Rroman 5
5
1Naaku kore tankaraki naitaaki iyioo loosipat to nkurukoto, ikiata sotua o Nkai teinia nataasa Laitoriani lang Yeso Kristo. 2Ketoboloka iyioo Yeso Kristo nkoitiei nikibakinyie to nkurukoto ana munyani nikitii taata atua, niking'idare siligi le nkitoo e Nkai likitum. 3Kore nalang inia, naa iking'ida abaki kitii nkiji ee sinaitin, amu ikiyielo nchere tinikiata sina nikiyielou aating'iria, 4naa kore kiata ng'iriata neidimie iyioo mataa ltung'ana lemeigusgusieki, naa kore payie kiaku ltung'ana lemeigusgusieki nikitum siligi. 5Nemeitukurru iyioo ilo siligi, amu eichoo iyioo Nkai Ltau Sinyati, laa ninye otubukoka nchaman e Nkai ltauja lang.
6Kore apa ewuon kira ltung'ana lemeitoki eidim, kore ta ng'amata naichiaakino, nenang ꞉Kristo ltung'ana lemeyanyit Nkai. 7Melelek payie enang ꞉ltung'ani, ltung'ani loosipat, kake kebaki duaake netii ltung'ani oitieu atanang'a ltung'ani supat. 8Keitoduaa iyioo Nkai nowua nchaman nacham iyioo, amu kore apa kira loo ng'ok nenang Kristo iyioo. 9Kore naa tankaraki naitaaki iyioo taata loosipat to lodo lenye, kebaa sa eitoki aitejeu iyioo to ngoro e Nkai? 10Amu kore apa ewuon kira iyioo lmang'ati le Nkai, neitemeletaki iyioo o ninye te lkiye le Nkerai enye. Naaku amaa taata eidipaki aitemeleta iyioo, kebaa sa eitejeunyieki iyioo nkichon enye? 11Namara inia ake, kake iking'idare oleng sotua likiata o Nkai tankaraki nayewua taata Laitoriani lang Yeso Kristo melet.
Lkiye eyewua Adam, neyau Yeso nkichui
12 #
Ng'as 3:6
Naaku inchi taa etiu: Ketijing'a ng'oki nkop aimu ltung'ani obo, neitoki lkiye aimu ng'oki, inia payie eibulaachayie ꞉lkiye ltung'ana pooki tankaraki ketaasa pooki ng'ok. 13Kedede ketii apa ng'ok nkop ewuon eitu eichoruni Nkitanapat e Nkai, kake meitoki eikenakini ng'ok tenemeatae nkitanapat. 14Kake kore etiu nejia, keitoria ꞉lkiye nkop ang'asu ng'amata e Adam ana metabaki ng'amata e Musa, neitore abaki lolo leitu egil Nkitanapat e Nkai neas ng'ok ana nataasa Adam. Kore apa Adam, naa nkitanyanyukoto e ilo apa olotu. 15Kore ng'oki e Adam naa meitinyinyukieki nkichooroto e pecheu e Nkai. Amu kore tanaa keyewua ꞉ng'oki e ltung'ani obo lkiye loo ltung'ana pooki, kewuaa sa munyani o nkichooroto e pecheu naicho ꞉Nkai ltung'ana pooki te leng'on enye, aimu ilo ltung'ani obo, Yeso Kristo? 16Naa kore nayau inia kichooroto e Nkai, kepaacha o nayau ng'oki nataasa Adam. Amu kore te inia ng'oki nabo nataasa Adam, nelotu nkiguana torno, kake kore etaasa ltung'ana kumo ng'ok, nelotu nkichooroto e munyani e Nkai naikenakinyieki ltung'ana aajo loosipat. 17Amu kore tanaa to ng'oki e ltung'ani obo etang'asua lkiye aitoreicho eimu ilo tung'ani, kelus eichu neitoricho kenya lolo oaang'amaa munyani nabore nedodooyo neitaaki loosipat pecheu te inia nataasa ilo tung'ani obo, Yeso Kristo.
18Naaku, kore ana natudung'okaki ltung'ana pooki nkiguana torno tankaraki ng'oki nataasa ltung'ani obo, keikenakini sii ltung'ana pooki aajo loosipat netum nkichui, tankaraki nataasa ltung'ani obo asata nabo e sipata. 19Amu kore ana natanya apa Adam ening Nkai, neitaae pooki loo ng'ok, nejia sii eikoni keitae pooki loosipat tankaraki nataasa ltung'ani obo nayieu Nkai. 20Kake keotuo nkitanapat payie eponunye ng'oki. Naa kore inie neakunyie ng'oki kitok, neborei munyani alang ng'ok, 21metaa kore ana neikuna ng'ok payie eng'asu aaitoricho neyau lkiye, neitoricho sii munyani to nkoitiei e sipata nayau nkichon ee ntarasi aimu Yeso Kristo Laitoriani lang.
လက္ရွိေရြးခ်ယ္ထားမွု
Rroman 5: saq
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2021, Bible Translation and Literacy