The Kisi Old Testament

Kisi Bible © Bible Society in Liberia, 2015.

Pūa̍a̍ Che̍kɔ̍pū wa̍, a̍ ku̍ɛ̄ o̍ lɛ̄ŋndē I̍chi̍pīle̍ŋ ni᷄ŋ nda̍ fi̍nyā ndā wa̍ā lātūlu̍ a̍ yu̍ŋgu̍la̍ ndāla̍ yɛ̍ yɛ̍la̍ŋ nda̍, nda̍ cho̍ ha̍ā ni̍: Lūbɛ᷅ŋ, a̍ Si̍mīɔ̄ŋ, a̍ Li̍va̍ī, a̍ Chu̍dā, a̍ I̍sa̍a̍kā, a̍ Sɛ̍bu̍lɔ̄ŋ, a̍ Bɛ̍ŋnja̍mīŋ, a̍ Da᷅ŋ, a̍ Nāfi̍ta̍lī, a̍ Ka̍a̍dī, a̍ A̍sīɛ̄ɛ̄. Mɛ̄ɛ̍ fa̍ū fa̍ū, wānāa̍ fu̍la̍ o̍ pūlāle̍ Che̍kɔ̍pūle̍ŋ chōo̍ ma̍ hūŋ I̍chi̍pī wa̍, a̍ wa᷄ ŋ̄wāŋ be̍le̍-ŋɔ̍mmɛ̍ū. Che̍kɔ̍pū po̍ ndɔ̄ɔ̍ pīlɔ̄ɔ̍ ndu̍ yɔ̍nūŋ māā Chōo̍sɛ̍ ni̍ ndu̍ wa̍ ni᷅ŋ I̍chi̍pī. Mɛ̄ɛ̍ wɔ̄sīlā fāŋgā lā hīo̍u̍, Chōo̍sɛ̍ ni̍, bɛ̄ndāā ndūa̍a̍ ni̍, o̍ ko̍ŋ kɔ̍ɔ̍lī a̍ wānāa̍ wa̍ a̍ te̍le̍ŋ nda̍ ko̍ŋ nda̍, nda̍ kpo̍u̍ ma̍ chūū. Kɛ̍ mi̍ wānāa̍ fu̍la̍ o̍ yu̍ŋgu̍la̍ ndāla̍ŋ chōo̍ wa̍ ā vīālū chūāūwa̍, ndu̍yɛ̍ ma̍ hīāū lāchī a̍ kūīyo̍ ta̍u̍ ta̍u̍, ma̍ tīū o̍ lɛ̄ŋndē I̍chi̍pīle̍ŋ ni᷄ŋ kpo̍u̍.
Mi̍ ī yɔ̄nu᷄ŋ, mi̍ wānā che᷅le̍ŋ ō sīmnu᷄ŋ māsāa̍ le̍ I̍chi̍pī. Kɛ̍ māsāa̍ ho̍ō ndu̍ o̍o̍ si̍nā īsɔ̄ɔ̍ o̍ īsɔ̄ɔ̍ a̍ Chōo̍sɛ̍ o̍kɔ̄ɔ̄ le̍. Mi̍ māsāa̍ ho̍ō lō o̍ ko̍ŋ mbo̍ dīmūl wānāā ndūa̍a̍ āā, “I̍sɔ̄lūɛ̍i̍ya̍ ha̍ā ā kūi̍ ni᷄ŋ bɔ̄ɔ̍ o̍ lɛ̄ŋnde̍ŋ nde᷅ŋ ni᷄ŋ, ndu̍yɛ̍ ā hīōū na̍a̍ kpāāyāa̍. Le̍la̍ŋ mɛ̄ɛ̍ mī ŋ̄ nūūwa̍ nɛ̄īla̍ na̍a̍ ŋ̄ bīī nda̍ mā pɛ̄ŋgi̍ hīōūwɔ̄ɔ̍ lāchī a̍ kūīyo̍ lāŋ. Tē o̍ cho̍ ko̍ŋ te̍, tē a̍ lo̍ hīōūwɔ̄ɔ̍ lāchī a̍ kūīyo̍ nu̍a̍ā pɛ̍, mbo̍ lo̍ o̍ ko̍ŋ mī chɔ̄ū lūēēlu̍l na̍a̍, ā nɔ̄lā mā mūūli̍āŋ a̍ ya̍a̍mɔ̍ɔ̍wa̍ nāa̍ mā sɔ̄ŋga̍ a̍ na̍a̍, o̍ ko̍ŋ ma̍ ma᷄l lɛ̄ŋnde̍ŋ ma̍ nyāānu᷄ŋ.” O̍ ko̍ŋ, mi̍ wāŋnda̍ I̍chi̍pī ā si̍i̍ŋgūū I̍sɔ̄lūɛ̍i̍ya̍ chīa̍a̍. Ma̍ hɛ̄lī wānāa̍ wa᷅ chīa̍a̍ bōlle̍ wa̍ ma̍ hāndū nda̍ I̍sɔ̄lūɛ̍i̍ya̍ chōo̍ le̍ nda̍ kīndīlāa̍ a̍ wa̍lta̍ ka᷅lā ka᷅lā la̍ŋ. Chi̍e̍e̍ŋ bɛ̍ndūŋ māsā bɛ̍ndōo̍ I̍chi̍pī ndu̍ o̍o̍ kɛ̍sī nyɔ̄ɔ̍ŋ ndo̍ŋ bɛ̍ɛ̍, mu̍ŋ yɔ̍nūŋ māā Pi̍tɔ̄m a̍ Lu̍a̍mɛ̍sī ni̍, I̍sɔ̄lūɛ̍i̍ya̍ ta̍ŋgu̍l mu̍ŋ ni̍. Kɛ̍ mɛ̄ɛ̍ kpɛ̍ wāŋnda̍ I̍chi̍pī nda̍ a̍a̍ tu̍sī I̍sɔ̄lūɛ̍i̍ya̍ nyɛ̄ pālāa̍ chōo̍ yɛ̍, le̍nde̍ ko̍ni̍ wāŋnda̍ I̍sɔ̄lūɛ̄ī nda̍ a̍a̍ hi̍a̍ū la̍chi̍ a̍ kūīyo̍ mā kūā a̍ tīūwo̍ o̍ lɛ̄ŋnde̍ŋ ni᷄ŋ kpo̍u̍ ni̍. Le̍ he̍ī, mi̍ sīōōŋnde̍ kāndū wāŋnda̍ I̍chi̍pī bīyɔ̄ɔ̍ le̍ I̍sɔ̄lūɛ̍i̍ya̍. O̍ ko̍ŋ, ma̍ hīāū lāchī a̍ I̍sɔ̄lūɛ̍i̍ya̍ sāāŋgīa̍a̍ a̍ wa̍lta̍ ka᷅la̍ ka᷅la̍ la̍ŋ nda̍ kīo̍o̍. Mɔ̍tɛ̄i̍ li̍ndā ni̍, ŋ̄kpi̍līki̍ lɔ̄ɔ̄ ni̍, tɔ̄lɔ̄ɔ̄lā ndāla̍ŋ a̍ kpe̍le̍la̍ ndāla̍ŋ ni̍, mu̍ŋ kpo̍u̍ I̍sɔ̄lūɛ̍i̍ya̍ nda̍ a̍a̍ ki̍ndīlā le̍ mu̍ŋ tōsāa̍ ni̍. Ndu̍yɛ̍ a̍ wa̍lta̍ ka᷅lā ka᷅lā nda̍ wa̍ la᷄ŋ to̍sāa̍ la̍ŋ kpo̍u̍, īnyīɛ̍ɛ̍ bɛ̍ɛ̍ nda̍ a̍a̍ nɔ̍ le̍ nda̍ le̍.
Mi̍ ī yɔ̄nu᷄ŋ, mi̍ māsā bɛ̍ndōo̍ I̍chi̍pī o̍ ve̍e̍lū Si̍fi̍lūā nda̍ Pu̍wa̍ā, a̍ wa̍ so̍ku̍a̍a̍ vi̍a̍lāa̍ I̍chi̍pī le̍ wāŋ lāāndūāā Hi̍būlūi̍ya̍ wa̍. Mbo̍ dīmūl nda̍ āā, “Te̍le̍ŋ o̍ te̍le̍ŋ tē lā sɔ̄ɔ̄ŋgu̍u̍ wānā la̍nɔ̍ Hi̍būlūi̍nɔ̍ɔ̍ īkɛ̄i̍, mī lā wa̍ ndu̍ mālāa̍ le̍ vīōlɔ̄ɔ̍ pɛ̍, tē lā sāālu̍ŋ pɛ̍ māā wānā pɔ̍nɔ̍ɔ̍ o̍ ve̍lū ni̍, lā dīi̍ chɛ̍lɛ̄kpɛ̍ ko̍ŋ. Kɛ̍ tē ō wa̍ wānā la̍nɔ̍ɔ̍ pɛ̍, lā di̍ī ndu̍ le̍, lā māl ndu̍ ō wa̍ yo̍o̍mū.” Kɛ̍ so̍ku̍a̍a̍ vi̍a̍lāa̍ ha̍ā nda̍ a̍a̍ nɔ̍ sīōōŋīi̍ Mɛ̄lɛ̄kɛ̍i̍, le̍ he̍ī ā chɛ᷄l mā tōsa̍ nyɛ̄ māsā bɛ̄ndōo̍ ho̍ō ō dīmu̍l nda̍ wo̍ le̍. Wāŋ lāāndūāā Hi̍būlūi̍ya̍ nda̍ a̍a̍ vi̍o̍lu̍ bɛ̍ɛ̍ wa᷅ŋ pīāāndūa̍a̍ ā di̍ī nda̍ le̍. Mālɔ̄ɔ̍ nda̍ mā wa̍ yo̍o̍mū. O̍ ko̍ŋ, mi̍ māsā bɛ̄ndōo̍ vēēlū nda̍, mbo̍ nyūnā nda̍ āā, “I̍ di̍mu̍l nya̍ māā tē wāŋ lāāndūāā Hi̍būlūi̍ya̍ ā vēlū wānā pɔ̍nɔ̍ɔ̍ pɛ̄, lā dīi̍ chɛ̍lɛ̄kpɛ̍ ko̍ŋ, kɛ̍ vɛ᷅ lā di̍ī nda̍ le̍ mī lā māl nda̍ mā wā yo̍o̍mū?”
Mi̍ so̍ku̍a̍a̍ ha̍ā mūlūl māsā bɛ̍ndōo̍ āā, “Wāŋ lāāndūāā Hi̍būlūi̍ya̍ nda̍ nda̍, ā cho̍ māā wāŋ lāāndūāā I̍chi̍pī na̍nu᷄ŋ te̍. Nda̍ nda̍ vīōlɔ̄ɔ̄ ndāa̍ chō bɛ̍ɛ̍ŋ bɛ̍ɛ̍ŋ. Tē ā sɔ̄ɔ̄ŋgu̍u̍ ō pīlɛ̍ īkɛ̄i̍ pɛ̍, lɔ̄ɔ̍ pa̍ na̍a̍ ŋ̄ fūūlūū lo̍ŋ ŋ̄ kōmāl ni᷅ŋ ō vēlū a̍ bā ndɔ̄.” Ndu̍yɛ̍ le̍ mɛ̄ɛ̍ so̍ku̍a̍a̍ vi̍a̍lāa̍ ha̍ā ā wo᷄ Mɛ̄lɛ̄ka̍ yɛ̍, mi̍ Mɛ̄lɛ̄ka̍ dūāū nda̍ sa̍lā, mbo̍ kē nda̍ chūāūwa̍. Ndu̍yɛ̍, mi̍ I̍sɔ̄lūɛ̍i̍ya̍ hīāū lāchī a̍ kūīyo̍ ta̍u̍ ta̍u̍ bɛ̍ndū. O̍ ko̍ŋ, mi̍ māsā bɛ̍ndōo̍ dūāū sāwāa̍ mbo̍ dīmūl wāŋnda̍ I̍chi̍pī kpo̍u̍ āā, “Chɔ̍ŋ a̍ hāū, chɛ̍lɛ̄kpɛ̍ o̍ chɛ̍lɛ̄kpɛ̍ Hi̍būlūi̍ya̍ ā vēlū ni᷅ŋ pɛ̍ mbō wa̍ wānā pɔ̍nɔ̍ɔ̍, lā chūa̍ ndu̍ mī lā vīōū ndu̍ Na̍īl o̍ pēēlo̍. Kɛ̍ tē ō wa̍ wānā la̍nɔ̍ɔ̍ pɛ̍, lā ma᷄l ndu̍ mbo̍ wa̍ yōōmū.”

နားေထာင္ရန္ Ɛ̍sɔ̍dɔ̍ɔ̄ 1