Matye 13
13
Kana sɔsel mɛbhek
1Dwoo tak wat, Yezu nadus ɛ́ pɛ ndjaa nyɛ nadi ɛ, nyɛ ɛ́ boozɛtɔ́, kɛdisi pɛ ɛboŋ ɛ boo soob na djato-djato. Tin, nyɛ moo zɛlyo bot. 2Wɔ gwaa, zukamwaa nɛ mot zokazɛmaala é di tak. Dáa nyɛ nabee náá, zukamwaa nɛ mot naazɛsɛɛga tin ɛ, nyɛ ɛ́ boozɛni tɔ dhiiti elɛɛd, nɔɔ nyel, disi. Nyɛ eezɛpus elɛɛd tɔ dii, ɛdhuu ɛ bot eezɛlik pɛ kyiid é ngwoob dii. 3Mɛlyo mɛ nyɛ nalelyo bɛ ɛ nadyeebabu ɛ́ tɔ ekana. Tɔ ekana ee nyɛ nadi elyo bɛ nɛ yɛ ɛ, wat nabɛ ɛ́ kɔ ɛsu ɛ sɔsel mɛbhek. Tin, nyɛ ɛ́ boozɛke nɛ nɔɔ náá: «Dhiiti dwoo mot ngɔt naatɔ́ pɛ pyeeb kɛsɔs bhek. 4Dáa nyɛ nakadi emwam bhek tak ɛ, kyee wat nakwyit ɛ́ é gba. Wɔ gwaa enen zokazɛdɛ yɛ. 5Yak kyee kakwyit ɛ́ kɔ bat ɛkok. Tin, ààkobɔya deenek, mɛbhek eezɛkwyil, etɛɛ náá, di tak nadi ɛ́ nɛ ba bɔs. 6É di gwyes na ghɛ-ghɛ nakakas ɛ, wɔ gwaa mɛbhek djas zɛsyee, etɛɛ náá, ekaŋal e tak nabɛ ɛ́ ààni tɔ bɔs ɛdimɛpe. 7Yak pak mɛbhek nakakwyit ɛ́ tɔ engwyinini. Wɔ gwaa, engwyinini binek zokawyee, kala kɔ mɛbhek ààbɛ nɛ dáa mɛbhek wyee ɛnyɔɛpe. 8Tin, mɛbhek mɛ nakakwyit kɔ mbɛɛ bɔs ɛ, naakwyil ɛnyɔɛpe, wɔ gwaa, ye kwyil bhum. É kwos wat, bhum mɛkam-mɛlɛl (30), é yak, mɛkam-mɛtɛn nɛ wat (60), é yak tak, bhum dhet (100).» 9Bhii tak, Yezu eezɛke náá: «Yɛ bɛ náá, bi ɛ́ nɛ mɛlɔ mɛ ɛgwak ɔɔ, gwakeka ɛnyɔɛpe!»
Étɛp yé Yezu di elii nɛ bot tɔ ekana
10Tin, bɛdjekel eezɛtiila pɛ pak Yezu nadi ɛ́, bɛ ɛ́ boozɛdji nyɛ náá: «Étɛp yé wɔ di elii nɛ nɔɔ tɔ ekana?» 11Wɔ gwaa nyɛ zɛbɔɔza nɛ nɔɔ náá: «Biyɔ, bi eezedjɛaa etsoŋ ɛgu ɛsuk ɛ Ɛyoŋ ɛ di tɔ gwoo ɛ. Yɛ bɛ bɛsɔ bin ɔɔ, bɛ dinaa ààpamɛt ɛsuk ɛ tak. 12Etɛɛ náá, mot aadi nɛ ba bim sonok ɔ, bɛ waabil nyɛ dhiiti, étɛp ye neebu. Tin, mot aakadi toto ààbɛ nɛ sonok ɔ, bɛ waadɛk nyɛ dɔɔ nɛ eghutu-ghutu nyɛ lik nɛ yɛ ɛ. 13Yɛ ɛ́ étɛp tak ɛ mɛ di elii nɛ nɔɔ tɔ ekana. Etɛɛ náá, bɛ ɛ́ nɛ ghwyil ɛgwyák nɛ mis, ààbee. Bɛ ɛ́ nɛ ghwyil ɛgwak nɛ mɛlɔ, dhi bɛ di ààsiiza sa ye di ekwyɛl ɛlɛɛ ɛ. 14Yɛ ɛ́ deenek ɛ́ etɛp ee ngoolel-Mɛkpa ɛ Zɛɛb Ezayi nalɛɛ ɛ́ aabela ɛsuk. Nyɛ nabɛ ɛ́, nyɛ eeke náá:
“Bi ɛ́ waagwak ɛnyɔɛpe, bi ɛ́ aanàkwaagu ɛsuk ɛ tɛp tak.
Bi ɛ́ waabee nɛ mis, bi aanàkwaasiiza ɛsuk ɛ tak.
15Etɛɛ náá, bot ɛ mbyak'ak nɛ kalyel elyem dhaa nyel.
Bɛ nɛ kasa maa-ɛlɔ dhaa tyɛ.
Bɛ eezedipal mis mɔɔ étɛp bɛ ɛ́ zɛkɛbee.
Bɛ eediyal mɛlɔ mɔɔ, ye nàgwak.
Bɛ eezelu ɛtselal ɛ lɔɔ náá, ye nàgu sonok.
Tin, bɛ tok nɛ ghwyil ɛbula,
dum koŋ nɛ Zɛɛb etɛɛ náá, Zɛɛb neetsik bɛ#13.15 Eza 6.9-10.”»
16«Yɛ kabɛ biyɔ bɛmet ɔɔ, mɛnyɔ nɛ nen, etɛɛ náá, mis men ɛpebee, mɛlɔ men ɛpegwak! 17Mɛ lɛɛ bin ɛ́ etɛp e tsɛɛtsɛ náá: Bɛtɛ nɛ bɛngoolel ɛ Mɛkpa ɛ Zɛɛb, bot ɛ epiki naadyeebakwos ɛbee nɛ ɛgwak sa bi di ebee nɛ gwak mos'aak. Saabɛgɔs nɛ nɔɔ ɛ́ náá, bɛ ààpabela mbɛɛ bhwoob ɛbee nɛ gwak sa bi di ebee mos'aak.»
Yezu moo elɛɛ ɛsuk ɛ kana sɔsel mɛbhek
18«Biyɔ, bot bak! Gwakeka ɛsuk ɛ kana sɔsel mɛbhek: 19Bɔs é ngwoob gba di bhek nakwyit ɔ, ye kwyɛl ɛlyaal ɛ́, bot ɛ nadi egwak etɛp Ɛyoŋ ɛ Zɛɛb, bɛ kadi ɛ́, ààmɛt ɛsuk ɛ tak ɔ. Tin, Mbee Mot eetuula, nyɛ eezɛdɛk mɛbhek bɛaa tɔ elyem bɔɔ ɛ. 20Bɛdhiiti bot kadi ɛ́ dáa mɛbhek nakwyit kɔ bat ɛkok ɛ, é sok bɛ di egwak-gwakak Mɛkpa ɛ Zɛɛb ɛ, bɛ nɛ dyeebamyaala tɔ elyem bɔɔ. 21Tin, bɛ ààpakabet náá, mɛkpa mɛ tak pookoni bɛ tɔ ebhum elyem ɛnyɔɛpe. Bɛ kadi ɛ́, ààwa zii ɛbuɛpe tɔ ɛbaal ɛ mɛkpa mɛ tak. Tin, é ghɛŋ mezuk nɛ mɛbhowal aatuula bɛ kɔ ɛsu ɛ Mɛkpa ɛ Zɛɛb ɛ, ɛliig ɛ lɔɔ koŋ nɛ Zɛɛb ààbɔya. 22Bɛdhiiti tɔ len gwak Mɛkpa ɛ Zɛɛb ɛ dáa kyee mɛbhek nakwyit tɔ engwyinini ɛ. Bɛ nɛ gwak Mɛkpa ɛ Zɛɛb, ye kabela ɛ́ náá, bɛ nɛ wa lyem tɔ ɛsiiza esa e bɔs, mɛvu mɛ di ekɔɔ bot kɔ bɔs'ak ɛ, nɛ mbee esiiza tɔ elyem bɔɔ ɛ di enyal Mɛkpa ɛ Zɛɛb. Tin, mɛbhek mɛ tak kadi ɛ́, ààwum. 23Bɛdhiiti bot kadi ɛ́ dáa mɛbhek mɛ nakwyit kɔ mbɛɛ bɔs ɛ. Bɛ ɛpegwak Mɛkpa ɛ Zɛɛb, myaal yɛ nɛ lyem wat, bɛ kakɛ ɛ́ dáa Zɛɛb kwyɛl ɛ. Tin, yɛ waawum ɛbuɛpe. Yak mɛkam-mɛlɛl (30), yak mɛkam-mɛtɛn nɛ wat (60), yak dhet (100).»
Kana mbee bhek
24Yezu zokabaalɛɛ bɛdhiiti ekana sis: «Beeka dhiiti sonok di tyee Ɛyoŋ ɛ di tɔ gwoo ɛ: Dhiiti mot ngɔt naabɛ embɛɛ mɛbhek tɔ pyeeb'ɛ. 25É pum, é sok bot ɛ dɛl djas nadi egɔ́ ɛ, wɔ gwaa dhiiti mot mɛbhuka mɛ zokazɛnɔɔ embee mɛbhek, bɛ yɛ pak mɛbhek mɛ nadi tɔ pyeeb ɛ, nyɛ eezɛnɔɔ nyel sik. 26Dáa mɛbhek nakawyee ɛ, yɛ eezɛwum, embee mɛbhek menek eebaazɛwyee yɛ. 27Tin, bot ɛ mɛsa mɛ nakuma pyeeb tak ɛ́ bookɛlɛɛ nɛ kukuma yɔbɔ náá: “Ghɛŋ, wɔ nabɛ tɔ pyeeb'ɔ ɛ́ embɛɛ mɛbhek, etsal é? Haaa yak mbee bhek kadus paa?” 28Nyɛ ɛ́ boozɛbɔɔza nɛ nɔɔ náá: “Yɛ ɛ́ mot mɛbhuka ɛ sa esesɛɛ binek.” Bhii tak, bot ɛ mɛsa ɛ́ boozɛdji nyɛ náá: “Bis sa dáa, wɔ kwyɛl ɛ bis kɛdis embee mɛbhek menek é?” 29Nyɛ eebaazɛbɔɔza nɛ nɔɔ náá: “Hooo! Ààbɛ! Etɛɛ náá, bi ɛ kɛgu yɛ ɔɔ, bi ɛ́ nɛ ghwyil ɛgu dɔɔ nɛ embɛɛ mɛbhek lɔɔg wat nɛ yiizaag. 30Deenek, betka náá, mɛbhek menek djas wyee lɔɔg wat, kɛkum dwoo yɛ aakabɛ náá, bi moo kɛdis ɛ. Tin, mɛ waalɛɛ nɛ bot aakɛdis ɔ náá, bɛ pookokan sok ɛdis ɛ embee mɛbhek, da bɛ ɛ́ kɔl yɛ é di wat étɛp bɛ needik yɛ. Bhii tak ɛ bɛ aakasɛɛg embɛɛ mɛbhek, kwom kɔ taŋ'am.”»
Kana ba mɔɔ bhek na sikɛ-sikɛ bɛ di edjóo «mutaad» ɛ
31Wɔ gwaa, Yezu baazɛlɛɛ bɛ yak kana sis, nyɛy náá: «Ɛyoŋ ɛ di tɔ gwoo ɛ, yɛ ɛ́ dáa bhek le di edjɛ bhum di edjóoaa mutaad ɛ#13.31 bhek le di edjɛ bhum di edjóoaa mutaad ɛ le mutaad ɛ́ boo le di kwyil tɔ bɔk ɛ.. Dhiiti mot naakɛbɛ yɛ pɛ tɔ pyeeb'ɛ. 32Bhum mutaad ɛ́ bhek na sikɛ-sikɛ dhaa mɛbhek djas di ebɛaa kɔ ɛko ɛ bɔs ɛ nɛ mɛtɔɔl. Tin, é ghɛŋ yɛ di ekwyil ɛ, ye nɛ bɔk dhaa ele e bok djas. Ye kadi ɛ́, ye moo le di náá, enen ɛpebatazɛlóo mɛk mɔɔ kɔ elɛɛ e tak.»
Kana leviid
33Yezu zokabaazɛdjɛ bɛ dhiiti kana. Nyɛy nɛ nɔɔ náá: «Ɛyoŋ ɛ di tɔ gwoo ɛ, nɔŋel ɛ́ nɛ leviid moma di ewa tɔ boo ɛdham ɛ tsim nyɛ di epul étɛp nyɛ neesa mapa nɛ yɛ ɛ. Ba ɛwala bhii tak, tsim'enek djas aadi ɛ́, yɛ eezeghamta.»
Etɛp ee Yezu nadi elelyo bot tɔ ekana ɛ
34Yezu nadyeebalelyo mɛdhuu mɛ bot etɛp binek djas ɛ́ pɛ tɔ ekana. Nyɛ nabɛ ɛ́ ààdjɛ dhiiti mɛlyo, ààlɛɛ yɛ tɔ kana. 35Nyɛ nasesa deenek ɛ́, etɛɛ náá, sa bɛngoolel ɛ Mɛkpa ɛ Zɛɛb nalɛɛ ɛ́ neebela ɛsuk. Ye nabɛ ɛ́ bɛngoolel ɛ Mɛkpa ɛ Zɛɛb naake náá:
«Mɛ waalii tɔ ekana.
Tin, mɛ waalɛɛ esa ee nadi syela kana bɔs nakusel ɛ#13.35 Mɛd 78.2.»
Yezu eezɛlɛɛ ɛsuk ɛ kana mbee bhek
36Bhii tak, Yezu zokazɛdus tɔ ɛdhuu ɛ bot, nyɛ eezɛsik, tɔ́ pɛ ndjaa. Tin, bɛdjekel ɛ́ boozɛzyɛ pɛ nyɛ nadi ɛ. Bhii tak, bɛ ɛ́ boozɛke nɛ nɛ náá: «Lɛɛa bis ɛsuk ɛ kana mbee bhek tɔ pyeeb.» 37É di'enek, Yezu ɛ́ boozɛni elɛɛ bɛdjekel bɛ náá: «Yɛ ɛ́ Sɛɛŋɛlɛ Mɔn Mot ɛ di ebɛ embɛɛ mɛbhek. 38Pyeeb kwyɛl ɛlyaal ɛ́ mɛdhik djas di kɔ bɔs ɛ. Embɛɛ mɛbhek kwyɛl ɛlyaal ɛ́ bot ɛ di ekɛ dáa Ɛyoŋ ɛ Zɛɛb di kwyɛl ɛ. Mbee bhek kalyaal ɛ́ bot ɛ Mbee Mot. 39Mot mɛbhuka nazɛbɛ bhek ɔ, kadi ɛ́ dim mot mɛkɔŋ. Dwoo ɛkɛbɔ́k bhum kabɛ ɛ́ ɛsi ɛ bɔs#13.39 ɛsi ɛ bɔs yɛ ɛ́ ɛwala ɛ di náá, bɔs ɛ́ waadum ɛ, esesɛɛ di mos'aak ɛ́ waasi. . Bot ɛ mɛsa kwyɛl ɛlyaal ɛ́ efofop. 40Dáa ye di náá, embee mɛbhek ɛ́ waatsaalaa étɛp ɛkɛmwasaa tɔ du ɛ, yɛ aabaazodi ɛ́ deenek é ɛsi ɛ bɔs. 41Sɛɛŋɛlɛ Mɔn Mot ɛ́ waalwom efofop bɛ, nyɛ waadis tɔ Ɛyoŋ ɛ lɛ bot djas di ezɛm ɛmyaal ɛ bɔn-nyɛɛg bɔɔ ɔ, zɛnɔɔ bot ɛ embee mɛsa. 42Nyɛ waamwas bɛ tɔ boo du na kɔm-kɔm. Penek, bot ɛbuɛpe ɛ́ waadje mɛgwyɛ nɛ ɛkwaal ɛ mɛtsok. 43Tin, bot ɛ epiki ɛ́ waakas tɔ Ɛyoŋ ɛ Sɛɛg'ɔɔ dáa gwyes. Yɛ bɛ náá, bi ɛ́ nɛ mɛlɔ mɛ ɛgwak ɔɔ, gwakeka ɛnyɔɛpe.»
Ɛkwom ɛ epata di syela ɛ
44«Ɛyoŋ ɛ di tɔ gwoo ɛ́ dáa di ɛkwom ɛ epata di syela tɔ pyeeb ɛ. Dáa dhiiti mot nakabela yɛ ɛ, nyɛ ɛ́ boobaazɛsyel yɛ é di sis tɔ pyeeb'enek. É di'enek, nyɛ moo ɛ́ tɔ mɛmyaala, etɛɛ náá, nyɛ waakɛbɔmsa esa bɛ djas, étɛp nyɛ neezɛbɔm pyeeb tak.
45Ɛyoŋ ɛ di tɔ gwoo ɔ, baanɔŋel ɛ́ nɛ mot di esaa esa e ghoŋ étɛp nyɛ neebɔmsa ɔ. Nyɛ dyeebasaŋ ɛ́ tɛtɛ esa e ghoŋ na nyenyɔ-nyɔ. 46Yɛ kabɛ náá, nyɛ eebela yii na nyenyɔ-nyɔ dhaa bɛsɔ djas nɛ boo mɛtaŋ ɔɔ, nyɛ kakɛbɔmsa ɛ́ esa bɛ djas, étɛp nyɛ neezɛbɔm yiizaag na boo mɛtaŋ.»
Kana ɛwyet
47«Ɛyoŋ ɛ di tɔ gwoo ɛ, baanɔŋel ɛ́ nɛ ɛwyet ɛ bɛ di ela tɔ dii ɛ. Ɛwyet ɛ tak dyeebamɛt ɛ́ ekɔkɔ bɛsu djas. 48Tin, yɛ bɛ náá, ɛwyet eezelwood ɔɔ, bɛlael ɛ mɛwyet kadul yɛ ɛ́, zyɛ nɛ yɛ pɛ kyiid, da bɛ ɛ́ nɔɔ mɛnyel disi, étɛp ɛdis ɛ́ ebel bɛsu é ɛwyet ɛ tak. Tin, bɛ kabɛk bɛ edi ɛ́ bɛka, da bɛ ɛ́ nɔɔ bɛtɛtɛ, wa tɔ mɛbɔɔl, yɛ kabɛ bɛ na sikɛ-sikɛ nɛ embee tak ɔɔ, bɛ kamwas bɛ ɛ́ mwasa. 49Ɛsi ɛ bɔs aadi ɛ́ deenek: Zɛɛb ɛ́ waadhis efofop bɛ, bɛ zɛwa mbɛk pak mbee bot nɛ bot ɛ epiki. 50Etɛɛ náá, mbee bot ɛ́ waakɛmwasaa tɔ boo du na kɔm-kɔm. Tin, bot ɛbuɛpe waadje mɛgwyɛ nɛ ɛkwaal ɛ mɛtsok.»
Mɛvu mɛ na bes nɛ yii na mwa
51Yezu zokazɛdji bɛ náá: «Bi eemɛt ɛsuk ɛ etɛp binek é?» Bɔɔ náá: «Iyooo». 52Yezu ɛ́ boozɛke nɛ nɔɔ náá: «Étɛp tak ɛ di náá: ghaa-mɛkana mɛ etsi djas di ekwos ɛdi djekel étɛp Ɛyoŋ ɛ di tɔ gwoo ɔ, nyɛ ɛ́ dáa kuma mot di enɔɔ ɛkwom ɛ lɛ pɛ tɔ mɛvu mɛ na mwa zɛnɔɔ yii na bes ɛ.»
Bot ɛ Nazalɛt ààmyaal Yezu
53Bhii Yezu nasilal ɛlyo bot tɔ ekana binek ɛ, nyɛ ɛ́ boozɛnɔɔ nyel, tɔ́ yɛ. 54Nyɛ natɔ́ ɛ́ pɛ dɛl ɛ nyɛ nawyee kɔ tak ɛ. Nyɛ moo tin elyo bot tɔ ndjaa mendjaala mɛ eYuda. Tin, bot ɛ nadi egwak nyɛ ɔ, naadyeebadjoka ɛbuɛpe, bɛ moo tin eke náá: «Nyɛ kɛbela yak kwaambi etsoŋ nɛ mbi yak endem e mɛbwala paa? 55Mɔn'ak tok wak mɔn salpande? Ye tok Maali di wak nyɛɛg é? Zak bɛ nɛ Zozɛf, nɛ Simɔŋ, zɛnɔɔ Zuud tok bɛdhyeeb é? 56Haaa ye tok bɛkɛl mena nɛ bɛnɔɔ di mɛlu djas é di wat'aak é? Haaa nyɛ kɛbela yenek mɛbwala paa?» 57Nyɛ nabɛ nɛ nɔɔ ɛ́ ɛbɛk. É di'enek, Yezu ɛ́ boozɛke nɛ nɔɔ náá: «Ngoolel-Mɛkpa ɛ Zɛɛb dyeebaduwalaa ɛ́ pɛ kyee sis, ààbɛ pɛ kɔ dɛl ɛ nyɛ nabyel kɔ tak ɛ, nɛghu tɔ ndjaŋ'ɛ nɛ tɔ bil'ɛ.» 58Yezu nabɛ ɛ́ ààsa bɛtɛ nɛ endem e mɛbwala tin, étɛp mɛlyel mɛ elyem bɔɔ.
လက္ရွိေရြးခ်ယ္ထားမွု
Matye 13: bkwNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© (Active), Wycliffe Bible Translators, Inc. All rights reserved.