Izaiya 38
38
Bulela wa mwene Ezekiya
1Mwa malambo anne, mwene Ezekiya ohoroma bulela, fiyeda liye hala vang'ono ira akwe. Mwa enne namafiyiheda Izaiya mwana Amoji ohozaga, liye nfwanya muwandela ira: <<Yehova unawonga ira: <Usakanyede jatene ja vande vawo. Tchoira weyo kunakalawo, unagomela kwa.> >> 2Evale mwene Ezekiya agavwile enne, ohorungunuwa aing'anaga ntchihini, liye roma lobela wa Yehova eraga: 3<<Yehova nnouvepani ira muumbuwele makalelo diwendile miyo vamentoni venyu mwa ibaribari eto na murima waga watene, disakanyaga jofwanela vamentoni venyu.>> Mwa enne mwene Ezekiya ohonlaga valukulu.#38:3 Ezekiya ohonlaga valukulu: Mazwala ananikokomeza ira nilobele zela makatamiho ali atene. Mwene Ezekiya ahalobela, ogokwa. Mbwenye agalobenle, Mulugu ohomuwendela tangaranga.
4Evale mazu a Yehova kohozaga wa Izaiya, kamuwandelaga ira: 5<<Udowe wamuwandele Ezekiya ira: <Yehova Mulugu wa mbwiyawo Davi unawonga ira: <<Dihivwa lobela wawo eto dihiona misodi dawo. Mwa eno, nnowendjeda malambo a ingumi yawo yaka 15. 6Eto nnouvunela mmandani mwa mwene wa Asiriya weyo vamohi na sidadi yatene yenna. Miyo nnovunela sidadila.>> > >>
7Izaiya ohowongagave eraga: <<Ionihedo yoira Yehova unoirana yenno ilumbenle liye tchi ila. Yehova unawonga ira: 8<Nnosakanya ira nfulri wa nzuwa wenno unaoneya vamasikadani a relojiyo ya nzuwa ya mwene Akazi#38:8 vamasikadani a relojiyo ya nzuwa ya mwene Akazi: Malambo a mundulrimu Akazi ohomanga masikada na makalelo ira mutu aona nfulri vali atu va masikadani, awande iziwa ora. Mbwenye ira Ezekiya akayena ibaribari zela vulumuwa waye, nfulri wa nzuwa ule ohowelelaga mundulri. awelele mundulri masikada kumi.> >> Mwa enne nfulri wa nzuwa ule ohowelelaga mundulri masikada kumi.
Yolobela ya Ezekiya
9Ila tchi yolobela ya Ezekiya, mwene wa Juda, yenno yalrembile liye agavulumuwile zela urenda anna liye:
10<<Miyo daumbuwela ira nnagomela kwa dagalive wapamene. Nnadowa davolowe milango da Nimburo na Anokwa, dahanamarihe yaka daga dimohi diwa. 11Eto daumbuwela ira miyo kannawelela muona Yehova akoka ilambo ya atu okalawo. Eto nne kadiza dimuona mutu uli watene muwari mwa atu anafwanyeya mwilamboni. 12Eni tempu ya ingumi yaga ihimala eto ingumi yaga ihimala tamihiwa nnga musasa wa namakumbuza. Ingumi yaga imala vindiwa nnga nguwo. Ihimala gwadiwa na makalelo nnga aliba sakanyeda nguwo kagwadaga nguwo diwa.
13<<Miyo dohokalave omiyalene diing'anelaga fiyeda unde tcha. Mbwenye upa udivahile Mulugu unokala nnga podogoma uirile kotola makuvaga. Ntana nari mahiyu miyo daumbuwela ira Mulugu unodimariha. 14Miyo dohonla nnga tchiveve eto dohongurumela nnga kangayiwa. Meso aga kohowaheya ing'ana zulu. Nabwiya miyo dihisanyeya, dikamihedeni! 15Kodi miyo nnawonge nni? Tchoira liye uirilena nnga mwemo mwadifunelena liye. Miyo kalawo waga watene kwa goyi na mwasa wa makatamiho nnafwanyeyana miyo. 16Nabwiya atu atene okalawo makalelo ewa mwaavahile nyo banno eto na miyene ingumi yaga vamohi no kalawo waga unakala wa eno. Na mwasa wenno nnouvepani ira mudivulumutche eto mudivahe ingumi. 17Kaing'anani, zuzuma waga watene ali ira diwande kana upama. Muwari mozivela wenyu mohodikoya ira dahadowe mmuliha mwemo munavunda maningo, mwasiwa muhutatilela unduli wenyu jotega jaga jatene. 18Tchoira Nimburo na Anokwa kannawanda utamalelani eto nne ukwa kunawanda utitimihani. Eto atu anne anadowa mmulihani kinawanda ona roromeleya wenyu. 19Mbwenye atu okalawo, atu okalawo mbwenye, aliwa banautamalelani nnga na makalelo nnaira miyo peno. Babi uli watene unerege uiziweyihani wa ahimaye.
20Yehova ohoza diwombola. Nona hiyo nnerege nliha joimbana jehu, nimutamalelege Yehova kalawo wehu watene, muNyumbani mwa Yehova.>>
21Tchoira mwene Ezekiya ahanavulumuwe, Izaiya ohowonga eraga: <<Kadowani mwavende nibolu nosakanyiwa na jovaha ja mufigera, muzena, muhele vailondani vaye ira mwene avulumuwe.>> 22Eto Ezekiya ohoira: <<Kodi ionihedo tchivi inafuna we dioniha ira dikayena ibaribari ira nnovulumuwa, difiyede dowa Nyumba ya Yehova?>>
လက္ရွိေရြးခ်ယ္ထားမွု
Izaiya 38: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral