Matayu 8
8
Yesu kankumponiziya muntu kana ugumbula
Mariku 1:40-45; Luka 5:12-16
1Yesu pakaseleriti kulawa kuligongu, lipinga likulu lya wantu limfatiti. 2Su, kiziti muntu yumu kana ungumbula, kamsuntamira Yesu na kutakula, “Mtuwa, pagufira, guweza kumpunga neni!”
3Yesu kanyosha liwoku lyakuwi na kamshinkula na kumgambira, “Nfira! Gupungwi.” Palaa palii muntu ulii kawera mkomu. 4Shakapanu Yesu kamgambira yomberi, “Gupikaniri! Nagumgambira muntu yoseri, kumbiti gugendi gwakalilanguziyi kwa mtambika gwa numba ya Mlungu, gulaviyi tambiku ntambu yakalagiliriti Musa su kila muntu kavimani handa gupona.”
Yesu kankumponiziya ntumintumi gwa ofisa gwa Rumi
Luka 7:1-10
5Yesu pakaweriti kankwingira lushi lwa Kafarinaumu, ofisa gwa Rumi kaliwoniti na yomberi na kaluwa utanga pakalonga, 6“Mtuwa, ntumintumi gwangu kagonja kalwala, ulweri wa kuleweleka na kalwala nentu.”
7Yesu kamgambira, “Hanizi kumponiziya.” 8Ofisa ulii kamwankula, “Ndala Mtuwa, gufiruwa ndiri gwingiri mnumba mwangu. Kumbiti gutakuli hera shisoweru na ntumintumi gwangu hakaponi. 9Toziya ata neni namuntu gwa pasi pa uwezu wa wamonga, nanawu wanjagila yanuwalagalira kutenda. Numulagalira yumu, ‘Gugendi!’ Na yomberi kagenda na panumlagalira yumonga, ‘Gwizi!’ Na yomberi kizaga na numulagalira ntumintumi gwangu, ‘Gutendi ashi!’ Na yomberi katendaga.”
10Yesu pakapikaniriti aga, kalikangashiti na kawagambira wantu yawamfatiti, “Nakaka nuwagambirani, numwoniti ndiri muntu yoseri mu Israeli yakawera na njimiru gambira muntu ayu. 11Nukugambirani handa wantu wavua hawizi kulawa kwagulawa mushenji na kwaguzyeta mushenji na hawalivagi pamuwera na Aburahamu na Isaka na Yakobu pamsambu Muufalumi wa kumpindi. 12Kumbiti walii yawafiruwitwi kuwera Muufalumi hawawasi muntiti, aku hawalili na kugayagaya menu.” 13Shakapanu Yesu kamgambira ofisa ulii, “Gugendi ukaya na ntambu yagujimira haitendeki kwaku.”
Na ntumintumi gwa afisa ulii kaponiti shaka shilaa shilii.
Yesu kankuwaponiziya wantu wavuwa
Mariku 1:29-34; Luka 4:38-41
14Yesu kafikiti ukaya kwa Peteru, kamwona mawu mganafu gwa Peteru kagonja mulisaga, kapyupa nentu. 15Su, Yesu kamshinkula liwoku lyakuwi na kupyupa kumleka, kagoloka na kanjiti kumtendera.
16Payiweriti pamihi, wamjegeriti wantu wavuwa yawaweriti wabegiziwa na washamshera. Yesu kawawinga washamshera kwa kulonga shisoweru na kawaponiziya woseri yawaweriti wankulwala. 17Katenditi hangu su galii gakatakuliti Isaya mbuyi gwa Mlungu gaweri nakaka,
“Yomberi kawutola utepeku wetu,
Kagatola malweri getu.”
Wasagulitwi kuwera wantumintumi wa Yesu
Luka 9:57-62
18Yesu pakawoniti shipinga sha wantu shimzyengeta, kawagambiriti wafundwa wakuwi waloki kumwambu kulitanda. 19Mfunda gwa Malagaliru kamgendera, kamgambira, “Mfunda, neni nakala kugenda na gwenga koseri kwagugenda.”
20Yesu kamwankula, “Vibweta wana mpanga na wampongu wawera na vitukulu, kumbiti Mwana gwa Muntu kahera pahala pa kugonja na kwoyera.”
21Muntu yumonga yakaweriti mfundwa kamgambira, “Mtuwa, gundeki uti, ng'endi nukamsiri tati gwangu.”
22Yesu kamwankula, “Gunfati, guwaleki yawahowiti shirohu wawasiri yawahowiti shirohu wawu.”
Yesu kankulikalipira lyega
Mariku 4:35-41; Luka 8:22-25
23Yesu kakweniti muuwatu na wafundwa wakuwi wagenditi pamuhera nayomberi. 24Pala palii lihega lyana likakala lilawira mulitanda na mankapala ganja kugubikira uwatu. Yesu mweni kaweriti kankugonja mpota. 25Wafundwa wamgendera na wamwimusiya pawatakula, “Mtuwa, gutulopoziyi twankuhowa!”
26Yesu kawagambira, “Iwera hashi mwana lyoga? Hee mwawantu mwenga mwana njimiru ndidini!” Su, kagoloka na kalikalapira lyega na mankapala ga litanda ganyamala na kuweriti na kunyamalira kukulu.
27Kila muntu kalikangasha. Womberi walonga “Ata lyega na mankapala ga mashi gamjimira!”
Yesu kankuwaponiziya wantu wawili yawawera na washamshera
Mariku 5:1-20; Luka 8:26-39
28Yesu pakasokiti lushi lwa Gadara, kumwambu kulitanda, kaliwoniti na wantu wawili yawalawiti mumapumba ga mpanga. Wantu awa waweriti na washamshera na waweriti wankutiluwa na wantu na kwahera muntu yakaweza kugenda munjira ilii. 29Su womberi wabotanga, “Hashi, Gufira shishi kwa twenga, gwenga Mwana gwa Mlungu? Hashi, gwiza kutubeziya pamberi pa shaka shetu?”
30Pakwegera na pahala palii, kuweriti na lipinga likulu lya wamtumbi wankulolelua. 31Su, washamshera wamluwa Yesu, “Handa pagutulaviya, su gutujimiliri tuwaingiri wamtumbi walii.”
32Yesu kawagambira, “Mgendi!” Su wawalawa wantu awa na wawingira wamtumbi. Lipinga lyoseri lya wamtumbi liseleriti paluseleru lukalipa na lilidiba mumashi.
33Walolera wa wamtumbi watugiti na wagenditi mlushi, kulii watakuliti vitwatira vyoseri na ntambu yavirawiriti kwa wantu yawaweriti na washamshera. 34Su, wantu woseri walawiti mlushi lulii na wagenditi kuliwona na Yesu na pawamwoniti Yesu, waluwa kawuki muisi yawu.
सध्या निवडलेले:
Matayu 8: PBV
ठळक
कॉपी करा
तुलना करा
सामायिक करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
The Bible version in the Pogoro Language. @The Word for The World International and Pogoro Language translation. All rights reserved.