YouVersion လိုဂို
ရွာရန္ အိုင္ကြန္

Malak 3

3
Yezu eetsik mot na sɔɔbela mbɔ dwoo saba
1Bhii tak, Yezu eebaazɛsik tɔ ndjaa mendjaala mɛ eYuda. Tɔ tak, ye nadi ɛ́, nɛ dhiiti mot ngɔt nɛ mbɔ sɔɔbela. 2Bot moo tinaak dhuuu nɛ mis é nyel ɛ Yezu egwyak nɛghu nyɛ waatsik nyɛ é dwoo saba, étɛp bɛ neepit nyɛ. 3Yezu eezɛke nɛ mot na mbɔ sɔɔbela yenɔk náá: «Wyɛla, dha! Tyaŋa tetel kuku ɛbwak.» 4Nyɛ eezɛdji ɛdhuu ɛ bot ɛ nadi tin ɔ: «Tɔ etsi, ɛyé di egoka nɛ ɛsael dwoo saba, enɛm esa ohoo, embee esesɛɛ? Ɛtsik ɛ mot ohoo, nɛghu ɛbet náá, mot gwyɛ?» Tin, bot djas moo tinaak mɔɔɔ, ààbɔɔza nyɛ. 5Yezu eezɛbulal mis, gwyák bɛ nɛ ɛbuk tɔ lyem, nyel tsak nyɛ wɔyɔŋ nɛ mbi yenek mɛlyel mɛ elyem mɛ bot ɛ tak. Nyɛ eezɛke nɛ mot tak náá: «Sɛɛba mbɔ'ɔ.» Nyɛ eezɛsɛɛb mbɔ'ɛ, wɔ gwaa, mbɔ'ɛ tak zɛsekel bula ɛnyɔɛpe. 6EFalizyɛ eezɛwyis tɔ ndjaa mendjaala mɛ eYuda. Tin, bɛ eezɛsɛɛga nɛ bot ɛ zɛɛga ɛ mɛkoozi Eelood. Bɛ nɛ bɛnɔɔ ɛ́ boozɛni é boob, étɛp ɛdjek dáa bɛ aasa étɛp bɛ neegó nyɛ ɛ.
Ɛdhuu ɛ bot eezɛdu Yezu
7Yezu nɛ bɛdjekel bɛ eezɛtɔ́ mbaka-mbaka nɛ boo soob na djato-djato e Ghalile. Wɔ gwaa, zukamwaa nɛ mot zɛdu nyɛ. Bot ɛ tak nadudus ɛ́ pɛ kyee dik Yude nɛ pɛ Ghalile, 8nɛ dɛl ɛ Yeluzalɛm, nɛ pɛ kyee dik Edhume, nɛ pɛ kyee dik yii kyiid dii Yuldɛn, zɛnɔɔ pɛ kyee dik Tiid nɛ Sidɔn. Bɛ nadi ezyɛ mɛdhuu-mɛdhuu etɛɛ náá, bɛ nabɛ ɛ́ egwak menduk mɛ sa nyɛ nasa ɛ. 9-10Dáa nyɛ naadi etsik membel ɛbuɛpe ɛ, bɛdhiiti nasuu ɛ́, bɛ ghaaga nyɛ é nyel, étɛp bɔɔ bɛmet neemɛt nyɛ nɛ mɛmbɔ mɔɔ, bɛ neetsak. Tin, Yezu ɛ́ boolɛɛ nɛ bɛdjekel bɛ náá, bɛ nɔɔ nyɛ dhiiti elɛɛd étɛp nyɛ neeni tɔ tak, ekaab náá, bot ɛzɛkɛbila nyɛ é nyel. 11É sok bot ɛ embee esisim nadi edhedhek ɔ, nadi ebee nyɛ ɛ, bɛ nadi ekwyit mɛboŋ si, si mɛko mɛ, etsim náá: «Wɔ ɛ́ Mɔn ɛ Zɛɛb!» 12Yezu ɛ́ bozɛlyak bɛ ɛlyelɛpe náá, bɛ nàsa náá, bot gu mbi mot nyɛ nadi ɛ.
Yezu eezɛsɛ́ɛ bot ɛ lwoma yɛ kam nɛ bɛbá
13Bhii tak, Yezu eezɛbyet kɔ ɛtsok. Nyɛ eedjóo bot ɛ nyɛ nasɛ́ɛ ɔ, wɔ gwaa bot ɛ tak zokazyɛ pɛ nyɛ nadi ɛ́. 14Bhii tak, nyɛ eezɛsɛɛ tɔ sama yɔɔ bot ɛ lwoma kam nɛ bɛbá yii nyɛ aadi egyee nɛ nɔɔ ɛ, étɛp nyɛ neekyeed bɛ, bɛ kɛlyo bot Mɛkpa ɛ Zɛɛb, 15dɔɔ nɛ ɛdjɛ bɛ eghɛŋ yii ɛsɔ embee esisim. 16Beeka min mɛ bɛdjekel kam nɛ bɛbá tak é: Simɔŋ, mot Yezu naget Pyɛɛd ɔ, 17Zak nɛ dhyeeb Zaŋ, bɔɔ djas bɔn Zɛbɛdɛ. Yezu naget bɛ din ɛ Bhoanɛɛghɛs, ye kwyɛl ɛlɛɛ ɛ́: bot ɛ di dáa ndum bhi ɔ. 18Andele, Filip, Bhaatelemi, Matye, Toma, Zak mɔn Alfe, Tade, Simɔŋ mot di tɔ ɛdhuu ɛ bot ɛ nadi edjóoaa eZɛlɔt ɔ, 19zɛnɔɔ Yudas Iskaliɔt, mot di náá, nyɛ aaka Yezu gha ɔ.
Bot ɛ mɛbyel ɛ Yezu eetɔ́ kɛsaa Yezu
20Bhii tak, Yezu eezɛsik pɛ ndjaa. Wɔ gwaa zukamwaa nɛ mot zɛlwood kɔ ɛbɛsɛɛ, ààbɛ nɛ dáa bɛ nɛ bɛdjekel bɛ dɛ edee. 21Dáa bot ɛ mɛbyel mɛ nagwak deenek ɛ́, wɔ gwaa, bɛ ghɛɛ, tɔ́, kɛsaa nyɛ, bɛ neebula nɛ nɛ etɛɛ náá, tɔ elo bɔɔ, bɛ nadi egek ɛ náá: «Yezu ɛpebɛ́ mɛlyet.»
Mɛbhekel mɛ bɛghaŋ ɛ mɛkana mɛ etsi
22Bɛghaŋ ɛ mɛkana mɛ etsi nadus pɛ Yeluzalɛm ɔ, moo tin eke pak'ɔɔ náá: «Nwyak ɛ́ leega nɛ Bɛlzebul, kukuma embee esisim djas.» Bɔɔ náá: «Yɛ ɛ́ kukuma embee esisim ɛ di edjɛ kɔkɔ yak mbi mɛbwala mɛ nyɛ di esɔ embee esisim nɛ yɛ ɛ.» 23É di'enek, Yezu eezɛdjóo bɛ. Nyɛ eezɛlii nɛ nɔɔ tɔ kana. Nyɛy náá: «Satan ɛ́ nɛ ghwyil ɛsɔ nyel'ɛ nyɛ ɛmet é? 24Yɛ bɛ náá, mɛsa mɛ bot ɛ ɛyoŋ ɛ wat ɛ́ ɛwaya pak'ɔɔ ɔɔ, ɛyoŋ ɛ tak aanàkwaadi. 25Baabela náá, bɔn bil wat ɛ di egónel pak'ɔɔ ɔɔ, bil tak aanàkwaadi. 26Ye kwyɛl ɛlɛɛ ɛ́ náá, Satan ɛ twak nyel'ɛ nyɛ ɛmet ɔɔ, nyɛ wa zyaala tɔ ɛyoŋ ɛ lɛ ɔɔ, tin, nyɛ aanàkwaabaabɛ nɛ ghwyil, ɛsi ɛ lɛ'enek.
27Ye tok nɛ mot di nɛ ghwyil ɛni tɔ ndjaa mot mɛnyan, da nɔɔ esa bɛ, yɛ bɛ náá, nyɛ dinaa ààpamɛt nyɛ sok, da kɔl nyɛ mɛmbɔ nɛ mɛko ɔɔ. Tin ɛ, nyɛ aadjala nɛ ɛnɔɔ esa e ndjaŋ'ɛ djas, da nyɛ ɛ́ wyis, tɔ́. 28Tsɛɛtsɛ nɛ tsɛɛtsɛ, mɛ lɛɛ bin ɛ́ náá, mesyem mɛ bot djas ɛ́ nɛ ghwyil ɛpelaa, ye nakoozodi ebyas djas bɛ byasal Zɛɛb ɛ nɛ mesyem mɔɔ djas. 29Yɛ kabɛ náá, mot eebyasal Sisim na Dɛɛ ɔɔ, nyɛ aanàkwaapelaa, etɛɛ náá, yenek ɛ́ syem na kɔm-kɔm.»
30Yezu nalii nɛ nɔɔ deenek ɛ́, etɛɛ náá, bɛ nadi eke náá: «Yɛ ɛ́ mbee sisim ɛ di tɔ lɛ.»
Tɛtɛ bot ɛ mɛbyel ɛ Yezu
31Nyɛɛg ɛ Yezu nɛ bɔn-nyɛɛg eezɛkum, bɛ eezɛtyaa pɛ kel, ààni tɔ ndjaa. Bhii tak, bɛ eezɛlwom mot, nyɛ kɛdjóo Yezu. 32Etɛɛ náá, zukamwaa nɛ mot nadi ɛ́ mendiindil nyɛy kuku ɛbwak. Wɔ gwaa, bɛ zɛlɛɛ nɛ nɛ náá: «Nyoog nɛ bɛdhyeeb bɔ, zɛnɔɔ bɛkɛl bɔ ɛ́ pɛ kel. Bɛ ɛpesaa wɔ.» 33Tin, Yezu eezɛbɔɔza nɛ nɔɔ náá: «Nyaagam ɛ́ zɛ? Da bɔn-nyaagam ɛ́ kadi bɛzɛ?» 34Wɔ gwaa, nyɛ bulal mis, gwyák ɛdhuu ɛ bot binɔk djas. Nyɛ ɛ́ booke náá: «Beeka nyaagam nɛ bɔn-nyaagam di wak é. 35Etɛɛ náá, mot di esa ɛkwosak ɛ Zɛɛb ɔ, nyɛ ɛ́ di mɔn-nyaagam, kɛl'am nɛ nyaagam.»

လက္ရွိေရြးခ်ယ္ထားမွု

Malak 3: bkwNT

အေရာင္မွတ္ခ်က္

မၽွေဝရန္

ကူးယူ

None

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ