Asat 13
13
Eirruaayieki Barnabas o Saulo
1Kore apa ta nkanisa e Antiok naa keatae loibonok le Nkai o laiteng'enak aa Barnabas o Simion oji Lorok o Lusio lo lkerenket oji Kirene o Saulo o Manaen otubulua tenebo o Erode oara apa larikoni le Galilaya. 2Kore esaita ꞉ninche Laitoriani neteena nkutukie, nejoki ꞉Ltau Sinyati, <<Entegelakaaki nanu Barnabas o Saulo payie epuo aas siaai laipotoka.>> 3Neen ꞉ninche nkutukie, neomon, neiteleki Barnabas o Saulo nkaik, nereu mechomo.
Mparri nabau Saulo nkop naji Saipiras
4Kore naa payie eirruaaya ꞉Ltau Sinyati Barnabas o Saulo, nedoyio aapuo lkerenket le Seleusia, neitoki aapuo te meli lkuran oji Saipiras. 5Nepuonu lkerenket otii inie oji Salamis, nelikoo rerei le Nkai taatua Sinagogini ee Lyiaudi. Kore apa Yoana oitokini ajo Marko oara laisiaayiani lenche naa ketii tenebo.
6Kore payie edung ꞉ninche inia kop pooki ana metabai lkerenket oji Papos, netum loiboni obo le sapare oirupucho loo Lyiaudi oji Bariyeso. 7Naa ketii apa ninye tenebo o Sergio Paulo larikoni kitok loo Rroman oitore inia kop, oara apa ltung'ani ng'en oleng. Kore Sergio naa keata apa nkure e rerei le Nkai, neipotu Barnabas o Saulo. 8Kake kore laduo airuponi oitokini aajo Elimas too nkutuk ee Lgirriki, neiboyoo ninche, nenyok aitopong'oo ilo kitok payie meiruk Yeso. 9Kake kore Saulo oitokini aajo Paulo, eiputa ꞉Ltau Sinyati, neing'or aing'ode ninye 10nejoki, <<Oi iyie nkerai e Chitani nira lmang'antita loosipat, nikibore sapare o nkitamaaya. Anu kenya ipal mikord nkoitieii naacho e Laitoriani? 11Kore taata naa ikioch iyie Laitoriani ta nkaina enye, nimodoku, nimintoki adol ndama te nkiti kata.>> Kore ake inia kata neirupurupu nkonyek enyena, nemodoku, nemanaa ayiaya ltung'ani oibung nkaina arik. 12Kore payie edol ilo kitok inia nataase neiruk, neing'asia teinia naiteng'enaki naipirita Laitoriani.
Etilikoitie Paulo o Barnabas te lkerenket le Antiok otii Pisidia
13Neinyuototo Paulo o lboitiei lenyena te ilo kerenket le Papos te meli aalang'aki lkerenket oji Perga otii mbata e Pampilia. Neing'uaa ꞉Yoana oitokini aajo Marko ninche teinie nechuko alo Yerusalem. 14Nelo Paulo o Barnabas te lkerenket le Perga oitokini sii aajo Antiok e Pisidia. Kore mparri e Sabato nepuo Sinagogi nejo siap aawueni. 15Kore tesiedi nochi kata naisomi mbuku ee nkitanapat o loibonok le Nkai, neirruaaya ꞉lkutuaa le Sinagogi meipotuni ninche ejo, <<Lalachera lang, kore tanaa iatata rerei orreten ltung'ana entilimu ake.>>
16Neinyuototo Paulo, neapaki ltung'ana nkaina nejoki, <<Koree ntae lewa le Isirael o ntae oourie Nkai, entining! 17#Nai 1:7, Nai 12:51Kore Nkai ee kulo tung'ana le Isirael, naa ketegelua lmakui lang, neitaparakuon too suom o too ltung'ana etii nkop eiching'a naji Misiri, nerikoo ta nkaina enye nagol aipung'unyie taatua inia kop. 18#Nki 14:34; Nkit 1:31Kore taa larin artam, neng'iri ꞉ninye ninche te lkees. 19#Nkit 7:1, Yoch 14:1Kore payie ear lochon sapa le nkop e Kanan, neicho inia kop metaa nenche. 20#Lar 2:16, 1Sam 3:20Kewa ana larin oaabaya 450. Naa kore tesiedi ana, negelaki ꞉Nkai ninche laiguanak oorik ninche ana metabaki ng'amata e ilo oiboni le Nkai oji Samuel. 21#1Sam 8:5, 1Sam 10:21Neomon ltung'ana Samuel meichori lkinkii, neicho Nkai ninche Saulo layieni le Kich, lo lmarei le Benjamin, neitore ninche larin artam. 22#1Sam 13:14, 1Sam 16:12; SNk 89:20Kore payie eworu Nkai Saulo lorika, neiliepunyie Daudi metaa lkinkii. Nelimu sipata naipirita ninye ejo, <Katoduaa Daudi layieni le Yese ajo kera ltung'ani laaiting'id neas kenya pooki nayieu.> >>
23Neitoki Paulo ajo, <<Naa te ichoi e Daudi eyaka ꞉Nkai Isirael Laitejeunoni Yeso ana apake naitaka te lekutuk lenye. 24#Mrk 1:4; Luka 3:3Kore apa ewuon eitu eng'asu Yeso siaai lenye, naa ketilika ꞉Yoana ltung'ana pooki le Isirael nkipatisare naitodolu ajo keirriiditua ng'ok enche. 25#Yoa 1:20, Mat 3:11; Mrk 1:7; Luka 3:16; Yoa 1:27Kore eidipita Yoana siaai enye nejo, <Kore ilo lijoijo ntae kara, naa mara. Kelotu ninye tesiedi nanu, namaaichiaakino nalak nkeenita ee namuka enyena.>
26<<Lalachera lainien, ichoi ee Abraam o ntae ourie Nkai lamara Lyiaudi, kore kulo omon le njeunoto naa iyioo eterewakaki. 27Kore lolo tung'ana oaamanya apa Yerusalem o lkutuaa lenche, naa eitu eyielou aajo ng'ae Yeso, kake kore payie edung'oki nkiguana e lkiye naa keitabaitie rerei lo loibonok le Nkai ooisomi chiaake te mparri e Sabato. 28#Mat 27:22,23; Mrk 15:13,14; Luka 23:21–23; Yoa 19:15Naa kore abaki etala mbae nadung'okinyie lkiye, neomon ꞉ninche larikoni loo Rroman oji Pilato meichooi metari metua. 29#Mat 27:57–61; Mrk 15:42–47; Luka 23:50–56; Yoa 19:38–42Kore payie eidip aaitabai nenia pooki naaigeroki naaipirita ninye, neitodou sesen lenye to lmusalaba, nepuo aiteper to nkurarei. 30Kake neitipiu ꞉Nkai ninye taatua lootuata, 31#Asat 1:3neipung'oki apa ꞉ninye mperot kumo lolo oiteng'eni lenyena ooirukurukore eing'uaa mbata e Galilaya ana metabaki Yerusalem. Kore taata ninche naa keliki ltung'ana lang sipata enye. 32#SNk 2:7Naa ikiakita ntae Lomon Supati, nchere kore apa ilo lekutuk oitaka ꞉Nkai lmakui lang, 33naa keitabayie tee iyioo oaara nkera enche, te mpiunoto e Yeso. Keigero ana taatua Sinkolio le Nkai le oare nchere
<Ira iyie Nkerai ai,
nataa anapar Papa lino.>
34 #
Isa 55:3
<<Neitipiwua ꞉Nkai Yeso taatua lootuata nemeitoki sesen lenye aisamisu, ana apake natejo,
<Kaitabaya lolo lekutukie sinyat oodede taa ntae laitaka apa Daudi.>
35 #
SNk 16:10
<<Neinyiaaka ajo te likae kereri,
<Naa mincho iyie Sinyati lino meisamisa taatua nkurarei.>
36<<Naa kore eidipa Daudi aisiaai ntowuo enye ana apa nayieu Nkai, neye neiteperi tenebo o lmakui lenye, neisamisu sesen. 37Kake kore ilo oitipiwua Nkai taatua lootuata naa eitu eisamisu.
38-39<<Naaku naa lalachera lainien, kore lomon layieu niyielouu naa kepalikini ntae ng'ok inchi taatua Yeso. Naa kore pooki ng'ae oiruk neitae loosipat, nelakuni ntae taa mbaa pooki nemeidimi aatalaku ewuon apa itii taabori nkitanapat e Musa. 40Naa entodol meirrachu ntae inia natejo apa lkipaareta nchere,
41 #
Abak 1:5
<Koree ntae oomenicho,
eng'asiata nindayaya!
Amu kalo nanu aas mbae too nkuaritin inchi
inia nimirukuruk aikata,
abaki tinikinyaki ltung'ani.> >>
42Kore eipung'uto Paulo o Barnabas taatua Sinagogi, nejoki ꞉ltung'ana ninye payie eigil aanyau kulo omon ta Sabato naijipu. 43Kore payie esachari ltung'ana te inie, neirukurukore Lyiaudi kumo o lolo oourie Nkai oaatang'asutua aaibung nkurukoto ee Lyiaudi Paulo o Barnabas. Nereki aaliki ninche metowuana taatua munyani e Nkai.
44Kore ta Sabato naijipu, nedotunyie lkerenket pooki ainining rerei la Laitoriani. 45Kake kore payie edol Lyiaudi inia kumoi ee ltung'ana, neiput ninche lom neng'asu aany lomon le Paulo ejo medede inia najoito esujuta ninye.
46Kake nejoki ꞉Paulo o Barnabas ninche meata ngureticho, <<Ntae apa eyiere nelikini rerei le Nkai tekue. Naa kore amu itanya, nitumuta aajo meichiaakino ntae nkichon ee ntarasi, enteyielo aajo ikiroyie naa aayaki lkulie oreren. 47#Isa 42:6, 49:6Amu nejia apake eitanapa iyioo Laitoriani ajoki too lkigerot sinyat:
<Kaitaa nanu iyie wong'an too lkulie oreren,
payie eitejeuni nkop pooki.> >>
48Kore payie ening lkulie oreren inia, neng'ida ninche, neiliepie rerei la Laitoriani, naa kore lolo pooki ootegelakaki nkichon ee ntarasi, neiruk.
49Nebulaa rerei la Laitoriani too lubot pooki e inia kop. 50Kake nepuo Lyiaudi aajoki ntomonok naayanyiti neurie Nkai o lkutuaa le ilo kerenket mbaa nainyoyie yieuna naitamie Paulo o Barnabas sina, nemiraa ninche to nkop enche. 51#Mat 10:14; Mrk 6:11; Luka 9:5, 10:11Neipiripiroki Paulo o Barnabas nkop nterit ee nkejek enche enang'aki nkaik, nepuo lkerenket le Ikoniam. 52Kake kore looiteng'eni ootii Antiok neiput ng'ida o Ltau Sinyati.
လက္ရွိေရြးခ်ယ္ထားမွု
Asat 13: saq
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2021, Bible Translation and Literacy