Хьунухь 47
47
1Фиръавандин кьилив атана, Юсуфа лагьана: «Къенандай чпин лапагрин ва къарамаларин суьруьяр ва чпин мал-девлетни гваз зи бубани зи стхаяр атанва. Исятда абур Гешендин чилел ала».
2Юсуфа фиръавандиз стхайрикай вад кас къалурна. 3Фиръаванди абурувай чеб квел машгъул ятӀа хабар кьурла, абуру жаваб гана: «Фиръаван, вун сагърай. Чна, ви лукӀари, чи бубайри хьиз, лапагар хуьзва». 4Ва мадни икӀ лагьана: «Чун, ви лукӀар, и чилел масанай куьч хьана атанвайбур я. Чахъ лапагар хуьдай маса чкаяр авач, Къенанда исятда зурба каш ава эхир. Чаз Гешен чилел бине кутуна ацукьдай ихтияр це ман».
5Фиръаванди Юсуфаз лагьана:
– Ви патав бубани стхаяр атанва – 6акӀ хьайила чи чилин виридалайни хъсан пипӀера абурув бине кутаз тур. Мисридин вири чилер ви вилик ква. Гешендин чилерал уьмуьр тухурай. Ваз абурун арада иллаки кар алакьдай ксар чидатӀа, абур зи суьруьйриз къуллугъ авун патал эциг.
Якьуб фиръавандин вилик акъвазун
7Ахпа Юсуфа фиръавандиз вичин буба къалурна. Якьуба фиръавандиз хийир-дуьа авуна, 8адани хабар кьуна: «Бес ви яшар гьикьван я?» 9«Зун и дуьньядиз вишни къанни цӀуд йис мугьман хьанва, – жаваб гана Якьуба. – Им са акьван гзаф туш, и йисарни четинбур хьанай. Абур зи бан-бубаяр мугьман хьайи йисарихъ галаз гьич гекъигизни жедач». 10Фиръавандиз мад гъилера хийир-дуьа авуна, Якьуб инлай элячӀна.
11Юсуфа, фиръаванди вичиз къалурайвал, вичин мукьва-кьилияр Мисридин виридалайни хъсан чилел, Рамсес вилаятда, бине кутуна ацукьарна, ва ана абуруз чилер чара авуна. 12Гьам бубадиз, гьам стхайриз, гьамни вири вичин сихилдиз Юсуфа техилни чара авуна, гьар садаз вичин хизанда авай аялрин кьадардиз килигна.
Мисривийри чеб фиръавандиз маса гун
13Уьлкведа лагьайтӀа, техил амачир, халкьдиз еке азият хьанвай – гьам Мисридихъ, гьамни Къенандихъ галукьнавай каш гьакьван заланди тир. 14Инин агьалийриз техил маса гуналди, Юсуфа фиръавандин хазинадиз Мисридани Къенанан авай кьван вири гимиш кӀватӀна. 15Я Мисрида, я Къенанда гимиш амачирла, мисривийри атана Юсуфаз лагьана: «Чаз техил це! ТахьайтӀа чун ви вилик кьиникь лазим яни? Гимиш куьтягь хьанва». 16«Гимиш куьтягь хьанватӀа, – лагьана Юсуфа, – гъваш инал куь малар, техил маларихъ галаз дегишда».
17Абуру чпин суьруьяр вилик кутуна иниз гьална, ва Юсуфа техил гьайванрихъ галаз дегишиз хьана: балкӀанрихъ, хиперихъ, цӀегьерихъ, къарамаларихъ, ламарихъ галаз. А йисуз ада техил абуруз маларихъ дегишнай, 18гуьгъуьнин йисуз абур адан патав ихьтин гафар гваз атана: «Вакай чуьнуьхдай кар авач, чи агъа, чи гимишни, чи маларни – вири вибур хьанва. Чаз гила чи беденрилайни чилерилай гъейри ваз теклифдай мад затӀни амач.
19Чун гила ви вилерал чи чилни галаз рекьин лазим яни кьван? Чунни, чи чилерни къачуна, техилдихъ галаз дегиш ая – ва чун чи чилни галаз санал фиръавандин лукӀар жеда. Анжах чун текьена амукьдайвал, ва чилер баябан тежедайвал, тумунин техил це».
20Гьа икӀ Юсуфа фиръавандин хийирдиз Мисридин вири чилер маса къачуна. Мисривийри вирида сад хьиз адаз чпин мулкар маса гана – каш гьакьван заланди тир. Вири чилер фиръавандин хсусиятдиз элкъвена, 21мисривияр лагьайтӀа вири уьлкве тирвал, и къерехдилай а къерехдал кьван, – Юсуфа фиръавандин лукӀариз элкъуьрна. 22Анжах мажуси диндин къуллугъдаррин чилер Юсуфа маса къачунач – диндин къуллугъдарар фиръавандин нафакьадал алай ва адан гьисабдай незвай, гьавиляй чпин чилерни маса ганач.
23Юсуфа мисривийриз лагьана: «Гила, за фиръавандин хийирдиз куь чилерни, куьн чебни маса къачур чӀавуз, техилдин тум къачуна ам цуз. 24Къедлай бегьердин вадай са пай куьне фиръавандив вахкуда, вадай кьуд пай тӀуьн ва цун патал тада – жува, хизанри, аялри».
25«Вуна чи уьмуьр хиласна! – жаваб гана мисривийри. – Вуна ви вилерай чаз майил авуна, чи агъа. Къедлай кьулухъ чун фиръавандин лукӀар я».
26Юсуфа тайинарай чилин къанун Мисрида къени кьилиз акъудзама: фиръавандив бегьердин вадай са пай вахкузва. Анжах диндин къуллугъдаррин чилер фиръавандиз хьанач.
Якьубан эхиримжи мурад
27Исраилвияр Мисрида, Гешендин чилел, бине кутуна ацукьна. Ина абурукай чилерин иесияр хьана, ина абурукай гзаф аладдайбур ва кьадардиз чӀехибур хьана.
28ЦӀерид йис Якьуба Мисрида акъудна, вири санлай ада вишни яхцӀурни ирид йисуз уьмуьр тухвана. 29Рекьидай вахт мукьув хьайила, ада Юсуфаз эверна: «Ви вилерай заз майил авайтӀа, зи ятурдив гъил хкӀуна, вуна зи тӀалабун рикӀелай алуддач лагьана кьин це: зун Мисрида кучукмир! 30Зун бан-бубайрин кьилив рекье гьатайла, Мисридай хутахна, къванцикай раснавай бубайрин сурара кучук». «За вуна лагьайвал ийида», – жаваб гана Юсуфа. 31«Кьин це», – лагьана Якьуба. Юсуфа кьин кьуна, ва месел къатканвай Якьуба икрам авуна.
လက္ရွိေရြးခ်ယ္ထားမွု
Хьунухь 47: ЛезПК
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Институт перевода Библии, 2010-2024