Sawmus 89
89
Avat abetnewa wakaymniki
1Kiyavwiye Uhokri, nah avanenekwa paksanek pamnihra. Nah kinetihwanek amin ku samah pisnewa wadikta akivara.
2Nah hiyak ku pamnihra in dahwa adahan avanenekwa. Nah hiyak ku inin ku samah pis waditye in dahwa hawata kewa inurikbe.
3Pis awna:
“Nah kehe pahat nahegbetawni gikak Davi, ku pariye nubukuh nukanyan. Nah kehe inin nahegbetawni gikak:
4“Pahavwi gaytakkis pihiwhivwi avanenekwa kumadukanek. Nah avuriwnek gikumadukankis adahan avanenekwa.”
5Kiyavwiye, madikte inurik paksap amin pabay ku pariye pis keh. Hawata ahj ku pariye pahadguvunene igkis paksap amin ku samah pis ka kinisakatruvyema.
6Yuma pahavwinema ay inurik kewa pisbe, Kiyavwiye! Ay gibetkis hiyeg inurikyenevwi yuma pahavwinema hehpekuye pikak.
7Pis ka pikiytanisima ay abet givahdukawnikis. Hawata pis aviska pibohri gavitkis ku pariye kiyaranene pikak.
8Kiyavwiye Uhokri Detye, yuma pahavwinema kadahan ka aynsima gidatni kewa pisbe! Hawata amin madikte ariknebdi pis ka kinisakatruvyema, Kiyavwiye!
9Pis kumaduka parahwokwa kane adatnisima. Pis kariswehsa avawanpig kane ahawnasima.
10Pis mateke igi axtigi kewye Haabi. Hawata pis umehpig. Hawata akak kane aynsima pidatni pis matakave pivetunyavu.
11Waxri in pidahan, inurik in pidahanwata. Pis humawase hawkri peyeke akak madikte ku pariye ay nikak.
12Pis kehe uvitkigavrik akak wahamavrik. Waxriviyene imuwadminene Tabor akak Hermon kabayhap akak batekka.
13Pis ka aynsima pidatni! Pis ka aynsima pidatuk!
14Barewvitka akak waditka in ku pariye kamax pikumadukan. Pamnihra akak ku samah pis inyewa in wew payak pikak abet madikte ku pariye pis keh.
15Ka aynsima kabayka gidahankis hiyeg ku pariye paksenevwi pis akak avatman hawata ku pariye misekwenvwi aynte abet pibutni!
16Awaku piwavrik, igkis batekyekis mataytak. Igkis hawata kabayhap awaku pisnewa ka pamnihrasima gikakkis.
17Pis, Kiyavwiye, pisnewa ikene udatni akak madikte ukiytani; awaku pabay, pis keh usuh mataka uvetunyavu,
18mmanawa pisnewa kaniyne umaptenten. Pisnewa, Kiyavwiye, izhaewyenevwi giwohkigakis barewvitye, ku pariye ike wotuh ukivara.
Uhokri gikaksan git Davi
19Minikwak, abetnewa giwtyakvey, pis awne git pibuk kamaxwene:
“Nah ike iyuti gitewharit pahavwi suwtat detye. Nah ike git iyuti kiyatyo, git pahavwi awayg ku pariye nah kaniye gibetitakkis nuhiyegavu.
20Nah kaniye nubukuh Davi adahan ig humaw yikivara. Nah imihevgi akak iyti kiyatye.
21Nudatni avanenekwa aynek gikak. Nudatni keh ig humawnek ka gidatnisima.
22Givetunyavu ka pahaynema matakignek. Hawata mbayavye ka hiya gisamanaknek.
23Nahwa pisenwanek gikakkis givetunyavu. Hawata nah umahavenek madikte ku pariye gamiyhetnivwi.
24Nah avanenekwa ka kinisginek. Hawata nah bateknek gikak. Hawata awaku ku samah nudatni ay gikak ig avanenekwa matakanek givetunyavu.
25Nah ahnek gikumadukan ku samah awetumnatak parahwokwa Meditehanyu danuhte awetumnat warik Ewfrates.
26Nikwe ig awnanek nutuh: “Pisnewa niguh. Pisnewa nuwohkiga. Pis numaptenten. Pis hawata namnihten.”
27Nah kehginek kewa ig nukamkayh egutyebe. Hawata nah kehnek ig humaw ka aynsima datte giwkis madikte ikivaratviyenevwi.
28Avanenekwa nah bateknek gikak. Hawata nahegbetawni gikak in dahwanek avanenekwa.
29Giwenketekenek gihiwhivwi avanenekwa kumadukanek. Hawata gikumadukankis dahwanek kewa inurikbe ayivwi.
30“Heneme, ku gihiwhivwi ka ihpanek nukumadukan, ku igkis ka wewnek ku samah nayapni gitkis,
31ku igkis tukuhenek nukiswanawni gidahankis hawata ku igkis ka avuriwnek nukumadukan,
32nikwe nah hiyapkisnek gitkis avatra givathawnikis. Nah kehnek igkis hiyap mbeyne avatra gitaraksankis.
33Heneme ka innema kehnek nah ka batekma gikak Davi akiw, heneme nah kehnek ku pariye nukaksan git.
34Nah ka dunihnek nahegbetawni ku pariye nah kehe gikak, ine kawnata nah uniyahnek ariknawnama ku pariye nuwnuh git.
35“Nah awna pahaywevi adahan avanenekwa, nah ikaksepni nuwavrik barewvitye ku nah ka wasaymawtinek git Davi.
36Ig avanenekwa kadahannek gihiwhivwi, hawata ku aysaw kamuw kabutenete, nah avuriwnek gikumadukan.
37Ini gikumadukan dahwanek kewa kaygbe, kewa igbe nawneve ku pariye ayntenene inurik.”
Ikivarat gihahwan
38Heneme kuri, Kiyavwiye, pis dagawnaw git ikivarat ku pariye pikanyan. Pis ikiswig. Pis tukuhpig.
39Pis kehe in pikaksan ka kawih git pibuk akiw. Hawata pis padeke giyu waykborite.
40Pis tuguhkise paytwempu ayaranwa. Hawata pis mehkise payt ayemweketviyene nuwhu.
41Madikte ku pariye mpiyenevwi igkis amevwi gewkanbet. Igkisme ku pariye misekwenevwi kennesa igkis mahivwihgi.
42Pis kehe igkis ikivarat givetunyavu matekevgi. Hawata pis kehe igkis batekyekuyes akak gibiykemni.
43Pis kehe giyakwok waditnevyenen. Hawata pis isakse ig matekepka abet kerka.
44Pis wiwhe ikivarat gikumadukan kiyatye givititak. Hawata pis pedeke gikumadukan waykborit.
45Pis kehe ig kiyavwip avit gihawkanavrik danuh. Hawata pis awastevgi akak maraki.
Ayavasawaka adahan isahptawka
46Aysawhki ayivwi pis ayamawnek wowhu, Kiyavwiye? Mmah adahan avanenekwatma? Aysawhki ayivwi pidagoni wohnenek kewa tiketbe?
47Kiyenaba ku samah nudehetni in matkusa. Kiyenaba ku madikte hiyegviyenevwi ku pariye pis kehe pahay hawkri igkis miyarapnek.
48Pariyeki ik adahan aymuhwa ig dahwa avanenekwa hawata ig ka miyati akiw? Pariyeki ik adahan ig isahkisasaka ariw imewti?
49Kiyavwiye Uhokri, kineyki inin minikweknene pamnihra arakak? Kineyki inin pahegbetawni gikak Davi?
50Kiyenaba ku samah nah pibuk nah mahivwihka. Hawata nah amava madikte miyathaki gavitkis hiyeg kane hiyak Kiyavwiye Uhokri.
51Kiyavwiye, ka ba aynsima pivetunyavu awna gimin ikivarat ku pariye pikanyan! Ku kit ig atak, igkis mahivwihgi.
52Uyay kabayha Kiyavwiye Uhokri adahan avanenekwa! Ameh! Ameh!
လက္ရွိေရြးခ်ယ္ထားမွု
Sawmus 89: pluPB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2018, Wycliffe Bible Translators, Inc. All rights reserved.