Aepa Gemae 50
50
1Yosefeʼa afoʼamoʼmo ageʼniyana ago faliʼnigeno agetenoʼaeʼmo afoʼamo augosafiʼmo asagauno aiteno aviʼyaʼmo nehunoʼaeʼmo haeno neʼniye. 2Yosefeʼa aliʼyaʼamo neʼaliya lota vayaʼaifeʼmo, agufamo okasalisiya malasinimo faletapa ateyo, huno hapa paiʼnigeʼa lota vayaʼmogimo Isaleli agufaleʼmo malasinimo faleʼa ateʼnae. 3Isipi lota vayaʼmogimo fotiʼa afinaʼmo faleʼa neʼapataya kava huʼa Yekopu agufaleʼmo malasinimo faleʼnae. Isipi vayaʼmogimo Yekopufeʼmo sevetiʼa afinaʼmo hapau huʼa aviʼyaʼmo huʼnae. 4Ani sevetiʼa afinaʼmo hano hutegeno Yosefeʼa uno Kini vekamo Felo afamo anagaʼaeʼmo hapa painoʼaeʼmo, Nagaefeʼmo nahaoke hesayana utapa geʼnimo Kini vekamo ha paitapaeʼmo, 5Yosefe afoʼamoʼmo falisiya afinaʼmo hogo huʼnigeno Yosefefeʼmo ha painoʼaeʼmo, Afiyo, huno, falisuva afinaʼmo hogo huʼniye. Kenani kotegamo kiʼa natesaya kanoluʼmo ago alo hu maleʼnova kanolufikeʼmo kika nato, huno ha paiʼniye, hutapa ha paiyo. Inagi afaʼa nategeʼna afoʼnimoʼmo aliniʼna uʼna kiʼna ateteʼna eno, huno huʼniye, hutapa ha paiyo. 6Feloʼa hunoʼaeʼmo, Afokamoʼmo kagaefeʼmo hunoʼaeʼmo, kagoʼyamo ataleteka Kenani kotegamo aliniʼna uʼna kiʼna kategauve, huka naha paiyo, huno kaha paiʼniyaʼmofeʼmo alinika uka kika ato, huno ha paiʼniye.
7Inagi Yosefeʼa uno afoʼamoʼmo alininuno kino atesiyafeʼmo uno haiʼnigeʼa agaeʼeʼmo muki Felo aliʼyaʼamo neʼaliya vayanagi neʼyagaiya vayanagi muki Isipi vayatama vayanagi huʼa uʼa haiʼnae. 8Ani kava huʼa Yosefe afamo anagaʼagi konagaʼamogiʼenagi afoʼamo afamo anagaʼagi huʼa mukiʼamo uʼnayaʼmonanafa aise mafaʼne anaganagi sipisipigi memegi pulumakagi huʼa Goseni kotegamo maiʼnae. 9Muki talalagi hosileʼmo fai neʼmaiya vayaʼenagi huʼa asole vayaʼmo Yosefeʼeʼmo uʼnae. 10Apakaemo Yoneni aniʼmo lakaeʼa Atati kotega viti haletiʼyaʼmo nehalaya koteʼmo uʼa avaʼyi huʼnae. Apakaemo ani koteʼmo uʼa avaʼyi huteʼapaeʼmo seveniʼa afinaʼmo lusi kava huʼa hapau huʼa maiʼnae. 11Ani koteʼmo Kenani vayaʼmogimo apakeʼnayana lusi kava huʼa hapau huʼa maiʼnageʼa apaketeʼapaeʼmo, Isipi vayaʼmo ani kavafeʼmo lusi kava huʼa hapau nehae, huʼa huʼnayaʼmofeʼmo ani koʼmo saufa agiʼamo Emo Misalaimi kone, huʼa ateʼnae. Yoneni aniʼmo mugagayaga faliga haneʼniye.
12Inagi Yekopu mafaʼne anagaʼamogimo hapa paiʼniya agufa kavaʼmo huʼa kiʼa ateʼnae. 13Mafaʼne anagaʼamogimo Kenani kotegamo aliniʼa uʼa Makapela kotega Mamali taonimo haopaleʼmo haneʼniya yafa kapiʼmo kiʼa ateʼnae. Emalehamuʼa agaiʼa kanoluʼmo hanesiyafeʼmo Hiti nofi vekamo Efaloni yafa kaʼmo miya faiʼniya kanolufiʼmo Yekopuʼmo kiʼa ateʼnae. 14Yosefe afoʼamoʼmo kino atetegeʼapaeʼmo konagaʼamogiʼe muki avagi huʼa uʼnaya vayaʼeʼmo Isipi kotegamo atagi neʼa eʼnae.
Yosefeʼa konagaʼamogi apaipamo alino falu huʼniya gemae
15Yekopuʼa falitegeʼapaeʼmo Yosefe nepuʼamogimo huʼapaeʼmo, Fiku yanageno Yosefeʼa lagaefeʼmo ohauge agaetegamo muki huʼnona hosu kavatimo anonatilefeʼmo lamige hugiye, huʼa apakesamo afiʼnae. 16Afiteʼapaeʼmo mago vayaʼmo aliʼa apatageʼa Yosefetegamo uʼapaeʼmo, Afokamoʼmo ofalino afaʼa maiʼnenoʼaeʼmo mago gemo laha paiʼniye. 17Lapakaemo Yosefefeʼmo ina ge hutapa ha paiyo. Kahaoke hovanagi, nepukamogi hosu kavaʼapimo afaʼa alika atalo. Apakaemo kagaetegamo hosu kavaʼmo huʼnayaʼmofeʼmae, huno laha paiʼniye. Hemenimo kahaoke honanagi afokamo Gotiʼamo aliʼyaʼamo neʼaluna vayaʼmogita hosu kavatimo afaʼa alika atalo, huʼa huʼnaya gemo Yosefeʼa afitenoʼaeʼmo aviʼyaʼmo huʼniye. 18Inagi nepuʼamogimo Yosefetegamo uʼa apaleʼyamo faiʼneʼa ape huʼa ateʼnae. Apakaemo huʼapaeʼmo, Afiyo, huʼa, lagaemo aliʼyakamo neʼaluna vayakamo maiʼnone, huʼa huʼnageno 19#Loa 32:35; Hi 10:30Yosefeʼa hapa painoʼaeʼmo, Lapakaemo koli osiyo. Nagaemo Gotiʼnamo oʼmaiʼnovanageʼna agoti huʼna olapategauve. 20#Ap 2:23; 3:13Lapakaemo nagaetegamo hosu kavaʼmo hugune, hutapa lapakesamo afitetapa huʼnayaʼmonanafa Gotiʼa alagepa kavaʼmo afole aisiyafeʼmo afaʼa lapateʼnigetapa ani kavaʼmo huʼnae. Asole vayaʼai apakufamo alino katino apatesiyafeʼmae. 21Ani kavaʼmo huʼniyaʼmofeʼmo koli osiyo. Nagaemo lapakaeʼe mafaʼne anagatapiʼeʼmo afaʼa yagaiʼna lapategauve, huno hapa paiteno koli huʼnaya apaipa apakesamo huno falu hisiyafeʼmo falu fala gefatiʼmo huno hapa paiʼniye.
Yosefeʼa faliʼniya gemae
22Yosefeʼe afoʼamo nofi vayaʼeʼmo Isipi koteʼmo maiʼnae. Yosefeʼa vani hataleti teniʼa kafugamo maiʼniye. 23Agaemo Ifalemi mafaʼne anagaʼe Ifalemi agiyoʼamogiʼeʼmo apakeʼniye. Manasa mafaʼnemo Maki mafaʼne anagaʼmo Yosefeʼa alute alino faino apateʼnigeʼa maiʼneʼa kosiʼnae. 24Henagaʼamo Yosefeʼa konagaʼamogifeʼmo hapa painoʼaeʼmo, Falisuva afinaʼmo ago hogo huʼniyaʼmonanafa Gotiʼa emineno lapa maeno mani kotetiʼmo lapavalelino hogoteno agoʼyamo ataletenoʼaeʼmo Emalehamufenagi Aisakifenagi Yekopufenagi huno lapamiguve, huno hapa paiʼniya kotegamo ugiye, huno hapa paiʼniye. 25#Hi 11:22Yosefeʼa Isaleli mafaʼne anagaʼaifeʼmo hapa painoʼaeʼmo, lapagoʼyamo ataletetapaeʼmo, kayamufakamo alinituta Kenani kotegamo kita ategaune, hutapa naha paiyo. Gotiʼa emineno alagepa huno lapa maesigetapa mani kotetiʼmo nayamufaʼnimo alinitapa ugae, huno hapa paiʼniye. 26Inagi Yosefeʼa vani hataleti teniʼa kafugamo maiteno faliʼniye. Mago lota vayaʼmogimo agufaleʼmo malasinimo faleʼa ateteʼa kesifiʼmo maleteʼa Isipi koteʼmo maleʼnae.
လက္ရွိေရြးခ်ယ္ထားမွု
Aepa Gemae 50: kyg2013
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2013, Wycliffe Bible Translators, Inc. All rights reserved.