ܡܬܠ̈ܐ 25

ܡܲܬܠܹ̈ܐ ܕܡܲܠܟܵܐ ܫܠܹܝܡܘܿܢ ܡܟܘܼܦܫܹܐ ܒܝܲܕ ܐ݇ܢܵܫܹ̈ܐ ܕܚܹܙܲܩܝܵܐ

1ܐܘܼܦ ܐܲܢܹܐ ܡܲܬܠܹ̈ܐ ܕܫܠܹܝܡܘܿܢ ܝܼܢܵܐ،

ܕܡܘܼܪܝܸܙܲܝ ܠܗܘܿܢ ܐ݇ܢܵܫܹ̈ܐ ܕܚܹܙܲܩܝܵܐ ܡܲܠܟܵܐ ܕܝܼܗܘܼܕܵܐ:

2ܚܸܩܪܵܐ ܕܐܲܠܵܗܵܐ ܝܠܹܗ ܠܛܲܫܘܼܝܹܐ ܫܘܼܠܵܐ،

ܘܚܸܩܪܵܐ ܕܡܲܠܟܹ̈ܐ ܝܠܹܗ ܨܲܚܨܵܝܬܵܐ ܕܫܘܼܠܵܐ.

3ܐܲܝܟ݂ ܪܵܡܘܼܬܵܐ ܕܫܡܲܝܵܐ ܘܥܘܼܡܩܵܐ ܕܐܲܪܥܵܐ،

ܐܘܼܦ ܠܸܒܵܐ ܕܡܲܠܟܹ̈ܐ ܠܹܐ ܐܵܬܹܐ ܠܨܲܚܨܘܼܝܹܐ.

4ܦܪܘܿܫ ܚܸܠܛ ܡ̣ܢ ܣܹܐܡܵܐ،

ܘܒܸܬ ܦܵܠܹܛ ܡܵܐܢܵܐ ܠܨܲܪܸܦܵܢܵܐ.

5ܦܪܘܿܫ ܪܲܫܝܼܥܵܐ ܡܩܵܕ݇ܡ ܡܲܠܟܵܐ،

ܘܒܸܬ ܡܩܵܘܹܐ ܟܘܼܪܣܝܹܗ ܒܙܲܕܝܼܩܘܼܬܵܐ.

6ܠܵܐ ܥܵܒ݂ܕܹܬ ܫܘܼܒ݂ܗܵܪܵܐ ܩܵܕ݇ܡ ܡܲܠܟܵܐ،

ܘܒܕܘܼܟܬܵܐ ܕܓܘܼܪ̈ܵܢܹܐ ܠܵܐ ܟܵܠܹܝܬ.

7ܣܵܒܵܒ ܒܘܼܫ ܨܦܵܝܝܼ ܝܠܵܗ̇ ܠܹܐܡܵܪܵܐ ܐܸܠܘܼܟ݂، ”ܐ݇ܣܘܿܩ ܠܐܲܟ݂ܵܐ،“

ܡ̣ܢ ܠܡܲܟܘܼܦܘܼܟ݂ ܩܵܕ݇ܡ ܢܲܨܝܼܚܵܐ.

8ܡܸܢܕܝܼ ܕܚܵܙܝܼ ܥܲܝܢܘܼ̈ܟ݂

ܠܵܐ ܦܵܠܛܹܬ ܠܹܗ ܠܕܝܼܘܵܢ ܒܡܲܠܝܲܙܬܵܐ،

ܕܠܵܐ ܟܲܕ ܥܵܒ݂ܕܹܬ ܗܲܕܟ݂ܵܐ،

ܒܚܲܪܬܵܐ ܡܲܢܟܸܦ ܠܘܼܟ݂ ܫܒ݂ܵܒ݂ܘܼܟ݂.

9ܕܪܘܿܫ ܠܵܗ̇ ܨܒ݂ܘܼܬܘܼܟ݂ ܥܲܡ ܫܒ݂ܵܒ݂ܘܼܟ݂،

ܐܝܼܢܵܐ ܐ݇ܪܵܙܵܐ ܠܐ݇ܚܹܪ݇ܢܵܐ ܠܵܐ ܓܵܠܹܝܬ.

10ܕܠܵܐ ܠܵܐܹܡ ܠܘܼܟ݂ ܗ̇ܘ ܕܫܵܡܹܥ،

ܘܠܵܘܡܵܐ ܕܥܲܠܘܼܟ݂ ܠܵܐ ܬܵܐܹܡ.

11ܚܲܒܘܼܫܹ̈ܐ ܕܕܲܗܒ݂ܵܐ ܓܵܘ ܡܵܐܢܹ̈ܐ ܕܣܹܐܡܵܐ ܝܠܵܗ̇

ܗܹܡܸܙܡܵܢ ܗܘܼܡܙܸܡܬܵܐ ܒܕܘܼܟܘܼܗ̇.

12ܩܢܲܫܬܵܐ ܕܕܲܗܒ݂ܵܐ، ܘܬܵܘܩܵܐ ܕܕܲܗܒ݂ܵܐ ܨܸܦܝܵܐ ܝܠܹܗ

ܡܲܢܟܸܣܵܢܵܐ ܚܲܟܝܼܡܵܐ ܠܢܵܬܵܐ ܫܵܡܥܵܢܬܵܐ.

13ܩܲܪܝܼܪܘܼܬܵܐ ܕܬܲܠܓܵܐ ܒܝܵܘܡܵܐ ܕܚܸܨܕܵܐ ܝܠܹܗ

ܐܝܼܙܓܲܕܵܐ ܡܗܘܼܡܢܵܐ ܠܐܵܢܝܼ ܕܩܲܡ ܫܲܕܪ̈ܝܼ ܠܹܗ،

ܣܵܒܵܒ ܓܵܢܵܐ ܕܡܵܪ̈ܵܘܵܬܹܗ ܟܹܐ ܡܲܢܝܸܚ.

14ܥܢܵܢܹ̈ܐ ܘܦܵܘܚܵܐ ܒܠܵܐ ܡܸܛܪܵܐ ܝܠܹܗ

ܐ݇ܢܵܫܵܐ ܕܥܵܒܹܕ ܫܘܼܒ݂ܗܵܪܵܐ ܒܡܵܘܗܲܒ݂ܬܵܐ ܕܠܹܐ ܝܠܹܗ ܝܘܼܗ݇ܒ݂ܘܼܗ̇.

15ܒܝܘܼܪܟ݂ܵܐ ܕܒܹܐܢܵܐ ܟܹܐ ܦܵܐܹܫ ܫܘܼܕܠܵܐ ܫܲܠܝܼܛܵܐ،

ܘܠܸܫܵܢܵܐ ܪܲܟܝܼܟ݂ܵܐ ܟܹܐ ܬܵܒܹܪ ܓܲܪܡܵܐ.

16ܐܝܼܡܲܢ ܕܕܸܒ݂ܫܵܐ ܡܲܫ݇ܟ̰ܚܸܬ، ܐ݇ܟ݂ܘܿܠ ܟܡܵܐ ܕܝܼܠܵܗ̇ ܡܵܠܝܵܢܬܵܐ،

ܕܠܵܐ ܣܵܒ݂ܥܹܬ ܡܸܢܹܗ ܘܓܵܣܹܝܬ ܠܹܗ.

17ܠܵܐ ܡܲܬܒܸܬ ܐܲܩܠܘܼܟ݂ ܪܵܒܵܐ ܓܵܘ ܒܲܝܬܵܐ ܕܫܒ݂ܵܒ݂ܘܼܟ݂،

ܕܠܵܐ ܣܵܩܹܕ ܡܸܢܘܼܟ݂ ܘܣܵܢܹܐ ܠܘܼܟ݂.

18ܚܘܼܛܪܵܐ ܘܣܲܝܦܵܐ ܘܓܹܐܪܵܐ ܚܲܪܝܼܦܵܐ ܝܠܹܗ

ܐ݇ܢܵܫܵܐ ܕܝܲܗ݇ܒܸܠ ܣܵܗܕܘܼܬܵܐ ܕܲܓܵܠܬܵܐ ܕܲܠܩܘܼܒ݂ܠ ܕܫܒ݂ܵܒܹܗ.

19ܟܹܟܵܐ ܚܪܝܼܒ݂ܵܐ ܘܐܲܩܠܵܐ ܫܠܝܼܦܬܵܐ ܝܠܵܗ̇

ܗܹܒ݂ܝܼ ܕܚܵܝܝܼܢ ܒܝܵܘܡܵܐ ܕܐܘܼܠܨܵܢܵܐ.

20ܫܲܠܚܵܢܵܐ ܕܠܒ݂ܘܼܫܹܗ ܒܝܵܘܡܵܐ ܕܩܲܪܬܵܐ،

ܝܲܢ ܚܲܠܵܐ ܥܲܠ ܢܸܬܪܵܐ ܝܠܹܗ،

ܗ̇ܘ ܕܙܵܡܹܪ ܙܡܵܪ̈ܝܵܬܹܐ ܠܠܸܒܵܐ ܦܫܝܼܡܵܐ.

21ܐܸܢ ܟܵܦܹܢ ܣܵܢܝܵܢܘܼܟ݂، ܡܲܐܟܸܠ ܠܹܗ ܠܲܚܡܵܐ،

ܘܐܸܢ ܨܵܗܹܐ، ܡܲܫܬܝܼ ܠܹܗ ܡ̈ܝܼܵܐ،

22ܣܵܒܵܒ ܓܘܼܡܪܹ̈ܐ ܓ̰ܲܡܘܼܥܹܐ ܝܘܸܬ ܥܲܠ ܪܹܫܹܗ،

ܘܡܵܪܝܵܐ ܒܸܬ ܦܵܪܹܥ ܠܘܼܟ݂.

23ܦܵܘܚܵܐ ܕܓܲܪܒܝܵܐ ܟܹܐ ܡܲܝܬܹܐ ܡܸܛܪܵܐ،

ܘܠܸܫܵܢܵܐ ܕܗܲܡܙܸܡ ܒܛܸܫܘܵܐ ܟܹܐ ܡܲܒܪܹܐ ܦܵܬܵܐ ܟܵܪܘܿܒܬܵܐ.

24ܒܘܼܫ ܨܦܵܝܝܼ ܝܠܵܗ̇ ܠܝܼܬܵܒ݂ܵܐ ܥܲܠ ܩܘܼܪܢܝܼܬܵܐ ܕܐ݇ܓܵܪܹܐ،

ܡ̣ܢ ܠܸܚܵܝܵܐ ܓܵܘ ܒܲܝܬܵܐ ܥܲܡ ܒܲܟ݂ܬܵܐ ܡܲܩܪܸܨܵܢܬܵܐ.

25ܡ̈ܝܼܵܐ ܩܲܪܝܼܪܹ̈ܐ ܠܓܵܢܵܐ ܟܟ̰ܝܼܚܬܵܐ ܝܠܹܗ

ܚܲܒܪܵܐ ܨܦܵܝܝܼ ܡ̣ܢ ܐܲܪܥܵܐ ܪܲܚܝܼܩܬܵܐ.

26ܥܲܝܢܵܐ ܕܡ̈ܝܼܵܐ ܚܒ݂ܝܼܛܹ̈ܐ ܘܡܲܒܘܼܥܵܐ ܡܘܼܚܪܸܒ݂ܵܐ ܝܠܹܗ

ܙܲܕܝܼܩܵܐ ܕܫܵܥܹܫ ܩܵܕ݇ܡ ܪܲܫܝܼܥܵܐ.

27ܠܹܐܟ݂ܵܠܵܐ ܕܸܒ݂ܫܵܐ ܪܵܒܵܐ ܠܹܐ ܝܠܵܗ̇ ܨܦܵܝܝܼ،

ܐܘܼܦ ܠܹܐ ܝܠܵܗ̇ ܡܝܘܼܩܸܪܬܵܐ ܠܐ݇ܢܵܫܵܐ ܕܛܵܥܹܐ ܚܸܩܪܵܐ ܕܓܵܢܹܗ.

28ܡܕܝܼܢ݇ܬܵܐ ܬܪܝܼܥܬܵܐ ܒܠܵܐ ܫܘܼܪܵܐ ܝܠܹܗ

ܐ݇ܢܵܫܵܐ ܕܠܵܐ ܙܲܒܛܸܢ ܪܘܼܚܹܗ.

လက္ရွိေရြးခ်ယ္ထားမွု

ܡܬܠ̈ܐ 25: ABTAB

အေရာင္မွတ္ခ်က္

မၽွေဝရန္

ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ

ܟܬܵܒ݂ܵܐ ܩܲܕܝܼܫܵܐ ܒܠܸܫܵܢܵܐ ܐܵܬܘܿܪܵܝܵܐ အေၾကာင္းကို ပို၍ သင္ယူပါ။