Luk Ɛniel
Ɛniel
Tyɛ wat nɛ Matye, Luk baazodu tɔ Ekwyala bɛ ɛ, ɛzel ɛ wat nɛ Malak:
Zaŋ Nduuel-bot nazyɛ ɛ́ zɛkoobal Yezu ze. Zaŋ eeduu Yezu Zɛɛb (3.1-20).
Bhii tak, Satan naawa Yezu é mɛbhowal (3.21–4.13).
Yezu nadi ɛ́ mot kyee dik Ghalile, pɛ nyɛ nakan ɛlyo nɛ ɛtsik ɛ membel ɛ (4.14–9.50).
Yɛ ɛpekaada dáa Yezu nazɛdus Ghalile tɔ́ pɛ ghaada Yeluzalɛm ɛ (9.51–19.28). Tin, Luk naabaakɛl bɛtɛ nɛ etɛp kɔ yɛ Malak nakaada ɛ. Yɛ ɛ́ dáa, kana ɛ mot Samaali na mbɛɛ lyem, kana wo mot ekum, kana mɔn nadiib, da nyɛ ɛ́ belaa ɔ, dɔɔ nɛ ɛtɔ́ ɛ Yezu pɛ daa Maat nɛ Maali.
Mɛsa ɛ Yezu pɛ Yeluzalɛm (19.29–21.38).
Yɛ ɛpebaakaa mezuk ɛ Yezu nɛ ɛsyee ɛ lɛ (22–23).
Mɛkana mak kɛsi ɛ́ nɛ dwoo ɛbyoŋ ɛ Pak (24), pɛ ye di elyaal dáa Yezu nakɛlyaal bot ɛ lwoma bɛ bɛbá nyel pɛ ze Emayus ɛ, ɛsok nɛ nyɛ nɛ byet tɔ pɛ ɛko.
Luk nakan ɛkaada ɛ dáa nyɛ nasa zii é ɛsɛɛga, étɛp ɛgu ɛnyɔɛpe etɛp djas Yezu nasa ɛ́ nɛ etɛp ee nyɛ nalii ɛ. Tin, nyɛ naakaada bɛtɛ nɛ etɛp dum nɛ ɛbyel ɛ Zaŋ Nduuel-bot, zɛnɔɔ yɛ Yezu. Nyɛ nakaada ɛ́ dáa fofop ɛ Ghɛŋ nalyaal Zakaali nɛ Maali nyel ɛ, dáa ye nadhaa é sok Elizabhɛt nɛ Maali nabya ɛ, dáa Maali, Zakaali zɛnɔɔ Simeyɔŋ naduwal Zɛɛb nɛ djeeb ɛ, dáa Yezu nalik tɔ Ndjaa-ebuwa nyɛ dinaa dhɔma ɛ (1–3).
Ye baakaada ɛ́, ɛtɔ́ ɛ Yezu pɛ Yeluzalɛm. Tɔ ɛlaŋel ɛlak, Luk nakaada kana dhiiti mot na mbɛɛ lyem dɛl ɛ Samaali, kana mot ekum, kana mɔn nawo ɔ. Zɛnɔɔ edhiiti etɛp, tyee yɛ Maat nɛ Maali, bot ɛ namyaal náá, Yezu sulal pɛ daa lɔɔ ɔ (10.35–15.32).
Tɔ etɛp bak djas, Luk nadi ekwyɛl ɛlyaal ɛ ghwyil nɛ mɛbwala ɛ Yezu. Nyɛ baalyaal ɛ náá, Yezu nadus ɛ́ pɛ daa Zɛɛb, nɛ tsɛɛtsɛ náá, nyɛ ɛ́ mot mbyak Yisalaɛl, nyɛ nazyɛ ɛ́ étɛp bot ɛ membyak djas. Nyɛ baakwyɛl ɛlyaal ɛ, dáa Zɛɛb di ekwyɛl bot ɛ di ebeeaa é mis toto ɔ. Yɛ ɛ́ mot dáa Elizabhɛt, mot nadi kwyiid moma ɔ, bɛmbaalel ɛ etaa, nɛ bɛdhiiti bot ɛ lɔɔg tak.
Luk nakwyɛl ɛ́ ɛgoola Mbɛɛ Bhaadal pɛ daa bot ɛ di ààbɛ bot ɛ mbyak eYuda ɔ. Kɔ ɛsu ɛ tak ɛ di náá, tɔ bɛmɛkana mɛná mɛ Mbɛɛ Bhaadal di kwyala ɛ, yɛ nabɛ ɛ́ etɛp bot ɛ di ààgu etsi e bot ɛ mbyak Yisalaɛl aalaa yɛ ɔ. Nyɛ nakwyal deenek ɛ́, étɛp bɛ neegu ɛsuk ɛ duma ɛ Yezu, bɛ neemyaal náá, nyɛ ɛ́ Mɛtsik-bot étɛp bot ɛ bɔs djas.
Mɛkana mɛ tak kaada ɛ etɛp bak:
Ɛlaŋel 1.1-4: Ɛsuk ɛ Ekwyala bak;
mɛlaŋel 1.5–2.52: Ɛbyel ɛ Zaŋ Nduuel-bot nɛ yɛ Yezu, zɛnɔɔ edhɔma bɔɔ;
ɛlaŋel 3.1-20: Mɛsa ɛ Zaŋ Nduuel-bot;
mɛlaŋel 3.21–4.13: Ɛduwa Yezu naduwa Zɛɛb ɛ, nɛ mɛbhowal mɛ;
mɛlaŋel 4.14–9.50: Mɛsa ɛ Yezu pɛ Ghalile;
mɛlaŋel 9.51–19.27: Yezu eedus pɛ Ghalile tɔ́ pɛ Yeluzalɛm;
mɛlaŋel 19.28–23.56: Yenga mɛsik ɛ Yezu pɛ Yeluzalɛm, mezuk mɛ nɛ ɛsyee ɛ lɛ;
ɛlaŋel 24.1-53: Yezu eegom, nyɛ eelyaal bot nyel, nyɛ eebyet tɔ gwoo.
လက္ရွိေရြးခ်ယ္ထားမွု
Luk Ɛniel: bkwNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© (Active), Wycliffe Bible Translators, Inc. All rights reserved.