Utu 13
13
Abulahamu ilekana na Lutu
1Abulahamu akawuya kuhuma ku Misili na kuhamba upandi wa kusini wa Kanaani, mwene na mdala waki, pamonga na Lutu na vindu vyaki vyoha. 2Lukumbi lwenulo Abulahamu avii na vindu vyamahele neju, avii na mifuya yamahele na maganga ga feza pamonga na zahabu. 3Akayendelela kugenda kuhuma ku kusini mbaka ku Beseli. Akahika pandu peajengili lindanda kadeni, pagati ya Beseli na Ai, 4penapo ndi peajengili pandu pa kuwusila teta. Penapo Abulahamu akamyupa Bambu.
5Mewawa, Lutu mwealandini na Abulahamu avii na mifuya na lindanda. 6Nambu mulima wavii udebe kwa vene kutama pamonga ndava ya umahele wa mifuya vyavi. 7Hinu ngondo yikahumila pagati ya vadimaji va Abulahamu na vadimaji va Lutu. Lukumbi lwenulo, Vakanaani na Vapelizi ndi vavii vakolonjinji va mulima wenuwo.
8Hinu Abulahamu akamjovela Lutu, “Tete tikotoka kukomana, mewawa na vadimaji vitu vakotoka kukomana, muni tete tavalongo. 9Wu! Mulima wenuwu woha uvii lepi palongolo yaku? Manya tigavanayi. Ngati wihamba upandi wa kulyela nene yati nihamba upandi wa kumangiya, Ngati ukahamba upandi wa kumangiya nene yati nihamba upandi wa kulyela.”
10Lutu akalola aliwene liwasi loha la Yoludani kuvya lavii na manji gamahele, ngati lidimba la Bambu, na ngati mulima wa Misili, upandi wa Soali. Yeniyi yavili kwakona Bambu angahalabisa miji ya Sodoma na Gomola. 11Ndava yeniyo Lutu akahagula liwasi loha la Yoludani, akahamba upandi welihumila lilanga, chenichi ndi chevagavini. 12Abulahamu akatama pamulima wa Kanaani, na Lutu atama pagati ya miji yeyavili muliwasi, na akahamila papipi na Sodoma. 13Hinu vandu va ku Sodoma vavii vahakau neju, vambudili neju Bambu.
Abulahamu ilangiswa mulima
14Lutu peamali kulekana na Abulahamu Bambu akamjovela Abulahamu, “Penapo lola, yinula mihu gaku ulola kasikazini na kusini na kwelihumila lilanga na kwelitipama lilanga. 15Mulima woha weukuuwona, yati nikupela veve na viveleku vyaku mbaka magono goha gangali na mwishu. 16Viveleku vyaku yati nikuvikita kuvya vyamahele vyangavalangika, ngati mundu chaangahotola kuvalanga lububu mewawa cheihotola lepi kuvalanga viveleku vyaku! 17Hinu uyimayi uwugendelela mulima wenuwu uvaha waki na utali waki, muni yati nikupela veve.” 18Ndava yeniyo Abulahamu akawusa mandanda gaki, akahamba kutama papipi na mikongo yamsopi ya mkongo uvaha wa Mamule ku Hebuloni. Kwenuko akamjengela Bambu pandu pa maganga pa kuwusila luteta za kutinyisa.
လက္ရွိေရြးခ်ယ္ထားမွု
Utu 13: Ngoni
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Ngoni New Testament © The Word for the World Southern Africa and Pioneer Bible Translators, 2020.