Quechua, Southern Conchucos Ancash - 2002 Edition (NT) Drama

Quechua, Southern Conchucos Ancash - 2002 Edition (NT)

Pascua fiestapä joqta junaq faltaykaptinmi Betania markaman Jesús aywarqan. Tsaychömi wanunqanpita kawamuq Lázaro täkurqan. Jesús chaykuptin kushikurmi merendata kusinakuyarqan. Wakin runakunawan mësaman Jesús jamaykuptinmi Lázarupis mikunanpä jamarqan. Paykunatam Marta qararqan.
Tsaychö mikuykäyaptinmi nardupita rurashqa chaniyuq perfümita mediu litrutanö María apamurqan. Tsay perfümitam Jesúspa chakinman wiñapaskir aqtsanwan tsakitsirqan. Tsay perfümim wayi junta mushkurqan. Tsaymi Jesústa rantikunanpä kaq discïpulun Judas Iscariote nirqan: <<¿Imapätä tsay perfümita perditsishqa? Tsaypa rantinqa juk wata arupakur gänanqantsikchömi rantikushwan karqan. Tsay qellaywanmi pobrikunata yanapashwan karqan>>.
Tsaynö nirqan manam pobrikunata yanapayta munartsu, sinöqa suwa karmi. Qoriyanqan qellayta tsarararmi pöcu pöculla suwakuq.
Jesúsnam nirqan: <<Tsay perfümitam tsararashqa pampayämänan junaqpä. Tsaynö kaykaptinqa ama imatapis niytsu. Pobrikunaqa qamkunawanmi imaypis kaykäyanqa. Peru noqam sïqa qamkunawan kashänatsu>>.

Betania markachö Jesús kaykanqanta musyaskirmi atskaq runakuna tsayman aywayarqan. Manam Jesús rikaqllatsu aywayarqan, sinöqa kawamuq Lázaruta rikayänanpämi. Tsaymi mandaq sacerdötikuna Lázarutapis wanutsiyta munayarqan. Mandaq sacerdötikunata cäsuyänanpa rantinmi Lázaruta kawatsimunqanpita atskaq runakuna Jesúsmanna criyiyarqan.


Waraynin junaqnam fiestaman aywaq atskaq runakuna musyayarqan Jerusalénman Jesús yaykuykanqanta. Tsaymi palmakunapa rämankunata apakurkur Jesústa chaskiyänanpä aywayarqan. Jesústa rikaykurmi jinchipa niyarqan: <<¡Hosana! ¡Tayta Diospa jutinchö shamuq runa alabashqa kaykullätsun! ¡Qammi Israel runakunapa mandaqnin rey kanki!>>
Jerusalénman Jesús yaykurqan malta ashnun muntashqam. Tsaynö yaykunanpämi Tayta Diospa palabran nin:
<<Sión runakuna, ama mantsayaytsu.
Rikayay mandaqniki rey malta ashnun muntashqa shamuykaqta>>.
Tsay höra imanir Jerusalénman ashnun muntashqa yaykunqanta discïpulunkuna manam tantiyayarqantsu. Wanunqanpita kawaskamuptinrämi Jesús ruranqankuna Tayta Diospa palabranchö ninqannö kanqanta tantiyayarqan.
Lázaruta Jesús kawatsimunqanta rikaq runakuna maytsaychö willakuyaptinmi Jesústa chaskiq atskaq aywayarqan. Tsayta rikarmi fariseukuna niyarqan: <<Kananqa ¿imatatä rurashun? ¡Llapan runakunam payta qatiräyan!>>

Pascuachö Tayta Diosta adorayänanpämi mana Israel runakunapis Jerusalénchö kaykäyarqan. Paykunapita wakin runakunam Felipiman aywaykur rugakuyarqan: <<Taytay, Jesústa reqiykatsiyällämay>>.
Felipiqa Galileachö Betsaida markapitam karqan.
Felipinam Andrésta willarqan. Tsaypitanam ishkan aywar Jesústa willayarqan: <<Taytay, runakunam reqishuynikita munaykäyan>>. Jesúsnam nirqan: <<Runapa Tsurin glorificashqa kananpä höra chämushqanam. Rasunpam nï: Trïguta murur mana pampashqaqa manam jeqamuntsu. Peru pampashqam sïqa jeqamur alli wayun. Kawayninta salvayta munaqkunaqa kawaynintam oqrayanqa. Kawayninta kay patsachö oqraqkunam sïqa kawayninta salvar mana ushakaq kawayta tariyanqa. Pipis sirvimayta munaq kaqqa qatirämätsun. Qatirämarqa noqa kanqä kaqchömi kanqa. Sirvimaq kaqtaqa Papänïpis kuyanqam.

<<Pasaypa llakikuymi tsarimashqa. Tsaynö llakikurpis manam Papänïta mañakümantsu wanuypita salvamänanpä. Wanunäpämi kay patsaman shamurqü>>.
Tsaynö nirmi Tayta Diosta mañakurqan: <<Papä, poderyuq kanqaykita tantiyakuyänanpä qam munanqaykinö kaykullätsun>>.
Tsaymi ciëlupita Tayta Dios nimurqan: <<Poderyuq kanqäta musyatsinqänömi yapaypis musyatsishä>>.
Tsayta wiyarmi tsaychö wakin runakuna niyarqan: <<¡Maqakuymi qayarämun!>>
Wakinnam niyarqan: <<¡Angelmi parlamushqa!>>
Jesúsnam nirqan: <<Parlamuqta wiyayanqayki manam noqapätsu, sinöqa Tayta Dios mandamanqanta tantiyayänaykipämi. Runakuna juzgashqa kayänanpä kaq höra chaykämunnam. Tsaynöllam kay patsapa mandaqnin qarqushqa kananpäpis höran chaykämunna. Kay patsapita joqariyämaptinmi maytsay nación runakunata noqaman criyiyämunanpä qorishä>>.
Tsaynö nirmi Jesús tantiyatsirqan imanöpa wanunanpä kanqanta.
Runakunanam niyarqan: <<Tayta Diospa palabranchömi nin salvamaqnintsik Cristo imayyaqpis kawananpä kanqanta. Tsaynö nikaptinqa ¿imanirtä ninki Runapa Tsurin wanunanpä kanqanta? Tsaynö kaptinqa ¿pitä tsay Runapa Tsurin?>>
Jesúsnam nirqan: <<Pöcu junaqllanam qamkunawan aktsi kanqa. Manarä tsakäpakur aktsi kanqanyaq puriyay. Paqaspa purirqa maypa aywayanqaykitapis manam tantiyayankitsu. Tsaynö kaykaptinqa aktsi qamkunawan kaykanqanyaq aktsiman criyiyay. Tsaynöpam qamkunapis aktsinö kayanki>>.
Tsaynö niskir pakayllapa aywakuptinmi rikayarqannatsu.

Atska milagrukunata ruranqanta rikarpis runakuna Jesúsman manam criyiyarqantsu. Tsaynö mana criyiyänanpä kanqantam profëta Isaías nirqan:
<<Tayta Dios, willakuyanqäta ¿pirä criyishqa?
Salvakuq kanqaykita musyatsiptikipis ¿pirä tantiyashqa?>>
Tsay ninqannöllam Jesúsmanpis criyiyarqantsu. Mastam Tayta Dios ninqanta Isaías nirqan:
<<Tsay runakunapa ñawinkunatam qaprayätsishqa.
Paykunapa shonqunkunatam chukruyätsishqa.
Tsaynöpam mana rikar y mana tantiyar cäsuyanqatsu.
Tsaynö kayaptinmi noqapis allïtsishätsu>>.
Isaías Jesucristupä tsaynö qellqarqan gloriachö poderyuq kaykaqta rikarmi.
Jesúsman wakin runakuna mana criyiyaptinpis atskaqmi payman criyiyarqan. Wakin Israel autoridäkunapis paymanmi criyiyarqan. Tsaynö criyiykarpis sinagögapita fariseukuna qarquyänanta mantsarmi willakuyarqantsu. Tayta Diospita alli rikashqa kayänanpa rantinmi paykunaqa runakunallapita alli rikashqa kayta munayarqan.

Tsaypitanam jinchipa Jesús nirqan: <<Noqaman criyimuq kaqqa mandamaqnïmanpis criyiyanmi. Tsaynöllam noqata reqimaq kaqqa mandamaqnïtapis reqiyan. Noqam aktsi kä. Kay patsaman shamurqü noqaman criyimuqkuna tsakäpakushqanö mana kawayänanpämi.
<<Manam runakunata condenaqtsu kay patsaman shamurqü, sinöqa runakunata salvanäpämi. Tsaynö kaykaptinqa ninqäkunata musyaykar mana cäsukuqkunataqa manam noqatsu condenashä, sinöqa juiciu finalchömi willakuynïkuna condenanqa. Noqaqa manam kikïpa yarpaylläpitatsu willakü, sinöqa mandamaqnï Papänï nimanqankunallatam. Pay nimanqankunata cäsukuqkunaqa mana ushakaq kawaytam tariyanqa. Tsaymi Papänï nimanqannölla llapantapis willakuykä>>.

နားေထာင္ရန္ Juan 12