ALIKƆLƆ̍SĀYI 2
2
1N ge̍ē koko̍o de ala̍ lɔkɔ nīi n ya̍ u̍ku̍rɔ̍ gba̍a̍ de ala̍, ba̍la Alileyode̍siya ba̍la āchɛ ɛha̍ wa̍a̍ nīi i̍ je̍ u la eyī ɛpɛpa je̍ ni̍ ma̍. 2N ya̍ nīi e̍ ge̍ē tū ūkpɔ̄tū yɛngrɔ̄ɔ. N gba̍a ya̍ nīi e̍ ge̍ē tū ngmo̍tu̍chɛ̄ la ɔhɔtū, hɛ̄ɛbɛ nīi e̍ ē po̍ ochi̍chi̍ yī lɛlā wa̍a̍ la ɔgɔ̄grāa, ē de ē lwɔhɔ̍hu̍ brii ē bū la ochi̍chi̍ yī lɛlā olēchi̍ lēchi̍ ɔla̍ā. Bū la ɛbɛ ɔla̍ā, e̍ ge̍ē jyɛ̍ɛ̄lā ɔtrɛ̍ba yī Ɔwɔ nīi re̍ka Ikra̍yisi ma̍. 3Ikra̍yisi, anu̍ - oyi̍īgbɔ̄gɔ̄rɔ̄ obī lwāa ɔpu yī ɛbɛ nīi lɛlā ojo̍ōje̍ ka̍ka̍ ba̍la ochi̍chi̍ yī Ɔwɔ ojo̍ōje̍ hɔ̄ ma̍ a̍nɛ.
4Ala̍ ma̍ gɛ ko̍ō! Ala̍ e̍e chɛ̄ nīi ɔ̄chɔ̄chɛ ge̍ gwi̍bobo tū ala̍ la ahu̍lɛ̄lā yī arīmɛ̄ la ɔtɔ̍ɔ̄ta̍ ni̍. Lɛlā yī wā ɔ̍lɔma̍ ge̍ hɔ̄hwɔhi bāa ɔjɔ̄jā ma̍, ala̍ e̍e chɛ̄ ni̍. 5N i̍ hɔ̄ɔ̄hɔ̄ abɔ̍ɔ ba̍la ala̍ la ɔ̄chɛ̄ɛchɛ ni̍ nyaa ma̍, n hɔ̄ abɔ̍ɔ tāa ala̍ la uhu. Bū la ɛbɛ ɔla̍ā, n lɛ ɔwɔ̄wīyā gba̍a̍ nīi n ma̍ nīi ala̍ yarɛ brii lēchi̍ lēchi̍ ngmo̍tu̍chɛ̄ la ɔtū ode che Ikra̍yisi ma̍.
Ɔgɔ̄grāa yī ɔhɔ̄leyī ongmo̍tu̍chɛ̄ la Ikra̍yisi
6Ala̍ de chɛ̄ hīka Ikra̍yisi Iji̍sɔ̄ɔsi ɔ̍lɔ - Ādādā a̍nɛ ma̍, ala̍ ā hɔ̄ la ongmo̍tu̍chɛ̄ ba̍la anu̍ gɛ. 7Ala̍ ā tɛ̍ɛgba hiyuu ku̍ la anu̍ gɛ. Ala̍ ā gwo̍ ɔhɔ̄leyī yī ala̍ che la anu̍. Ala̍ ā ya̍ i̍ngɔ̍ɔ wa̍a̍ gɛ hɛ̄ɛbɛ nīi ala̍ ge̍ lwɔhɔ̍hu̍ ga iyɔ̄bū iyɔ̄bū la ɔtū ode chōche lɔkɔ nīi n ngū ala̍ ma̍. Ūkpɔ̄tū yī ala̍ ge̍ mōmu la o̍be yī wɔga ɔda Ɔwɔ ɔdɔ̄da.
8Ala̍ ā kū grigri hɛ̄ɛbɛ nīi ɔ̄chɔ̄chɛ ge̍ e̍e ku̍ ala̍ tū lɛfiyɛ la a̍kpla yɛ̍gra̍ ɔgɔ̍ɔ̄gla̍ yī wā ɔla̍ā ni̍. Yɛ̍gra̍ ɔgɔ̍ɔ̄gla̍ yī wā ɔla̍ā bū la lɛlā oje̍ ka̍ka̍ yī ɔ̄chɛ̄ɛchɛ. Lɛlā oje̍ ka̍ka̍ yī wā ɔla̍ā chī bū la lɛlā ongōngū yī āchɛ̄ɛchɛ ba̍la lɛlā yī uhu ɛha̍ nīi yɛ ē bī wɔhu̍ yī yɛchɛ ma̍. O̍ i̍ bū la abɔ̄ yī Ikra̍yisi ni̍. 9Wu̍chē oji̍ nɛ, lɔkɔ nīi Ɔwɔ lɛ ke̍e̍ la ɔgɔ̄grāa ma̍ hɔ̄ i̍ngɔ̍ɔ la ibi̍īyē yī Ikra̍yisi la onīi o̍ wɛ ɔ̄chɛ̄ɛchɛ ma̍. 10Ɔwɔ chī de ɔhɔ̄leyī ɔgɔ̄grāa ke̍e̍ de ala̍ la otū ngmo̍tu̍chɛ̄ ba̍la Ikra̍yisi mɛ̍. Ikra̍yisi ga uhu ɔha̍lɔha̍ wa̍a̍ nīi yɛ ē deyīrɛ ɛbɛ kɛ̄ɛ bī wɔhu̍ yī ɛbɛ ma̍ ɔgɔ̄ga.
11Bū la otū ngmo̍tu̍chɛ̄ ba̍la Ikra̍yisi nīi ala̍ de twɔ̍wu̍ a̍nɛ. I̍ wɔwu̍ ɔtɔ̍ɔ̄ta̍ nīi āchɛ̄ɛchɛ ē ta̍ āchɛ ma̍ ni̍; wɔwu̍ ɔtɔ̍ɔ̄ta̍ nīi - iyī Ikra̍yisi ma̍ nīi ala̍ ta̍ a̍nɛ. Ɔjā nīi tū lipu̍ yī ɔla̍ā ma̍, ode alɔ hɛ̍ta̍ hī wɔhu̍ yī ibi̍īyē yī alɔ nīi ē yɛ̍ɛ̄lā ɔdwɔ̄bi̍ ma̍ nɛ. 12Wu̍chē oji̍ nɛ, yɛ̄grāa nīi ala̍ hu yenyi ma̍ nīi e̍ de ala̍ nyi ba̍la Ikra̍yisi a̍nɛ. La yenyi ohōhu ɔla̍ā, ala̍ hye̍ēyī la okū ba̍la Ikra̍yisi bū la onīi ala̍ de ɔtū che wɔhu̍ yī Ɔwɔ nīi yɛ ē ya̍ u̍ku̍rɔ̍ ma̍. Ɔwɔ ɔla̍ā - anu̍ chī de Ikra̍yisi ɔlɔjā hye̍ēyī la okū a̍nɛ. 13Yɛ̄grāa ɔha̍ i̍chɔ̍lɔ ma̍, ala̍ pīyaku̍ wu̍chē yī lɛlā ɔdwɔ̄bi̍ yī ala̍ ba̍la wu̍chē lɔkɔ nīi ala̍ - Ɛchɛkɔcha nɛ, nīi Lihɔ yī Imo̍sīisi i̍ hɔ̄ de ala̍ ni̍ ma̍. U̍ma̍ama, Ɔwɔ de ala̍ bī wā la ɔhɔ̄leyī ba̍la Ikra̍yisi mɛ̍. Ɔwɔ de lɛlā ɔdwɔ̄bi̍ wa̍a̍ nīi alɔ ya̍ ma̍ kɔ̄ de alɔ ke̍e̍ mɛ̍. 14O̍ de ure̍ yī lɛlā ɔdwɔ̄bi̍ nīi lā ga̍nū de alɔ ma̍ ngmo̍nyi̍ ke̍e̍, gala lihɔ yī ure̍ yī lɛlā ɔdwɔ̄bi̍ ɔla̍ā wa̍a̍ mɛ̍. O̍ de ɔ̍ chāajɛ, de ɔ̍ gwōba̍ la ɔchi̍ ɔhrɛ̍ɛpa mɛ̍. 15Abɔ̍ɔ la ɔchi̍ ɔhrɛ̍ɛpa ɔla̍ā, Ikra̍yisi de iyī nū wu̍ ngmɛ̍ɛchɛ ke̍e̍ hī abwɔ̄hu̍ yī uhu ɛha̍ nīi yɛ ē deyīrɛ ɛbɛ ma̍ ba̍la enīi bī wɔhu̍ yī ɛbɛ ma̍. O̍ ya̍ wā lɛlā ɔma̍ bī ka la ɔgbādu, kpo̍ wā kwɔ̍gba bāa afiyɛ yī lɛwu̍ ma̍ la ɔ̍gba yī ogrinya ɔhɔ̍ɔ̄hɛ̍ yī nū wu̍chē yī onīi o̍ de wa̍ gwō ma̍.
16O̍ lɛ i̍ngɔ̍ɔ ma̍, ɔ̄chɔ̄chɛ ge̍ e̍e trīihɔ yī ɔjā ɔha̍ oro̍ōre̍, kɛ̄ɛ iyī ɔjā ɔgwɔ̍ɔ̄gwa̍, kɛ̄ɛ iyī ɔ̄chī ɔnɛ̄ɛhɛhi ɔha̍, kɛ̄ɛ iyī ɔ̄chī ɔwɔ̄wīyā yī ɔyɔ̍ɔ onīpīpɛ̄, kɛ̄ɛ iyī Ɔ̄chī Ɔmyɛ̍nyɛ̍ ni̍. 17Ɛjā oli̍ngɛ̍ɛ̄nɛ̄ nūma̍ wa̍a̍ - uhu yī ɛjā kpakpa nīi ge̍ē hɔ̄ la ɔ̄chī iyɔ̄bū ma̍ nɛ. Onīi - olēchi̍ kpakpa nīi ɛjā ɛla̍ā wa̍a̍ yɛ ē miyabɔ̄ yī nū ma̍ - Ikra̍yisi nɛ. 18Āchɛ ɛha̍ gblāa abɔ̍ɔ ē ka hīka aɛ̍lɛ gɔ̄ga a̍nɛ wu̍chē yī yɛ̍ma̍ ɔlɛbɛ̍bi̍ ɔmɔ̍ɔ̄ma̍, ba̍la obli̍kpo̍ kpɛɛ ka āchɛ ɛ̍lɛ ge̍ ya̍ otūlichō de ayɛ̍ɛ̄chɛ̄rɔ̄ yī Ɔwɔ. Āchɛ eli̍ngɔ̍ɔ ɛla̍ā ē de ē jɛ̄ ɛba̍achɛ kpɛ̍ɛ bū la ɛri̍ya̍ ogbōgbo yī wā ɛla̍ā nīi - iyī āchɛ̄ɛchɛ ɔlamu cha̍ka̍ra̍ ma̍. Ala̍ e̍e chɛ̄ nīi āchɛ eli̍ngɔ̍ɔ ɛla̍ā ge̍ ya̍ ala̍ lɛfiyɛ yī lɛlɛ̄lā ni̍. 19Āchɛ eli̍ngɔ̍ɔ ɛla̍ā wa̍ābɔ̄ hī Ikra̍yisi nīi re̍ka lɛhu̍ yī ibi̍īyē ma̍ mɛ̍. Ibi̍īyē nīi chī hɔ̄ la ihi̍yajɛ yī Ikra̍yisi ma̍ ē hiyē hwɔhi hwɔhi, iko ba̍la inyi̍hi̍ yī nū wa̍a̍ hra̍ku ke̍e̍ nīi o̍ yɛ ē jɛ̄ lɔkɔ nīi Ɔwɔ chikpo̍ ka ɔ̍lɔ ge̍ jɛ̄ ma̍.
Ɔpīyaku̍ ba̍la ɔhɔ̄leyī la Ikra̍yisi
20Ala̍ chī pīyaku̍ ba̍la Ikra̍yisi nīi o̍ de ala̍ wu̍ ngmɛ̍ɛchɛ hī abwɔ̄hu̍ yī uhu ɛla̍ā nīi yɛ ē deyīrɛ yɛchɛ mɔri̍mɔri̍ ma̍ mɛ̍. Ɔna̍ - ɔgba̍a ya̍ ɔhɔ̄leyī bɔ̄ɔjā nīi ala̍ - āchɛ yī yɛchɛ nūma̍ we̍ nɛ ma̍? Ɔna̍ - ɔgba̍a ya̍ otūlichō yī lihɔ eli̍ngɛ̍ɛ̄nɛ̄ wa̍a̍ nīi e̍ ē tū ma̍? 21Ɛha̍ re̍ka, “A ā nāa ɔjā nūma̍ bī la abɔ̄ ni̍! A ā de oko̍o tū ɔjā ɔla̍ā ni̍! A ā de abɔ̄ gwō ɔla̍nū ni̍!” 22Ɛjā eli̍ngɔ̍ɔ ɛla̍ā wa̍a̍ ē de ē pīya a̍kpla yī lɛlā nīi āchɛ ge̍ yɛ ē ya̍ i̍ngɔ̍ɔ ma̍. Ɛla̍ā wa̍a̍ - lihɔ yī āchɛ̄ɛchɛ ba̍la lɛlā ongōngū yī aa̍ ɛlɛjā ji nɛ. 23O̍ chī ya̍ bɔ̄ɔjā nīi lɛlā ojo̍ōje̍ ka̍ka̍ hɔ̄ abɔ̍ɔ la ita yī lihɔ ɔla̍ā ma̍. E̍ ē bli̍kpo̍ kpɛɛ ka āchɛ ɛ̍lɛ ge̍ ya̍ otūlichō de ayɛ̍ɛ̄chɛ̄rɔ̄ yī Ɔwɔ; āchɛ ɛ̍lɛ ge̍ bī iyī ɛ̍lɛ ga ajɛ dwɔ̄bi̍ dwɔ̄bi̍; āchɛ ɛ̍lɛ ge̍ ya̍ ibi̍īyē yī ɛ̍lɛ ichi̍ dwɔ̄bi̍ dwɔ̄bi̍. I̍ lɛlā ɔyɔ̍ɔ̄ya̍ i̍ngɔ̍ɔ ɛla̍ā wa̍a̍ chī - ɔjā ɔlamu ɔlamu nīi ge̍ē ku̍ ibi̍īyē yī ɔ̄chɛ ē bī hī a̍hla̍ ɔdwɔ̄bi̍ nīi hɔ̄ la ibi̍īyē yī ɔ̄chɛ ma̍ a̍ni̍.
လက္ရွိေရြးခ်ယ္ထားမွု
ALIKƆLƆ̍SĀYI 2: YBASR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020 Bible Society of Nigeria (second edition)