TAHINGA 15
15
Na ki iana o Moise
1Hemuri o Moise ma na Isiraelita ka kiria na ki ikê tanga na Araha.
“Inê be ki tanga na Araha,
suria ngaia ki raramohaga hunia ma ki teha.
Ngaia ki kasira i asi
na hosi ma na mane ni me igê.
2Na Araha ka na raramohaku.
Ngaia ki ngahisiê ma ki hagatahiê.
Ngaia ki na God iaku ma inê be hagarahasia.
Ngaia ki na God o vaemaku i rahesia
ma inê be ki be hagarahasia.
3Ngaia ki teha igê na hearihatana.
Na atana ki na Araha.
4Ngaia ki kasira i asi
na mane ni me iana na maneraha i Esipito
henigi na kati ni me iata.
Na mane ni me na manisi
ka tono i Asi Memera.
5Na asi ki buhira.
Ngaira ka kokoro vato igê na rutuni
mangagi na hê.
6Araha, na raramohamu ki raha teha vê.
Igo ko menamenarira na merongamu.
7Igo ko teharira na merongamu,
suria go teha ma ko raramohaga hunigo.
Na vavatana na mangariaganiha iamu
ki resira ka mangagi na go maria.
8Igo ko uhia na asi,
ki guru hegitigi,
ki ura manga na apê.
Na porona vato na asi ki gatagata.
9Na merongamu ka vi:
“Nika, ge tarigenira.
Ke henahuraugi na ruruguha iata
ma ke tonganigi.
Ke amurigi na tatapa borahu iaka,
hanana ngaira ke tuturiha.
10Ma igo, Araha, ko uhi râ ma,
ma na me ni Esipito ka tono hato.
Ngaira ka kokoro igê na rutuni i asi
manga na poro na hagakokoro.
11Araha, ti na ataro ki maratoramu?
Ti ki raramohaga manga igo?
Ti ki koro igê na ara ni tarani manga igo?
Ti ki girara i tanugi na mena
ma na tagaraha raha manga igo?
12Igo ko tagarenia râ na rimamu na otomu
ma na ano ki unumira na merongamu.
13Igo ko hagamonaria na suruha iamu.
Igo ko bêngenira na enoni go hagatahira.
Renia na raramohamu igo ko hagaotora
tanga na agua ni suruha iamu.
14Na enoni getera i maveta ka rongo tarohamu.
Ngaira ka magu ma ka tata.
Na ai ni Pilisitia ka bubununuga ngavê.
15Na maneraha i Etome ka anumanuma ngavê.
Na mane ramo ni Moaba ka gisigisi.
Na ai ni Kanani ka bagahagêguri.
16Na maguha ma na anumanumaha ka tarahura.
Ngaira ka rigia na raramohamu, Araha.
Ngaira ka magu ma ka tugupu ka ura,
matena ga ritare na kariamu go rupasira.
17Igo ko bêngenira tanga na hungana apuna iamu
ma ko hasira igê na mako iamu,
i na agua go bani atea, vigo gâga igê,
i ruma ni rotu go tagarahia igo maremu.
18Na arahanga iamu, Araha,
ki asa hagetage vige page hato.
Na ki iana ka Miriama
19Na Isiraelita ka tarê ka râ suria na tara mamata i asi. Ma na matena na me ni Esipito henira na hosi iata ma na kati ni me, ma henira na mane ni me igê na hosi, ka mumurira me i tara i asi ngekana na Araha ki katoa na asi ki aporo hetaku hurira na merongata.
20Ka Miriama na poropete ma kesina o Aroni ki haganega ki tahutahuru ma na gete hato ka mumuria ka tahutahuru nogata. 21Ka Miriama ki haganega na ki haoru ikê tangara:
“Kiria na Araha,
suria ngaia ki teha
ma ki raramohaga hunia.
Ngaia ki kasira i asi
na hosi ma na mane ni me igê.”
Na ve mahe
22O Moise ki bêngenira na Isiraelita tenia na Asi Memera tanga na bagamasusu raha i Suru. Na tangiani gi oru ka râ surigi igê na bagamasusu raha ma ka pe tarahua rârâ na ve. 23Ma hemuri ngaira ka ata râ i Mara. Ma na ve i ngekana ki mahe ngavê, ma ki bara tangara vige tono. Tahema ga hêtana vi Mara, i vi Mahe. 24Na enoni ka hagagege tanga o Moise ma ka hagate, ka vi: “Na ta kami totono?” 25O Moise ki avarasia na Araha, ma na Araha ki hagabâsia renia na kere matena na apinige. O Moise ki tavoa ma ki kasia so i ve, ma na ve ki kahu arari ni tonoha.
I ngekana na Araha ki vatera igê na ramata tangagi na ogaha iata, ma nikâ ngaia ki uhungira i ngekana. 26Ngaia ki vi tangara, ki vi: “Manga mu têtê viteaku maninga, mu katogi na tarani ga ototo i maaku ma kamu marupegi na ramata iaku, hoi, inê ki asa be hagaitangigamu renigi na ani mavê na mera, gê hagaitangira noga na ai ni Esipito renigi. Inê nga ka na Araha gê hagakomagagamu.”
27Ma hemuri ngaira ka râ ka ata i Elimi. I ngekana ka oga igê na vebanga tangahuru matarerua ma na bêni na ni na tangahuru gi pi. Ma ngaira ka mêru so i ngekana hagarangia na ve.
Terpilih Sekarang Ini:
TAHINGA 15: KCB
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
© 2011 Bible Society of the South Pacific