ALIKƆLƆ̍SĀYI 1
1
Owu̍tu
1Ami Ipɔ̍ɔli nīi de pīya ɔlɛrɔ̄ yī Ikra̍yisi bū lɔkɔ nīi Ɔwɔ ɔlɔjā chikpo̍ ma̍, ami ba̍la Iti̍mōti ɔɔ̍nɛ̍ yī alɔ ta̍ īpū nūma̍ tɛ̄rɔ̄ a̍nɛ. 2Alɔ tɛ̄rɔ̄ nūma̍ hu ala̍ nīi - āchɛ yī Ɔwɔ gblāa abɔ̍ɔ la Ikɔlɔ̍sāyi ma̍; ala̍ nīi - aɛ̍nɛ̍ yī alɔ la abɔ̄ yī Ikra̍yisi nīi alɔ de ɔtū che ala̍ ma̍ nɛ.
Ɔwɔ nīi - A̍dā yī alɔ ma̍ ge̍ de ɔpiyɛ ba̍la ogbodɔ̍dɔ̍ de ala̍ wa̍a̍.
Ɔhā oji da Ɔwɔ o̍be
3Alɔ ē da Ɔwɔ, A̍dā yī Iji̍sɔ̄ɔsi Ikra̍yisi nīi - Ādādā yī alɔ ma̍ o̍be myɛ̄grāa-myɛ̄grāa nīi alɔ ē jɔhā de ala̍ ma̍. 4Wu̍chē oji̍ nɛ, alɔ po̍ ohu yī ala̍ lɔkɔ nīi ala̍ de ɔtū che Ikra̍yisi Iji̍sɔ̄ɔsi ma̍, ba̍la lɔkɔ nīi ala̍ yɛ ē yɔ̍ɔhɔtū yī āchɛ yī Ɔwɔ ma̍. 5Yɛ̄grāa nīi ɛrɔ̄ olēchi̍ lēchi̍ nūma̍ nīi - Wɔ̄kā Ɔlwɔnyɛ yī Ɔwɔ ma̍ gbajɛ wā la ɛbɛ yī ala̍ la ɔrāarāa ma̍, je̍ka aa̍ ala̍ plɛ̍ɛ̄lā odeyīche nīi o̍ chabɔ̄ ma̍! Bū la ɛbɛ ɔla̍ā, ɔtū nīi ala̍ de che Ikra̍yisi ma̍ ba̍la ɔhɔtū ɔla̍ā nīi ala̍ lɛ ma̍, aa̍ wa̍a̍ bū la ɔjā nīi ala̍ deyīche nīi Ɔwɔ chī de lā abɔ̍ɔ la ichō hwɔhi hwɔhi de ala̍ ma̍. 6Wɔ̄kā Ɔlwɔnyɛ yī Ɔwɔ yɛ amu ē bī ɔpiyɛ yɛ̄mɛ̄mɛ̄ wā, o̍ chī gba̍a yɛ amu ē ngrāa ē gāa ɛbɛha̍ wa̍a̍ la yɛchɛ mɛ̍. O̍ yɛ ē ya̍ i̍ngɔ̍ɔ ke̍e̍ lɔkɔ nīi o̍ ya̍ la ɛbɛ yī ala̍ īchāha̍ ɔla̍ā nīi ala̍ plɛ̍ɛ̄lā ku̍ uhwa ɔnɛ̄ɛhɛhi yī Ɔwɔ la ɔrāarāa, o̍bū de ɔ̍ jo̍ōje̍ lɔkɔ nīi o̍ lɛ la olēchi̍ lēchi̍ ma̍. 7Je̍ka aa̍ ala̍ ngū lɛlā nūma̍ i̍ngɔ̍ɔ bū la abɔ̄ yī Ɛpa̍frāasi nīi - ɔ̍nyīmɔ̄chɛ yī alɔ lēchi̍ lēchi̍ nīi hɔ̍chɛ̍ i̍ngi̍ngɔ̍ɔ bāa alɔ ma̍. Anu̍ - ɔ̄chɛ ode ɔtū che ɔ̍ hwɔhi hwɔhi nīi yɛ ē ya̍ u̍ku̍rɔ̍ ē de Ikra̍yisi ē kulɛhu̍ yī alɔ a̍nɛ. 8O̍ kɛlā ku̍ ɔhɔtū nīi Uhu yī Ɔwɔ kɔ̄ de ala̍ wa̍a̍ ma̍ de alɔ.
9Ɔla̍ā - ohu̍ nīi alɔ ē jɔhā de ala̍ i̍ngɔ̍ɔ myɛ̄grāa-myɛ̄grāa bū la īchāha̍ ɔla̍ā nīi alɔ plɛ̍ɛ̄lā ku̍ ala̍ ma̍ a̍nɛ. Alɔ yɛ ē ra̍ābɔ̄ hīka Ɔwɔ ge̍ ya̍ nīi ala̍ ge̍ jo̍ōkū yī lɛlā nīi o̍ chikpo̍ ma̍. O̍ ge̍ de lɛlā ojo̍ōje̍ ka̍ka̍ ba̍la ochi̍chi̍ yī lɛlā opo̍ōpo̍ nīi Uhu yī nū de ma̍ mu ala̍ iyē. 10Bū la ɛbɛ ɔla̍ā, ala̍ ge̍ē jɔ̍ɔkɔ ē hɔ̄leyī lɔkɔ nīi Ādā ɔlɔjā chikpo̍ ke̍e̍ ma̍. Ala̍ ge̍ē gba̍a ē yɛ̍ɛ̄lā nīi hi ɔ̍ ɔtū ke̍e̍ ma̍ ē mɛ bɛ̍ɛ̄nɛ̄. Bū la ɛbɛ ɔla̍ā, ɔhɔ̄leyī yī ala̍ ge̍ē ya̍ yɛ̍yɛ̍ la ita yī lɛhi ɔyɔ̍ɔ̄ya̍ ɔha̍lɔha̍ wa̍a̍; ala̍ ge̍ē jɛ̄ hwɔhi hwɔhi la ochi̍chi̍ yī lɛlā yī Ɔwɔ ojo̍ōje̍. 11Ɔwɔ ge̍ ya̍ nīi ala̍ ge̍ de lwɔhu̍ brii bū la wɔhu̍ ɔnɔ̄kɔ̄kū nīi bū la wɔhu̍ yī rīgā yī anu̍ ɔlɔjā, hɛ̄ɛbɛ nīi ala̍ ge̍ jɔ̍ɔkɔ tū ūkpɔ̄tū yɛngrɔ̄ɔ la lɛlāha̍ ɛlāha̍ wa̍a̍ mlɔtū kpɔ̍ɔ̍. 12Ala̍ ā da Ɔwɔ nīi - A̍dā ma̍ o̍be la ūkpɔ̄tū ɔlɛyaya gɛ! Anu̍ ya̍ nīi ala̍ de hwɔhi ge̍ē nāa ɔjā nīi Ɔwɔ de lā de āchɛ yī nū abɔ̍ɔ la ɛbɛ ɔlɛgēdēgēdē yī nū ma̍ a̍nɛ. 13O̍ de alɔ wu̍ ngmɛ̍ɛchɛ ke̍e̍ hī wɔhu̍ yī ɛbɛ odobū mɛ̍. O̍ de alɔ bī ke̍e̍ wā la ɛbɛ yī Ɔchwɔ̄lɛ̍ Oro̍ōre̍ yī Ɔyi̍ yī nū lēchi̍ lēchi̍ mɛ̍. 14Bū la abɔ̄ yī Ɔyi̍ yī nū nīi alɔ lɛ ɔhɛ̍ta̍ ke̍e̍ a̍nɛ; anu̍ de lɛlā ɔdwɔ̄bi̍ yī alɔ wa̍a̍ kɔ̄ de alɔ ke̍e̍ a̍nɛ.
Ɔ̄chɛ nīi Ikra̍yisi wɛ ma̍ ba̍la u̍ku̍rɔ̍ yī nū
15Ikra̍yisi - ɔ̄chɛ nīi e̍ ē mɔ̍ɔ̄ma̍ la eyī nɛ; o̍ chī - īgbla yī Ɔwɔ nīi ɔ̄chɛ i̍ ē mɔ̍ɔ̄ma̍ la eyī ni̍ ma̍ nɛ. Ikra̍yisi - Ɔyi̍ rɛ̄ɛya yī Ɔwɔ nīi ga ɔjāha̍ ɔjāha̍ wa̍a̍ nīi Ɔwɔ yɔ̍ɔ̄ya̍ ma̍ nɛ. 16Bū la abɔ̄ yī nū nīi Ɔwɔ ya̍ ɛjāha̍ ɛjāha̍ wa̍a̍ abɔ̍ɔ la ichō ba̍la amu la ajɛ a̍nɛ: ɛjā ɔma̍ la eyī ba̍la i̍ma̍ la eyī ni̍, gala uhu ɛha̍ nīi bī wɔhu̍ wa̍a̍ ma̍, enīi re̍ka ādādā ma̍, enīi deyīrɛ ɛbɛ ma̍ ba̍la enīi bī wɔhu̍ ɛha̍ ē yɛ̍ɛ̄lā ma̍. Ɔwɔ ya̍ yɛchɛ wa̍a̍ gala abɔ̄ yī Ɔyi̍ yī nū, de Ɔyi̍ yī nū ɔlɔjā. 17O̍ hɔ̄ o̍bo̍bū nīi ɛjā wa̍a̍ ngma̍ a̍nɛ. Bū la ongmo̍tu̍chɛ̄ ba̍la anu̍ nīi ɛjā wa̍a̍ hɔ̄ la ɛbɛ kpakpa nīi e̍ hɔ̄ wa̍a̍ ma̍ a̍nɛ. 18Anu̍ ɔlɔjā re̍ka lɛhu̍ yī ibi̍īyē yī nū nīi - ogrēeyī yī āchɛ yī Ɔwɔ ma̍ a̍nɛ. Ɔhɔ̄leyī nīi ibi̍īyē yī nū ɔla̍ā lɛ ma̍ bū la abɔ̄ yī nū. Anu̍ - Ɔyi̍ rɛ̄ɛya nīi hye̍ēyī la okū ma̍ a̍nɛ. Ɔla̍ā lɛ i̍ngɔ̍ɔ hɛ̄ɛbɛ nīi o̍ ge̍ē nāa ɛbɛ ɔrāarāa la ɔjāha̍ ɔjāha̍ wa̍a̍. 19Wu̍chē oji̍ nɛ, Ɔwɔ ɔlɔjā miya la abɔ̄ yī nū hīka Ɔyi̍ ɔ̍lɔ ge̍ lɛ i̍ngɔ̍ɔ ke̍e̍ lɔkɔ nīi Ɔwɔ lɛ ma̍ la ɔgɔ̄grāa. 20Gala abɔ̄ yī Ɔyi̍ yī nū, Ɔwɔ miya ge̍ē ku̍chē la yɛchɛ wa̍a̍ ē wā dikpo̍ ē ba̍ iyī nū. Ɔwɔ ya̍ ogbodɔ̍dɔ̍ bū la ɔpīyaku̍ yī Ɔyi̍ yī nū la ɔchi̍ ɔhrɛ̍ɛpa. Bū la ɔla̍ā, Ɔwɔ ku̍chē la ɔjāha̍ ɔjāha̍ wa̍a̍ amu la ajɛ ba̍la abɔ̍ɔ la ichō wā dikpo̍ba̍ iyī nū.
21I̍chɔ̍lɔ ma̍, ala̍ gblāa hwɛɛ hī Ɔwɔ. Ala̍ - ɛchɛlɛwu̍ yī nū nɛ, wu̍chē yī lɛlā abi̍ nīi ala̍ ē ya̍ ba̍la ɛri̍ya̍ nīi ala̍ ē gbo ma̍. 22U̍ma̍ama, bū la ɔpīyaku̍ nīi Ɔyi̍ yī nū ku̍ ma̍, Ɔwɔ ɔlɔjā de ala̍ pīya aɛ̍ɛya anu̍ ke̍e̍ mɛ̍. O̍ ya̍ i̍ngɔ̍ɔ hɛ̄ɛbɛ nīi ala̍ ge̍ē de ē pīya āchɛ ɛnɛ̄ɛhɛhi lɛ cha̍ri̍cha̍ri̍ i̍ tū abi̍ ni̍ nīi o̍ ge̍ē bī ala̍ ē ga iyɔ̄bū iyī nū ma̍. 23Ala̍ ā de ɔtū che i̍ngɔ̍ɔ ga iyɔ̄bū iyɔ̄bū brii la olēchi̍ lēchi̍ yī nū. Ala̍ e̍e chɛ̄ nīi ɔjɔ̄jā ge̍ diya ala̍ gee hī ɔjā nīi ala̍ deyīche yɛ̄grāa ɔla̍ā nīi ala̍ po̍ Wɔ̄kā Ɔlwɔnyɛ yī Ɔwɔ ma̍ ni̍. Lɛlā yī Wɔ̄kā Ɔlwɔnyɛ nūma̍ pi̍i̍ nīi ami Ipɔ̍ɔli hɔ̍chɛ̍ yī nū a̍nɛ. Wɔ̄kā Ɔlwɔnyɛ nūma̍ nīi e̍ ē ka ē de āchɛ wa̍a̍ la yɛchɛ a̍nɛ.
U̍ku̍rɔ̍ nīi Ipɔ̍ɔli ya̍ de Ogrēeyī yī āchɛ yī Ɔwɔ ɔla̍ā ma̍
24U̍ma̍ama, n lɛ ɔwɔ̄wīyā wu̍chē yī ichi̍ ɔmɔ̍ɔ̄ma̍ yī u lɛhu̍ yī ala̍. Bū la ichi̍ ɔmɔ̍ɔ̄ma̍ yī ibi̍īyē yī u nūma̍, n yɛ ē twɔ̄bɔ̄ hɛ̄ɛbɛ nīi ichi̍ ɔmɔ̍ɔ̄ma̍ yī Ikra̍yisi nīi - e̍e hōhī ma̍ ge̍ē chlɛhu̍. Ichi̍ ɔmɔ̍ɔ̄ma̍ yī Ikra̍yisi nīi hōhī nīi o̍ ge̍ē ma̍ wu̍chē yī ogrēeyī yī āchɛ yī nū nīi re̍ka ibi̍īyē yī nū ma̍ nɛ. 25Ɔwɔ de u pīya ɔ̍chɛ̍ yī ogrēeyī yī āchɛ yī nū. Anu̍ de u̍ku̍rɔ̍ nūma̍ de u ka amɔ̍lɔ ge̍ ya̍ wu̍chē yī ɔnɛ̄ɛhɛhi yī ala̍ a̍nɛ. 26Ɛrɔ̄ yī nū ɔla̍ā - lɛlā nīi o̍ de trɛ̍ba gbi̍chɛ gbi̍chɛ wa̍a̍, o̍bū nīi o̍ chōo̍chē de hi̍yɛchɛ u̍ma̍ama de āchɛ yī nū ma̍ nɛ. 27Ɔjā nīi Ɔwɔ miya ge̍ ya̍ ma̍, lɛlā ɔtrɛ̍ba ɔla̍ā ode hi̍yɛchɛ de āchɛ yī nū nɛ. Lɛlā ɔtrɛ̍ba nūma̍ mōmu la wɔdu ba̍la rīgā ɔnɔ̄kɔ̄kū de āchɛ wa̍a̍. Lɛlā ɔtrɛ̍ba ɔla̍ā re̍ka: Ikra̍yisi tū abɔ̍ɔ la ala̍ mɛ̍. Ɔla̍ā re̍ka ala̍ titi ge̍ē nāa rīgā nīi Ɔwɔ lɛ ma̍. 28Wu̍chē yī ɔla̍ā, alɔ nūma̍ yɛ ē ka ɛrɔ̄ yī Ikra̍yisi ē da āchɛ̄ɛchɛ wa̍a̍. Bū la lɛlā ojo̍ōje̍ ka̍ka̍ nīi Ɔwɔ ē de ma̍, alɔ ē ta̍ āchɛmāchɛ ɔna, ē ngū wā lɛlā, hɛ̄ɛbɛ ge̍ē bī āā wā la iyɔ̄bū yī Ɔwɔ bāa āchɛ nīi de jɛ̄ angrɔ̄ɔ ke̍e̍ la otū ngmo̍tu̍chɛ̄ ba̍la Ikra̍yisi ma̍. 29N yɛ ē ya̍ u̍ku̍rɔ̍ ɔla̍ā ma̍, n ē nyiya kpɛ̍ɛ la ode u̍ku̍rɔ̍ ɔla̍ā ya̍ chlɛhu̍. N yɛ ē ya̍ i̍ngɔ̍ɔ bū la wɔhu̍ ɔnɔ̄kɔ̄kū ke̍ke̍ni̍ nīi Ikra̍yisi de de u nīi yɛ ē ya̍ u̍ku̍rɔ̍ la ibi̍īyē yī u ma̍.
လက္ရွိေရြးခ်ယ္ထားမွု
ALIKƆLƆ̍SĀYI 1: YBASR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2020 Bible Society of Nigeria (second edition)