ܩܘܗܠܬ 3

ܙܲܒ݂ܢܵܐ ܠܟܠ ܡܸܢܕܝܼ

1ܠܟܠ ܡܸܢܕܝܼ ܐܝܼܬ ܥܕܵܢܵܐ، ܘܙܲܒ݂ܢܵܐ ܠܟܠ ܨܒ݂ܘܼܬܵܐ ܬܚܘܿܬ ܫܡܲܝܵܐ:

2ܙܲܒ݂ܢܵܐ ܠܸܠܝܵܕܵܐ ܘܙܲܒ݂ܢܵܐ ܠܸܡܝܵܬܵܐ، ܙܲܒ݂ܢܵܐ ܠܸܢܨܵܒ݂ܵܐ، ܘܙܲܒ݂ܢܵܐ ܠܸܥܩܵܪܵܐ ܢܨܝܼܒ݂ܵܐ،

3ܙܲܒ݂ܢܵܐ ܠܸܩܛܵܠܵܐ، ܘܙܲܒ݂ܢܵܐ ܠܒܲܣܘܼܡܹܐ، ܙܲܒ݂ܢܵܐ ܠܸܬܠܵܚܵܐ، ܘܙܲܒ݂ܢܵܐ ܠܸܒܢܵܝܵܐ،

4ܙܲܒ݂ܢܵܐ ܠܸܒܟ݂ܵܝܵܐ، ܘܙܲܒ݂ܢܵܐ ܠܸܓܚܵܟܵܐ، ܙܲܒ݂ܢܵܐ ܠܸܥܒ݂ܵܕܵܐ ܬܵܥܙܝܼ، ܘܙܲܒ݂ܢܵܐ ܠܸܪܩܵܕܵܐ،

5ܙܲܒ݂ܢܵܐ ܠܪܲܦܘܼܝܹܐ ܟܹܐܦܹ̈ܐ، ܘܙܲܒ݂ܢܵܐ ܠܓ̰ܲܡܘܼܥܹܐ ܟܹܐܦܹ̈ܐ، ܙܲܒ݂ܢܵܐ ܠܸܚܦܵܩܵܐ، ܘܙܲܒ݂ܢܵܐ ܠܸܥܪܵܩܵܐ ܡ̣ܢ ܚܦܵܩܬܵܐ،

6ܙܲܒ݂ܢܵܐ ܠܸܛܥܵܝܵܐ، ܘܙܲܒ݂ܢܵܐ ܠܛܲܠܘܼܩܹܐ، ܙܲܒ݂ܢܵܐ ܠܸܢܛܵܪܵܐ، ܘܙܲܒ݂ܢܵܐ ܠܪܲܦܘܼܝܹܐ،

7ܙܲܒ݂ܢܵܐ ܠܸܦܪܵܛܵܐ، ܘܙܲܒ݂ܢܵܐ ܠܸܚܝܵܛܵܐ، ܙܲܒ݂ܢܵܐ ܠܸܫܬܵܩܵܐ، ܘܙܲܒ݂ܢܵܐ ܠܗܲܡܙܘܼܡܹܐ،

8ܙܲܒ݂ܢܵܐ ܠܡܲܚܘܼܒܹܐ، ܘܙܲܒ݂ܢܵܐ ܠܸܣܢܵܝܵܐ، ܙܲܒ݂ܢܵܐ ܕܦܠܵܫܵܐ، ܘܙܲܒ݂ܢܵܐ ܕܫܠܵܡܵܐ،

9ܡܘܿܕܝܼ ܝܘܼܬܪܵܢܵܐ ܐܝܼܬ ܠܹܗ ܦܲܠܵܚܵܐ ܒܥܲܡܠܹܗ؟ 10ܚܙܹܐ ܠܝܼ ܟܸܟ̰ܚܵܐ ܕܝܘܼܗ݇ܒܸܠ ܠܹܗ ܐܲܠܵܗܵܐ ܠܒܢܲܝ̈ ܐ݇ܢܵܫܵܐ ܠܸܥܒ݂ܵܕܵܐ. 11ܠܟܠ ܡܸܢܕܝܼ ܥܒ݂ܝܼܕ ܠܹܗ ܫܲܦܝܼܪܵܐ ܒܙܲܒ݂ܢܹܗ، ܘܐܘܼܦ ܥܵܠܡܝܼܢܵܝܘܼܬܵܐ ܡܘܼܬܸܒ݂ ܠܹܗ ܒܠܸܒܲܝܗܝ، ܗܵܕܵܐ ܕܠܹܐ ܡܵܨܹܐ ܦܲܪܡܹܐ ܐ݇ܢܵܫܵܐ ܦܘܼܠܚܵܢܵܐ ܕܒܸܥܒܵܕܵܐ ܝܠܹܗ ܐܲܠܵܗܵܐ ܡ̣ܢ ܫܘܼܪܵܝܵܐ ܘܗܲܠ ܦܪܵܩܬܵܐ. 12ܝ݇ܕܝܼܥ ܠܝܼ ܕܠܲܝܬ ܨܦܵܝܘܼܬܵܐ ܠܟܸܣ ܒܢܲܝ̈ ܐ݇ܢܵܫܵܐ، ܫܒ݂ܘܿܩ ܡ̣ܢ ܠܸܚܕܵܝܵܐ ܘܠܸܥܒ݂ܵܕܵܐ ܛܵܒ݂ܬܵܐ ܒܚܲܝܲܝ̈ܗܝ. 13ܘܡܵܘܗܲܒ݂ܬܵܐ ܕܐܲܠܵܗܵܐ ܝܠܵܗ̇ ܐܸܢ ܐ݇ܢܵܫܵܐ ܐܵܟܹܠ ܘܫܵܬܹܐ ܘܚܵܙܹܐ ܛܵܒ݂ܬܵܐ ܒܟܠܹܗ ܥܲܡܠܹܗ. 14ܝ݇ܕܝܼܥ ܠܝܼ ܕܟܠ ܕܥܵܒܹܕ ܐܲܠܵܗܵܐ ܒܸܬ ܗܵܘܹܐ ܠܥܵܠܲܡ. ܥܲܠܘܼܗܝ ܠܲܝܬ ܠܡܲܙܝܘܼܕܹܐ، ܘܡܸܢܹܗ ܠܲܝܬ ܠܡܲܒܨܘܼܪܹܐ. ܐܲܠܵܗܵܐ ܥܒ݂ܝܼܕ ܠܹܗ ܕܙܵܕܥܝܼ ܡܸܢܹܗ. 15ܡܸܢܕܝܼ ܕܗܘܹܐ ܠܹܗ، ܡܩܵܕ݇ܡ ܐܵܕܝܼܵܐ ܝܠܹܗ، ܘܡܸܢܕܝܼ ܕܒܸܬ ܗܵܘܹܐ، ܡܩܵܕ݇ܡ ܐܵܕܝܼܵܐ ܗܘܹܐ ܠܹܗ، ܘܐܲܠܵܗܵܐ ܟܹܐ ܥܵܒܹܕ ܬܢܵܝܬܵܐ ܠܕܲܥܒܲܪ.

ܠܲܝܬ ܟܹܐܢܘܼܬܵܐ ܓܵܘ ܪܹܐܙܵܐ ܕܕܘܼܢܝܹܐ

16ܘܗܹܫ ܚܙܹܐ ܠܝܼ ܬܚܘܿܬ ܫܸܡܫܵܐ، ܒܫܵܘܦܵܐ ܕܗܵܩܘܼܬܵܐ، ܬܵܡܵܐ ܐܝܼܬ ܪܲܫܝܼܥܘܼܬܵܐ، ܘܒܕܘܼܟܵܐ ܕܙܲܕܝܼܩܘܼܬܵܐ، ܬܵܡܵܐ ܐܝܼܬ ܥܵܘܠܵܐ. 17ܘܐ݇ܡܝܼܪܝܼ ܐܵܢܵܐ ܒܠܸܒܝܼ، ”ܠܙܲܕܝܼܩܵܐ ܘܠܪܲܫܝܼܥܵܐ ܒܸܬ ܕܵܐܹܢ ܐܲܠܵܗܵܐ،“ ܣܵܒܵܒ ܠܟܠ ܨܒ݂ܘܼܬܵܐ ܘܠܟܠ ܥܒ݂ܵܕܵܐ ܐܝܼܬ ܙܲܒ݂ܢܵܐ ܬܵܡܵܐ. 18ܐ݇ܡܝܼܪܝܼ ܐܵܢܵܐ ܒܠܸܒܝܼ ܒܘܼܬ ܨܒ݂ܘܼܬܵܐ ܕܒܢܲܝ̈ ܐ݇ܢܵܫܵܐ، ”ܡܲܥܒ݂ܘܼܪܲܝ ܠܹܗ ܐܲܠܵܗܵܐ ܒܨܲܚܨܵܝܬܵܐ ܕܚܵܙܝܼ ܕܐܵܢܝܼ ܗܲܝܘܵܢܹ̈ܐ ܝܢܵܐ ܒܓܵܢܲܝܗܝ.“ 19ܣܵܒܵܒ ܚܸܠܩܵܐ ܕܒܢܲܝ̈ܢܵܫܵܐ ܘܚܸܠܩܵܐ ܕܗܲܝܘܵܢ ܚܲܕ ܝܼܠܹܗ ܠܬܸܪܘܲܝܗܝ، ܐܲܝܟ݂ ܕܡܵܐܹܬ ܐܵܗܵܐ ܗܲܕܟ݂ܵܐ ܟܹܐ ܡܵܐܹܬ ܐܘܼܦ ܗ̇ܘ ܐ݇ܚܹܪ݇ܢܵܐ، ܘܚܕܵܐ ܢܫܲܡܬܵܐ ܐܝܼܬ ܠܟܠܲܝܗܝ، ܘܠܹܐ ܝܠܹܗ ܒܘܼܫ ܙܵܘܕܵܐ ܒܲܪܢܵܫܵܐ ܡ̣ܢ ܗܲܝܘܵܢ، ܣܵܒܵܒ ܟܠ ܣܪܝܼܩܘܼܬܵܐ ܝܠܹܗ. 20ܟܠ ܟܹܐ ܐܵܙܹܠ ܠܚܕܵܐ ܕܘܼܟܬܵܐ، ܟܠ ܗܘܹܐ ܠܹܗ ܡ̣ܢ ܥܲܦܪܵܐ، ܘܟܠ ܒܸܬ ܕܵܐܹܪ ܠܥܲܦܪܵܐ. 21ܡܵܢܝܼ ܟܹܐ ܝܵܕܹܥ ܐܸܢ ܪܘܼܚܵܐ ܕܒܢܲܝ̈ܢܵܫܵܐ ܟܹܐ ܐܵܣܩܵܐ ܠܥܸܠܸܠ، ܘܪܘܼܚܵܐ ܕܗܲܝܘܵܢ ܟܹܐ ܨܵܠܝܵܐ ܠܠܬܸܚܬ ܕܐܲܪܥܵܐ؟ 22ܘܗܲܕܟ݂ܵܐ ܚܙܹܐ ܠܝܼ ܕܠܲܝܬ ܒܘܼܫ ܨܦܵܝܝܼ ܡ̣ܢ ܕܚܵܕܹܐ ܒܲܪܢܵܫܵܐ ܒܦܘܼܠܚܵܢܘܼ̈ܗܝ، ܣܵܒܵܒ ܐܵܗܵܐ ܝܠܹܗ ܣܵܗܡܹܗ، ܣܵܒܵܒ ܡܵܢܝܼ ܒܸܬ ܡܲܚܙܹܐ ܠܹܗ ܡܸܢܕܝܼ ܕܒܸܬ ܗܵܘܹܐ ܡܒܵܬ݇ܪ ܕܝܼܹܗ؟

လက္ရွိေရြးခ်ယ္ထားမွု

ܩܘܗܠܬ 3: ABTAB

အေရာင္မွတ္ခ်က္

မၽွေဝရန္

ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ

ܟܬܵܒ݂ܵܐ ܩܲܕܝܼܫܵܐ ܒܠܸܫܵܢܵܐ ܐܵܬܘܿܪܵܝܵܐ အေၾကာင္းကို ပို၍ သင္ယူပါ။