Daniyeli 1
1
Daniyeli na afwaye
1Yaka yaneraru yatonga Jeyowaki mwene wa Juda, Nabukodonozore mwene wa Babiloniya ohovenyaga na anyakondo aye, aliwa dowa Jeruzalemu, irindja sidadi yatene yenne ira kagondjihe. 2Evale Nabwiya ohosakanya ira Nabukodonozore awande mugondjiha Jeyowaki mwene wa Juda ule eto amuwake pandi imohi ya fwaramento dalabetchana atu Nyumba ya Mulugu. Mwa enne Nabukodonozore ule agamanle mugondjiha, ohotukulaga fwaramento dile, liye dowana nyumbani wa mulugu waye mwilamboni mwa Sinari, liye volotchiha nyumba mwakoya atu fwaramento da mulugu waye.#1:2 Nabwiya ohosakanya ira Nabukodonozore awande mugondjiha Jeyowaki mwene wa Juda: Gondjiha wa Nabukodonozore wazenle muwari mwa kopolo da Mulugu. Mbwenye mwene Nabukodonozore muwari mohomuiziwa mutu amukamiheda, adowaga vande, amutamalela mulugu waye. Tapulela ira masiki ale anarayela muwari mokwima ira karayele Mulugu gunarumeliha eto Mulugu gunaatonga zela jotega jiwa. Ku wonga Mulugu gu mwene otonga jatene, masiki atu ohara amilugu amohiwa nnga mwene Nabukodonozore.
3Mwa enne mwene Nabukodonozore ohomuwandelaga mulombwana Aspenaji, wenno ali mundimuwa wa anamalabaye,#1:3 mundimuwa wa anamalabaye : nari mundimuwa osogolrelra alombwana ohoya mmba afwaye Ora yenno kohokalawo amwene amohi kaafuna alombwana ohoya mmba ira kasogolrelrege mabasa amohiwa kaumbuwelaga ira: <<Mulombwana ohoya mmba kanatamangela ja ahiyana. Unerege hinda mabasaye bahi.>> (2 Amwene 9:32-33; Estere 2:3; Jeremiya 38:7) liye ira: <<Miyo nnafuna ira udowe waasake muwari mwa Ana Izarayeli, atu a muibalini mwa mwene, nari a muibalini mwa atu oiziweya, 4azombwe ohokana yotakala ili yatene, maningo ewa matene, azombwe oriya, ofundjetchetcha, oiziwetchetcha, oonelramo na a toto, ofwanela kala na miyo palasiyoni waga. Aliwa kafundjihiwe wonga no lremba uwa wene iwongelo ya aBabiloniya.>> 5Evale mundimuwa Aspenaji ohadowelaga azombwale, aliwa za. Kagazile, mwenole ohotonga ira aliwa kadjege jodja jejo jadja mwene malambo matene eto ira kang'wege vinyu wenno ang'wa liye. Aliwa eto kohovahiwa ira kafundjihiwe yaka taru ira magomelo wa yaka dedile kadowe kalabege mabasa vamentoni va mwene Nabukodonozore.
6Mwa azombwe kasakulriwe ale, kohokalamo azombwe annayi ala: Daniyeli, Ananiya, Mizayeli, na Azariya. Aliwa kakumile nlogo na Juda. 7Mbwenye mundimuwa wa anamalaba atene a mwene Nabukodonozore ule ohavahaga mazina mamohiwa.#1:7 ohavahaga mazina mamohiwa: Fwanyeya ira azombwe annayi ale kazaga, kohokana mazina kanna yotapulela ya Mulugu wa Izarayeli. Mbwenye mundimuwa wa anamalaba ule ohavahaga mazina mamohiwa a amilugu ewa. Nione 4:8. Daniyeli ohonvaha nzina na Beltesazare, Ananiya liye nvaha nzina na Sadaraki, Mizayeli liye nvaha nzina na Mezaki eto Azariya liye nvaha nzina na Abedenego.
8Mbwenye muzombwe Daniyeli ohela mmirimani mwaye ira ahavitakalihe na jodja jejo javahiwe atu ira kadjege jokumela meza ya mwene, nne zela vinyu wenno wang'wetcha mwene. Mwa enne liye ohonvepaga mundimuwa wa anamalaba ule ira: <<Nnauvepani ira murumelihe ira dahavitakalihe na jodja ji.>>#1:8 dahavitakalihe na jodja ji: Fwanyeya ira wanle Mulugu ohawandela aJudewu jengo jofwanela ira aliwa kadje. Eto ohawandela jimohi jiwa joatakaliha jejo jahafwanela ira aliwa kadje. (Detoronomiyo 14:3-20) Voira aBabiloniya tchabalra malamulo anne eto aliwa kohara vikwamutu josema (Daniyeli 5:23), aliwa podi kana makalelo odja jengo jokuteliwa vikwamutu josema jile muwari motamalela. Nona pa evale Daniyeli akonda liye dja jodja ja mwene. 9Mulugu ohosakanya ira mulombwana Daniyeli awande fwanya upama na tangaranga vamentoni va mundimuwa wa anamalaba ule. 10Evale mundimuwa wa anamalaba ule ohomuwandelaga Daniyeli eraga: <<So inaova miyo, miyo nnamuova mbwiyaga, mwene wenno ukumihile utongi zela jodja jinafuna nyo djaga eto zela jong'wa jinafuna nyo ng'waga. Tchoira nyo mwahadje jinadja azombwe afwinyu eto mwenole aza, aona ira nyo muhumala wonda eto yavweya ira kamunadja juvahileni liye, liye podi funa jodigwada muru waga na mwasa wenyu.>>
11Evale Daniyeli ohodowa wa mundimuwa ahambihiwe na mundimuwa wa anamalaba ule ira liye amuing'anelege Daniyeli na Ananiya na Mizayeli na Azariya. Aganfwanyile ohomuwandelaga eraga: 12<<Miyo nnouvepani ira munixixe hiyo anamalaba enyu malambo kumi, munivahaga jalo ja mmindani ira nidjege eto mahindje ira ning'wege! 13Hiyo nnafuna munixixe muone makalelo anafuna hiyo kana, vamohi na makalelo anafuna kana azombwe anadja jodja ja mwene. Mwagahiyanihilevo, munoirana yenno inafune nyo na hiyo vano anamalaba enyu.>>
14Mwa enne liye ohovwaga yovepa yewa, liye axixa malambo kumi, kadjaga jalo ja mmindani eto kang'waga mahindje. 15Mwa enne magomelo wa malambo kumi ale, fwanyeya ira maningo ewa kohofwanyeyagana makalelo apama, aliwa kohomalaga ruva hiyaniha na azombwe atene kadjetcha jodja ja mwene. 16Mwa enne mundimuwa wenne aaing'aneletcha ule, ohotonga ira kahavahiweve akoka jodja jakuma vameza va mwene na vinyu wavahiwe atu ira kang'wege, mbwenye kavahiwege jalo ve bahi.
17Fwanyeya ira va azombwe annayi ala, Mulugu ohavaha zelru no iziwetchetcha zela yolremba ili yatene no nonelamo watene.#1:17 va azombwe annayi ala, Mulugu ohavaha zelru: Agali azombwe kakumile Juda kohoindjiva, Mulugu aavahile zelru atene anne kakondile vitakaliha na jodja ja mwene. Tchoira Mulugu unolaba mabasaye muwari mwa atu okonda jabure hiya ovitakaliha na jabure. Eto Mulugu ohonvaha mulombwana Daniyeli iwandelo yotapulela joona na joroha jatene.
18Magomelo wa yaka taru dofundja dile, mwene Nabukodonozore oharuma atwaye ira kaazegena azombwale vamentoni vaye. Evale mundimuwa wa anamalaba ule ohatukulaga azombwe atene, liye adowana vamentoni va mwene. 19Evale mwene ohotapanyaga na aliwa eto kavafwanyeyaga muzombwe okwakwanela na Daniyeli, Ananiya, Mizayeli na Azariya. Na mwasa wenne, azombwe annayi ale kohalaga, aliwa labaga vamentoni vaye. 20Fendo datene mwene afuka liye zela yengo ili yatene yafuneya ira ilabiwena zelru nari iziwetchetcha, mwenole ofiyeda ona ira atu annayi ale kohokana toto didjindji akwaranya ang'anga okwima atene na aliba visangwisangwi atene kafwanyeya muumweneni mwaye.
21Mulombwana Daniyeli ohokalagave palasiyoni wa mwene wewule fiyeda yaka yaromile tonga mwene Siru.
လက္ရွိေရြးခ်ယ္ထားမွု
Daniyeli 1: iLolo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018 Visão Integral