Lomɛ́ŋ 15
15
Kupɔ́tɔkɔn waakúán
1Pasɔ́ tunyɛɛ́ pakúnínán á kuátap tuɛ́kɛɛsikɛnɛn kupínɛ́ɛ́kinɛn pɔsɔ́k pátiányípá na pukaaka, tutiambá kɔ́ɔ́m epú púnyɛɛ́ peseé káásɔ́.
2Ɛ́nyɛɛlɛ́ sikɛ mɔɔndɛ káásɔ́ ɔ́ kiɔ́p pɔ́tɔkɔn wɔɔkúɔ́p é púúpú púnyɛɛ́ peseé, ɛ́ɛ́ epú púnyɛɛ́ peseé wááka. 3Á kiákí ɛ́ɛ́ Kilíis timɔpíɔ́pinɔn peseé wɔ́ muɛ́tɛ́ muɛtɛ, maná púnyɛ puɔ́ŋɔ́n ɛ́ɛ́: Insikɛ́ pámaákusikan, niŋúɛ pámiínsikan. 4Ɛ́ kuɛn, puandá kitikit púnyɛɛ́ puɔ́ŋɔ́n kisíósíó nyɛ iŋónyítónyí káásɔ́ ó pusíó, é kuésépenyi no kuwóónit andilɛ́ infíɔ́ŋ eekenyí ɛ́ɛ́ tútáŋap pipíóndínyí ɔtɛ́m. 5Ɛ́nyɛɛlɛ́ Támbákɛ́ɛ u kuésepenyi no kuwóónit andilɛ́ túfá kilɔ́ɔ́ŋɛ́t kí kupá ekelú ómoómí pasúɛ na pasúɛ aná Yésus Kilíis ɔ́ɔ́yɔɔnɛ́ɛ. 6Ɛ́ɛ́ panɔ́ peem ɔtɛ́m ómoómí, niít nímoómí núkúmesi Támbákɛ́ɛ unyɛɛ́ Síí wɔɔkɔ́n waasɔ́ Yésus Kilíis.
Iŋólio i puundimán
7Ónukólósínyí panúɛ na panúɛ aná Kilíis moónúkóli ó pusíó pú nukúm nú Támbák. 8Yɔɔ́kɔɔyɔ ɛ́ Kilíis mɛɛ́yɛ́ eŋelípuólí u Pɛyúútɛn, ó kuwóónyi indan síɛ́yɛ́ umaákɛ́n pa taatɛ́ɛ, é kutíínyi ɛ́ɛ́ Támbák nyɛ nulátát. 9Akáánɛ́ piɛ́nɛɛ́n pílotí kúmesi Támbákɛ́ɛ ó pusíó pú niɛ́n ɔsúkɛ, aná púnyɛɛ́ puɔ́ŋɔ́n ɛ́ɛ́: Tɛ ɔ́ɔ́pɔn yeényíkukúmesi ɔ́ pitɔŋ kitikit, andíkɛ́k yɔɔ́nyíkutɔ́ŋɔn isak é nukúm nú kisiɛ́n kíáwɔ. 10Ɔnfíɔ́ŋ áánd kuɔyɔ ɛ́ɛ́: Pitɔŋ, ánuyayápá embúl ne nikúli níɛ́yɛ́! 11Andíkɛ́k: Énukúmésí Ɔkɔ́n panɔ́ pitɔŋ kitikit, ɔ́nutɔyɔ́ wɔ́ panɔ́ piɛ́nɛɛ́n kitikit. 12Isayí ɔ́ɔ́kɔɔyɔ kɛ́kɛ́ɛ́yɛ́ ɛ́ɛ́: Kitɔ́ɔ́ŋɔ áányaámɛn ku Yése, kíányíátukɛn á kupian pitɔŋ kitikit, pitɔŋ kitikit áányípian pipíóndínyí ɔtɛ́m kɛ́ɛ́yɛ́. 13Ɛ́nyɛɛlɛ́ Támbákɛ́ɛ u pipíóndínyí ɔtɛ́m núwóónyi na anyamɔ́ kitikit, ne kiyeéwe á kuátap ɛ́ɛ́ núpá á puyupuyɛ, ó pipíóndínyí ɔtɛ́m á pukaaka pú enfúnukufúúmɛ!
Pusɔ́m pú Póol
14Epú púnúyoosonée paandimán, yeémenyen ɛ́ɛ́: Nunyɛ nɔ ɔtɛ́m peseé, powóónón na piták pí kumenyi nunyɛ ké etényí ú kupíekenyi insúŋɛ panúɛ na panúɛ. 15É kuenyi meéne máánɔ́ yɔɔ́nuɔ́ŋɔ́n na kutáám kɔ́ ɔtɛ́m é kunúpítéékiti epú numoópíónyítónyi, ó nupoo enú Támbák miímfá, 16imbá etúmí u Yésus Kilíis ɛ́ kikɛtɛ́kɛtɛ́ɛ kí pitɔŋ pílotí, ímbíéŋenyi pusɔ́m pú Támbák é kupéke insɔ́m yi indámb, ɛ́ɛ́ pátiányípá Pɛyúútɛn pá kifunɔ́ kiitámb, kisukúnán ké enfúnukufúúmɛ, ɛ́ɛ́ púpɔ́tɔkɔn Támbákɛ́ɛ. 17Yaápian ɛ́ɛ́ ímbíkúmesi é Yésus Kilíis, é púúpú púyoosoné maandá má Támbák. 18Indíékené kuɔ́ŋ puandá epú Kilíis mɛɛl káámɛ ó pusíó, ɛ́ɛ́ íyɔɔk ne péépé pátiányípá Pɛyúútɛn ɔ́ kuɔ́pɛn, na tukál ne melínyée, 19á pukaaka pú pisey ne melinsí á pukaaka pú enfún ú Támbák kuetúm Yelúsalɛm nɔ pitɔŋ pí mɛŋɛl kuám Ililíi yeesélemendi insɔ́m i Kilíis. 20Maná yeepíméketi é kukéme insɔ́m yi indámb kɔɔ́mɔ aká kisiɛ́n kí Yésus mapásiɛ́ kítipítɛɛ́tɛn, ɛ́ɛ́ indiwáák ɔ́ kɔɔ́mɔ aká sɔ́k maápá umamaná kuɛyɛn. 21Akáánɛ́ yoówóónyosi epú punyɛɛ́ puɔ́ŋɔ́n: Pɛ́ɛ́nyɛ́ɛ́nɛn epé pɛ́mɛɛ́l pɔ́tiɔyítɛ́n pɔ́ puandá, ne epé pámapásiɛ́ pɔ́tiɔ́p pɛ́tɛɛtɛn, ɔ́ɔ́nyɔɔp.
Tuketi tú Póol
22Púú púkányanɛ́ á sikɛ kisikilɛ ɛ́ɛ́ indiól kuanɔ́. 23Nínúan aná indiányípá yaand apian puandá pú kuɛl ɔ́ pitɔŋ epie, no kilɔ́ɔ́ŋɛ́t kikanyɛɛ́ tuɔŋ ɛ́ɛ́ yóol kuanɔ́. 24Aká yaányítápukanɛ́ kuanɔ́ á kuyɔɔk ɛspany yoópíóndonyi ɔtɛ́m á kuámɛn kuanɔ́, ɛ́ɛ́ nuumfá pipíɔ́kɛ́n pí ɛŋɛnd, yóondo ímbá ká anyamɔ́ ú kunúɛn tɛ aná púányípáánɛ́ ɔ́ muɔ́nɔ́ u kisikɛl. 25Nínúan yaáyuukan Yelúsalɛm ɛ́ɛ́ yɔ́ɔ́kɔ́nɔ́kɔ́n peétépí. 26Á kiákí ɛ́ɛ́ pɛɛnd pá Masetúan na pá Akayi ápíápɛ́n kiáka ó pusíó pú pɔsúkɔsukɔ pɛ́nyɛɛ́ peétépí Yelúsalɛm. 27Pɔ́mɔ́pílɔ́ŋɛ́t anakáánɛ́, púmɛ́ɛ́síkɛ́n nɔ; Á kiákí ɛ́ɛ́ índɛ peétépí pátiánuípá Pɛyúútɛn mápia niap ó kisótio kí Pɛyúútɛn, peétépí pɛ́nyɛɛ́ Pɛyúútɛn mɛ́ɛ́síkɛ́nɛ́n ɛ́ɛ́ pátáŋap niap á punɛ́m pú peétépí pátiányípá Pɛyúútɛn. 28Iŋɛɛl imanán kuekenyi tupɔ tukáánɛ́, iŋayɔɔk ispania indápukɛn kuanɔ́. 29Yeémenyen, ɛ́ɛ́ yóólon kuanɔ́ punyɛ ne kipínúúne kí Kilíis iŋoónyóol. 30Yɔɔ́núɔ́yɔn ɛ́ɛ́ paandimán á kinɔn kí Ɔkɔ́n waasɔ́ Yésus Kilíis ó pusíó pú niɔy ní enfun, é kunuenesi embúl naamɛ, nuékenyi Támbákɛ́ɛ imbísókólí káámɛ ó pusíó. 31Ɛ́ɛ́ ímbíɔk kí imbɔk sí péépé pátiányípá páátapan pé Yúte, andíkɛ́k ɛ́ɛ́ tupoo etú iyuukanɛ́ na tɔ́ Yelúsalɛm peétépí pákɔn tɔ. 32Púɛl ɛ́ɛ́ kisikɛl iŋaányípá kuanɔ́ na anyamɔ́ ú kuɔyɛt kú Támbák iŋɔ́l muɔ́nɔ́ u kupíɔyɛt káánɔ́ ɛ́ kikɛtɛ́kɛtɛ́ɛ. 33Ɛ́nyɛɛlɛ́ Támbákɛ́ɛ u kiyeéwe pá naanɔ́ panɔ́ peem anakáánɛ́.
सध्या निवडलेले:
Lomɛ́ŋ 15: yav
ठळक
कॉपी करा
तुलना करा
सामायिक करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2026, CABTAL