Yezsuzyaq 24
24
Laemh Dij Sen Hoakzaqrawz Saeh Puj Yixsowhleh
1 Yezsuzyaq yuq dih rongx hoak Swqjenq naeh rongx daengz jijgaj ngah Yixsowhleh maz, goj rongx puj jeq Yixsowhleh sowh puj miz aen gvai naeh, yaq sowh puj hoak zaeuj changz hoakri naeh, yaq sowh puj saeq saeh daenh paegsaeh naeh, yaq puj saeq, rongx paenqdix maz, paenqdix zoq maz in doqnaj dij Sen. 2Yezsuzyaq daj daengzle hax: "Yez'hoahhuah dij Sen Yixsowhleh hoakzaqnaeh hax: ‘Zwzndowj, puj jeq rownz su, zoq zawh Tazlaz laux dez Yaqboahlazhanq daj laux dez Nahhowh naeh, ndowj yuq ka dah Yaeuqfahlazdix baih gaengnaeh. Paenqdix mbud dij sen ndai. 3Gux lingz puj jeq rownz su Yaqboahlazhanq daeq ka dah Yaeuqfahlazdix baih gaengnaeh maz, lingz dix daeq daengz Zaznanh nauq, goj hawj luglan dix raengh. Gux hawj dix miz maeng lug zaiz ux rongx hoak Yitsaeg. 4Hawj Yitsaeg miz Yaqgowh daj Yixsaux, yaq aeu bo Cizex hawj Yixsaux hoak dih hoakjin. Gaj Yaqgowh daj luglan dix bae Aizjih. 5Doaklaeng, gux nemz Moahciz daj Yaqlunh hoak raeng raeng, gux hawj Aizjih miz nanq dwx, yaq lingz puj jeq rownz su daeq Aizjih og daeuj.
6"‘Gux lingz puj jeq rownz su ni Aizjih, paenqdix bae taeng haenz aen haij roang hoak Haijndiang naeh. Dij goanz Aizjih naengh chowz kviq max daem paenqdix bae taengdeg haenz haij. 7Puj jeq rownz su rongx gux jeuq, gux zoq hawj jinghzang gaenqsu daj bin Aizjih ndaem yowngh ndaem, hoakzaqnaeh jeg bin Aizjih, daeuq hawj naemx tumj bin Aizjih. Sowh saeh gux yuq Aizjih hoak naeh, puj Yixsowhleh su ndaej ta'taen singjringh. Laengmaz, puj Yixsowhleh su goj yuq ndaw doanghmowz ndowj ndowj taeuq. 8Gux lingz puj Yixsowhleh su maz taeng ka dah Yezdanq baih tang'vaenz og dih puj Yaqmoahliq ndowj naeh, gaenqsu daj paenqdix dungzsaeuh, gux aeu paenqdix nyaengx mwz ndaw mungz su, hawj gaenqsu ndaep paenqdix lown, gaenqsu zoq ndaej dih paenqdix hoak dih hoakjin. 9Zwz naeh, Cizbah laux hongz puj Moahyaq naeh, lug zaiz dix Bazlowh daz maz saeuh dij goanz Yixsowhleh. Dix nemz dij goanz bae rongx Bazlanh goanz lug zaiz Bixex naeh maz vanz gux mang su. 10Gaj gux mboq venq biak kauq Bazlanh, baenzzaqnaeh dix gajfa vanz gux goq gumx gumx su. Hoakzaqnaeh, gux zoq jeuq su ni dawj mungz Bazlowh. 11Gaenqsu gvaq ka dah Yezdanq yaq, maz taeng Yezliqgoz. Dij goanz Yezliqgoz daj gaenqsu dungzsaeuh, naengz miz puj Yaqmoahliq, puj Bixliqcix, puj Zaznanh, puj Howx, puj Gowhzazsax, puj Cizvaeq, puj Yezbuqsez, goj daj gaenqsu dungzsaeuh. Gux goj aeu paenqdix nyaengx mwz ndaw mungz su. 12Yaq song laux hongz puj Yaqmoahliq naeh, gux nemz dojgvax daem paenqdix ni doqnaj su, mboq zawh aeu remz su, goj mboq zawh aeu naqgoang su. 13Sowh dih gux aeu hawj su naeh, raehnaz ndaw dix mboq zawh gaenqsu mbaeg daekgoanq. Sowh chaenh ndaw dix naeh, mboq zawh gaenqsu daengj, gaj gaenqsu ndaej yuq ndaw dix ndowj. Sowh sown maegkaeu'it daj sown maeghit ndaw dix naeh, goj mboq zawh gaenqsu ndaem, gaj gaenqsu ndaej jin maeg dix.’"
Puj Yixsowhleh Daj Yez'hoahhuah Dungzdingq
14 Yezsuzyaq daj puj Yixsowhleh hax: "Gaenqsu hem uxux, biak kauq Yez'hoahhuah oaj, mizzaw kvej dix. Aeu sowh dij sen puj jeq rownz su yuq ka dah Yaeuqfahlazdix baih gaengnaeh kvej naeh daj sowh dij sen paenqdix yuq ndaw Aizjih kvej naeh ni, bae kvej gaj Yez'hoahhuah. 15Jixzawh gaenqsu mboq venq kvej Yez'hoahhuah, vaenznaeh gaenqsu haeggaj lowg, gaenqsu zawx kvej gawz: Kvej dij sen zwz puj jeq rownz su yuq ka dah Yaeuqfahlazdix baih gaengnaeh kvej naeh, rux kvej dij sen puj Yaqmoahliq dih su yuq gannaeh? Gaj gux daj rownz gux, gaenqpiu toj kvej Yez'hoahhuah mboqyaq."
16Goanzlai yaeng: "Gaenqpiu toj mboq rux ni Yez'hoahhuah bae kvej dij sen ndai. 17Yez'hoahhuah dij Sen raeuz lingz raeuz daj puj jeq rownz raeuz daeq Aizjih dih raeuz hoakkoij daenh naeh og daeuj, yuq doqnaq raeuz hoak sowh saenh yaengh saenh naeh, suq ka loh raeuz daeq naeh, gvaq zoah puj gaeng goj ndae, dix zwzzwz yaz raeuz. 18Puj gaeng, Yez'hoahhuah goj daem ni yuq doqnaj raeuz, goj daem puj Yaqmoahliq sowh puj yuq inxnaeh ndowj naeh ni doqnaj raeuz, dix zawh dij Sen raeuz, baenzzaqnaeh gaenqraeuz kvej dix."
19 Yezsuzyaq daj goanzlai hax: "Yez'hoahhuah lej mboq miz gaenqndog saek'i neh, baenzzaqnaeh gaenqsu kvej Yez'hoahhuah mboq baenz. Dix zawx hawj dij goanz zaw doag kvej gaj dix. Jixzawh gaenqsu mboq zawdoag kvaj gaj dix, dix toj mboq rux yangq gaenq hoakloang su daj gaenqndog su. 20Jixzawh mwznaj gaenqsu ni Yez'hoahhuah, bae kvej dij sen puj yowngh ndai, daengz Yez'hoahhuah haeuz gumx su yaq, dix goj hawj su miz aen nanq, ndaep su lown." 21Goanzlai daj Yezsuzyaq hax: "Mboq, gaenqpiu toj kvej Yez'hoahhuah mboqyaq." 22Yezsuzyaq daj goanzlai hax: "Gaenqsu lowg Yez'hoahhuah, zoq kvej dix, gaenqsu yinq zawh hoakri su haeggaj lowg." Paenqdix hax: "Wnh, gaenqpiu yinq zawh gaenqpiu haeggaj lowg Yez'hoahhuah." 23Yezsuzyaq hax: "Gannaeh gaenqsu aeu dij sen puj yowngh ndai yuq zawj su naeh ni, zawdoag nowngz Yez'hoahhuah dij Sen Yixsowhleh." 24Dij goanz Yixsowhleh daengzle daj Yezsuzyaq hax: "Gaenqpiu toj kvej Yez'hoahhuah dij Sen piu, biak kauq dix mboqyaq."
25Vaenz gaengnaeh, Yezsuzyaq zoq daj daengzle dij goanz Yixsowhleh dungzdingq, yuq dih rongx hoak Swqjenq naeh saeh paenqdix laiz fahlih daj goizdingq. 26Yezsuzyaq aeu suq kauq naeh laiz mwz ndaw Sw Fahlih dij Sen, daeuq aeu kvaix tin dwx ux maz, ndaem goak go maex dwx go yuq haenz zangjpungh Yez'hoahhuah naeh. 27Yezsuzyaq daj daengzle dij goanz Yixsowhleh hax: "Su lez, kvaix tin naeh ruxnyinz suq kauq Yez'hoahhuah daj raeuz hax naeh, baenzzaqnaeh dix saeh raeuz hoak puj jinghzang, yaj gaenqsu mboq yinq dij Sen su." 28Yaq Yezsuzyaq zoq nemz dij goanz Yixsowhleh gaj goanz gaj dauh bae dih hoakjin hoakri naeh.
Yezsuzyaq Daj Yixliqyaqsax Tai
29Gvaq le gaenq naeh yaq, Yezsuzyaq goanz puj koij Yez'hoahhuah, goanz lug zaiz Naenq naeh tai, zwz naeh dix ndaej baeg'aet bi. 30Dij goanz Yixsowhleh aeu dix moak ndaw dih hoakjin hoakri dix ndaej naeh, zoq zawh baih bowhfangz Bo Zazswh, mbanj miz bo luglan Yixfahleanh baen ndaej, dih rongx hoak Tinhnah-cizlaz naeh. 31Zwz Yezsuzyaq naengz zaeu naeh, dij goanz Yixsowhleh kvej Yez'hoahhuah. Dix tai yaq, puj Yixsowhleh puj jeq sowh puj miz aen gvai naeh yaq ndaej ta'taen suq saeh Yez'hoahhuah saeh dij goanz Yixsowhleh hoak naeh naengz zaeu naeh, sowz zwz naeh, dij goanz Yixsowhleh goj naengz kvej Yez'hoahhuah.
32Zwz dij goanz Yixsowhleh ni Aizjih naeh, paenqdix tw nduk Yezsowh maz, doaklaeng aeu moak ndaw Swqjenq, zoq zawh oaxraeh koax daekgoanq Yaqgowh aeu baeg koaxciztah ngaenz ux swx daeq mungz luglan Hazmoah maz naeh. Goanz Hazmoah naeh zoq zawh goanz dez Swqjenq naeh.#24:32 BaegKoaxciztah ngaenz ux zawh baeg ndeaj ngaenz ux. Dih naeh zawh luglan Yezsowh ndaej. 33Yixliqyaqsax goanz lug zaiz Yaqlunh naeh goj tai, zoq aeu dix moak ndaw Jizbixyaq naeh, Jizbixyaq zawh lug zaiz dix Faeznihhaz baen ndaej, Jizbixyaq yuq mbanj miz bo luglan Yixfahleanh baen ndaej naeh.
လက္ရွိေရြးခ်ယ္ထားမွု
Yezsuzyaq 24: ZHN
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023, Peace Publishing Co. All rights reserved.