2 Tesalonik 3
3
Ilúndɛ kí imbísókólí no puólí
1Ékuesúkín paandimán, ónupísókólónyí káásɔ ó pusío, ɛ́ɛ́ nukál nú Támbák suŋuna, núónd nú sálamand pɛkɛtɛpɛkɛt, pɛɛnd kúmésí aná núnyiɛ́ kuanɔ. 2Ónupísókólónyí káásɔ ó pusíó ɛ́ɛ́ Támbák túfánɔn ɔ́ pilɔk pí pɛɛnd ne pefílefile á kiákí ɛ́ɛ́ peem tipá páátapan. 3Ɔkɔ́n nyɛ nulátát, úkanúfáan ilúndɛ woond unúfánɔn ɔ́ kilɔk. 4Káánɔ́ ó pusíó, tuápian pipíondínyí ɔtɛ́m kɔ́ Ɔkɔ́n nɛkɛtɛ́ɛ: epú tumaanutíán nuɛ́kɛlɛ pú nuond nusuŋuna nɛ kuɛlɛ pú. 5Ɛ́nyiɛlɛ́ Ɔkɔ́n punduna itɛ́m síánɔ kí iŋɔyɔ i Támbák ne kuésepenyi ekú Kilíis ekenyié. 6Paandimán tuónúówon, ɛ́ kisiɛ́n kí Ɔkɔ́n Yésus Kilíis ɛ́ɛ́, núpínyaŋit paandimán páánɔ́ pɔ́ɔsɔ́tɔn kusɔ́t kunyiɛ́ kupusá kútiányípá kí insaŋ yi iŋónyítónyí tumeénutepukinyi. 7Nuémenyen aná nuɛsikɛnɛnɛ́ kuɛl, tiɛkíɛ nunyiɛ́ pékutúpiketi. Á kiákí ɛ́ɛ́ tutimapá pɔnún kuanɔ́. 8Múkunyíá tumaányián kuanɔ́, tutimɔɔŋɔn mɔɔnd, maná, é muyú nɛkɛtɛ́ɛ, na kuand, neneputúk nɔnɔpuɔ́sí, tukɔtɔ ɛ́ɛ́ tutiɛlɛ́ kinuá á mɔɔnd. 9Tumapián ipán íkuɛ́nyíɛlɛ́ nútúoyosi maná tumɛɛlɛ́ anakáaní ɛ́ɛ́ túpá pulinsí káánɔ́ ó pusíó ɛ́ɛ́ nútúpíketi. 10Aká tumaápá kuanɔ́, tumapá tunútíánan ɛ́ɛ́: índɛ mɔɔnd tipá wamba kukɔtɛt, utipá wɛsikɛnɛn ɛ́ɛ́ úpíyaka. 11kúúkɔ́ tuɔ́ponɛ́ ɛ́ɛ́ káánɔ́ kɔ́ ɔlɔŋ pɛɛnd pómotí ɔ́sɔ́tɔ́n kusɔ́t kupusá, póyoson kusɔ́t kú pɔsɔ́k. 12Ɔ́ pɔsɔ́k pakáanɛ, tuɛ́pí kɔ́ɔpɔ́ ni ilúndɛ ɛ́ kisiɛ́n kí Ɔkɔ́n Yésus Kilíis ɛ́ɛ́ ínyiɛlɛ́ pɔ́kɔtɔ, pányípíyaka múkunyá mú puólí púɔ́p. 13Panɔ́ kɔk paandimán nutiánd ɛ́kuɛlɛ peseé. 14Índɛ mɔɔnd sien kuɔŋ á tukál tú kálatɛ ewue, ɔ́nukɔ́l pú ɔ́ niɔlɔ́ núond núpilɛmbiti wɔ́ ɛ́ɛ́ wuɔ́p etú kunua. 15Nutikɔ́l wɔ́ ɛlɛɛ́ okóyikoyi, maná ánusúŋá wɔ́ ɛlɛɛ́ andimán.
Kipínúun ni imbíkélie
16Ɛ́nyiɛlɛ́ Ɔkɔ́n u kiyeéwe núeki wúmuɛ́tíɛ́ múɛ́tiɛ kiyeéwe á kisikɛl kitikit, á tunamá kitikit, Ɔkɔ́n pá naanɔ́ panɔ́ peem. 17Imbíkélie inyɛɛ́ ɔmbɔ́k wáámɛ ú Póól ú kuɔ́ŋ, yáanakáanɛ insánanɛ́ pa kálatɛ́ páámɛ peem; yáanakáanɛ yɔɔ́ŋɔnɛ́. 18Ɛniɛ́ peseé ú Ɔkɔ́n waasɔ́ Yésus Kilíis pá naanɔ panɔ́ peem.
सध्या निवडलेले:
2 Tesalonik 3: yav
ठळक
कॉपी करा
तुलना करा
सामायिक करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2026, CABTAL