TAHINGA 17
17
Na ve ki gogo me igê na bagahê raha
(Tomaha ni nuni 20.1-13)
1Na Isiraelita hato ka pania na bagamasusu raha i Sini. Na Araha ki bonasira ka tênga rârâ surigi na mani agua. Ngaira ka tênga i Repitimi. Ma i ngekana ki mareha rârâ igê na ve, hanana vige totono. 2Ngaira ka hagagege tanga o Moise, ka vi: “Gu vategami na ve, kami tono.”
O Moise ki aramira, ki vi: “Tanu hega mu hagagege? Tanu hega mu uhungia na Araha? Tanu hega mu pe hagêguritogo renia?”
3Ma na enoni ki mamata ngavê na riota ma ka ama ni hagagege nga tanga o Moise. Ngaira ka vi: “Tanu hega go bêngenigami hura tenia i Esipito? Go obanigami vari, igami, na karemami ma na togoha iamami, vigami mesi tonoha?”
4O Moise ki avarasia nga na Araha, ki vi: “Ve katora marata nenuni agini? Ngaira ka sugi arihahuniê nge!”
5Na Araha ki vi tanga o Moise, ki vi: “Gu merarâ tani na enoni raha iata na Isiraelita ma kamu nanago tarata tanga na hungana i Sinai. Go torea na vato, go bani tahurua noga renia na ve i Nile. 6I ngekana inê kê page rêra igê na hê raha i maamu. Gu tahurua na hê raha, ma na ve ki page gogogo me igê tangara na enoni ka totono.” O Moise ki kato vikana i maata na enoni raha iata na Isiraelita.
7O Moise ki naka na ata gi rua tanga na agua ngekana: Masa, i vi Uhungiha ma Meriba i vi Hagagegeha, suria na Isiraelita ka hagagege ma ka uhungia na Araha, matena ga hagate, ka vi: “I hega, na Araha ki ngahisigami mênga, se i mareha?”
Na Isiraelita ka meraheariha na Amalekita
8Na Amalekita ka sugarira na Isiraelita i Repitimi. 9O Moise ki vi tanga o Josua, ki vi: “Gu atera tani na me, hanana mu meraheariha na Amalekita i gomaha. Inê kê page rêra igê na hungana, kê tavoa na vato, God ki bani vateê renia.” 10O Josua ki râ suria na tamasinga iana o Moise tanga, ma ki râ ki meraheariha na Amalekita, matena o Moise, o Aroni mo Guru ka tagere igê na hungana. 11Matena garu akê na rimana o Moise, na Isiraelita ka ama ni teharira nga na Amalekita, ma na matena garu vatovato na rimana, na Amalekita ka haganega nogata ka teharira na Isiraelita. 12Matena garu mangusi na rimana o Moise, o Aroni mo Guru karu ragea me na hê tanga o Moise ki oga igê. Ma ngairerua karu ura hetangenia ma karu têgi akê na rimana. Ngairerua karu têgi akê rârâ na rimana mataro me ki su na arito. 13Igê na tarana ngekana tahema o Josua ki teharira ngavê na Amalekita.
14Ma hemuri na Araha ki vi tanga o Moise, ki vi: “Gu segea so na sihonga renia na hearihatana mu teha igê ngekê, hanana ga takusia tare. Gu hagarongoa o Josua, vi inê kê page mutera ngavê na Amalekita.”
15O Moise ki tagarahia na panga na hê ni vogasiha ma ki hêtana renia vi ‘Na Araha ki ngahisiê manga na bêata’. 16Ngaia ki vi: “Mu hagahigasia nga na ngahisiha iana na Araha. Ngaia ki tohe, vi ama ni meraheariha nga tare na Amalekita.”
Terpilih Sekarang Ini:
TAHINGA 17: KCB
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2011 Bible Society of the South Pacific