ܡܬܠ̈ܐ 1
1
ܡܵܘܕܥܵܢܘܼܬܵܐ
1ܡܲܬܠܹ̈ܐ ܕܫܠܹܝܡܘܿܢ ܒܪܘܿܢܵܐ ܕܕܵܘܝܼܕ، ܡܲܠܟܵܐ ܕܝܼܣܪܵܝܹܠ: 2ܠܝܼܕܵܥܵܐ ܚܸܟ݂ܡܬܵܐ ܘܡܲܪܕܘܼܬܵܐ،
ܠܦܲܪܡܘܼܝܹܐ ܗܹܡܸܙܡܵܢܹ̈ܐ ܕܣܘܼܟܵܠܵܐ،
3ܠܩܲܒܘܼܠܹܐ ܡܲܪܕܘܼܬܵܐ ܩܵܐ ܦܲܪܡܵܝܬܵܐ،
ܙܲܕܝܼܩܘܼܬܵܐ، ܘܕܝܼܘܵܢ، ܘܬܪܘܼܨܘܼܬܵܐ،
4ܠܝܼܵܗ݇ܒ݂ܵܐ ܠܦܫܝܼܛܹ̈ܐ ܝܵܕܘܿܥܘܼܬܵܐ،
ܠܥܠܲܝܡܹ̈ܐ ܝ݇ܕܲܥܬܵܐ ܘܬܲܚܡܲܢܬܵܐ.
5ܫܵܡܹܥ ܚܲܟܝܼܡܵܐ ܘܡܲܙܝܸܕ ܝܘܼܠܦܵܢܵܐ،
ܘܦܲܪܡܝܼܵܢܵܐ ܩܵܢܹܐ ܡܗܲܕܝܵܢܘܼܬܵܐ،
6ܠܦܲܪܡܘܼܝܹܐ ܡܲܬܠܵܐ ܘܐ݇ܪܵܙܵܐ ܕܣܘܼܟܵܠܹܗ،
ܚܲܒܪܹ̈ܐ ܕܚܲܟܝܼܡܹ̈ܐ ܘܩܸܨܹܡܝܵܬܲܝ̈ܗܝ.
7ܙܕܘܼܥܬܵܐ ܕܡܵܪܝܵܐ ܪܹܫܵܐ ܕܝ݇ܕܲܥܬܵܐ ܝܠܵܗ̇،
ܚܸܟ݂ܡܬܵܐ ܘܡܲܪܕܘܼܬܵܐ ܣܲܟ݂ܠܹ̈ܐ ܟܹܐ ܡܲܣܠܝܼ.
ܡܲܨܝܲܬܬܵܐ ܠܝܘܼܠܦܵܢܵܐ ܕܐܲܒ݂ܵܗܹ̈ܐ
8ܫܡܸܥ، ܒܪܘܿܢܝܼ، ܡܲܪܕܘܼܬܵܐ ܕܒܵܒܘܼܟ݂،
ܘܠܵܐ ܡܲܚܦܸܠܸܬ ܢܵܡܘܿܣܵܐ ܕܝܸܡܘܼܟ݂.
9ܣܵܒܵܒ ܟܠܝܼܠܵܐ ܕܫܵܦܵܩܲܬ ܝܼܢܵܐ ܠܪܹܫܘܼܟ݂،
ܘܬܵܘܩܹ̈ܐ ܠܩܕܵܠܘܼܟ݂.
ܙܗܝܼܪܘܼܬܵܐ ܡ̣ܢ ܚܲܛܵܝܹ̈ܐ
10ܒܪܘܿܢܝܼ، ܐܸܢ ܫܲܕܠܝܼ ܠܘܼܟ݂ ܚܲܛܵܝܹ̈ܐ،
ܠܵܐ ܗܵܘܹܝܬ ܪܵܙܝܼ.
11ܐܸܢ ܐܵܡܪܝܼ، ”ܬܵܐ ܥܲܡܲܢ،
ܝܵܬܒܲܚ ܒܟܡܹܐܢܵܐ ܠܕܸܡܵܐ،
ܘܥܲܠ ܙܲܟܵܝܵܐ ܛܲܫܲܚ ܓܵܢܲܢ ܕܠܵܐ ܥܸܠܬܵܐ،
12ܒܵܠܥܲܚ ܠܗܘܿܢ ܚܵܝܹ̈ܐ ܐܲܝܟ݂ ܫܝܘܿܠ،
ܘܬܲܡܝܼܡܹ̈ܐ، ܐܲܝܟ݂ ܨܵܠܝܵܢܹ̈ܐ ܕܓܘܼܒܵܐ،
13ܟܠ ܥܘܼܬܪܵܐ ܛܝܼܡܵܢܵܐ ܒܸܬ ܡܲܫ݇ܟ̰ܚܲܚ،
ܡܵܠܲܚ ܒܵܬܲܢ̈ ܡ̣ܢ ܣܠܵܒܬܵܐ.
14ܦܸܫܟܘܼܟ݂ ܕܵܪܹܝܬ ܠܹܗ ܒܓܵܘܲܢ،
ܗܵܘܝܵܐ ܚܕܵܐ ܟܝܼܣܬܵܐ ܠܟܠܲܢ.“
15ܒܪܘܿܢܝܼ، ܠܵܐ ܐܵܙܹܠ݇ܬ ܒܐܘܼܪܚܵܐ ܥܲܡܲܝܗܝ،
ܡܲܟܠܝܼ ܐܲܩܠܘܼܟ݂ ܡ̣ܢ ܫܒ݂ܝܼܠܲܝܗܝ.
16ܣܵܒܵܒ ܐܲܩܠܵܬܲܝ̈ܗܝ ܠܒܝܼܫܬܵܐ ܟܹܐ ܪܵܚܛܝܼ،
ܘܟܹܐ ܡܲܠܝܸܙܝܼ ܠܫܲܦܘܼܟܹܐ ܕܸܡܵܐ.
17ܗܹܐ، ܣܪܝܼܩܘܼܬܵܐ ܝܠܵܗ̇ ܠܸܦܪܵܣܵܐ ܓܲܪܕܵܐ
ܩܵܕ݇ܡ ܥܲܝܢܹ̈ܐ ܕܟܠ ܦܵܪܲܚܬܵܐ.
18ܐܝܼܢܵܐ ܐܵܢܝܼ ܠܕܸܡܵܐ ܕܓܵܢܲܝܗܝ ܟܹܐ ܝܵܬܒ݂ܝܼ ܒܟܡܹܐܢܵܐ،
ܟܹܐ ܥܵܒ݂ܕܝܼ ܛܸܫܘܵܐ ܥܲܠ ܓܵܢܵܬܲܝ̈ܗܝ.
19ܗܲܕܟ݂ܵܐ ܝܢܵܐ ܐܘܼܪ̈ܚܵܬܹܐ ܕܟܠ ܚܲܕ ܚܵܛܘܿܦܵܐ،
ܟܹܐ ܫܵܩܹܠ ܚܛܘܼܦܝܵܐ ܓܵܢܵܐ ܕܡܵܪ̈ܵܘܵܬܹܗ.
ܡܲܡܠܠܵܐ ܕܚܸܟ݂ܡܬܵܐ
20ܚܸܟ݂ܡܬܵܐ ܒܥܵܠܘܿܠܵܐ ܟܹܐ ܩܲܘܸܚܵܐ،
ܒܫܘܼܩܹ̈ܐ ܟܹܐ ܝܵܗ݇ܒ݂ܵܐ ܩܵܠܘܼܗ̇،
21ܩܵܕ݇ܡ ܟܸܢܫܹ̈ܐ ܟܹܐ ܩܵܪܝܵܐ،
ܒܥܒ݂ܵܪܬܵܐ ܕܕܲܪ̈ܘܵܙܹܐ ܕܓܵܘ ܡܕܝܼܢ݇ܬܵܐ ܗܹܡܸܙܡܵܢܘܼ̈ܗ̇ ܟܹܐ ܐܵܡܪܵܐ، 22”ܗܲܠ ܐܝܼܡܲܢ، ܝܵܐ ܦܫܝܼ̈ܛܹܐ، ܒܸܬ ܡܲܚܸܒܝܼܬܘܿܢ ܦܫܝܼܛܘܼܬܵܐ؟
ܘܡܲܣܚܸܪ̈ܵܢܹܐ ܠܡܲܣܚܲܪܘܼܬܵܐ ܒܸܬ ܫܲܗܘܸܬܝܼ،
ܘܐܲܗܡܲܩܹ̈ܐ ܒܸܬ ܣܵܢܝܼ ܝ݇ܕܲܥܬܵܐ؟
23ܦܵܬܠܝܼܬܘܿܢ ܒܵܠܵܐ ܠܡܲܢܟܲܣܬܝܼ،
ܗܵܐ، ܒܸܬ ܡܲܢܒܸܥܸܢ ܐܸܠܵܘܟ݂ܘܿܢ ܪܘܼܚܝܼ،
ܒܸܬ ܡܲܕܥܸܢ ܗܹܡܸܙܡܵܢܝܼ̈ ܐܸܠܵܘܟ݂ܘܿܢ.
24ܣܵܒܵܒ ܩܪܹܐ ܠܝܼ، ܐܝܼܢܵܐ ܡܘܼܚܦܸܠ ܠܵܘܟ݂ܘܿܢ،
ܦܘܼܫܸܛ ܠܝܼ ܐܝܼܕܝܼ، ܐܝܼܢܵܐ ܠܲܝܬ ܗ݇ܘܵܐ ܡܲܨܝܸܬܵܢܵܐ،
25ܘܡܘܼܣܠܹܐ ܠܵܘܟ݂ܘܿܢ ܟܠܹܗ ܡܸܠܟܝܼ،
ܘܒܡܲܢܟܲܣܬܝܼ ܠܵܐ ܒܣܝܼܡ ܠܵܗ̇ ܠܵܘܟ݂ܘܿܢ،
26ܐܘܼܦ ܐܵܢܵܐ ܒܓܘܼܢܚܵܘܟ݂ܘܿܢ ܒܸܬ ܓܵܚܟܹܢ،
ܒܸܬ ܡܲܣܚܸܪܸܢ ܟܲܕ ܐܵܬܝܵܐ ܥܲܠܵܘܟ݂ܘܿܢ ܙܕܘܼܥܬܵܐ،
27ܟܲܕ ܐܵܬܝܵܐ ܐܲܝܟ݂ ܥܲܠܥܵܠܵܐ ܥܲܠܵܘܟ݂ܘܿܢ ܙܕܘܼܥܬܵܐ،
ܘܓܘܼܢܚܵܘܟ݂ܘܿܢ ܐܲܝܟ݂ ܓܵܪܕܲܬ݇ ܒܘܼܠܹ̈ܐ ܐܵܬܹܐ،
ܟܲܕ ܐܵܬܹܐ ܥܲܠܵܘܟ݂ܘܿܢ ܥܵܘܩܵܢܵܐ ܘܐܘܼܠܨܵܢܵܐ.
28ܗ̇ܝܓܵܗ ܒܸܬ ܩܵܪܝܼ ܠܝܼ، ܐܝܼܢܵܐ ܠܹܐ ܓ̰ܲܘܸܒܸܢ،
ܒܸܬ ܛܵܥܝܼ ܐܸܠܝܼ، ܐܝܼܢܵܐ ܠܹܐ ܡܲܫ݇ܟ̰ܚܝܼ ܠܝܼ،
29ܣܵܒܵܒ ܣܢܹܐ ܠܗܘܿܢ ܝ݇ܕܲܥܬܵܐ،
ܘܙܕܘܼܥܬܵܐ ܕܡܵܪܝܵܐ ܠܵܐ ܓܘܼܒܹܐ ܠܗܘܿܢ.
30ܠܵܐ ܒܣܝܼܡ ܠܵܗ̇ ܠܗܘܿܢ ܒܡܸܠܟܝܼ،
ܡܘܼܣܠܹܐ ܠܗܘܿܢ ܟܠܵܗ̇ ܡܲܢܟܲܣܬܝܼ،
31ܒܘܼܬ ܐܵܗܵܐ، ܒܸܬ ܐܵܟ݂ܠܝܼ ܡ̣ܢ ܛܥܘܼܢܝܵܬܹ̈ܐ ܕܐܘܼܪܚܲܝܗܝ،
ܘܡ̣ܢ ܨܢܝܼܥܘܼܝܵܬܲܝ̈ܗܝ ܒܸܬ ܣܵܒ݂ܥܝܼ.
32ܣܵܒܵܒ ܩܠܵܒܬܵܐ ܕܦܫܝܼ̈ܛܹܐ ܒܸܬ ܩܵܛܠܵܐ ܠܗܘܿܢ،
ܘܫܸܠܝܘܼܬܵܐ ܕܐܲܗܡܲܩܹ̈ܐ ܒܸܬ ܛܵܠܩܵܐ ܠܗܘܿܢ.
33ܐܝܼܢܵܐ ܗ̇ܘ ܕܫܵܡܹܥ ܐܸܠܝܼ ܒܸܬ ܫܵܪܹܐ ܒܐܲܡܝܼܢܵܝܘܼܬܵܐ،
ܘܒܸܬ ܗܵܘܹܐ ܪܸܚܩܵܐ ܡ̣ܢ ܙܕܘܼܥܬܵܐ ܕܒܝܼܫܬܵܐ.“
လက္ရွိေရြးခ်ယ္ထားမွု
ܡܬܠ̈ܐ 1: ABTAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Aramaic Bible Translation Assyrian Bible © 2025 Aramaic Bible Translation