्येन् ॱनङ बेत्। 5हुबल पुबु छ्यीम्मु छ्यीम्मु गज्येन् यो़क्केन् बेत्। ॱनी को़न्ज्योक्की को़बे च्यप्को़न् ख्रीष्ट् इक् कोलीमील हुबे ज्यी़त्ल कीन युङ बेत्। छङ्म थम्ज्येक्की थोक्ल ॱवङ् डोगेङ्गी को़न्ज्योक्ल धी़ ज्यी़न्दु तो़प्प युङ् युङ युङ्ज्ये यो़प्प स्योक्च्यीत्। आमेन्।
6को़न्ज्योक्की ॱनङे छ्यो़त्तुम्गी केच्च्य हुगो मत् युङ मेम्बेत्। घन्ड हीन् सीन्न इस्राएल्ल छ्येप्पे ज्यी़त् घयेत् कुरीक् इस्राएली ॱङो़न्ने मेम्बेत्। 7अब्राहाम्ल छ्येप्पे ज्यी़त् घयेत् एत् कुरीक् खोङ्गी भीज ॱङो़न्ने हीम्बल मीत् डोगेन् बेत्। हीगी ढीक्ल को़न्ज्योक्की अब्राहाम्ल
इसहाक् च्यानी छ्येप्पे ज्यी़त् घयेत् दीरङ् रङ्गी भीज ॱङो़म हीम्बल युङ्गेन् बेत् सीन्न ॱसुङ थो़ङ्गेन् बेत्। (छ्यारप् २१:१२)
8हीगी धो़न् दी कोलीमी धेच्च्यो ङो़नी कीन युङ घयेत् को़न्ज्योक्की भीज हीम्बल मीत् युङ्गेन् बेत्। छ्यो़त्तुम्गी केच्च्य ॱनङल कीन युङे भीज घयेत् दीरङ् अब्राहाम्गी ज्यी़त् ॱङो़न्ने हीम्बल डोगेन् बेत्। 9हुगी ॱनङे छ्यो़त्तुम् दील हीन्दुक् सीर यो़क्केन् बेत्।
ॱसङ्बो़त् हजो़त् ङ युङ्गेन्। हुगी यङ्ल साराल भु च्यीक् कीन यो़प्प युङ्गेन् बेत् सीन्न को़न्ज्योक्की ॱसुङ थो़ङ्गेन् बेत्। (छ्यारप् १८:१०,१४)
10ॱनी हुगी छ्यो़त्तुम्ल पीब हरुङ् ङीक्की पुबु इसहाक्ल भु ॱङी रीबेक्का च्यानी कीब बेत्। 11-12हुब ॱङीबु छीरुक् बेत्। ढोप्पे नङ्दु यो़प्पे यङ्ल हुबे गा आक्पा घन्ड अक् मत् झ्यीबे यङ्लरङ् को़न्ज्योक्की रीबेक्काल
गेम्बा दीगी स्यो़म्बा दील स्यप्च्यी़ ज्युक्केन् बेत् सीन्न को़न्ज्योक्की ॱसुङ थो़ङ्गेन् बेत्। (छ्यारप् २५:२३)
ॱनी हुगो झ्यीनी हुबे लेगी मेम्ब, हीगो खोङ्गी थुल ॱमीन भो़बे ढो़ हीम्बल डोगेन् बेत्। 13हीगी ढीक्ल हीन्दुक् सीर अक् थो़ङ्गेन् बेत्।
याकुब्ल च्यीबा धङ् एसाब्ल ङे मक्का झ्यीबेन् सीर ॱसुङ्रप्ल यो़क्केन् बेत्। (मलाकी १:२-३)
14हीगो हीन्न ॱनी, हील हज्यरङ् घन्ड सीक्केन्? को़न्ज्योक् दम्ङीत् झ्यीक्केल्ल डोगेन् बेक्क ॱनी? ॱस्युली मेम्बेत्। 15को़न्ज्योक्की मोशाल ॱसुङे केच्च्यल
ङ ॱसुल ॱङीङ्ज्यी झ्यीच्च्ये ॱनो़गुक्क हुगोल झ्यीक्केन्। ङ ॱसुल ॱङीङ् छा झ्यीच्च्ये ॱनो़गुक्क हुगोल झ्यीक्केन् सीर यो़क्केन् बेत्। (थो़म्ब ३३:१९)
16हीगो झ्यीनी ॱनी, खोङ्गी ॱङीङ्ज्यी हुगो खोङ्गी ॱनङ्न मेन्द, कोलीमी ॱनो़जो़त्ल धङ् ओङ्रेङ्गी लीम्बे ॱमीत् थोप्केन् बेत्। 17को़न्ज्योक्की फारोहाल हीन्दुक् ॱसुङ ॱसुङ्रप्ल थो़ङ्गेन् बेत्।
रङ्गी मीजील घङ् झ्युङे लेमु हुनी ङल घन्दुक्मे ॱवङ् छ्यीय दुक्क हुगो तो़न्ज्येल धङ् ङे मीङ् जम्लीङ् की़ल्ल धर्च्ये यो़प्पे ढीक्ल सीन्न रङ् ज्याबुल ङे को़न स्यक्पेन्। (थो़म्ब ९:१६)
18हुगो झ्यीनी खोङ्गी ॱसुल ॱङीङ्ज्यी झ्यीच्च्ये ॱनो़गो़दङ् हुल झ्यीक्केन् बेत्। ॱसी़ ॱसीम् गट्टक्पल सोज्ये ॱनो़गो़दङ् हुगोल सोगेन् बेत्।
19खीत्रङ् यरीगी ङल सीगो़ट्टो। हुगो हीन्न ॱनी, को़न्ज्योक्की घन्डल मील ङीब कोप्केन् बेक्क ॱनी? खोङ्गी थुल यो़प्पे ढो़ क च्यो़त् छुगेन् दी ॱसु दी यो़प्प? सीन्न सीगो़ट्टो। 20ॱवे कोलीमी खो़त् को़न्ज्योक्ल ख तोङ्गेन् सीक्केन्? जम दीगी रोरङ् सोगेन् दील
खोक्की ङ घन्डल हीन्दुक् झ्यीब सो़ब हीम्ब सीन्न सीर् छुगो़प्प बेक्कक् ॱनी? (यशैया २९:१६)
21जम सोगेन् दीगी दप्पक् ॱनग च्यीक्नीरङ् जमे ॱनो़च्च्य यरी रीन् छ्यीया, यरी रीन् च्युङा च्येम्म सोज्येमे ॱवङ्ग रोल मीप्प बेक्कक् ॱनी?
22को़न्ज्योक्की खोङ् रोरङ्गी खोङ्डोक् तो़न्न युङ्न, खोङ्ल ॱस्यीक् छ्यीम्मु यो़प्प दी छङ्म थम्ज्येक्की ॱह घोदु ची़च्च्येल ॱनो़च्च्य यरी खोङ्गी हुन्दुक् झ्यीबल सो़ब बेत्। ॱनी हीन्न अक्, खोङ्गी हुन्दुक् मत् जेप्प, खोङ्गी खोङ्डोक्की छ्येप्प खीगेङ्गी ॱनो़च्च्य खरप्ल डोगेल्ल ठोक्क झ्युङ् छर हुब घयेत्ल खोङ्गी ङङ्रीन् छ्यीम्मु खुर्न स्युब बेत्। 23हीगो खोङ्गी ॱङीङ्ज्यी जेप्पे ॱनो़च्च्य खोङ्गी नोर्तङ् छ्येत्मीक्की तो़त्वङ्गी फक् थोप्केल्ल सो़ छर हज्यरङ् घयेत् खोङ्गी तो़त्वङ्गी ओ़च्च्यल ॱनोप् छुबे ढीक्ल बेत्। 24हुगोल हज्यरङ् यहुदीगी ज्यी़त्नी छ्युवक् मेम्ब, ज्यी़त् ॱयोङ् ॱयोङ्गी मी इक् भो़न यो़क्केन् बेत्। 25हीगी ढीक्ल होशेगी यीगील थो़ङ्गेन् बेत्।
ङे मीस्सीर् मेम्बे मी घयेत् ङे मीस्सीर् हीम्बल सोगेन्। ङे झ्यम्बे मी मेम्ब घयेत् ङे झ्यम्बे मी हीम्बल सोगेन् सीर यो़क्केन् बेत्। (होशे २:२३)
26ॱनी हरुङ् ॱसुङ्रप्ल हीगो थो़ङ्गेन् बेत्।
खीत्रङ् ङे मीस्सीर् मेम्बेत् सीस्स दीदुरङ् खीत्रङ् ॱसोम्बु हीम्बे को़न्ज्योक्की भीज बेत् सीक्केन् बेत्। (होशे १:१०)
27यशैयागी इक् इस्राएल्की ढीक्ल हीन्दुक् सीन्न केत् ज्यब बेत्।
इस्राएल्की मीस्सीर् घयेत् छ्यु ज्यम्जो छ्यीम्मी़ छीगल यो़प्पे झ्यीम डस्सी छेत्मीत्रङ् यो़त्न अक्, कुरीक् ॱमीत् थर, हुगी ॱल्हक्टो़ दीरङ् क छी थर्वल थो़ङ्गेन् बेत्। 28चोव ज्यीन्दक्की जम्बुलीङ् हील छ्येप्प को़ज्येमे ढो़ दी ह ज्योक्पु डुप्केन् बेत् सीर थो़ङ्गेन् बेत्। (यशैया १०:२२-२३)
29हीगी ढीक्ल यशैयागी हरुङ्द ॱङो़स्स्यी ॱस्येत्न यो़क्केन् बेत्।
ॱवङ् की़न् च्येम्मे चोव ज्यीन्दक्की हज्यरङ् इस्राएली घयेत् ॱसो़न्ज्यी़त् च्यीक् इक् मत् स्यक्प हीन्न ॱनी, हज्यरङ् सदोम् धङ् गमोरा डस्सील डोयेत् क ॱनी सीर थो़ङ्गेन् बेत्। (यशैया १:९)
इस्राएलीगी छ्य मत् स्यक्प ३०-३३
30हीगो हीन्न ॱनी, हील हज्यरङ् घन्ड सीक्केन्? ज्यी़त् ॱयोङ् ॱयोङ्गी मी घयेत् को़न्ज्योक्की ढुङ्दु ॱनम्बर् धक्पे लम्ल डोगेङ्गी मी मेन्न अक्, छ्य स्यक्पे लम्नी हुब ॱनम्बर् धक्पल थो़न् छुगेल्ल झ्युङ्न यो़क्केन् बेत्। 31ॱनी इस्राएली घयेत् छ्यो़डीम्गी कल चीन युङे लम्नी ॱनम्बर् धक्पल थो़न् छुज्ये ॱनो़ब झ्यीब बेत्। ॱनी हीन्न अक्, थो़न् ॱमत् छुब बेत्। 32घन्डल थो़न् ॱमत् छुब बेक्क ॱनी? ॱनम्बर् धक्प दील हुबे छ्य स्यक्पे लम्नी मेम्ब, हुबे ले झ्यीन युङे लम्नी थो़न् छुज्ये ॱनो़ब झ्यीब बेत्। हुन्दुक् झ्यीनी हुब ॱनत्त दुगेङ्गी दोल दुनर बेत्। 33हीगी ढीक्ल ॱसुङ्रप्ल थो़ङ्गेन् बेत्।
तेदे मी घयेत् ॱनत्त दुज्येल दो च्यीक् धङ् मी घयेत् थुक्न च्यो़न् युङ्ज्येल ढक् च्यीक् ङ सीयोन्दु स्योक्केन्। ॱसी़ खोङ्ल छ्य स्योक्कुक्क हुल ॱने फम्ब मीत् युङ्गेन् बेत् सीर यो़क्केन् बेत्। (यशैया २८:१६)
လက္ရွိေရြးခ်ယ္ထားမွု
रोमी 9: LHM
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 1995 Wycliffe Bible Translators, Inc. and Nepal Bible Society