Mbombo sa Vasungʼhua 18
18
ɄPaulo mʉ lɨkaaja ɨlya Kolinto
1Ye sivombiike isio, ʉPaulo akavʉʉka pa Atene, akalʉta kʉ Kolinto. 2Ʉkuo akatangʼhana nʉ Mʉyahudi jʉmonga jʉno akatambʉlwagha Akila, ʉmhʉma mʉ kɨghavo ɨkya Ponto, ʉnʼdala ghwake akatambʉlwagha Pilisika. Avaanhu ava, vakahʉmile pifika kuhʉma kʉ Looma, mʉ ɨɨsi ɨja Italia, ʉlwakʉva ʉntwa ʉmʼbaha ʉKilaudio#18:2 ɄKilaudio, alyale ʉmo mʉ vatwa avavaha vano valyatemile ʉvʉtwa ʉvwa Kɨlooma. Kwekʉti alyale Kaisali. akalaghiile kuuti aVayahudi vooni, vavʉʉke mʉ lɨkaaja ɨlio. Pe ʉPaulo akalʉta kʉ veene, 3akikala navo na kuvomba ɨmbombo palɨkɨmo na veene, ʉlwakʉva ghwope alyale ivomba ɨmbombo ɨja kʉhona amahema ndavʉle aveene. 4Ifighono fyoni ifya Sabati, ʉPaulo akalʉtagha mʉ sinagogi, ʉmuo akajovagha na Vayahudi na Vayunaani kuuti vamwɨtɨke ʉYesu.
5Neke ʉSiila nʉ Timoti ye vafikile kuhʉma kʉ Makedonia, ʉPaulo akatengʉla kupʉlɨsia imhola isa Mʉtwa ʉYesu ʉnsiki ghwake ghwoni. Alyale ikwoleka kʉ Vayahudi kuuti ʉYesu ghwe Kɨlɨsite. 6Neke aVayahudi vakava vikaana ʉvwolesi vwa Paulo na kʉkʉmʉligha. Pe ʉmwene akakungʼuuna amenda ghaake,#18:6 Akakungʼuuna amenda ghaake: Kwe kʉvonia kuuti ʉNgʉlʉve avakanile avaanhu vala, ʉlwakʉva vakakanile ɨmhola jɨno ʉPaulo akavavʉlile. akavavʉʉla akati, “Inhalamu sino kyande sikʉvisila mʉlolaghe jʉmue, ʉne nɨlɨ nsila nkole. Kuhʉma lɨno, nilʉta kupʉlɨsia kʉ vaanhu vano naVayahudi.”
7Pepano ʉPaulo akavʉʉka mʉ sinagogi, akalʉta kukukala kwa muunhu jʉmonga jʉno akatambʉlwagha Tiito Yusito. Ʉmuunhu ʉjuo naalyale Mʉyahudi, looli akavɨngɨlɨlagha ʉlwɨtɨko ʉlwa Kɨyahudi, ɨnyumba jaake jɨlyale piipi nɨ sinagogi. Ye ikukala kwa muunhu ʉjuo, akafipʉlɨsyagha imhola isa Mʉtwa ʉYesu. 8Pambele ʉmʼbaha ʉghwa sinagogi ɨjio, jʉno akatambʉlwagha Kilisipo, palɨkɨmo na vaanhu vooni ava mʉ nyumba jaake, vakamwɨtɨka ʉMʉtwa ʉYesu. Voope aVakolinto vinga vano vakapʉliike imhola isio,#18:8 Imhola isio: Vamonga viiti, amasio gha Paulo. vakamwɨtɨka ʉMʉtwa na kukwofughua.
9Ɨkɨghono kɨmonga pakɨlo, ʉMʉtwa akamʼbʉʉla ʉPaulo mʉ nyivonelo akati, “Nʉngoghopaghe, ʉfipʉlɨsyaghe, nʉngajighaghe kɨmihe. 10Ʉne nɨlɨ palɨkɨmo nuuve, nakwale ʉmuunhu jʉno ndepoonu ɨkʉkwalʉkɨla na kʉkʉlemasia, ʉlwakʉva mʉ lɨkaaja muno, mwevale avaanhu vinga vano kyavikʉnyɨtɨka ʉne.” 11Pe ʉPaulo akikala kʉ Kolinto ʉmwaka ghʉmo na meesi ntanda, ivʉlanɨsia avaanhu ɨlɨsio lya Ngʉlʉve.
12Neke ʉnsiki ye ilongosia ʉGalio ɨkɨghavo ɨkya Akaya,#18:12 Ɨkɨghavo ɨkya Akaya: Ɨlɨkaaja ɨlya Kolinto lɨlyale mʉ kɨghavo ɨkio. aVayahudi vakamwalʉkɨla ʉPaulo nʉ mwojo ghʉmo, na kʉkʉntwala pa vʉhɨghi. 13Pe vakajova vakati, “Ʉmuunhu ʉjʉ ɨkʉvahonga avaanhu kuuti vamwɨmɨkaghe ʉNgʉlʉve kʉ sɨla jɨno najikwɨtɨngʼhana ni ndaghɨlo.” 14ɄPaulo ye ilonda pitengʉla pijova, ʉGalio akavavʉʉla aVayahudi akati, “Ʉmue Vayahudi! Ʉmuunhu ʉjʉ ale aave amhokile jʉmonga nambe kuvomba ʉvʉhosi vʉmonga, nale nɨkʉvapʉlɨkɨsia. 15Lɨno, ʉlwakʉva mukanɨngʼhana vwɨmɨla amasio, amatavua, ni ndaghɨlo siinu, mʉlamʉle jʉmue. Ʉne nanilonda kuuva mʉlamʉsi ghwa masio aghuo.” 16Pe akavadaga pa vʉhɨghi pala. 17Pepano avaanhu vooni vakankola ʉSositeni,#18:17 Sositeni: Luvoneka ʉSositeni jʉno ijovua apa ghwe jʉmo na jʉno ijovua mʉ kalata ɨja 1 Vakolinto 1:1. ʉmʼbaha ʉghwa sinagogi, vakantova pala pala pa vʉhɨghi. Neke ʉGalio akavaleka vavombaghe sino vivomba.
ɄPaulo igomoka kʉ Antiokia ɨja Silia
18ɄPaulo pe akikala pa Kolinto ifighono finga. Pambele akavalagha avɨtɨki avajaake, ʉmwene palɨkɨmo nʉ Pilisika nʉ Akila vakalʉta kʉ lɨkaaja ɨlya Kenkilea. Apuo ʉPaulo akakeeta ɨlɨnyele lyake,#18:18 Akakeeta ɨlɨnyele lyake: AVayahudi vakaketagha ɨlɨnyele kuvonia kuuti, vamalile ʉlʉfingo lwave lʉno vakafingile kwa Ngʉlʉve. ʉlwakʉva akafingile ʉlʉfingo kwa Ngʉlʉve. Pe vakapanda ɨngalava kulʉta kʉ ɨɨsi ɨja Silia. 19Ye vafikile mʉ lɨkaaja ɨlya Efeso, ʉPaulo akamʉleka pala ʉPilisika nʉ Akila. Neke ʉmwene ye akyale kuvʉʉka mʉ lɨkaaja ɨlio, akingila taasi mʉ sinagogi, akapʉlɨsia ɨlɨsio lya Ngʉlʉve kʉ Vayahudi. 20Pe aVayahudi vakansʉʉma ʉPaulo kuuti, ikale na veene ifighono finga, looli ʉmwene akakaana. 21Neke ye ɨkʉvalagha, akavavʉʉla akati, “Nave ʉNgʉlʉve akeele, nigomoka kange.” Pe akapanda ɨngalava, akavʉʉka kʉ Efeso. 22Ye afikile mʉ lɨkaaja ɨlya Kaisalia, akalʉta kʉ Yelusalemu kuhʉngɨla ɨkɨpʉgha ɨkya vɨtɨki. Pambele akalʉta kʉ Antiokia. 23Ye ikalile ifighono ndafilɨngi kʉ Antiokia, akavʉʉka ʉkuo, akakilila mʉ makaaja agha kɨghavo ɨkya Galatia nɨ kya Fuligia, ɨkʉvakangasia avavɨngɨlɨli vooni.
ɄApolo ipʉlɨsia kʉ Efeso
24Mʉ fighono fila ʉMʉyahudi jʉmonga, jʉno akatambʉlwagha Apolo, akafika kʉ Efeso. Ʉmuunhu ʉjʉ alyaholilue mʉ lɨkaaja ɨlya Alekisandilia, alyale mwɨmbi, kange alyaghatangʼhinie fiijo aMalembe aMɨmɨke, 25na kuvʉlanɨsɨvua ɨSɨla ɨja Mʉtwa ʉYesu.#18:25 ƗSɨla ɨja Mʉtwa ʉYesu, lɨlyale lɨtavua lya vano vakamʼbɨngɨlɨla ʉYesu Kɨlɨsite ni mbʉlanɨsio saake. Lijova vwɨmɨla ɨsɨla ɨja vʉpoki nambe ɨsɨla ɨja vwʉmi ʉvwa kʉvʉsila kʉsila. Ʉmwojo ghwake ghʉlyale nʉ vʉsyʉkue ʉvwa kʉpʉlɨsia imhola isio, pe akavʉlanɨsyagha vʉnono imhola isa Yesu, neke ɨmhola ɨja lwofugho, naakavʉlanɨsyagha vʉnono, ʉlwakʉva akalʉtangʼhinie lʉ lwofugho lwa Yohani lwene. 26Akingila mʉ sinagogi, akatengʉla kuvʉlanɨsia kɨsila vwoghofi. ɄPilisika nʉ Akila ye vapʉliike imbʉlanɨsio isa Apolo, vakantoola, vakalʉta naghwo kʉvanave, pe vakamʼbʉlanɨsia vʉnono ɨsɨla jɨno ʉNgʉlʉve ahʉfisie.
27Pambele ʉApolo akalamʉla kulovoka, kulʉta kʉ kɨghavo ɨkya Akaya. Avɨtɨki avajaake vakankangasia ʉmwojo. Pe vakavalembela ɨkalata avavɨngɨlɨli ava kʉ Akaya kuuti vamwʉpɨlaghe. Ye afikile kʉla, akavatanga fiijo vano vɨtiike mʉ lʉsʉngʉ lwa Ngʉlʉve. 28Akava ɨkʉvatanga mʉlwa kʉkanɨngʼhana na Vayahudi na kʉkʉvatola pamaaso gha vaanhu vooni. Akava ɨkʉvatola mʉlwa kʉhʉfia mʉ Malembe aMɨmɨke kuuti, ʉYesu ghwe Kɨlɨsite.
လက္ရွိေရြးခ်ယ္ထားမွု
Mbombo sa Vasungʼhua 18: wbi
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© (Active), Wycliffe Bible Translators, Inc. All rights reserved.