Malak 6
6
Bot ɛ Nazalɛt ààmyaal Yezu
1Yezu eezɛdus pɛ nyɛ nadi ɛ́, nyɛ eezɛtɔ́ sama wat bɛ nɛ bɛdjekel bɛ pɛ Nazalɛt ghaada nyɛ nawyee kɔ tak ɛ. 2Dwoo saba, nyɛ nadi elyo bot tɔ ndjaa mendjaala mɛ eYuda. Zukamwaa nɛ mot nadi tin ɔ naadyeebadjoka ɛbuɛpe. Bɔɔ ekeke náá: «Yak ɛ́ yaa kwaambi ɛlyo ɛ bot? Ɛzɛ djɛ nyɛ mbi yak etsoŋ nɛ endem e mɛbwala mɛ nyɛ di nɛ yɛ'aak? 3Ye tok nyɛy di salpande, mɔn Maali, mɔn-nyɛɛg ɛ Zak bɛ nɛ Zozɛs, nɛ Zuud, zɛnɔɔ Simɔŋ é? Bɛkɛl tok wak mena nɛ bɛnɔɔ?» Yenek djas naasa náá, nyɛ di tyee boo ɛbɛk dum nɛ nɔɔ. 4Wɔ gwaa, Yezu zɛbɔɔza nɛ nɔɔ náá: «Ngoolel-Mɛkpa ɛ Zɛɛb dyeebaduwalaa ɛ́, pɛ kyee sis, ààbɛ pɛ kɔ dɛl ɛ nyɛ nabyel kɔ tak ɛ, nɛghu tɔ ndjaŋ'ɛ nɛ tɔ bil'ɛ.» 5Tin, nyɛ nabɛ ɛ́ ààsa dhiiti ndem mɛbwala, bhii yii nyɛ nazokɛl bɛdhiiti membel mɛmbɔ da bɛ ɛ́ tsak ɛ. 6Nyɛ nadi edjoka dáa bot ɛ dɛl ɛ lɛ nadi ààdum koŋ nɛ nɛ ɛ.
Lwomel bɛdjekel bɛ kam nɛ bɛbá
Bhii tak, Yezu naazɛkɛ elyo bot Mɛkpa ɛ Zɛɛb kɔ mɛl mɛ nadi é ngwoob dɛl ɛ lɛ ɛ. 7Nyɛ eezɛdjóo bɛdjekel bɛ kam nɛ bɛbá, nyɛ eezɛkyeed bɛ bɛbá-bɛbá. Wɔ gwaa, nyɛ zɛdjɛ bɛ eghɛŋ kɔ embee esisim. 8Nyɛ eezɛlu bɛ náá: «Sa mot àànɔɔ sonok wat, nyɛ neetɔ́ nɛ yɛ mɛdjoŋ. Bi zotɔ́ ɛ́, nɛ sek. Sa mot àànɔɔ mapa, àànɔɔ ɛkoo, àànɔɔ-nɔŋak meea tɔ mengwyɛ men. 9Bɔtka bɛmɛpapa, sa mot àànɔɔ dhiiti kuwa étɛp ɛkɛswoola penek.»
10Nyɛ eebaazɛke nɛ nɔɔ náá: «Bi ɛ kum dhiiti di ɔɔ, dika tɔ ndjaa bi aasulal ɛ. Dika é di'enek kɛkum dwoo bi aadus tin ɛ. 11Bot ɛ dɛl ɛpɛɛ náá, bi nàsulal pɛ daa lɔɔ ɔ, nɛghu bɛ kapɛɛ ɛ́ ɛgwak bin ɔ, kpaaka yebɔ, da bi ɛ́ kut bɛ piib di é mɛko men ɛ. Yɛ aadi ɛ́, tyee mwana étɛp embee esesɛɛ bɔɔ.» 12Bɛdjekel eezɛtɔ́, kɛgoola nɛ bot djas náá, bɛ liig elyem. 13Bɔɔ zokasɔ bɛtɛ nɛ embee esisim. Bɛtɛ nɛ membel naatsak, bhii bɛ nadi elɔɔb bɛ mul ɛ.
Ɛsyee ɛ Zaŋ Nduuel-bot
14Ghuna ye nabɛ ɛ́, Mɛkoozi Eelood naagwak menduk ɛ Yezu etɛɛ náá, dék'ɛ nabɛ ɛ́, yɛ eezedjala mɛl djas. Bɛdhiiti bot nadi ekeke ɛ́ náá: «Zaŋ Nduuel-bot naagwyɛ, gom. Yɛ ɛ́ étɛp tak ɛ nyɛ di esa bɛtɛ nɛ yenek endem e mɛbwala.» 15Bak náá: «Yɛ ɛ́ ngoolel-Mɛkpa ɛ Zɛɛb, Eli!» Yak kyee bot náá: «Yɛ ɛ́ ngoolel-Mɛkpa ɛ Zɛɛb, dáa dhiiti ngoolel-Mɛkpa ɛ Zɛɛb na mwa!» 16Dáa Eelood nagwak sa bot nadi elii-lii kɔ ɛsu ɛ Yezu ɛ, nyɛ ɛ́ boozɛke náá: «Yɛ bɛ Zaŋ ɔɔ, ye nabɛ ɛ́, mɛ naazelwom náá, nyɛ tsakaa, nyɛy ɛ́ baagom e!»
17Nɛ tsɛɛtsɛ ye nabɛ ɛ́, Eelood naalwom náá, bɛ mɛt Zaŋ kɔɔl nyɛ é membok kɔ ɛsu ɛ Eeloodhiaad, mwaa tel Filip, nyɛ nadɛk ɔ. 18Etɛɛ náá, Zaŋ naake nɛ Eelood náá: «Yɛ ààgoka náá, wɔ dɛk mwaa mɔn-nyoog!» 19Eeloodhiaad nadi ebhina Zaŋ ɛlyelɛpe. Nyɛ nadi esaa dáa nyɛ aasa étɛp nyɛ neegó nyɛ. Tin, nyɛ nabɛ ɛ́, ààbela ghwyil ɛsa. 20Eelood nadi ekaab Zaŋ, etɛɛ náá, nyɛ nadi egu náá, Zaŋ nadi ɛ́ mot edɛɛ nɛ epiki. Nyɛ nabɛ ààkwyɛl náá, nyɛ góaa. Nyɛ nadi ekwyekwyɛl ɛgwak mɛlyo mɛ ɛbuɛpe, ye nakoozodi náá, mɛlyo mɛ tak naadyeebadhedheeg nyɛ mɛsel ɛbuɛpe.
21Tinaak, dwoo ɛbyoŋ ɛ Eelood di eduwal dwoo ɛbyel ɛ lɛ ɛ, ye nabɛ nɛ Helodhiaad ɛ́ mbɛɛ ɛwala étɛp nyɛ neesa sa lyem'ɛ nadi ekwos ɛsa ɛ. Ye nabɛ ɛ́, Eelood naadjóo bɛtɛ nɛ ekukuma di esa mɛsa bɛ nɛ nɔɔ ɔ, nɛ ekukuma e esodja bɛ, nɛ boo bɛtsoŋ ɛ bot ɛ kyee dik Ghalile, bɛ zɛdɛ pɛ daa lɛ. 22Tin, ɛsyes ɛ Eeloodhiaad eezɛtuula kuku ɛbwak, tɔ koo ndjaa é di bot nadi edɛ ɔ. Bhii tak, nyɛ moo bɔl é mis ɛ Eelood. Ye nabɛ ɛ́, Eelood nɛ bɛdjoŋ bɛ naadyeebamyaala nɛ ko zɛŋ tak ɛbuɛpe. Tinaak, Mɛkoozi Eelood ɛ́ boozɛke nɛ ɛsyes ɛ moma tak náá: «Waaba sa lyem'ɔ kwyɛl ɛ, mɛ waadjɛ wɔ.» 23Nyɛ nake nɛ nɛ deenek ɛ́, nɛ tsɛɛtsɛ nɛ lyem wat: «Mɛ eetuwal myoŋ nɛ mɛsoŋ mam! Sa wɔ waawaab ɛ, mɛ waadjɛ wɔ, ye nakoozodi pes ɛyoŋ ɛ lam.» 24Ɛsyes ɛlenɔk eezɛwyis, kɛdji nyɛɛg: «Mɛ waab yé?» Wɔ gwaa, nyɛɛg zɛbɔɔza náá: «Waaba lo ɛ Zaŋ Nduuel-bot.» 25Ɛsyes eezɛsik kaab pɛ daa Mɛkoozi Eelood. Nyɛ eezɛke nɛ nɛ náá: «Mɛ kwyɛl ɛ́, wɔ djɛ mɛ nenak yak lo ɛ Zaŋ Nduuel-bot kɛla kɔ pɛt kongo na pyaaz!» 26Wɔ gwaa, ye sa Mɛkoozi Eelood nyel wɔyɔŋ nɛ ghoŋ. Tin nyɛ nabɛ ɛ́ ààbɛ nɛ dáa nyɛ pɛɛ, etɛɛ náá, nyɛ naazetuwal myoŋ nɛ mɛsoŋ mɛ é mis mɛ bɛdjoŋ. 27Tin, nyɛ eezɛlwom sodja di ebaal nyɛ ɔ, nyɛ tsaal lo ɛ Zaŋ Nduuel-bot, da nyɛ ɛ́ zyɛ nɛ yɛ. É di'enek, sodja ɛ́ boozɛtɔ́ pɛ ndjaa membok, kɛtsaal lo ɛ Zaŋ Nduuel-bot. 28Wɔ gwaa, nyɛ zyɛ nɛ lo tak kɔ pɛt kongo, nyɛ eezɛdjɛ ɛsyes ɛ moma yenɔk, ɛsyes ɛ tak ɛ́ boonɔɔ yɛ, kɛdjɛ nɛ nyɛɛg. 29Dáa bɛdjekel ɛ Zaŋ nagwak deenek ɛ́, bɛ ɛ́ boozɛnɔɔ muu'ɛ, kɛdel tɔ ɛvit.
Yezu eezɛdjɛ botom bɛmil ɛtɛn edee
30Bhis ɛbula ɛ lɔɔ, bot ɛ lwoma eezɛboma pɛ daa Yezu, bɛ moo tin ebaŋa nyɛ esesɛɛ bɛ nasa ɛ, nɛ mɛlyo mɛ bɛ nadi elyo ɛ djas. 31Tinaak, bot ɛ nadi ezyɛ, nɛ bot ɛ nadi esik ɔ naadyeebabu, ààbɛ nɛ ɛwala di náá, bɛ nɛ bɛdjekel bɛ dɛ edee. Yezu ɛ́ boozɛke nɛ bɛdjekel bɛ náá: «Dhaka, mena tɔ́ka pɛ kasak di etseta nɛ bot ɛ, étɛp mena neekɛwalaka batsa.» 32Bɛ eezɛtɔ́ tɔ elɛɛd, bɔɔ bɛmet, pɛ bot di ààbɛ ɛ. 33Ghuna bot ɛbuɛpe naabee ze bɛ nadi etɔ́ ɛ. Tin, pɛ bɛ nadi etɔ́ ɛ́ nadi eguaa, bhwak djas zɛsum kaab é ɛtɔ́ pɛ kyee Yezu nɛ bɛdjekel bɛ nadi etɔ́ ɛ, bɔɔ batakɛkum é di tak ɛsok nɛ Yezu bɛ nɛ bɛdjekel bɛ.
34Dáa Yezu nasul tɔ elɛɛd ɛ, nyɛ naabee ɛdhuu ɛ bot binɔk, wɔ gwaa, ghoŋ zɛmɛt nyɛ ɛlyelɛpe, etɛɛ náá, bɛ nadi ɛ́, dáa mɛsaa mɛ ebhata di ààbɛ nɛ mbaalel ɛ. Tin, nyɛ moo zɛlyo bɛ kɔ ɛsu ɛ bɛtɛ nɛ esonok. 35Dáa bɛ nabee náá, dwoo moo ɛ́ bikoko ɛ, bɛdjekel bɛ ɛ́ boozɛtiila pɛ daa lɛ. Bɔɔ nɛ nɛ náá: «Dwoo eezeleega, tɔ kakoŋ'ak, ye tok nɛ dɛl. 36Swaala bot bak pɛ bɔɔ mɛl nɛ pɛ tɔ epɛt ee di é mengwoob'aak, bɛ neekɛbɔm edee e dek!» 37Tin, wɔ gwaa Yezu zɛbɔɔza nɛ nɔɔ náá: «Djɛka bɛ edee biyɔ bɛmet!» Bhii tak, bɛ eezɛdji nyɛ náá: «Wɔ kwyɛl ɛ́ náá, bis kɛbɔm emapa di edhenye bɛdhet-ɛbá (200) étɛp bis needjɛ bot bak bɛ needɛ#6.37 Pɛ tɔ mɛkana Mɛkpa Zɛɛb nakwyalaa sok ɛ, bɛ ke ɛ́ 200 dhenye. Ye kwyɛl ɛlyaal ɛ́ efute epata mɛsa mɛ bɛngɔn ɛtɛn nɛ ebá..» 38Nyɛ ɛ́ boobaazɛbɔɔza nɛ nɔɔ náá: «Bi ɛ́ nɛ emapa edhen? Pookokɛgwyákeka.» Bhii bɛ kakɛgwyák ɛ, bɛ ɛ́ boozɛlɛɛ nyɛ náá: «Emapa etɛn nɛ bɛsu ɛbá.» 39Tin, Yezu ɛ́ boozɛlɛɛ bɛdjekel bɛ náá, bɛ dil bot djas mendiindil, mɛbwak nɛ mɛbwak kɔ ebes eka. 40Wɔ gwaa, bot zɛdisi zɛɛga lɔɔg bot dhet (100), bak mɛkam-mɛtɛn (50). 41Bhii tak, Yezu eezɛnɔɔ emapa nɛ bɛsu binek, nyɛ eezɛben mis pɛ ɛko, zɛghaapɛɛ Zɛɛb. Nyɛ eezɛpyak mapa, nɔɔ, djɛ bɛdjekel bɛ etɛɛ náá, bɛ needjɛ bot ɛ bɛ nanɛɛg mendiindil ɔ, dɔɔ nɛ bɛsu ɛbá bɛ nadi nɛ yɛ ɛ. 42Mot nɛ mot naadɛ, djil. 43Bɛdjekel bula nɛ mɛbhubhwak mɛ ebil e emapa nɛ bɛsu ɛ́ nalik ɛ, sa yɛ aalwoodal mɛbhwaa kam nɛ ebá. 44Tɔ bot ɛ nadɛ emapa binek ɔ, botom nadi ɛ́, bɛmil ɛtɛn (5 000).
Yezu eezɛkɛ kɔ dii
45Ààkobɔya bhii tak'enek, Yezu eezɛbesal bɛdjekel bɛ, bɛ ni tɔ elɛɛd, da bɛ ɛ́ tsaal, tɔ́ pɛ yii kyiid boo soob, pɛ kyee ghaada Bhɛtsaida. É di tak wat, nyɛy nyɛ ɛmet eezɛswaal zukamwaa nɛ bot binɔk, bɛ sik pɛ yɔbɔ. 46Bhii nyɛ nasilal ɛswaal bɛ ɛ, nyɛ eezɛbyet kɔ ɛtsok, kɛdjaala Zɛɛb. 47Dáa ɛgwyitok nabɛ, ye moo egwyiidela ɛ, elɛɛd nabɛ ɛ́ ye moo kuku dii. Tin, Yezu nalik ɛ nyɛ ɛmet pɛ kyiid. 48Dáa nyɛ nabee náá, bɛdjekel bɛ nadi ezuk é ɛduk, etɛɛ náá, pup nadi ebulal bɛ pɛ bhis ɛlyelɛpe ɛ. Tin, é ɛwala mɛsik é pum, nyɛ ɛ́ boozɛdu bɛ, nyɛy é ɛkɛ kɔ dii nɛ mɛko, ye nabɛ ɛ́, nyɛ naawaadhaa bɛ. 49Dáa bɛ nabee nyɛ ekɛ kɔ dii ɛ, bɛdjekel nagek ɛ́ náá, yɛ ɛ́ dim. Bɛ moo tin etsim. 50Etɛɛ náá, dáa bɔɔ djas nabee nyɛ ɛ, bɛbebwol naamɛt bɛ. Batsa deenek, nyɛ moo lii nɛ nɔɔ. Nyɛy náá: «Dika nɛ mɛghaaz. Yɛ ɛ́ mam! Nàdika nɛ bwoo.» 51Bhii tak, nyɛ eezɛni tɔ boo elɛɛd. Tin, pup eezɛtyaala. Bɔɔ djas naadyeebadjoka ɛlyelɛpe. 52Ye nabɛ ɛ́, bɔɔ àànyɔ ɛmɛt ɛsuk ɛ mɛvyɛkɛlɛ mɛ nasael dum nɛ ɛbil ɛ emapa ɛ. Etɛɛ náá, bɛ nadi ɛ́, nɛ elyem e mɛso.
Ɛtsak ɛ bot ɛ mɛbɛ́ pɛ Ghenezalɛt
53Bhii bɛ nasɛɛ dii ɛ, bɛ eezɛsel é ɛboŋ ɛ Ghenezaalɛt. 54Dáa bɛ nawyis tɔ elɛɛd ɛ, ààkobɔya deenek, bot eezɛgwyak Yezu. 55Tin, bot eezɛtɔ́ kɔ mɛl djas, nɛ é edi djas kɛnɔɔ membel. Bɛ nadidi ebebɛp bɛ ɛ́, kɔ emwaala, kɔ é edi djas bot nagwak lɛŋ ɛkwyil ɛ lɛ ɔ. 56É edi djas Yezu nadi etɔ́ ɛ, kɔ mɛl, kɔ eghaada nɛ epɛt, bɛ nadi ezyɛ nɛ membel é edi bot djas di esɛɛga ɔ. Bɛ nadi edje-djaala nɛ nɛ náá, nyɛ bet bɛ, bɔɔ bɛmet zokee-keeak ɛlɔ ɛ ndjookuwa yɛ pɛ si. Tin, bot djas namɛt nyɛ ɔ, naatsak.
လက္ရွိေရြးခ်ယ္ထားမွု
Malak 6: bkwNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© (Active), Wycliffe Bible Translators, Inc. All rights reserved.