Puj Saeq 4
4
Dixbozlaz Daj Bazlaz Lingz Dij Goanz Mwz Saeuh Cizcizlaz
1 Yixhuh tai yaq, dij goanz Yixsowhleh daeuq hoak sowh saeh Yez'hoahhuah ywjhwnq naeh, 2Yez'hoahhuah zoq aeu paenqdix nyaengx bae ndaw mungz Yezbinz laux hongz Zaznanh laux yuq ndaw Caqsoax chaenh hoak hongz naeh. Goanz saeh Yezbinz gvanx bin naeh rongx hoak Cizcizlaz, Cizcizlaz yuq ndaw Caqloahsowh-hazgowhyinq ndowj. 3Laux hongz rongx hoak Yezbinz naeh miz sowh chowz liak aeu dungzsaeuh naeh gaeujbaeg aen. Dix vazkuz dij goanz Yixsowhleh ndaej ngihsip bi, vazkuz zaeh zaeh. Dij goanz Yixsowhleh zoq vanz dij Sen jeuq.
4Jeh naeh, miz goanz nyingz ux minxzwh rongx hoak Dixbozlaz, dix hoak saeq dij goanz Yixsowhleh laux goak naeh, dix zawh puj zawxkauq dij Sen, dix zawh mijmez Lazbixdoz. 5Bo'mbanj Yixfahleanh naeh dih yuq jinghzang Lazmax daj Boztowhliq naeh miz maex mba'baet, Dixbozlaz kwnz yuq dawj go maex mba'baet ux naengh, dij goanz Yixsowhleh kwnz mwz dih naeh hawj dix paeg saeh. 6Miz vaenz ux, Dixbozlaz nemz dij goanz mwz mbanj Nahfuhtazliq dih rongx hoak Jizdixsez naeh rongx Bazlaz goanz lug zaiz Yaqbixnoah'anz naeh daeuj, dix daj Bazlaz hax: "Yez'hoahhuah dij Sen Yixsowhleh hoakzaqnaeh saengq mawz: ‘Mawz lingz dij goanz Nahfuhtazliq daj dij goanz Cizbuqlunh, lingz fanh goanz ux mwz Bo Tazboah. 7Gux toj hawj Cizcizlaz goanz saeh Yezbinz gvanx bin naeh lingz daengzle bin dix daj chowz dix maz ka dah Jizcunq, maz dih mawz naeh, gux toj hawj paenqdix doak dawj mungz mawz mboqyaq.’" 8Bazlaz daj Dixbozlaz hax: "Jixzawh mawz daj gux zaemh mwz, gux zoq mwz. Jixzawh mawz mboq daj gux zaemh mwz, gux zoq mboq mwz." 9Dixbozlaz yaeng: "Gux toj daj mawz zaemh mwz mboqyaq, gaj mawz mboq venq goanz doag haeggaj lingz dij goanz mwz, baenzzaqnaeh Yez'hoahhuah hawj Cizcizlaz doak dawj mungz yah nyingz ux, hoanx naeh mbaed naeh mawz zoq mboq miz gaeng najta." Yaq Dixbozlaz dwnq maz, daj Bazlaz zaemh mwz Jizdixsez. 10Bazlaz zoq rongx dij goanz Cizbuqlunh daj dij goanz Nahfuhtazliq mwz Jizdixsez, sowh dij goanz nowngz dix mwz naeh miz fanh ux, Dixbozlaz goj daj dix zaemh mwz.
11Jeh naeh, miz goanz ux minxzwh rongx hoak Cizbowh. Dix zawh puj Jiznih, zawh luglan Hoahbaz, Hoahbaz zoq zawh dez mijmez Moahciz. Cizbowh koax daekgoanq ni dij goanz Jiznih dix bae haenz Jizdixsez, dih haenz maex mba'baet ndaw Saxnahyinz naeh daengj zangjpungh ndowj.
12Bazlaz zowz dij goanz mwz yaq, miz dij goanz haxdoq Cizcizlaz, hax Bazlaz goanz lug zaiz Yaqbixnoah'anz naeh haeuz maz taeng Bo Tazboah. 13Cizcizlaz zoq lingz daengzle sowh dij goanz nowngz dix naeh daj daengz gaeuj baeg aen chowz liak dix, daeq ndaw Caqloahsowh-hazgowhyinq loangzdin, mwz taeng ka dah Jizcunq. 14Dixbozlaz daj Bazlaz hax: "Bae ndeh, vaenznaeh zawh vaenz Yez'hoahhuah hawj Cizcizlaz doak dawj mungz mawz yah. Yez'hoahhuah daeq baihnaj mawz." Yaq Bazlaz daj fanh goanz nowngz dix naeh loangz ndaw Bo Tazboah bae. 15Yez'hoahhuah hawj Cizcizlaz daj daengzle chowz dix bin dix nyungj nauq, zoah Bazlaz daj dij goanz Bazlaz aeu remz kaj. Cizcizlaz loangz chowz lenh gowx. 16Bazlaz daem chowz Cizcizlaz daj bin dix, daem bae daeux diak Caqloahsowh-hazgowhyinq, bin Cizcizlaz daengzle tai dawj remz nauq, daengz goanz ux naengz mboq low.
Yaxyiq Kaj Cizcizlaz
17 Laemh jeh naeh, rownz Cizbowh goanz puj Jiznih naeh daj Yezbinz laux hongz Caqsoax naeh dungzdingq mboq dungzsaeuh, hoak dungzndae, baenzzaqnaeh, Cizcizlaz lenh bae dih zangjpungh Yaxyiq goanz mijmez Cizbowh naeh. 18Yaxyiq og daeuj raep Cizcizlaz, daj dix hax: "Zaeuj aj, maz ndaw zangjpungh gux, laek mbu." Cizcizlaz zoq ndonj mwz ndaw zangjpungh Yaxyiq, Yaxyiq aeu faz yaz dix. 19Cizcizlaz daj Yaxyiq hax: "Gux yaegnaemx taeuq, vanz mawz aeu naemx hawj gux ndut ixux mah." Yaxyiq zoq aj daeh naeng, aeu neuhnaix hawj dix ndut, goj daeuq aeu faz yaz dix. 20Cizcizlaz daeuq daj Yaxyiq hax: "Vanz mawz bae baegdu zangjpungh in ywj, jixzawh miz dij goanz cham mawz miz mboq miz dij goanz yuq inxnaeh, mawz zoq hax mboq miz oaj." 21Cizcizlaz moih gvaq, noanzlaep ndae taeuq. Yaxyiq goanz mijmez Cizbowh naeh zoq it laenj saeulaek zangjpungh ux, mungz gaem hunxdog, hoj sanq hoj daeq mwz doq haenz Cizcizlaz, dix aeu saenj saeulaek naeh dog bae goaknyit Cizcizlaz, dog laemq bae daeux diak dihndin, Cizcizlaz zoq tai. 22Zwz naeh, Bazlaz maz daem Cizcizlaz, Yaxyiq og daeuj raep dix, daj dix hax: "Maz ndeh, gux aeu goanz mawz cha naeh hawj mawz lez." Bazlaz zoq daj Yaxyiq ndonj mwz, leztaen Cizcizlaz haeuz tai, ed doq dihndin, saenj saeulaek naengzgaj rangh to dix. 23Hoakzaqnaeh, vaenz gaengnaeh dij Sen hawj puj Yixsowhleh saeuh bex baih Yezbinz goanz laux hongz Zaznanh naeh. 24Puj Yixsowhleh gaj laeng gaj riangz, saeuh bex Yezbinz goanz laux hongz Zaznanh naeh, taengdiak hawj dix lown.
လက္ရွိေရြးခ်ယ္ထားမွု
Puj Saeq 4: ZHN
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023, Peace Publishing Co. All rights reserved.