Yohanna 14
14
Jesu t'en-kihr zheppkamm keeniy mwopp
1“Tapp phitukhup wu wad mou. Wu pihhzeenn Naan yakhal wu pihhzeenn wu'an zag. 2Tihngg tuluh khi Daa, bhi luh'tong mwopp nhighin dhess. Kaddyinn nyi a kihhsheh mou, bhi dyinn a'n p'ee satt nyi wunn. Mwasseh ih kihh dum nhighin p'ee dhakk pee wunn. 3Bwoonrooh ih dum ih dhakk pee wunn, bhi a'n p'ee b'aa ji p'ee lapp wunn lhidum kihpee na diy, tihh pee w'u wu'an diy, bhi wu'wunn p'ee tong a nhighin zag. 4Wu man arr pee w'u a'n p'ee dum diy.”
Jesu a arr, a nyi a zeenn, a nyi a seen
5Tomas satt nyi le, “Gwoohyon, baah mu man pee w'u ghi kihh dum diy mou, dhangg sh'in a rangg bhi mu man arr ni ayeh?”
6Jesu pring nyi le, “A a'n a arr, a a'n a zeenn, a a'n a seen. Baah m'ee gurum kihh mak ji kihpee Daa diy mou, seeh y'aa arr a kihpee na diy. 7Mihh wu man a'n rih-rett, bhi wunn p'ee man Daa zag. Yakhal mwasseh kihhshe bhi wu man nyi, yakhal baa wu naah nyi.”
8Bhi Filip satt nyi le, “Gwoohyon, kum'bokk, gha dyinggyit Pag ni munn bhi bad keemu kwat.”
9Jesu lapp nyi le, “Hah, Filip! An kihshag kihh wunn phigyet diy, dhangg harr mwasseh bhi ghi man a'n s'ang? Ai gwooh mihh cham naah a'n bhi baa naah a Daa seh. Dheeh a mihyeh l'e bhi ghi satt ghi le, a'n dyinggyit Daa ni munn ayeh? 10Kan ghi pihhzeenn rooh a'n dhighin Daa, yakhal Daa wu'nyi zag dhighin a'n maah? Pwoo w'u a'n phi yak nyi wunn se a m'aan mou, a Daa w'u dhighin a'n phi sh'in dhakk keeniy. 11Wu pihhzeenn pwoo keena w'u ih satt ih le a'n dhighin Daa yakhal Daa wu'nyi dhighin a'n, kooh wu pihhzeenn p'ee dhakk w'u a'n phi sh'in mwopp se. 12Ih kihh satt a zeenn wunn, gwooh mihh pihhzeenn a'n bhi nyi p'ee sh'in dhakk w'u wu'an ih kihh sh'in. Baah a kihhsheh kyekk mou, harr nyi p'ee sh'in dhakk w'u mett mihhse mwopp, p'ee wu'an p'ee waa dum kihpee Daa diy. 13Koohmeeh w'u mihh wu dhang dhighin shumm nah, bhi a'n p'ee sh'in nyi wunn, tihh Daa kad lappdhess diy lhiwaa a'n. 14Koohmeeh w'u mihh w'u dhang dhighin shumm nah, bhi a'n p'ee sh'in nyi.”
Jesu le riy p'ee lop Riin Wu'bhangg
15“Mihh wu kihh wall a'n, bhi wunn p'ee kyeer pwoo keena, 16a kihhsheh bhi a'n p'ee dhang phi Daa, bhi nyi p'ee pihh m'ee Gu'Tenkihr dyi wunn, tihh tong diy kihshag kihh wunn harr ngaa-ngaa. 17Nyi a Riin mhi Zeenn. Baah yill ni p'ee mak lapp nyi mou, p'ee baah kihh mak naah Riin ni kooh mak man nyi mou. Dhangg wu'wunn wu man nyi, p'ee nyi naar wu, yakhal nyi p'ee tong dhighin phitukhup wu. 18Baah a'n p'ee yet wu dheeh kaa zhepp lhikaah se mou, a'n p'ee b'aa ji kihpee wu dyi. 19Pee dheeh lee bhi baah yill ni p'ee naah a'n dyi mou, weett kihhsheh bhi wu'wunn p'ee naah a'n. Pee'rooh a'n kihh seen, bhi wu'wunn zag p'ee kwed kihh seen. 20P'ar puus mhizeh ni bhi wunn p'ee man wu le a'n dhighin Daa, yakhal wu'nyi dhighin a'n, yakhal wu'an dhighin wu'wunn. 21Kapp gwooh lapp pwoo keena yakhal kihh kyeer, bhi a nyi a gwooh kihh wall a'n. Gwooh kihh wall a'n bhi Daa p'ee wall nyi, yakhal wu'an zag p'ee wall gwoh ni; bhi a'n p'ee dyingg san gwoh ni.”
22Bhi Yahuda, (Baah a Yahuda Em Iskaryoti mou) satt Jesu le, “Gwoohyon, a mihyeh l'e bhi gha p'ee dyingg sak a munn; baah a yill ni mou ayeh?”
23Jesu lapp nyi satt le, “Gwooh kihh wall a'n bhi nyi p'ee kyeer kamm keena, bhi Daa p'ee wall gwoh ni, bhi munn p'ee ji tong kihshag kihh gwoh ni. 24Gwooh baah kihh wall a'n mou, bhi baah kihh kyeer kamm keena mou. Kamm w'u wunn phi klihng nyi se, baah a maan'nah mou; a mhi Daa w'u lop a'n.
25“Ih satt bii mihhse mwopp weett wunn bhi a'n kudyi kihshag kihh wunn. 26Dhangg Gu'Tenkihr, w'u a Riin Wu'bhangg w'u Daa p'ee lop nyi dhighin shumm nah, p'ee kamm bii mwopp weett wunn, yakhal kakkder w'u kihh koohmeeh w'u ih cham kamm wunn. 27Tongkakhamm a bii w'u ih yet kihshag kihh wunn; ih pihh Tongkakhamm keena wunn. Baah tongkakhamm keena ni a kaa tongkakhamm w'u yill ni kihh pihh se mou. Tapp phitukhup w'u wad, kooh kihkhirmuut yak wunn mou.
28“Dyinn baa wu klihng ih satt ih le, a'n p'ee dhel, dhangg a'n p'ee b'aa ji kihpee wu dyi. Kaddyinn wu kihh wall a'n bhi dyinn wunn p'ee sh'in rettyit, p'ee ih kihh dum a kihpee Daa diy, p'ee Daa mett wu'an. 29A satt mihhse wunn dhangg bii ni kihh sh'in, tihh mihh p'ar sh'in diy bhi wu pihhzeenn. 30An p'ee kadpwoo kihh wunn dyi pwetd mou, p'ee miskakhamm khi yill ni baa kihh ji; dhangg baah nyi kihh bhall kaa na mou. 31Weett kihhsheh, nyi a ching tihh yill ni man le ih kihh wall Daa. Wu yakhal munn mu reen bihze.”
လက္ရွိေရြးခ်ယ္ထားမွု
Yohanna 14: Chakfem
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©️2022 Luke Initiative for Scripture Translation