Puj Saeq 3
3
Sowh Puj Yowngh ndai Naengz Low Naeh
1 Yez'hoahhuah leux le yowngh dij goanz naeh, zawh bae'naj aeu daeg puj Yixsowhleh sowh puj naengzbaeq sanz ndaej saeuh puj Zaznanh naeh. 2Hawj luglan puj Yixsowhleh, zoq zawh sowh puj mboq sanz ndaej dungzsaeuh naeh zau dungzsaeuh. 3Le yowngh dij goanz Yez'hoahhuah leux naeh zawh, haj goanz puj saeq puj Faezliqseq naeh, puj Zaznanh ndaw ijrawz gojndae, puj Cizdunq, sowh puj Cizvaeq yuq ndaw bo Lihbaznaenq naeh, zoq zawh daeq ndaw Bo Bazlih-howhmaenh mwz taeng baeg ngamz Hazmax naeh. 4Leux le yowngh dij goanz naeh zawh bae'naj aeu daeg puj Yixsowhleh, lez paenqdix biak mboq biak sowh gaenq Yez'hoahhuah tungzgoaq Moahciz saengq puj jeq rownz paenqdix naeh. 5Puj Yixsowhleh zoq daj puj Zaznanh, puj Howx, puj Yaqmoahliq, puj Bixliqcix, puj Cizvaeq, puj Yezbuqsez zaemh ndowj. 6Paenqdix raep lug nyingz puj yowngh ndai le gaenqnaeh hoak mijmez, goj kai lug nyingz hoakri hawj lug zaiz puj yowngh ndai le gaenqnaeh, yaq goj bae kvej dij sen puj yowngh ndai.
Owhtoahneh
7Puj Yixsowhleh hoak sowh saeh Yez'hoahhuah ywjhwnq naeh, lumz dij Sen hoakri Yez'hoahhuah, bae kvej sowh le Bazlih daj Yaqcowxlaz naeh.#3:7 Bazlih daj Yaqcowxlaz zawh dij sen zaj le dih naeh. 8Baenzzaqnaeh Yez'hoahhuah zoq rik dwk puj Yixsowhleh, hawj paenqdix doak doq dawj mungz Guxsanz-liqsaxteanh laux hongz Yaqlanh dih yuq ndawMaexsoahbuqdahmixyaq naeh. Puj Yixsowhleh kvej Guxsanz-liqsaxteanh biad bi. 9Puj Yixsowhleh vanz Yez'hoahhuah jeuq, Yez'hoahhuah zoq yaeuj goanz ux maz jeuq paenqdix. Goanz naeh rongx hoak Owhtoahneh, dix zawh lug zaiz Jiznahswz goanz nongx zaiz Zazlowh naeh. 10Minghkoan Yez'hoahhuah daeuj ndang Owhtoahneh, Owhtoahneh zoq hoak puj saeq Yixsowhleh laux goak naeh. Dix bae dungzsaeuh, Yez'hoahhuah hawj Guxsanz-liqsaxteanh laux hongz Yaqlanh doak dawj mungz dix, dix zoq saeuh bex Guxsanz-liqsaxteanh. 11Yaq puj Yixsowhleh zoq ndaej yuqvangq siqsip bi. Doaklaeng Owhtoahneh goanz lug zaiz Jiznahswz naeh tai.
Yixhuh
12Puj Yixsowhleh daeuq hoak sowh saeh Yez'hoahhuah ywjhwnq naeh, Yez'hoahhuah zoq hawj Yizjizlunh laux hongz Moahyaq naeh haen, qiz puj Yixsowhleh, zawh cholaeng puj Yixsowhleh daeuq hoak sowh saeh Yez'hoahhuah ywjhwnq naeh ijyoh. 13Yizjizlunh daj puj Yaqmaenh, puj Yaqmaxlih hoak baih, maz saeuh puj Yixsowhleh, longx aen chaenh maex mba'baet naeh. 14Yaq puj Yixsowhleh zoq kvej Yizjizlunh laux hongz puj Moahyaq naeh sipbiad bi.
15Puj Yixsowhleh vanz Yez'hoahhuah jeuq, Yez'hoahhuah zoq yaeuj goanz ux jeuq paenqdix. Goanz naeh rongx hoak Yixhuh, dix zawh puj Benqyaqminh, zawh lug zaiz Jizlaz, dix twsaix. Puj Yixsowhleh hawj dix aeu sowh sangqgungq naeh bae hawj Yizjizlunh laux hongz puj Moahyaq naeh. 16Yixhuh hoak maeg remz ux daengz song baih kaeuj, riz azmax ux,#3:16 Azmax ux riz baenzzaq qensog mwz taeng byai mungz naeh. aeu naep ka sa dix, hawj sowj yaz zoah. 17Dix aeu sowh gaenq sangqgungq naeh hawj Yizjizlunh laux hongz puj Moahyaq. Laemh goanz Yizjizlunh naeh byauz taeuq. 18Yixhuh aeu sowh gaenq sangqgungq naeh soangq ndae yaq, dix zoq nemz sowh puj tam koang'hoq daeuj naeh dauh mwz. 19Gaj hoakri dix daeq ndaw Jehzah dih kaeuz dij sen zaj naeh dauh maz dih Yizjizlunh naeh, dix daj Yizjizlunh hax: "Laux hongz aj, gux miz diauq ux hawj gaj mawz ruxndeq zuxbaenz." Laux hongz hax: "Laekgaj goanq." Yaq sowh puj yuq haenz laux hongz kvej naeh zoq og bae baihnog. 20Yixhuh daeq mwz doqnaj laux hongz, laux hongz goanzdoag yuq aen rownz gowxzumx naeh naengh. Yixhuh hax: "Dij Sen hawj gux aeu kauq dix haxdoq mawz." Laux hongz zoq daeq aen daengq dix naengh naeh dwnq maz. 21Yixhuh zoq aeu mungzsaix dix it maegremz dix aeu gowx kasa naeh maz, nyoak bae dongx laux hongz, 22daengz remz daj gaenz laemq mwz ndaw nauq, remz gaz ndaw nowxbiz laux hongz, Yixhuh mboq it remz og daeuj, remz menq bae daeux diak baihlaeng. 23Yixhuh og bae, ngaemz baegdu, daep jezsaq. 24Yixhuh og daeuj yaq, puj koij laux hongz zoq maz, paenqdix leztaen baegdu daep jezsaq, zoq hax: "Laux hongz toj yuq ndaw dix leuhnyaj mboqyaq." 25Paenqdix taj bae taj dauh, baegdu goj naengzgaj mboq aj, paenqdix yuq mboq vangq zoq aeu jezsaq maz aj du, wjwmx! Zaeuj paenqdix haeuz ed dihndin, tai yaq. 26Gau paenqdix taj bae taj dauh naeh, Yixhuh haeuz lenh ni yaq, dix gvaq dih kaeuz dij sen zaj naeh, lenh mwz ndaw Cizyizlaz. 27Dix bae taeng yaq, zoq yuq ndaw bo'mbanj Yixfahleanh naeh baeuq kaeu dij mbej, puj Yixsowhleh nowngz dix daeq ndaw bo'mbanj naeh daeuj, dix daeq baihnaj paenqdix. 28Dix daj paenqdix hax: "Gaenqsu nowngz gux, Yez'hoahhuah haeuz hawj sowh puj daj su hoak dangqbaih naeh, zoq zawh hawj puj Moahyaq doak dawj mungz su yah." Paenqdix zoq nowngz dix bae, saeuh bex longx ndaej ka dah Yezdanq dih kamj dah naeh, dej puj Moahyaq, mboq jinx goanz rawz gvaq. 29Zwz naeh, paenqdix kaj puj Moahyaq teq fanh goanz ux naeh, sowh puj paenqdix kaj naeh zawh gaj puj zaengx puj haen gangq, mboq hawj goanz rawz lenh ni gvaq. 30Hoakzaqnaeh puj Yixsowhleh saeuh bex puj Moahyaq, ndaw Yixsowhleh yuqvangq ndaej biadsip bi.
Sanzzaz
31Doaklaeng Yixhuh, miz goanz ux rongx hoak Sanzzaz, dix zawh lug zaiz Yaqnah, dix hoak saeq puj Yixsowhleh laux goak naeh. Dix aeu sowh maex ndaq dij moaz naeh saeuh puj Faezliqseq tai choakbaeg goanz, dix goj jeuq puj Yixsowhleh.
လက္ရွိေရြးခ်ယ္ထားမွု
Puj Saeq 3: ZHN
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023, Peace Publishing Co. All rights reserved.