Izaiya 65
65
Yehova unoza aatonge atu ohonvwelela Mulugu
1Yehova unawonga ira: <<Miyo dohovioneyiha wa atu anne kahadifukedetcha. Eto dohosakanya ira atu anne kahadivendetcha kawande difwanya. Eto miyo dohowonga na atu anne kahaitanetcha na nzina naga, miyo ira: <Miyo dili vano! Miyo dili vano!> 2Miyo dohotapula mandaga siku nompumbula para atu okonda tongiwa, atu anawenda na ndila dohokala pama kaharaga jofuna jiwa. 3Malambo matene atu anno anaditakaleliwiha komove. Tchoira muwari moahara amilugu amohiwene, anovelela mikuto mmindani eto anotumeya jonukela vazulu va boloki. 4Anagarati masiye eto anavireliwa mahiyu mamburo okoyeya, anadja nyama ya nguluwe eto kaganna misuzu da vinyama dotakala muparatoni mwewa. 5Eto anoawongana afwiwa ira: <Kavenyanivo vili hiyo vano, kamuniwandamele, mwasiwa hiyo nili atu otchena!> Anoditatamula uwali waga, anakala nnga utchi okumela munlo unaja malambo matene mpunoni mwaga. 6Kaing'anani, dihimala lremba inafuna miyo irana. Dilrembile mazu oira: <Miyo kannamiyala! Mbwenye nnoza daavahe yotambilra yewa, na ibaribari nnoatambilriha zela jabure jiwa jatene, 7roma jotakala jewa vamohi na jotakala ja ababiwa. Unawonga gu Yehova.> Na mwasa oira aliwa kohotumeya jonukela mmwangoni na mujipatapatani ja mwango, miyo nnoza daapimele matongelo mokwakwanela na joira jiwa jatene ja wanle.>>
8Yehova unawonga ira: <<Mutu afwanya uva wapama vamuratchini unawongetcha ira: <Kaninongeni uva ula mwasiwa unoza akumihe vinyu wapama.> Na makalelo mamohive, na miyene nnoairela anamalabaga. Miyo kadiza daatolotcha aliwa atene. 9Miyo nnoza daaindjivihe ahima a Jako na ahima a Juda eto aliwa anoza kakale annya a mwango daga. Atwaga osakulriwa anoza katukule ilambo eto anoza kamangemo. 10Zela atwaga anno anafuna kadivende, ilambo ya Saromi inoza ikale nimburo nnafuna atu djihaga mabiliwa eto ndabo na Akori nnoza nikale nimburo nnafuna vumaga ng'ombe diwa. 11Mbwenye zela wa nyo munadihiya miyo Yehova, mudiwalaga mwango waga otchena, mmusakanyelaga pwando mulugu wenyu unaitaniwa <Jorayela> eto mmusakanyelaga vinyu mulugu wenyu unaitaniwa <Ireya-Wene>, 12miyo nnagomela upani na supada eto nyo atene munoza mukokore ira mupiwe, mwasiwa duitanagani, kamurumenle eto diwongaga, kamufunile vwa. Nyo musakanyile yenno ili yabure vamentoni vaga eto musakunlre yenno yahafuna miyo.>>
13Nona, Nabwiya Yehova unawonga ira: <<Kavuruwanani, anamalabaga anoza kadje, nyo mbwenye munoza mukayena ndala. Eto anamalabaga anoza kang'we, nyo mbwenye munoza mukayena ntona. Anamalabaga anoza kahagalale, nyo mbwenye munoza munyaswe. 14Anamalabaga anoza kaimbege nyumbo na mwasa okana hagalala mmirimani mwewa, nyo mbwenye munoza mutomole kuto na mwasa okana kumbanya mmirimani mwenyu eto munoza mukuwe na mwasa okana upa undimuwa wougomihani. 15Eto miyo dagali Nabwiya Yehova nnoza dupeni. Atwaga osakulriwa anerege labana mazina enyu kafunaga mutembelrelra mutu. Mbwenye nnoza daaitanege anamalabaga na mazina mamohiwa. 16Fiyeda ira mutu wenne unavepe mareliho mwilamboni, unavepege na nzina na Mulugu wa ibaribari. Eto mutu wenne unalumbele mwilamboni, unalumbelelege na nzina na Mulugu wa ibaribari. Tchoira tempu yenno zuzuma watene waireyetcha unoza udiwaliwe eto na miyene kannaumbuwelege zuzuma uvirile.
Ilambo ya zulu ixa na ilambo ya vati ixa inafuna za
17<<Mwasiwa miyo nnopandutcha ilambo ya zulu ixa na ilambo ya vati ixa. Jengo jatene jivirile jinoza jidiwaliwe eto kajiza jiumbuweliwagave. 18Mbwenye nyo munoza mukayena teyela vamohi no hagalala zela jengo jatene jinafuna miyo pandutcha. Mwasiwa miyo nnoza dipandutche jengo johagalaliha Jeruzalemu vamohi na jengo joavaha imwerumweru atu a Jeruzalemu. 19Miyo nnoza dikayena hagalala zela Jeruzalemu eto nnoza dikayena teyela zela atwaga. Eto muwari mwa aliwa kamuza muvweyaga nizu nonla nari nizu nokumbanya. 20Muwari mwa aliwa kamuza mukala mwana unafuna kwaga na malambo a vang'ono eto nne kalivo mundimuwa unafuna kwa ahanaulule pama. Mwasiwa mutu wenno unakwe na yaka 100 ku wonga ukwile agali muzombwene. Eto mutu wenne unakwe ahanakayena yaka 100 ku wonga mutuyo ohotembelrelreya na mwasa otega. 21Aliwa anerege manga nyumba eto anerege gonamo. Anerege zala miratchi da uva eto anerege dja jovaha jiwa. 22Aliwa kamanga nyumbiwa, mutu ogonamo kaza akala mutu mmohiwene, nari. Eto aliwa kazala miratchi da uva, mutu odja kaza akala mutu mmohiwene, nari. Mwasiwa atwaga yaka diwa nnakalege nnga yaka da mutengo eto atwaga osakulriwa anerege djavo jatene jilabile atu fiyeda kaulule. 23Kiza kalabaga vasayi vene eto kiza kaabalaga ahimiwa ira katolowe. Mwasiwa anaza kakale atu orelihiwa na Yehova, aliwa vamohi na ahimiwa anabaliwegemo. 24Eto tempu yenno, aliwa kahanadiitaneve, nnoza dirumele. Eto miyo nnerege irana yovepa yewa tempu imohive inawongege atu. 25Mwanambwa wa mukokolani vamohi na mwana nibila anoza kadjege mpinda vamohi. Eto podogoma unoza adjege mpinda nnga ng'ombe. Eto tumbulru nnoza nikaleve yodja ya nyowa. Kalivo unafuna za irana yabure owu yotolotcha ili yatene muwari mwa mwango waga watene otchena. Unawonga miyo gu Yehova.>>
လက္ရွိေရြးခ်ယ္ထားမွု
Izaiya 65: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral