Izaiya 28
28
Langiwa wa akuda Efarayimi
1Imala arutcha andimuwa otonga ovitukulela a Efarayimi, aliba lrezelra! Riya undimuwa wa sidadi yewa ya Samariya uroma nyala nnga tondo. Sidadi inafwanyeya nkuma wa ndabo nokana teya yapama eto atuwa kohomala gondjihiwa na vinyu. 2Kaing'anani, Nabwiya umukana mutu waye olimba eto wa kopolo. Mutu wenno uli nnga za wa maralaza eto nnga nipevo nononga jengo, eto nnga za wa mahindje madjindji obwanyula jengo. Unoza aagwihede aliwa vati na ndanda naye. 3Jingari wa andimuwa otonga ovitukulela a Efarayimi anno kali aliba lrezelra, jingari wewa wewo unoza unyingaliwe. 4Riya undimuwa wa sidadi yewa uroma nyala nnga tondo. Sidadi inafwanyeya nkuma wa ndabo nokana teya yapama inakala nnga yovaha ya mutengo wa mufigera yoroma itwa tempu ya ilimwe yahanafiye. Mutu aona kanavaha tempu, unoimida ora imohive inahapa liye.
5Siku neno atu ohala a Yehova anoza kamuone Yehova wa Makuru Matene nnga yengo yapama, nnga tchapowa wa umwene eto nnga tchapowa oriyetchetcha. 6Yehova eto unoza aavahe aliba tonga ira kawande kana matongelo a ibaribari, eto unoza aavahe kopolo ale anawana kondo va mulango wa sidadi.
Langiwa wa akuda Jeruzalemu
7Fiyeda anamakuta na anamafiyiheda peno kali deri deri na mwasa wa vinyu. Anadedereya na jong'wa jolrezelriha. Aliwa kalive deri-deri na jong'wa jolrezelriha. Kohomala midiwa na vinyu. Anadedereya na mwasa wa jong'wa jolrezelriha. Kinawanda ona joroha. Anagwagwaduwa zela makalelo ewa otonga. 8Tchoira mmezani muwa muhumala zala maraveyo, eto kavali nimburo vahali uzende.
9Nnga Yehova unafuna anfundjihe ani? Kodi unafuna amuonelrihemo ani muselu waye? Unafuna liye awandelamo ba ahima kahiyile wamwa tchineneva. Eto unafuna liye awandelamo ba ahima karomile dja tchineneva.#28:9 Unafuna liye awandelamo ba ahima kahiyile wamwa tchineneva. Va na mwasa oira andimuwa ale kali olrezelra bure, Mulugu afuna atukule zelru daye, adowe aavahe atu oviyeviha, anno kaoneya nnga kahi yengo. Nione 1 Korinto 1:27-29. 10Tchoira fundjiha ku vaha zelru vang'ono vang'ono, endjedaga vang'ono vang'ono, va vang'ono, vo vang'ono. 11Tchoira Yehova unoufundjihani muwari mwa atu owonga iwongelo imohiwa yahaiziwile nyo, muwari mwa atu owonga jahanavwa nyo. 12Liye ohouwandelani ira: <<Nimburo novuma ti ni. Mwaahiye atu owaheya kavume. Nimburo novuma ti ni.>> Mbwenye nyo kamufunne nvwelela. 13Na mwasa wenno Yehova unoafundjiha zelru vang'ono vang'ono, endjedaga vang'ono vang'ono, va vang'ono, vo vang'ono, ira mudowe mwagwagwaduwe, mukotoliwe, mumange ratuwero eto muhindiwe.
14Na mwasa wenno vwani mazu a Yehova nyo atu opokiha, nyo munaatonga atu a Jeruzalemu. 15Nyo munawonga ira: <<Nihimala pangana yopangana na ukwa, nihimala vwanana na Nimburo na Anokwa, nona jorutcha jazaga kajinanifwanya hiyo. Hiyo eto nnaroromela jonama ira jikale wotawela wehu. Eto nnanyindela nama ira ikale yengo yonivulumutcha.>>#28:15 Andimuwa a Jeruzalemu kawongaga ira Nihimala pangana yopangana na ukwa, kahi ira andimuwa a Jeruzalemu kohopangana yopangana na ukwa nari. So yopangana yewa ali na akuda Ijipitu. Voira aIjipitu tchawanda akamiheda, yopangana yenno yafuna ziha ukwa. Eto mazu oira Hiyo eto nnaroromela jonama ira jikale wotawela wehu ba mazu osimbulela oapeta akuda Jeruzalemu. 16Nona Nabwiya Yehova unawonga ira: <<Kaing'anani, gu miyene uhenle aliserisi muwari mwa Siyawu, nibwe nagali nibwe na ibaribari, nibwe na vamwendoni nofuneya valukulu. Ule unaroromele nibwe neno, kaza atekenyeya. 17Tonga wa ibaribari unoza ukale nnga ngohi opimana nyumba. Upama unoza ukale nnga ngohi omangana nyumba. Maralaza anoza kanonge jonama jaroromela nyo. Mahindje ozala anoza kamide mamburo mwanyindeletcha nyo ira muvulumuwelemo.>> 18Evale yopangana yapanganne nyo na ukwa inoza imalihiwe. Eto yovwanana yenyu na Nimburo na Anokwa kinakalawove. Nonga wohokala wa masika waviraga, unomala ukotolani. 19Kada fendo inavira atu, nonga wewo unounongani. Nonga wewo unerege vira mabebehi ali matene, nari na ntana nari na mahiyu. Atu atene ovwa anerege rendjeya na muselu wenno.
20Inakala nnga mutu agonaga vakamani yokwiva kanawanda sapwiha mendo daye. Eto nnga mutu uvikunenle na manta mang'onong'ono kanawanda vipitikelrelrana mutu watene. 21Tchoira Yehova unoza avenye, awane kondo nnga vere liye mwango wa Perezimi eto avikunge nnga vere liye ndabo na Jibeyawu.#28:21 mwango wa Perezimi gu mwango wewo Mulugu amukamihedile liye Davi ira awande agondjiha amwidanaye. (2 Samuweli 5:20) ndabo na Jibeyawu tchi ilambo wewo Mulugu aakamihedile liye aIzarayeli ira kawande agondjiha amwidani. (Jozuwe 10:10-11; 1 Koronika 14:16) Unoza airena yofuna yaye yotikiniha. Unoza amarihe mabasaye kagali ogomiha niso. 22Nona nyo kamupetege mazu anna. Tchoira mwapeta, makurenti enyu oumangani anoza kalimbihiwe mokwaranya. Tchoira miyo dihivwa tonga wa Nabwiya Yehova wa Makuru Matene atongaga ira ilambo yatene itolotchiwe.
Mulugu ukana zelru daye mwa joira jaye
23Reyani mabaru, muvwe jinafuna miyo wonga, vuruwanani ira muvwe jinafuna miyo uwandelani. 24Kodi namalima unafuna zala unakalela tipulrave? Kodi liye unakalela limave owu kwesave?#28:24 Kodi namalima unafuna zala unakalela tipulrave? Ku wonga Mulugu kanakalelave atonga atu mbwenye tempu yafiya, unoavenyiha akoka. 25Agamanle sakanyedamo, unowoka masirikawu na mpeza, eto unozala tirigu na malinya, eto unozala sevada na nimburo naye, eto unorungunutcha munda watene na mbewu ya espelta.#28:25 espelta tchi mwana yomela yolingana na mbuga mbwenye inalimiwa unde. 26Tchoira namalima umala wandeliwa pama. Mulugu waye gunanfundjiha.
27Masirikawu kinabubudiwa na yobubudana yotutumuliwa na ng'ombe. Eto atu kinawendiha aterelado vazulu va mpeza. Mbwenye masirikawu anabubudana ikwakwari, eto mpeza anabubudana mwana imiri. 28Kodi mutu abubudaga tirigu unabubuda ira avayele kala utu? Nari. Tirigule agabubudeyile, liye kanakanyiheda bubudagave. Awendihaga aterelado na kavalo vazulu va tirigu, kahi ira tirigule avayele tchileya.#28:28 Kodi mutu abubudaga tirigu unabubuda ira avayele kala utu? Ku wonga Mulugu kaatongile aIzarayeli ira kamale atene mbwenye ali ira makata kakumemo. 29Zelru yenno inakumela wa Yehova wa Makuru Matene. Jowelruza jaye totikiniha, zelru daye ta pama kwaranya.
လက္ရွိေရြးခ်ယ္ထားမွု
Izaiya 28: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral