Maroma 14
14
1Tambulenu muntu wabula Ŋovu mukukuhwelela, ilaŋa bayi chakutadika ninduku. 2Muntu wumu wekala nakukuhwelela kwakudya yuma yonsu, mukwawu wabula Ŋovu wadyaloŋa kwamafu. 3Muntu wadyaloŋa, bayi asekesha mukwawu walekaŋa kudyaku; muntu walekaŋa kudya, bayi asompesha mukwawu wadyaloŋaku, muloŋa Nzambi namutambuli. 4Eyi wukusompesha ŋamba yambala, yeyinyi? Hela nemani hela nadimbuki, hinsaŋu yaMwanta windi omweni. Chalala akamwimika, muloŋa Mwanta natweshi kumwimika.
5Muntu wumu walemeshaŋa ifuku dimu nindi dabadika di kwawu; mukwawu nindi mafuku ejima wowamu hohu. Chachiwahi antu ejima eluki chalala awenawu, iwu mwanatoŋojokiyi, iwu mwanatoŋojokiyi. 6Muntu wajilikaŋa ifuku, wadiŋilikileŋa Mwanta; muntu wadyaloŋa, wadijilikaŋa Mwanta, muloŋa wamusakililaŋa Nzambi; muntu walekaŋa kudya walekelaŋa hansaŋu yaMwanta, niyena nawa wamusakililaŋa Nzambi. 7Kwosi mwinetu wadihandilaŋa yomwenuku; kwosi wadifwilaŋa yomwenuku. 8Muloŋa hela tukuhanda, tukumuhandila Mwanta; hela tukufwa, tukumufwila Mwanta. Dichi hela tukuhanda hela tukufwa, tudi ambala aMwanta. 9Dihu hafwililiyi Kristu hakuhanda cheŋi, kulonda akekali Mwanta wawafu niamomi.
10Eyi mukwetu, wasompeshelaŋadi mana kweyi? Cheŋi nawa, eyi mukwetu mukwawu, wasekeshelaŋadi mana kweyi? Muloŋa wonsu wetu twamba kemana kwitanda daNzambi dakusompela. 11Muloŋa nasoneki nawu, Yehova nahoshi nindi, Chinahandaŋichi, manuŋu ejima amba kanfukamina, madimi ejima amba keteja kudi Nzambi. 12Dichi dinu, wejima wetu twamba kalumbulula kudi Nzambi mutwelaŋa hamuntu hamuntu.
13Bayi tusompeshaŋa akwetu nawa cheŋuku. Chakala tubabalenu tubuli kushila mana kwetu chuma chakudimbukila hela chakuhukena munjila yindi. 14Neluki chikupu mudi Mwanta Yesu, nami hikwekala chuma chaditaminaŋa chachenuku; Ilaŋa muntu watoŋojokaŋa nindi chatama, chikwikala chuma chatama kudi yenowu. 15Neyi waneŋeshaŋa mukwenu nakudya kweyi, wunaleki dehi kwenda mukukeŋa. Bayi wukisaŋana mukwenu afwililiyi Kristu, nakudya kweyuku. 16Chimwelaŋa chachiwahi bayi achitenaŋa nawu chatamaku. 17Muloŋa wanta waNzambi hiwalemena mukudya nakunwaku, walemena mukuloŋa, nimukuwunda, nimumuzaŋalu wamudi Spiritu Wajila. 18Muntu wakalakelaŋa Kristu mwenimu, wamutiyishaŋa Nzambi kuwaha, amuhamekaŋa nikudi antu nawa. 19Dichi tushenu muchima hakwila yuma yaletaŋa kuwunda, niyuma yakudikolesha nachu wumu namukwawu. 20Bayi mujaha mudimu waNzambi nansaŋu yakudyaku. Chalala yuma yejima yayiwahi; ilaŋa chatama muntu kudimbwisha mukwawu nachuma chadyaloŋayi. 21Chachiwahi kuleka kudya mbiji, hela kunwa walwa, hela kwila chuma chimu chakudimbwisha nachu mana kweyi. 22Kukuhwelela kweyi kuwekala naku, ikalaku naku eyi aweni kumesu aNzambi. Muntu wabulaŋa kudi bayisha nachuma chetejaŋayi, nakooleki. 23Hakwila muntu wukudya nantadi nabayi, muloŋa nadyi chakadi kukuhwelela; Muloŋa yuma yejima yabula kuya mukukuhwelela hinshidi.
လက္ရွိေရြးခ်ယ္ထားမွု
Maroma 14: MW62
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bible in Lunda: Ndembu (Lunda of Kalunda) © B. F. B. S. 1962.