Matiw 22
22
Shumpwoo kaah soh'var bhal'dyik
(Luk 14:15-24)
1Jesu sokihkyeen kihh kadpwoo prist wu'nan kihh mwoohnan ni mwopp sh'i shumpwoo le, 2“A'n p'ee kammshiiy dhenglong khi Naan ni a sh'i m'ee miskakhamm w'u kihh t'ang sh'in gag m'ee soh'var mhi rettyit p'ee dyik khi em niy. 3Bhi lop m'ee kromm keeniy mwopp lhidum kihpee mwooh deh lop bhal'dyik ni diy mwopp tihh mwopp nang mwopp diy lhija p'ee so soh bhal'dyik ni, dhangg mwopp shiih ruh ja.
4“Bhi miskakhamm nyi waa lop pakk m'ee kromm keeniy ni mwopp dyi le, ‘Dum wu dyangg mwooh deh ih lop bhal'dyik ni mwopp seh wu le baa a'n dhakk soh'var ni khibhid: Ih twa kus'nihngg kihh zlang'rondong w'u ih kyeer mwakhal, yakhal baa mwopp dhakk shed ni dh'eer. Wu ja soh'var ni.’
5“Weett kihhsheh, bhi gurum ni mwopp naah ruh m'ee yit ru; pakk reen duam ruh yaghal bhokk ruh, pakk mwopp y'aa arr w'oor keeru. 6Pakk mwopp yak kromm khi miskakhamm ni mwopp sh'in nyangg mwopp harr mwopp twa mwopp. 7Kai, tukhup miskakhamm ni vullug pwetd, bhi shenn mhi'lek keeniy mwopp dum twa mhi-tu'kaah mhizeh ni mwopp diy, yakhal mwopp twakhan khishikhitt khimwopp kihh wus.
8“Bhi miskakhamm ni satt pakk m'ee kromm keeniy dyi mwopp le, ‘Baa mwopp dhakk soh'var mhi bhal'dyik nyi khibhid, dhangg mwooh deh ih lop bhal'dyik ni mwopp seh a m'ee fafflahan gurum wu'baan. 9Pee'mhinyi, bhi wu pwat wu duam kih tihleng-arr w'u khishikhitt ni tihh wu nang kapp gurum w'u wu mak kad mwopp diy lhija p'ee so soh'var bhal'dyik ni.’ 10A nyi seh bhi kromm ni mwopp pwat duam kih tihleng-arr w'u khishikhitt ni, bhi mwopp chakk koohmhirangg w'u mwopp mak kad lhija, mwoohrett kihhsheh kihh mwoohbis weett tu'ru'ru'ru, bhi luh soh'var bhal'dyik ni gam zhwett kihh mhizeb mwopp.
11“Dhangg kaarooh miskakhamm ni ji p'ee naah mhizeb ni mwopp, bhi naah m'ee gwooh wu'nyi noott bh'aar bhal'dyik ni nhighin. 12Bhi nang phi nyi le, ‘Gwoh m'aan, lukk a ranggyeh ghi ji ghi dhel bihzeh noott bh'aar bhal'dyik ni ayeh?’ Gwoh ni tong dh'ok tihkk, kad bii mhi satt wonn.
13“Bhi miskakhamm ni satt mhi-dhakkshed ni mwopp le, ‘Wu y'aa gwoh mhize ni wu dyan, sarr kihh kwag, wu put wu meng kihtekhell dhighin pee'kwoo, pee w'u gurum mwopp p'ee shwat wall diy, mwopp shum aghaz ruh.’
14“Ih kihh satt wunn, mwooh pih-peet dhess, dhangg mwooh bih-blihp a lee kyekk.”
T'al kaah kwat wapp Kaisar
(Mar 12:13-17; Luk 20:20-26)
15Bhi pakk Farisiiy mwopp pwat dum y'aa kukhul-bhellepp w'u tihh mwopp kad Jesu diy y'aa dhighin m'ee pwoo w'u shaahseh diy satt kih k'an. 16Bhi mwopp lop m'ee zheppkamm keeru dangshag kihh pakk mhi-tuppbwoonn Hiridus mwopp lhidum kihpee Jesu diy. Bhi mwopp satt nyi le, “Gukamm, mu man mu le gha a guzeenn, yakhal ghi kihh kamm arr khi Naan shi'zeenn. Baah ghi kihh kakk bii w'u m'ee gurum kihh satt kaah gha mou, p'ee baah ghi kihh naah yitlwaann khi gurum mwopp mou. 17T'o, ghi satt munn, a mihyeh a p'an keegha? Nyi dihhreh tihh mu kwat wapp Kaisar aa'h, h'aa shiih'pee nyi dihhreh ayeh?”
18Jesu man p'an wu'bis khimwopp, bhi satt mwopp le, “N'an m'ee mhi-raanaan wu'baan! Wunn phi l'ang l'eer a'n a p'ee mihyeh? 19Wu pihh m'ee shaghal w'u wu kihh kwat wapp ni dyishig seh a'n ih naah.” Bhi mwopp pihh dinarius nyi. 20Bhi nang phi mwopp le, “A ran'ryiin wuyeh se dyikihh? Yakhal a le'sarr mhi wuyeh se dyikihh?”
21Bhi mwopp lapp nyi le, “A mhi Kaisar e'h.”
Bhi satt mwopp le, “Mihh nyi a kihhsheh, bhi wu pihh bii w'u a mhi Kaisar, Kaisar ni; yakhal wu pihh bii w'u a mhi Naan, Naan.”
22Kaarooh mwopp klihng kihhsheh bhi aa'phi mwopp pwetd. Bhi mwopp reen yet nyi diy.
T'al kaah yakhal kih peemuutt kihh dyik
(Mar 12:18-27; Luk 20:27-40)
23P'ar mihhseh ni bhi pakk m'ee Sadusiiy, w'u a mwooh kihh sh'in kamm le baah m'ee yakhal kih peemuutt nhighin mou, mwopp ji kihpee Jesu diy kihh m'ee t'al. 24Mwopp nang phi nyi le, “Gukamm, Musa gyet kamm munn le, mihh gurum diy m'uut noott la zhepp, bhi nyi a ching tihh emnhikhin nyi looh mat'kaah ni tihh la zhepp diy kih shumm kumm emnhikhin#22:24 WSW 25:5-10:. 25T'o, gyet mwopp cham sh'in m'ee zheppdaass w'u a emnhikhin shag pwoghovel nihghinse. Gwooh'shee lapp mat, bhi m'uut noott la zhepp, bhi mat khinyi dheeh emnhikhin nyi. 26A bii w'u kad wu'vel kihh wu'kunn seh, shi'baa sam putt sihkhitt-pwoo khimwopp wu'pwoghovel zag. 27Kyess nyi bhi mat ni wu'nyi m'uut zag. 28T'o, ghi satt munn, mat mihhseh ni p'ee p'ar dheeh a mat khi m'ee mwopp wu'ranggyeh p'ar yakhal kih peemuutt ni, p'ee gyet mwopp weett pwoghovel cham looh nyi mat?”
29Bhi Jesu lapp mwopp le, “Wu pyallap pee'rooh baah wu man Ran'Wubhangg kooh maa'pee khi Naan mou. 30P'ar yakhal kih peemuutt bhi baah m'ee dyik nhighin, p'ee gurum mwopp p'ee dheeh a kaa mhi'lop w'u kih dhengNaan se. 31Dhangg p'ee pwookaah yakhal kih peemuutt, bhi kan wu khi cham t'ang bii w'u Naan satt wunn maah? Bii w'u satt le, 32‘A a'n a Naan khi Ibrahim, Naan khi Ishaku, kihh Naan khi Yakub.’ Naan ni a Naan khi mwooh mih-mwarrap mou, Nyi a Naan khi mwooh kihhseen.”
33Kaarooh dw'uu gurum ni mwopp klihng bii w'u Jesu satt seh, bhi aa'phi mwopp kihh kamm khinyi.
W'aar w'u mett kakhar w'aar weett
(Mar 12:28-34; Luk 10:25-28)
34Kaarooh Farisiiy mwopp klihng rooh Jesu dwall Sadusiiy mwopp, bhi wu'mwopp bhal'kaah ruh kihshag. 35Bhi m'ee Guman-w'aar dhighin mwopp sh'in t'al tihh kamm Jesu diy le, 36“Gukamm, a m'ee w'aar wu'rangg mett kakhar w'aar weett dhighin W'aar khi Naan?” 37Jesu lapp nyi le, “A w'aar w'u satt le, ‘Ghi wall Daah Naan keegha sh'i phitukhup gha kihhdihng'dihng, kihh seen gha, kihh en gha weett zag.’ 38A mihhse a w'aar wu'shee, w'u mett kakhar weett. 39W'aar wu'vel a kaa mihhse ni zag, w'u satt le, ‘Ghi wall shaar'tong keegha kaa sak se zag.’ 40Kapp W'aar kihhsheh kihh r'an khi mhi-wanggshiiy mwopp weett kihh dyarrang a kaah w'aar wu'vel mhize ni mwopp.”
Kristi ni a l'aa khi wuyeh?
(Mar 12:35-37; Luk 20:41-44)
41Kaarooh Farisiiy ni mwopp nhighin kihshag, bhi Jesu nang phi mwopp le, 42“A mihyeh a p'an keewu kaah Kristi? Wu kihh m'ang wu le nyi a l'aa khi wuyeh?”
Bhi mwopp lapp nyi le, “Nyi a em khi Dauda 'y.”
43Bhi Jesu nang phi mwopp le, “Dheeh shitt a ranggyeh bhi gyet Dauda peet Kristi ni ‘Gwoohyon,’ kaarooh nyi kaah kadpwoo sh'i Riin? P'ee Dauda ni gyet satt le,
44“ ‘Daah Naan satt Gwoohyon keena le:
“Tong gha se sarrsoh keena
harr seeh ih l'e tihh shaar'lek keegha
mwopp zhwam pwoo ru diy yill tekhem gha.” ’#22:44 KwN 110:1
45Dheeh kad Dauda sh'i kaah niy peet Kristi ni ‘Gwoohyon,’ bhi shitt a rangg Kristi ni diy tong a em khinyi ayeh?” 46Baah menguh mak pring pwoo w'u satt seh mou. Yakhal nhighin bhi baah menguh kamm nang mee'bii dyi phi nyi mou.
လက္ရွိေရြးခ်ယ္ထားမွု
Matiw 22: Chakfem
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©️2022 Luke Initiative for Scripture Translation