Isaías 47
47
Bexj Babilonian
1Betj, nor weo ke Babilonia, bi bine' su xhiew,
na blle raw yu,
betj gan lliw llnebia'on, nor weo Caldea,
na blle raw yu,
le bill ye aklle rwe'
da nak llendi, na da llun zisrat.
2Bex xhi'nn yichen
na bet nbas ke trigon,
baka dan nkoach ra'on,
batub zodon,
broere xholljo ka'
na bde galniazo lo yeo ka',
3na re' akre rwe' galyidzo,
awa, na re' akre rwe' kan nakon.
Wazia wzon,
na nutno gak wllun, lakse cha llatyoe akre.
4Be'nn wasra keton
Dios Xhirall ke Israelen,
le'en nzie'e Xanllon nap doxhente yelwaken, nee:
5Blle lliteze,
nor weo Caldea,
bio lo da xchulen,
le bill ye aklle rwe',
nor llnebia latj yell-liw ka'.
6Kan guklla be'nn yell kian,
bia latj nench bxhi latj yell-liw kian yel sdo
na bia latj wexj ake' raw yelwak ko'on.
Na rwe' bi bayachrallo le ake'
na bxoaw kull be'nn gur ka' dazi ko'on.
7Bneo: Gaka nor wnebia ke chnare,
bi bayuno xbab ke daki,
nike benzo xbab gakre wayullen.
8Kelen'na, bzenay dani na',
nor llawe da zeraw nak dawen, na zuw nbaraz gan lliw llnebia'on,
na torazo lluno xbab:
Nada', na nullno ke nada',
bi yegana' wazeb,
na nike yeganza sin xhi'nna ka'.
9To setegaze, raw lla nakse,
gak dakenxhie ko'o:
yegano' wazeb, na sin xhi'nno ka', lakse guno dazan yelwalla ko'o ka',
na to nike nbabze yelwalla ko'o ka.
10Rwe' nxenlallyano damar ko'on,
na beno xbab: Nutno llrere nada'.
Yel sin ko'on, na yel llajnie ko'on bxhiye aken rwe'.
Beno xbab torazo:
Nada', nullno zu yeto ka nada'.
11Axha yed dan wsakzi rwen,
na bi gak wzayon konen yel walla ko'on;
yexhj to da wsakzi rwe'
da bi gak wzayo,
to damar xhen da bi llbexho,
to setegaze yeden wadranen rwe'.
12Bnawkse kone yel walla ko'o ka',
konen dazan yel walla ko'o ka'
daka ba beno kan ne' naktew nor weo,
narachk cha gakrenen rwe' rat,
narachk cha gak lleb be'nn ka' rwe'.
13Ba blla zan be'nn lle ake' rwe' gakren guno, to ba jachiero.
Axha na' yedse be'nn ko'o ka' llsed ke berj ka',
be'nn ka' llaneya llwia berj ka',
be'nn ka' llixjwe rwe' yew beo kan ze gaken,
na llgapyin ake' wasra ake' rwe'.
14Axha, wiachga, nak ake' ka yixh beb:
yi' na llzeyen le ake',
bi llara ake' raw yi' ka'.
Le bi naken ke yi' barj ake',
nench'na kwe ake' kwiten na walle akre.
15Ganaze zeraw jase be'nn walla ko'o ka',
kone be'nn ka' benleno llin doxhente raw yelnban ko'on.
Toaj toaj ake' zajze ake' bnao ake' nes xhinj ke ake' ka',
na nutno llra' wasra rwe'.
လက္ရွိေရြးခ်ယ္ထားမွု
Isaías 47: ZPUPAT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ