Лука 22
22
22 къаьм
Иса авараг мунагьла̄д бовацӀийа сукӀоба̄ла каъ ницца
1. Ягьудиялис къотӀина гьоькмона
1Гьинкьа ПасхалӀо нисона ца̄ᵸ гулло йӣэшла йоьᵸтоба̄ш баьба̄ йовагьцас ид-водо гьицакца зукъойо. 2Букъа̄ кашишла̄на диниябла аьлимла̄на вагьалло водла̄ъна аьмал бо̄с зукъойо Иса икьал санаъат михъолал, амма гьолло̄л халкъилахъа гьийабачӀена зувакъойо.
3АцӀон къониъ эᵸдос Искариот тӀокӀца̄ᵸ гаьгьийо Ягьуда асгьаблила йакӀиъ илбис эᵸдокийо. 4Букъа̄ кашишла̄дойна Аллагьлис билӀо цӀуми йо̄ва рагъухъаллидойна эᵸкьена, гьолцо асгьабли Иса нигъа гьоллохъа нилӀалсо къотӀи бо̄йо. 5Гьолло̄л йилӀа рази бахъийо, гьолцол окко нилӀал къотӀина бо̄йо. 6Гьини вагьли жо тӀубази йо̄слӀо нисона гьолцона йаьже нилӀийо. Аьдамла гаьччо къулаяб маьче мизца зукъойо гьолцо гьоглохъа Иса нилӀал.
2. Пасха ид-водил гьаьдурлъи
7Йӣэшла йоьᵸтоба̄ш баьба̄ йовагьцасна къурбаллил лӀиле мухоцасна Пасхалис водо кьодо йоᵸкъойо. 8Иса Петерлихъана Иоаннхъана нисойо:
– Мекьена ид-водис кен гьаьдур йовалӀо.
9– На̄д Дул гьули йовал йатӀна гей? – лӀо нисолло гьолло.
10Иса нисойо:
– Шагьарбаъ эᵸдобака̄цо мизол иᵸхъос лъӣс билӀейна боцӀинна эᵸкьецас гьоᵸс сукӀо, гьули эᵸкьейа билӀоъ мижена мекье. 11Бета миже билӀола бетӀергьаллихъа вагьда̄ ниса: «Муалимли дӯхъа нисолло, на̄д гей ид-водиъ Жуна Гьинис асгьаблана нише бесал къачӀази йо̄йо билӀо?» 12Гьолцо сукӀо мизол йегалас кьодола билӀоъ бекӀейа говатойо гьоᵸс йукъо отахи. Вагьлиъ йова миже гьаьдурлъи. 13Гьулиъ мокъолъ, гьоллол Иса нисогъа къацӀцӀо жо йиᵸхъо̄йо. Ид-водис кенна йогьна гьолло̄л гувабацӀона бечейо.
3. МарчӀокӀолъ бахъийо балъгояб хабар
14МарчӀокӀолъ бесалцо мех мокъолъ, Исана чапарлана бесал къе̄ бечейо. Иса гьоллохъа нисойо:
15– Дие букъо гъира гей азаб-акъубалиъ кези ахъал аьᵸйда̄ мизогъой къацӀо вагьалӀо ид-водиъ эсал. 16СудлӀо нисода тӀокӀаб мизогъой ид-водиъ къацӀо эсал Дие рес бахъаъас, Аллагьлила Парчагьлиъ кӀетӀо ид-водис бесийолъи йахъцал.
17Бета Иса, гъинолис боцӀийо дончана бокчина, рец-бакълис доьъана богьна, нисойо:
18– Гьаᵸъа, бокчина къацӀцӀола хулӀа. До мизохъа нисос: Аллагьлис Парчагьлъи йоᵸкъоцал До желагъа муьгъатта̄ тӀокӀаб кӀодас бо̄йо жа хулӀаъас.
19Баьбана бокчина, рец-бакълис доьъана богьна, Гьолцо бувакӀинна гьоллол нилӀийо:
– Вагьло гей мизол къурбанлъилаъ бечецас Дие магъо. Дона акӀкьа оᵸкъонна мижена вагьда̄ йова.
20Бета бесна муьгъатта̄, гъинолис боцӀийо дончана бокчина, Иса нисос:
– Вагьдо гей мизодда̄ла гиса мегьцас гьеᵸ – ицӀцӀо къотӀилас#22:20 БетӀергьаллиъна Гьолцола агьлолаъна балӀо бо̄йо къотӀи. гьеᵸ. 21Гьуна, гувабацӀона бече! До жейса тушмалла̄хъа ниццас ко̄ гей Диела ко̄гъой сид истӀолийакьа. 22Вагьла̄ Аьдамлис Оьжо эᵸкьал нуцӀос Аллагьли аьᵸйда̄жу йегалло гьиногьид, амма гьолцол хилип бахъийа̄л балагь мокъос.
23Гьолло̄л муьхобалъийо сидхъа-гьоᵸсо нисолал: сукӀоле гьиᵸдеъ эᵸдо вагьли жо йовал йакӀиъ хиял гаьгьийо сукӀо гейлӀо нисона.
4. «Бишшун укъо сукӀод гей?»
24Асгьабла̄с бахъна гей даьъба: сукӀод гьиᵸдеъ эᵸдо бишшун укъо ахъал нуцӀослӀо нисона. 25Иса гьоллохъа нисойо:
– Мажусла̄ла парчагьла̄ ханлъи йо̄с, халкъилакьа ханлъи гаьгьийа̄на бикӀзи бо̄с тӀалаб-агъаз богьцаса аьдамлалъилаъ. 26Амма миже гьула̄ бахъал нуцӀаъас. Мизос бишшун укъо эче бишшун итӀиноцой, ханлъилаъ жу бикӀзи о̄йо лагъцой ахъ! 27СукӀод гей укъо: раьгьатликьа эсцас сукӀод, йаги бесцала̄л хъуллухъ богьцас сукӀод? Гьай-гьай, эсцас сукӀо гаьъад! Гьуна до мизол гьолӀоъ хъуллухълил эчена гей.
28Дил йегаба̄ балагь-азабла̄ъ миже Дӣгъой къацӀо ба̄хъийо. 29Диела Або Дил ирслиъ нилӀийо Парчагьлъи До мизонна ирслиъ йечанне̄ш. 30Диела Парчагьлиъ Дӣгъой истӀолийагъа миже бесцасна хулӀоцасна ба̄хъца. Гьула̄зу тахла̄кьана къе̄ бечеш Израиллила наслолас ацӀона къона тухумла̄л гьоькмова йуьвачӀал.
5. «Ми Дӣкьас инкар бовас, Симон!»
31– Симон, Симон! Энекзи ахъ! Илбисли гьарзи йо̄йо, хъибо бох-нахоъос иᵸззаъ исийаъийаъцой миже исибаъалӀо нисона. 32Амма До дул доьъа-гьари бо̄йо, дибо божи-иман мукъсан бахъечӀе гьихлъалъгъа. Кьа̄ь бета Дидой оᵸкъолъ, динлила исна̄сна йакӀода йилӀабакъола.
33– Йа̄ БетӀерчӀахъаяв! – лӀо нисос Петерли Исахъа. – До гьаьдураб гей Дӯгъой къацӀо тӀусагъийаъ эᵸкьанна, угъал нуцӀода угъанна.
34– Нисос дӯхъа Петер, – лӀо нисойо Иса, – хисалдайлил мамали уьᵸъудалъол, лъахна инкар бовас Дӣкьас, До икъаъаслӀо нисона эцас.
6. Иса гьаьдур бахъна бечелӀо нисос
35– Йа окко-месед гаьчӀел, йа моьшокӀи-къацӀиццо йоькчечӀе, йа гьалалъцова гийахечӀе До Дие чапарлацой мегьна муьгъатта̄ мизол нӣйона къарилъи йахъийоди? – лӀо нисолло гьоллохъа Иса.
– Йахъеэш, – лӀо нисона жаваб нилӀийо гьолло.
36Иса гьоллохъа нисойо:
– Амма же окко гаьгьийа̄ гьулина къацӀо йеза, гьиногьидил санаъатлъилал моьшокӀи-къацӀиццона йоькча. Балъаййа гаьчча̄, кьодо лъичӀейо чухъа-гужгатна йиᵸсона, балъаййа йовахал санаъат бова. 37До мизохъа нисос: «Гьули такъсирчилъилаъ бикӀзи овас», – лӀо Дӣкьас ТӀекликьа чахийо жо тӀубази йахъалълъегьна гей. Дӣкьас чахийо жо же йахъца.
38Асгьабла̄ нисолца:
– Йа̄ БетӀерчӀахъаяв, вагьалӀоъ къона балъай гей.
– Оьлилла, – лӀо нисойо Иса.
6. Иса авараг Гетсеманияъ
а) Гетсеманияъ гаьгьийо къеркьей
39Бета гьулиъис гисакна, воддиъ эᵸкьецала Зайтун ма̄ькьа эᵸкьейо. Гьолцогъой муьгъалӀ асгьаблана мекьейо. 40Ма̄ькьа мокъолъ, Иса гьоллохъа нисойо:
– Мизос гьаьл бикъелцалаъ, сабру-ягь бахъалъгъа, доьъа̄ йовагьа.
41Йикьейо кьало йоᵸкъова манзиллиъ гьоллодойс ата̄на эᵸкьена, суждалкьана эчена, Иса доьъа бовал уьᵸхолъийо. 42Гьолцо нисос зукъойо:
– Йа̄ Дие Або! Дибо амро зогъда, хеллис гьино Дӣдойс ата̄кӀа! Амма Дил йатӀгъа гаьъа, Дул йатӀгъа йахъала.
43Гьаᵸсаъкьа̄ оᵸкъона, малаикли Гьолцос йакӀо йилӀакъолло.
44Вагьлиъис йакӀиъ гаьгьийа букъа гьаьлчейликьа, Гьули кьодона тели Аллагьлихъа гьардизи ахъал уьᵸхолъийо. Гьолцоъкьа̄ гугьцас гьад гьеᵸйас кӀаькӀачой мицакьа тӀаьлӀеш зукъойо.
45Доьъана лъикъона, Гьинила чапарладой кьа̄ь оᵸкьолъ, Исал гьолло̄л пашманлъилахъа буьчаба̄хена мийахъос.
46– Суд миже буьчаба̄хена? – лӀо нисолца Иса. – Баьгъбаъ, мизос гьаьлла йийакъелцалаъ, сабруна ягьна бугъечӀе гьихлъалъгъа, гьари-доьъа̄ йовагьа.
б) Ягьуда баъда̄лъи, бета Иса авараг охийолъи
47Вагьла̄ гьоллохъа икълашешлаъ, тели халкъ кьодо мокъойо. Халкъилагъа аьᵸйда̄ зукъойо Исас ацӀон къониъис ЯгьудалӀо нисоцас гьоᵸсцойс асгьаб. Гьуги баъда̄л Исадой гьиᵸцакийо. 48Иса Ягьудахъа нисойо:
– БаълӀонад ми Аьдамлис Оьжо тушмалла̄л икъал о̄с, – лӀо.
49Гьулиъ йахъцас жо йегалъ, со̄ᵸ гаьгьийа асгьабла̄ Исахъа нисос:
– Йа̄ БетӀерчӀахъаяв! Балъаййа йа̄гъалди?
50Асгьабла̄ъ эᵸдо гаьгьийа сидцойсола балъай йакьенна сид укъа кашишлила лагълис кӀетӀакьас аьᵸгъа йуьчӀийо.
51– Оьлилла, беченувацӀ! – лӀо нисойо гьоллохъа, кьодо ко̄на йеᵸхенна, Иса лагълис аьᵸгъа сагъ йо̄йо.
52Гьингъой муьгъалӀ мокъова̄ букъа̄ кашишла̄хъана, Аллагьлис билӀо цӀуми йогьна бечейа̄ рагъухъалла̄хъана, гьаькимла̄хъана Иса нисойо:
– Балъаййана хечлана йа̄къона, къачагъ охал гӯваъцой, мокъона гей миже До охал. 53Воддиъ До мизогъой, къацӀо Аллагьлила билӀоъ ахъца зукъо̄ваъ, гьугиъ, миже Дил ко̄ йеᵸхелеэш. Амма же мизос саъат мокъона гей, нишела ханлъилас мех#22:53 Илбислис ханлъилӀо нисойо маъна гей. мокъона гей.
7. Петерли Иса авараг икъаъаслӀо нисона инкар бо̄йо
54Охна эжейо гьолло Иса укъа кашишлила билӀоъ. Гьоллогъой муьгъалӀ гьаьтеэчена эᵸкьеш зукъойо Петерна. 55Гьогцо кашишлила билӀола бежиъ йалӀода̄, цӀона йекӀенна, гьогго̄л со̄ᵸ къе̄ бечейо. Гьоллоъ алӀо цӀо̄дой Петерна къе̄ эчейо. 56Сид гъарабашли цӀо̄дой шеблаъ Петер эгалъ, ахо гьогцохъана гийачӀена нисос:
– Вагьли сукӀона Гьокцогъой къацӀо зукъойо.
57Амма Петерли инкар бо̄йо:
– Йе аьдам, дил Гьули икъаъас.
58Гьолълъогъа муьгъатта̄ тели мех мекьечӀе бацо сукӀона нисос:
– Мина гьоглос сукӀо гей, – лӀо нисона.
Петерли жаваб нилӀийо:
– Гаьъа гьалмагъ.
59Саъатлъийо заман мекьелъ, бацосола сукӀона йилӀа йакӀона йоᵸкъонна нисос:
– БитӀараб гей, вагьди сукӀо Гьокцогъой къацӀо зукъойо. Гьулина Галилеялиъис ахъца.
Амма Петерли нисос:
60– Энекзи ахъ, ми сийод йекӀца, гьалмагъ!
Гьолцо вагьли нисослаъ, мамали уьᵸъуда̄л муьхолъийо. 61Кьодда̄с Иса, кӀаьйна уьᵸхона, Петерлихъа говацӀойо. Петерлил йакӀкьа йоᵸкъойо Кьодда̄ла Иса гьинхъа нисова̄ йаьжбо: «Хиссалдайлил мамали уьᵸъудалъол, ми лъахна Дӣкьас инкар бо̄слӀо». 62Гьулиъисна гисакна, Петер йилӀа ийа̄йо.
Иса диваллил аьᵸйда̄ эчелло
63Иса охийа аьдамла̄ Гьули, нуькучӀна огьна, а̄ькьелло. 64Гьаьйдана йиᵸйацона гьолло нисолца зукъойо:
– Авараг зогъда, лъод Дул бакьелло йикъелалӀо нисона.
65Бадина лади инжитаб жо йекӀийо гьолло Исахъа.
66Хискьаклъо, Ягьудиялис гьаькимлана, букъа̄ кашишлана, динияб аьлимлана гьулиъ къацӀобакийо, бета Иса эжейо бишшун кьодда̄с диван богьцала мицаъ.
67Гьогло нисолло:
– Ми Масигьди гей? Ниса илохъа.
– Нагагь До нисода, миже боьважаъаш. 68До мизол суал нилӀда, гьолълъонна миже жаваб Гьинил нилӀаъас. 69Амма желагъа муьгъатта̄ Аьдамлис Оьжо Къудратаб Аллагьлила кӀетӀакьала рахълиъда̄ къе̄ эчена ахъца.
70КъацӀцӀола нисолло:
– Вагьла̄ зогъда, Ми Аллагьлис Оьжод гей?
– Миже нисос До гей, – лӀо нисона жаваб нилӀийо Иса.
71Гьолло нисойо:
– Бадина нӣйо нуьълъид йатӀна илол. Гьолцола сикӀаъкьа̄ гиса гӯйо илол тухъал йатӀийо жо.
လက္ရွိေရြးခ်ယ္ထားမွု
Лука 22: KapPROLUK
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)