प्रेरित 25
25
पावलले रोमी महाराजालाई बिन्ती चढाउँछन्
1फेस्तस आफ्नो मुलुकबाट आएको तीन दिनपछि नै कैसरियाबाट यरूशलेम गए। 2त्यहाँ हुँदाखेरि मुख्य पूजाहारी र यहूदी नेताहरूले उनलाई पावलको विरोधमा आफ्ना कुरा सुनाए 3र पावललाई यरूशलेम पठाइदिनुहोस् भनी बिन्ती चढाए किनभने तिनीहरूले पावललाई बाटोमा आउँदाआउँदै मार्ने योजना बनाउँदै थिए। 4तर फेस्तसले तिनीहरूलाई यस्तो जवाफ दिए, “पावललाई कैसरियामै थुनिराखिएको छ र म पनि चाँडै त्यहाँ जाँदै छु। 5तिमीहरूमध्येको कोही शासकहरू मसँगै जान चाहन्छन् भने पठाइदेओ। यदि पावलले केही बिराएको छ भने तिनीहरूले त्यहाँ नै उजुर गर्न सक्छन्।”
6आठ-दश दिनसम्म यरूशलेममा बसेपछि फेस्तस कैसरियामा फर्किए। भोलिपल्टै उनले न्याय गर्ने ठाउँमा बसेर ‘पावललाई ल्याउनू’ भनेर हुकुम दिए। 7पावल आइपुगेपछि यरूशलेमबाट आएका यहूदीहरूले उनलाई चारैतिरबाट घेरेर थरी-थरीका दोष लगाए। तर तिनीहरूले कुनै पनि दोषको प्रमाण दिन सकेनन्। 8पावलले तिनीहरूलाई जवाफ दिँदै भने, “मैले न यहूदी धर्मशास्त्रको विरोधमा न मन्दिरको विरोधमा नता रोमी महाराजाको विरोधमा नै कुनै नराम्रो काम गरेको छु।”
9यहूदीहरूलाई खुसी पार्ने इच्छाले फेस्तसले पावललाई भने, “म तिमीलाई यरूशलेम पठाइदिन्छु अनि यी कुराको बारेमा म तिम्रो न्याय त्यहीँ नै गर्नेछु, हुँदैन र?” 10तर पावलले भने, “म रोमी महाराजाको न्यायालयको अगाडि उभिरहेको छु। यहीँ नै मेरो न्याय हुनुपर्छ। मैले यहूदीहरूको विरोधमा कुनै खराबी गरेको छैन भन्ने कुरा हजुरलाई पनि थाहा छ।
11यदि मैले ऐन-कानुनलाई मिचेको छु र ज्यानसजाय पाउनुपर्ने कुनै अपराध गरेको छु भने म मर्नलाई पनि तयार छु। तर यहूदीहरूले लगाएका कुनै पनि दोष साँचो छैन भने मलाई तिनीहरूको हातमा कसैले पनि सुम्पन सक्दैन। म रोमी महाराजाको अगाडि नै बिन्ती चढाउने अधिकार माग्छु।”
12तब फेस्तसले उनका सल्लाहकारहरूसँग सल्लाह गरे अनि पावललाई भने, “तिमीले महाराजाको अगाडि नै बिन्ती चढाउने माग गर्यौ। त्यसो हुँदा म तिमीलाई महाराजाकहाँ नै पठाइदिनेछु।”
फेस्तसले राजा अग्रिपाससँग सल्लाह लिएका
13केही दिनपछि राजा अग्रिपास र उनकी बहिनी बरनिकी फेस्तसको स्वागत गर्न कैसरियामा आए।
14तिनीहरू केही दिन कैसरियामा बसेपछि फेस्तसले तिनीहरूलाई पावलको कुरा यसरी सुनाए, “यहाँ फेलिक्सले नै थुनेका एउटा मानिस छ। 15म यरूशलेम गएको बेलामा यहूदीहरूका मुख्य पूजाहारी र अरू अगुवाहरूले उसको विरोधमा दोष लगाएका थिए र उसलाई दण्ड दिनुपर्छ भने। 16तर मैले तिनीहरूलाई भनें, ‘मानिसलाई दोषी नठहराएसम्म रोमी सरकारको दण्ड दिने चलन छैन। दोष लगाइएको मानिसले दोष लगाउनेका अगाडि आफ्नो कुरा सुनाउने मौका पाउनुपर्छ’। 17तिनीहरू यहाँ आएपछि मैले ढीलो नगरी भोलिपल्टै पावललाई न्यायालयमा ल्याउने आज्ञा दिएँ। 18पावलका विरोधीहरूले उसले अपराध गरेको कुनै खास दोष लगाउँछन् होला भन्ने सम्झेको थिएँ, तर तिनीहरूले त्यस्तो कुनै दोष लगाउन सकेनन्। 19उनीहरूकै धर्म र मरिसकेको येशू भन्ने मानिसको बारेमा मात्रै तिनीहरूको पावलसँग झगडा थियो। पावलचाहिँ मरेको येशू बिउँतनुभएको छ भनेर जिद्दी गर्दोरहेछ। 20यी कुराको बारेमा मैले त केही सोधपूछ गर्न पनि सकिनँ। त्यसो हुँदा मैले उसलाई ‘यरूशलेम गएर तिम्रो न्याय त्यहीँ नै गरे हुन्छ कि’ भनेर सोधें। 21तर उसले रोमी सम्राटबाट न्याय पाऊँ भनी बिन्ती गर्यो र मैले सम्राटकहाँ नपठाएसम्म उसलाई राम्ररी पहरा दिएर यहीँ नै राख्ने आज्ञा दिएको छु।”
22यो बयान सुनेर अग्रिपासले फेस्तसलाई भने, “मलाई आफैं त्यसको कुरा सुन्न मन लाग्यो।” फेस्तसले भने, “भोलि नै हजुरले सुन्न पाउनुहुन्छ।”
पावल अग्रिपासको सामुन्ने
23भोलिपल्ट अग्रिपास र बरनिकी ठूलो सम्मानमा आए। उनीहरू सेनापतिहरू र सहरका गण्य-मान्य व्यक्तिहरूसँग सभामा बसे। फेस्तसले आज्ञा दिएपछि पावललाई सभामा ल्याइयो। 24फेस्तसले भने, “राजा अग्रिपास र यहाँ उपस्थित हुने सबै भलाद्मीहरू, यहूदीहरू सबैले मकहाँ उजुर गरेको मानिस यही नै हो। यो मानिसलाई मार्नुपर्छ भनी सबै यहूदीहरूले यरूशलेममा र यहाँ कैसरियामा पनि भन्छन्। 25तर मैले यस मानिसमा ज्यान सजाय दिने लायकको कुनै दोष पनि भेट्न सकिनँ। तर ऊ आफैंले रोमी सम्राटकहाँ बिन्ती चढाउने माग गरेकोले मैले उसलाई रोमी सम्राटकहाँ पठाउने निर्णय गरें। 26तर मैले सम्राटलाई उसको बारेमा केही पनि लेख्न सकिनँ। यसैकारण मैले उसलाई तपाईंहरूको सामुन्ने र खास गरी तपाईं राजा अग्रिपासको सामुन्नेमा ल्याउन चाहेको हुँ। तपाईंहरूले यसको जाँचबुझ गरिदिनुभयो भने मैले लेख्ने कुरो पाउँछु कि भन्ने आशा राखेको छु 27किनभने खास दोष नदेखाई उसलाई पठाउन मलाई राम्रो लागेन।”
လက္ရွိေရြးခ်ယ္ထားမွု
प्रेरित 25: सरल नेपाली
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Simple Nepali Holy Bible © Nepal Bible Society, 2008.