Yezsuzyaq 22
22
Song Ngah Mbengj Gaengnaeh Dauh Mwz Dih Paenqdix Ndaej Naeh
1Zwz gaengnaeh, Yezsuzyaq rongx ngah Loixbenq, ngah Zazdowh, daj ngah Maxnahciz mbengj yuq ka dah Yezdanq baih tang'vaenz og naeh maz, 2dix daj paenqdix hax: "Puj koij Yez'hoahhuah Moahciz saengq su gaeng, su goj haeuz biak bae hoak nauq; Gux saengq su gaeng, su goj haeuz biak bae hoak nauq. 3Daeq ndowj maz, gaenqsu mboq sanz viangh dij goanz Yixsowhleh su, sowh kauq Yez'hoahhuah dij Sen su saengq su naeh, gaenqsu goj haeuz biak bae hoak. 4Gannaeh Yez'hoahhuah dij Sen su hoakzaq gaenq dix yinq naeh, hawj dij goanz Yixsowhleh su ndaej yuqvangq. Gannaeh gaenqsu dauh mwz rownz su ndeh, dauh mwz Ka dah Yezdanq baih tang'vaenz og naeh, zoq zawh dih puj koij Yez'hoahhuah Moahciz aeu hawj su hoak dih hoakjin naeh. 5Gaenqsu caqsiq biak fahlih dix daj sowh gaenq dix yaix hoak naeh oaj, zoq zawh sowh gaenq Yez'hoahhuah hawj puj koij dix Moahciz saengq su naeh, ngaiq Yez'hoahhuah dij Sen su, daeq ka loh dix, biak sowh gaenq dix yaix hoak naeh, zawdoag nowngz dix, aeu daengz zaw daengz mingh kvej dix." 6Yaq Yezsuzyaq zoq vanz dij Sen gumx paenqdix, nemz paenqdix dauh mwz, paenqdix zoq dauh mwz rownz hoakri. 7Moahciz haeuz aeu Bazsanz hawj ngah Maxnahciz mbengj yuq baih tang'vaenz og naeh hoak dih hoakjin. Yaq mbengj ngah gaengnaeh, Yezsuzyaq goj haeuz aeu ka dah Yezdanq baih tang'vaenz doak naeh hawj paenqdix hoak dih hoakjin, dih naeh daj dij goanz Yixsowhleh ngah ndai zaemh yuq. Gau Yezsuzyaq nemz ngah Loixbenq, ngah Zazdowh, daj ngah Maxnahciz mbengj yuq ka dah Yezdanq baih tang'vaenz og naeh dauh mwz rownz paenqdix naeh, Yezsuzyaq vanz dij Sen gumx paenqdix. 8Yezsuzyaq daj paenqdix hax: "Gannaeh gaenqsu miz za'hoq lai, miz doihdo lai, miz jim, miz ngaenz, miz dongz, miz liak, miz ndangnungh lai, le gaenqnaeh longx daeq mungz baih daenh maz. Gaenqsu tw le gaenqnaeh dauh mwz rownz su, baen hawj bihnongx hoakri." 9Yaq ngah Loixbenq, ngah Zazdowh, mbengj ngah Maxnahciz gaengnaeh zoq daeq ndaw Zaznanh dih rongx hoak Swqloah naeh loangzdin, ni dij goanz Yixsowhleh paenqdix, dauh mwz Jizleh dih paenqdix ndaej hoak dih hoakjin naeh, zoq zawh dih Yez'hoahhuah yaix Moahciz aeu hawj paenqdix hoak dih hoakjin naeh.
Song Ngah Mbengj Gaengnaeh Yuq Haenz Dah Daengj Aen Kuq Tin Mbud Dij Sen Ux
10Ngah Loixbenq, ngah Zazdowh daj mbengj ngah Maxnahciz gaengnaeh, paenqdix maz taeng Zaznanh mbanj yuq zawj ka dah Yezdanq naeh, zoq yuq haenz ka dah Yezdanq daengj aen kuq tin mbud dij Sen ux. Aen kuq tin mbud dij Sen naeh sung taeuq, dwx taeuq. 11Dij goanz Yixsowhleh ngah ndai ruxnyinz mbaed saeh naeh, zoq hax: "Su lez, mboq zawh yowngh yah, ngah Loixbenq, ngah Zazdowh daj mbengj ngah Maxnahciz gaengnaeh, paenqdix yuq ndaw Zaznanh, mbanj yuq zawj ka dah Yezdanq naeh, dih dij goanz Yixsowhleh naeh, daengj aen kuq tin mbud dij Sen ux." 12Dij goanz Yixsowhleh daeh ruxnyinz mbaed saeh naeh, daengzle zoq maz ndaw Swqloah, daz bae saeuh paenqdix.
Ngah Ndai Nemz Dij Goanz Mwz Hwt Song Ngah Mbengz Gaengnaeh
13Dij goanz Yixsowhleh nemz Faeznihhaz goanz lug zaiz puj mbud dij Sen minxzwh rongx hoak Yixliqyaqsax naeh, nemz dix mwz Jizleh lez ngah Loixbenq, ngah Zazdowh, mbengj ngah Maxnahciz gaengnaeh, 14daeuq nemz sip goanz puj saeq daj Faeznihhaz zaemh mwz. Sip goanz naeh goanz ux zoq zawh hax ngah Yixsowhleh ux, paenqdix dangq goanz dangq zawh zaeuj ngah paenqdix. 15Paenqdix mwz taeng Jizleh, daj puj Loixbenq, puj Zazdowh, mbengj ngah Maxnahciz gaengnaeh hax: 16"Daengzle dij goanz Yez'hoahhuah hoakzaqnaeh hax: ‘Gaenqsu naeh ah, gaenqsu hoak gaeng saeh hoakzaqnaeh hoak mux? Gaenqsu mboq nowngz gaj dij Sen Yixsowhleh, vaenznaeh ueq ni mboq nowngz Yez'hoahhuah, saeh hoakri daengj aen kuq tin mbud dij Sen ux, dix Yez'hoahhuah. 17Koax daekgoanq gaenqraeuz yuq ndaw Pih'ex hoak loang naeh#Anq Yixsowhleh 25:1-9., gaenqraeuz haeuz dohbaeuh taeuq. Laemh zwz naeh, gaenq baenzrah daeuj doq daengzle dij goanz Yez'hoahhuah, taeng gannaeh gaenqraeuz naengzgaj kaed mboq saw. Gannaeh gaenqsu naengz soanx hawj raeuz gajfa dohbaeuh tem mah? 18Gaenqsu vaenznaeh ueq ni mboq nowngz Yez'hoahhuah ejraj? Gaenqsu vaenznaeh dix Yez'hoahhuah, vaenzbig dix toj rikdwk daengzle dij goanz Yixsowhleh. 19Jixzawh gaenqsu hax dih gaenqsu ndaej naeh mboq saw, gaenqsu zoq kamj mwz dih Yez'hoahhuah naeh, zoq zawh dih zangjpungh Yez'hoahhuah ndowj naeh, yuq haenz piu ndaej dih namh. Gaj mboq jinx su yuq dihndai saeh hoakri daengj kuq tin mbud dij Sen, gaenqsu hoakzaqnaeh zawh hoak loang Yez'hoahhuah, hoak loang gaenqpiu. 20Koax daekgoanq Yaqganz goanz laenj Ceqlaz naeh aeu sowh gaenq hoj aeu hawj dij Sen naeh, Yez'hoahhuah rik daeuj doq daengzle dij goanz Yixsowhleh, Yaqganz hoak loang, mboq zawh hawj gaj goanz doag dix tai.’"
Song Ngah Mbengj Gaengnaeh Hax Paenqdix Baenzzaqrawz Daengj Kuq Tin Mbud Dij Sen
21Yaq puj Loixbenq, puj Zazdowh, mbengj ngah Maxnahciz naeh, paenqdix yaeng puj saeq sowh puj hoak zaeuj ngah paenqdix naeh: 22"Yez'hoahhuah zawh dij Sen haen nyeuz daengzle naeh! Yez'hoahhuah zawh dij Sen haen nyeuz daengzle naeh! Dix ruxndeq gaenqpiu baenzzaqrawz hoakzaqnaeh hoak, mbaenqnaeh gaenqsu goj ruxndeq mboqyaq. Jixzawh gaenqpiu zawh dix Yez'hoahhuah, raj mboq nowngz Yez'hoahhuah, vaenznaeh zoq laek yangq gaenqpiu. 23Jixzawh gaenqpiu saeh hoakri daengj kuq tin mbud dij Sen zawh daz yuq now dix aeu gaeng mbud, piu zoq zawh ueq ni mboq nowngz Yez'hoahhuah. Jixzawh zawh baenzzaqnaeh zaeh, ngwz Yez'hoahhuah haeggaj chaenxfah gaenqpiu. Gaj gaenqpiu haxdoq su, gaenqpiu toj mboq rux yuq now dix mbud sowh gaenq aeu pyaeu mbud naeh, mbud kaeuj, mbud sowh gaenq hawj dij Sen daj dij goanz dungzndae naeh, toj mboq rux aeu gaeng yuq now dix mbud. 24Gaenqpiu daengj aen kuq tin naeh zawh baenzzaqnaeh, gaenqpiu mbu mwznaj luglan su rux hoakzaqnaeh naeh hax luglan piu: "Gaenqsu daj Yez'hoahhuah dij Sen Yixsowhleh miz gaeng ndaemndiang mux? 25Puj Loixbenq daj puj Zazdowh aj, Yez'hoahhuah aeu ka dah Yezdanq jeg gaenqsu, hawj gaenqsu haeggaj yuq baih ux, gaenqsu daj Yez'hoahhuah mboq miz gaeng." Hoakzaqnaeh, luglan su rux hawj luglan piu mboq mbu Yez'hoahhuah eh. 26Baenzzaqnaeh gaenqpiu hax: ‘Gaenqraeuz saeh hoakri daengj aen kuq tin mbud dij Sen ux, mboq zawh aeu mbud sowh gaenq aeu pyaeu mbud naeh, goj mboq zawh aeu gaeng mbud now dix, 27zawh hawj dix hoak zaenqjiq gaenqpiu daj gaenqsu, hawj dix hoak zaenqjiq luglan piu daj luglan su, hawj su ruxndeq piu goj mwz aen zangjpungh Yez'hoahhuah mbud sowh gaenq aeu pyaeu mbud naeh, mbud sowh gaenq aeu mbud hawj dij Sen daj dij goanz dungzndae naeh, mbud yowngh ndai. Hoakzaqnaeh mwznaj luglan su zux mboq daj luglan piu hoakzaqnaeh hax: "Gaenqsu daj Yez'hoahhuah mboq miz gaeng ndaemndiang gah."’ 28Baenzzaqnaeh gaenqpiu hax: ‘Mwznaj miz dij goanz daj piu, rux daj luglan piu hoakzaqnaeh hax, gaenqpiu zoq hoakzaqnaeh yaeng baenz: "Gaenqsu lez aen kuq tin mbud dij Sen naeh, zawh puj jeq rownz piu daengj, zawh hoakzaq rangh aen kuq tin mbud Yez'hoahhuah naeh daengj, aen kuq tin mbud dij Sen naeh, mboq zawh aeu mbud gaenq aeu pyaeu mbud, goj mboq zawh aeu mbud yowngh ndai, zawh hawj dix hoak zaenqjiq gaenqpiu daj gaenqsu."’" 29Song ngah mbengj naeh daeuq daj paenqdix hax: "Ndaw zangjpungh dij Sen raeuz haeuz miz aen kuq tin mbud dij Sen ux, zawh aeu mbud sowh gaenq aeu pyaeu mbud naeh, aeu mbud kaeuj daj aeu mbud yowngh ndai, Baenzzaqnaeh gaenqpiu daeuq yuq dihndai saeh hoakri piu daengj aen kuq tin mbud dij Sen ux, gaenqpiu toj mboq rux yuq now dix aeu gaeng mbud, toj mboq rux hoakzaqnaeh dix Yez'hoahhuah ni dix."
Ngah Ndai Ruxndeq Yaq Zoq Faengz, Zoq Daeuq Dungzndae
30 Faeznihhaz goanz puj mbud dij Sen naeh daj puj saeq, zoq zawh sowh puj saeq hoak zaeuj ngah paenqdix naeh, paenqdix ruxnyinz puj Loixbenq, puj Zazdowh, puj Maxnahciz hoakzaqnaeh hax, zaw paenqdix zoq faengz, yuq vangqdangh. 31Faeznihhaz goanz lug zaiz Yixliqyaqsax goanz puj mbud dij Sen naeh daj puj Loixbenq, puj Zazdowh, puj Maxnahciz hax: "Vaenznaeh gaenqraeuz ruxndeq Yez'hoahhuah yuq zawj raeuz, gaenqsu mboq ueq ni Yez'hoahhuah, gannaeh gaenqsu haeuz jeuq dij goanz Yixsowhleh, mboq hawj dij goanz Yixsowhleh zoah chaenxfah." 32Faeznihhaz goanz lug zaiz Yixliqyaqsax goanz puj mbud dij Sen naeh daj le goanz puj saeq gaengnaeh ni puj Loixbenq, puj Zazdowh, daeq ndaw Jizleh dauh maz ndaw Zaznanh, maz taeng dih dij goanz Yixsowhleh ngah ndai naeh, aeu mbaed saeh naeh haxdoq paenqdix. 33Dij goanz Yixsowhleh ngah ndai biak yaq zoq zaemz, yuq vangqdangh, zoq biangz dij Sen, goj mboq hax mwz saeuh puj Loixbenq, puj Zazdowh, zoq mboq hax vaih dih paenqdix ndowj naeh. 34Puj Loixbenq, puj Zazdowh hax: "Aen kuq tin mbud dij Sen naeh zawh zaenqjiq, zawh hax Yez'hoahhuah zawh dij Sen." Paenqdix zoq nyaek minxzwh aen kuq tin mbud dij Sen naeh hoak: "Aen Zongz Hoak Zaenqjiq Gaenqraeuz naeh."
လက္ရွိေရြးခ်ယ္ထားမွု
Yezsuzyaq 22: ZHN
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023, Peace Publishing Co. All rights reserved.