Yakub 1
1
1Lop'ran mihhse put a sarr nah Yakub, kromm khi Naan kihh mhi Puup mu Jesu Kristi.
Ih kihh shenn lop'ran mhize lhidum seghen khi Isra'ila w'u kaghapaad baa'vel, w'u mwopp chiit meett-meett dhighin yill ni. Ih kihh tog kihh wunn.#Mat 13:55; Mar 6:3; Dkz 15:13; Gal 1:19
Gung dhighin kammpee
2Em'naa mwopp, yet tihh dheeh wunn a bii rettyit wu'yon kadmihh v'ur kammpee mhi zheell mwopp shi'nyi-shi'nyi taah kaah wuh; 3p'ee wu man wu le kammbhall mhi pihhzeenn keewu kihh l'e tihh wu kwed kihh gung. 4Wu yet tihh gung gam dhakk keera, tihh khibhid wunn diy kihhdihng, harr baah wu taah wu kat dhighin mee'bii mou. 5Mihh en'dyee diy wonn meeh muh, bhi dhang phi Naan, g'u pihh bii koohweeh yallaz noott shwatyit, bhi nyi p'ee pihh nyi gwoh nyi. 6Dhangg yet tihh gwoh ni dhang a sh'i pihhzeenn, baah kihshag kihh sakkrihkk mou; p'ee gwooh kihh sakkrihkk a kaa liiss kur'am w'u kutt kihh tupp blung lhidum se. 7Tapp gwooh kihhsheh ni kihh naah seh le riy p'ee lapp mee'bii kihpee Naan diy mou. 8Gwooh kihhsheh ni a g'u p'an vel-vel, g'u reg-reg dhighin kapp bii w'u kihh sh'in.
9T'o, yet tihh emnhikhin mu Gu-PwooNaan w'u a wu'pyaah nhighil shin dhighin rooh Naan baa eep nyi. 10Dhangg zag, yet tihh Gu-PwooNaan w'u a gulong nhighil shin dhighin rooh Naan sam kihh wu'nyi. P'ee nyi p'ee p'ar wonn a kaa pel'pee dhighin dh'em se. 11P'ee puus kihh k'aa kihh tihrr-puus w'u yaa'pee kakk'chiu bhi kihh fyaa dh'em mwopp, bhi l'e tihh p'el khimwopp chaat, yakhal wad yillim khimwopp. Gulong p'ee p'ar wonn a kihhsheh zag dhighin orr t'ang long keeniy.
12Rettyit a mhi gwooh g'ung dharr bhall-bhall dhighin kammpee, p'ee mihh sokokhorong, bhi nyi p'ee p'ar lapp gossoklong mhi seen w'u Naan bwakhatbhellepp mwooh kihh wall riy.
13Mihh gurum diy dhel dhighin zhwaan'pee, bhi tapp diy satt le wai a Naan phi zhw'aan riy mou. P'ee baah mwopp kihh mak zhw'aan Naan tihh sh'in wu'bis diy mou; h'aa kooh wu'nyi zhw'aan menguh tihh sh'in shigbis diy mou. 14Zhwaan'pee kihh ji gurum kadmihh cha'khar khinyi wu'bis diy del nyi harr shwaakaah nyi. 15Mihh cha'khar wu'bis ni gam, bhi kihh l'aa a shigbis; mihh shigbis yon khibhid, bhi kihh l'aa a muutt.
16Em'naa mwopp, phikrihpp nah mwopp, tapp menguh d'ihk munn mou. 17Kapp zhukhum wu'rett, w'u a zhukhum w'u khi-khibhid, bhi kihh put a kihpee Naan sam diy; Naan gu l'e bii w'u mwopp kihh bhanggpee phikihtihngg. Nyi w'u baah kihh shee diy kaa ryiin w'u kihh shikhir se mou. 18A Naan ni naah rett riy tihh la munn diy sh'i pwoo mhi zeenn, tihh mu dhen diy a kaa shee-nung se dhighin kapp bii w'u Naan ni l'e.
Klihng pwoo Naan wu sh'in dhakk kihh nyi
19Em'naa mwopp, phikrihpp na mwopp, ih kihh dh'om tihh wu man mihhse. Yet tihh koohweeh dhen a g'u klakk klihng bii; dhangg tapp diy dhen a g'u klakk pring orr, kooh klakk lang'tukhup mou; 20p'ee baah tukhup khi gurum kihh l'e tihh gurum kwed kihh shigrett w'u Naan kihh dh'om tihh mu kwed kihh nyi mou. 21Pee'mhinyi bhi wu kor kapp p'an wu'bis kihh v'ur dhakk wu'bis w'u kihh piin dhen b'uu se, bhi wu lapp pwoo w'u mwopp kopp dhighin wunn seh sh'i saam kihh kaah, w'u a pwoo w'u kihh mak l'e tihh wu kad bh'am a dyishig seh.
22Tapp wu kihh kihh klihng pwoo khi Naan kyekk noott kyeer ni mou. Mihh wu sh'in kihhsheh bhi wunn a phi d'ihk shuk b'aan. 23Gwooh mihh klihng pwoo khi Naan dhangg baah sh'in dhakk kihh bii w'u pwoo ni satt mou, bhi nyi a kaa gwooh naah yit niy dhighin naahdhongg; 24dhangg bwoonrooh naah bhi dhel, dhangg shikhir munder kooh kyed dyinn riy a kaarangg oh. 25Dhangg gwooh kihh nyak blihp w'aar wu'dihhreh; w'aar w'u kihh ji kihh yetshik gurum, yakhal gwoh ni sokihkyeen kihh sh'in bii w'u w'aar ni satt, baah kihh shikhir mih-munder mou, bhi Naan p'ee le'wurett nyi dhighin bii w'u kihh sh'in weett.
26Mihh gurum diy kihh m'ang le riy a Gu-PwooNaan, dhangg baah kihh mak y'aa liiss niy mou, bhi gwoh ni a phi d'ihk shin b'aan, yakhal gab'zhakham pwooNaan khinyi a bii wu'buu. 27PwooNaan w'u Puup mu Naan kihh lapp le nyi a wu'bhangg noott rab, a rooh gurum kihh kok kih lhikaah mwopp kihh shwarabkaah mwopp dhighin zheell khimwopp; yakhal kihh tapp kihh kaah niy tapp dokhor shin kihh dhakk'shin mhi yill ni.
လက္ရွိေရြးခ်ယ္ထားမွု
Yakub 1: Chakfem
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©️2022 Luke Initiative for Scripture Translation