Zaŋ 16
16
1«Mɛ lɛɛ bin etɛp bak djas ɛ́, etɛɛ náá, bi needi ààkat ɛdum ɛ koŋ'en nɛ nam. 2Bi ɛ́ waasɔaa tɔ mendjaa mɛ mendjaala mɛ eYuda. Deenek, ɛwala ɛ́ waazyɛ, ɛwala di náá bot aagó bin ɔ, waake náá, yɛ ɛ́ deenek ɛ́ bɛ di esa mɛsa mɛ Zɛɛb. 3Bɛ aasa deenek ɛ́, etɛɛ náá, bɛ ààgu Saagam, ààgu mɛ pe. 4Tin, mɛ lɛɛ bin etɛp binek ɛ́, etɛɛ náá, é sok ɛwala ɛ tak aakum ɛ, bi neegheesisimza náá, ye nabɛ ɛ́, mɛ naaloozelɛɛ bin.»
Mɛsa mɛ Sisim na Dɛɛ
«Mɛ nadi ààleelɛɛ bin yɛ sok ɛ́, etɛɛ náá, mena nadika ɛ́ mena dinaa é di wat. 5Nenak, mɛ moo tɔ́ pɛ daa mot nadhis mɛ ɔ. Tin, ye tok nɛ mot pak'en aabaadji mɛ náá: “Wɔ tɔ́ paa”? 6Deenek, elyem bin moo ɛ́ tɔɔɔ nɛ ghoŋ, kɔ ɛsu ɛ etɛp mɛ di elɛɛ bin'aak. 7Ghuna mɛ lɛɛ bin ɛ́ tsɛɛtsɛ náá, kɔ ɛsu ɛ len, ɛnyɔ náá, mɛ tɔ́. Etɛɛ náá, mɛ di ààtɔ́ ɔɔ, Mot-Mɛghɛm di egoka nɛ ɛzyɛ ɔ, nyɛ aanàkwaabaazyɛ pɛ daa len. Tin, mɛ tɔ́ ɔɔ, mɛ ɛpedhis bin nwyak. 8Tin, é sok nyɛ aazyɛ ɛ, nyɛ waalyaal bot ɛ di kɔ bɔs'ak ɔ, ɛdjak ɛ lɔɔ kɔ ɛsu ɛ mesyem, ɛdjak ɛ lɔɔ kɔ ɛsu ɛ epiki e Zɛɛb, zɛnɔɔ epɛ́ɛ e Zɛɛb. 9Mesyem mɛ bot ɛ bɔs ɛ́ náá, bot ɛpebyen ɛdum koŋ nɛ nam. 10Yɛ bɛ dum nɛ epiki e Zɛɛb ɔɔ, bot ɛ́ tɔ ɛdjak, etɛɛ náá, mɛ ɛpetɔ́ pɛ daa Saagam. Tin, bi aanàkabaabee mɛ. 11Yɛ kabɛ dum nɛ epɛ́ɛ ɔ, bot ɛ́ tɔ ɛdjak, etɛɛ náá, Zɛɛb eezepɛ́ɛ mɛkoozi mɛ bɔs'ak.
12Mɛ dinaa nɛ bɛtɛ nɛ etɛp ee mɛ aalɛɛ bin ɛ, saabɛgɔs ɛ́ náá, bi tok nɛ ghwyil ɛtiibal yɛ nenak. 13É sok Sisim etsɛɛtsɛ aazyɛ ɛ, nyɛ waadjɛɛd bin tɔ etsɛɛtsɛ djas. Nyɛ aanàkwaalii nɛ nen kɔ ɛsu ɛ lɛ met. Nyɛ aalɛɛ bin ɛ́ etɛp ee nyɛ nagwak ɛ. Nyɛ waalɛɛ bin etɛp ee di ezyɛ pɛ sok ɛ. 14Nyɛ waalyaal duu'am, etɛɛ náá, nyɛ waabela etɛp ee mɛ di nɛ yɛ ɛ djas. Bhii tak, nyɛ kazyɛ, zɛbaŋa bin yɛ ɛ. 15Esa e Saagam djas ɛ́ esa bam. Kɔ ɛsu ɛ tak ɛ́, mɛ di eke náá, Sisim na tsɛɛtsɛ waanɔɔ sa di náá, yɛ ɛ́ yam ɛ, da nyɛ ɛ́ zɛgoola bin yɛ ɛ.»
Ghoŋ bɛdjekel ɛ́ waaliiza mɛmyaala
16«Ye kalik ɛ́ ba ɛwala, bi aanàbaabee mɛ. Tin, ba ɛwala batsa bhii tak, bi ɛ́ waabaabee mɛ.» 17Bɛdhiiti bot tɔ sama bɛdjekel bɛ zokazɛdjinel pak'ɔɔ náá: «Nyɛ dyeebakwyɛl ɛlɛɛ yé, é sok nyɛ di eke náá: “Ye kalik ɛ́ ba ɛwala batsa, bi aanàkabaabee mɛ, bhii ba ɛwala, bi ɛ́ waabaabee mɛ” ɛ? Dɔɔ nɛ é sok nyɛ di eke náá: “Mɛ ɛpetɔ́ pɛ daa Saagam” ɛ? 18“Ba ɛwala batsa” nyɛ di elɛɛ wak ɛ, ye kwyɛl ɛlyaal yé? Mena ààmɛtka ɛsuk ɛ sa nyɛ di elɛɛ mena ɛ.»
19Tinaak, Yezu eezɛgu náá, bɛ nadi ekwyɛl ɛdji nyɛ edhiiti etɛp. Wɔ gwaa nyɛ zɛke nɛ nɔɔ náá: «Mɛ eelɛɛ bin tsɛɛtsɛ náá: “Ye kalik ɛ ba ɛwala batsa, bi aanàbaabee mɛ. Bhii ba ɛwala, bi ɛ́ waabaabee mɛ.” Yɛ ɛ́ dum nɛ tɛp tak ɛ bi di edjinel pak'en é? 20Mɛ lɛɛ bin ɛ́ etɛp e tsɛɛtsɛ náá, bi ɛ́ waadje mɛgwyɛ, bi ɛ́ waadi tɔ́ mezuk. É di'enek, bot ɛ bɔs'ak aadi ɛ́, tɔ mɛmyaala ɛbuɛpe. Bi aadi ɛ́, tɔ ghoŋ. Tin, ghoŋ'en ɛ́ waaliiza mɛmyaala.
21É sok moma di ekɛbya ɛ, nyɛ bya ɛ́ tɔ mezuk nɛ mɛkpaa. Etɛɛ náá, ɛwala ɛ mezuk mɛ dyeebadi ɛ́, eezedjala. Tin, yɛ kabɛ náá, mɔn eebyel ɔ, nyɛ eedjisa mezuk menek. Nyɛ moo tɔ mɛmyaala etɛɛ náá, dhiiti mot na bes eezyɛ kɔ bɔs'ak. 22Tyee wat nɛ nen, é di mena mooka nenak'aak, bi ɛ́ tɔ ghoŋ nɛ mezuk. Tin, mɛ waabaaboma nɛ nen. É di'enek, elyem bin aadi ɛ́, tɔ mɛmyaala. Deenek, ye tokapɛ nɛ mot aadis mɛmyaala menek tɔ elyem bin.
23É sok ɛlu ɛ tak aakum ɛ, bi aanàkwaabaadji mam kiya dum nɛ dhiiti tɛp. Mɛ lɛɛ bin ɛ́ etɛp e tsɛɛtsɛ náá: Saagam ɛ́ waadjɛ bin esonok djas ee bi aawaab nɛ din ɛ lam ɛ. 24Kɛyaka nɛ dwoo pan mos'ak, bi dinaa ààpawaab sonok nɛ din ɛ lam. Tin, waabka, bi ɛ́ waadjɛaa. Deenek mɛmyaala men ɛ́ waadi tɛtɛ mɛmyaala nɛ lyem wat.»
Yezu ɛ́ Ghɛŋ kɔ esa e bɔs'ak
25«Mɛ lɛɛ bin etɛp bak djas ɛ́, tɔ ekana. Ɛwala ɛ mɛ aadi ààkabaalii nɛ nen tɔ ekana ɛ, yɛ ɛpezyɛ. Tin ɛ́, mɛ aazɛlɛɛ bin etɛp mɛpyɛmɛ dum nɛ Saagam. 26Dwoo tak, bi ɛ́ waawaab esonok nɛ Saagam nɛ din ɛ lam. Tin, mɛ ààpalɛɛ bin náá, mɛ waadjaala nɛ Saagam kɔ ɛsu ɛ len. 27Mɛ aanàdjaala nɛ Saagam étɛp'en, etɛɛ náá, nyɛ ɛmet nɛ kwyɛl bin. Nyɛ kwyɛl bin ɛ́, etɛɛ náá, bi nɛ kwyɛl mɛ. Yɛ ɛ́ etɛɛ náá, bi nɛ myaal náá, mɛ nadus ɛ́ pɛ daa Zɛɛb. 28Mɛ nadus ɛ́ pɛ daa Saagam, bhii tak, mɛ eezɛzyɛ kɔ bɔs'ak. Nenak, mɛ moo zɛdus kɔ bɔs'ak, étɛp ɛsik pɛ daa Saagam.»
29Wɔ gwaa bɛdjekel bɛ zɛke nɛ nɛ náá: «Beea! Nenak wɔ moo lii mɛpyɛmɛ, ààbɛ tɔ ekana. 30Deenek, ye di mena kadi wak nenak'aak, bis nɛ gu náá, wɔ nɛ gu djas. Tin, wɔ tok nɛ gwyes ɛbwood náá, bis dji wɔ dhiiti tɛp. Yɛ ɛ́ étɛp tak ɛ bis di emyaal náá, wɔ nadus ɛ́ pɛ daa Zɛɛb.» 31Tin, Yezu eezɛbɔɔza nɛ nɔɔ náá: «É di'enek, bi moo myaal é? 32Deenek, beeka ɛwala ɛpezyɛ, ɛwala ɛ tak eezezyɛ, ɛwala ɛ biyɔ djas aawyɛɛza na “gwyeeeŋ” ɛ, mot nɛ mot ɛ́ waasik pɛ daa lɛ. Bi ɛ́ waalik mɛ mam mɛ ɛmet. Ààbɛ, ye tok tsɛɛtsɛ náá, mɛ aalik ɛ́ mam mɛ ɛmet etɛɛ náá, bis nɛ Saagam ɛ́ di sama. 33Mɛ lɛɛ bin etɛp bak djas ɛ́, étɛp bi needi tɔ egwyem, é ghɛŋ bi aadi tɔ ɛgwakel nɛ nam ɛ. Bi ɛ́ waazukaa nɛ ɛtiigaa kɔ bɔs'ak. Tin, saka mɛghaaz, etɛɛ náá, mɛ naazekwak etɛp e bɔs'ak djas.»
လက္ရွိေရြးခ်ယ္ထားမွု
Zaŋ 16: bkwNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© (Active), Wycliffe Bible Translators, Inc. All rights reserved.