Romanji 3
3
Pistimeniljea al Dumnidzãu
1Cai easti nãintarea a Iudeului, icã cai easti ufelia a anvãrliga-tãljeariljei? 2Mari tu tuti soili. Prota, cã a Iudeilor lã si pistipsirã zboarili al Dumnidzãu. 3Sh-tsi deapoea, macã niscãntsã nu pistipsirã? Nacã nipistipsirea a lor va u-anuleadzã pistimeniljea a Dumnidzãlui? 4Diparti s-hibã! Dumnidzãlu s-hibã alihios sh-cathi om arãdios, ashã cum easti scriatã trã Dumnidzãlu: “Tra s-ti discãbãteshti tu zboarili a tali sh-ashã va nichiseshti cãndu s-ti giudits.”#Ps 51:4.
5Ma, macã nindriptatea a noastrã aspuni ndriptatea a Dumnidzãlui, tsi s-dzãtsem atumtsea? Dumnidzãlu, cãndu s-nãreashti easti nindreptu? (Ma grescu ca om.) 6Pute s-nu hibã! Cã atumtsea, cum va u giudica lumea Dumnidzãlu? 7Trã atsea, “Macã cu arãdearea a mea, alihea a Dumnidzãlui u-analtsã mãrirea a lui, cãtse mini mi giudic ninga ca amãrtios?” 8Cãtse s-nu dzãtsem ca niscãntsã tsi cacuzburãscu sh-dzãcã vahi noi dzãtsem, “S-fãtsem arãu tra s-aflãm ghini”? Ahtari condamnari easti ndreaptã.
Vãrã Nu Easti Ndreptu
9Tsi s-dzãtsem tora? Avem noi tsiva ma multu dicãt elji? Sigur, cã nu. Cã, ma nãinti noi lã acuzãm cum Iudeilji ashãtsi sh-Pãngãnjlji cã tuts suntu sum amãrtii. 10Ashã cum easti scriatã:
“Vãrã nu easti ndreptu, vãrã.
11Nu easti vãrã tsi s-aducheascã,
nu easti vãrã om tsi s-caftã Dumnidzãlu.
12Tuts s-abatirã dit cali,
tuts deadun s-featsirã anaxii,
nu easti vãrã cai s-facã ghini, vãrã.
13Murmintul discljis easti gurmadzlu a lor,
cu limbili a lor au dzãsã arãdeari,
ari fãrmac di nãpãrtitsi sum budzãli a lor.
14Gura a lor easti mplinã di blãstem sh-amãrãciuni.
15Cicioarili a lor suntu aĝunjisiti tra s-vearsã sãndzi.
16Pustuxiri sh-urfanji alasã pri cãljurili a lor,
17sh-calea a paciljei nu u cunuscurã.
18Nu easti frica a Dumnidzãlui nãintea a ocljilor a lor.”#Ps 14:1-3; 53:1-3; 5:9; 140:3; 10:7; Isa 59:7,8; Ps 36:1.
19Noi shtim cã itsido tsi dzãtsi legea, u dzãtsi trã atselji cai suntu sum lege, tsi cathi gurã si s-ncljidã sh-tutã lumea s-hibã sum giudicata al Dumnidzãu. 20Trã atsea, vãrã om nu va si ndripteadzã nãintea a lui trã faptili a legiljei, cã prit legea yini mash cunushtearea a amãrtiiljei.
Ndriptatea Prit Pisti
21Ma tora, cu tutã cã easti sh-legea, easti aspusã ndriptatea a Dumnidzãlui, trã cai mãrtirseashti Legea sh-Prufitsilji, 22va s-dzãcã ndriptatea al Dumnidzãu prit pistea tu Isus Hristos trã tuts atselji tsi pistipseascã, cã nu ari alidzeari, 23cã tuts au amãrtisit sh-suntu lipsits di mãrirea a Dumnidzãlui. 24Tuts suntu ndriptats fãrã-platã prit harul a lui sh-prit arãscumpãrarea tsi easti tu Hristolu Isus. 25Dumnidzãlu lu deadi Hristolu ca curbani di spãstrirea tsi easti loat prit pisti, prit virsarea a sãndzilui a lui. Elu aspusi ndriptatea a lui cã cu arãvdarea. Elu li tricu amãrtiili, cai suntu fapti tu chirolu di ma nãinti. 26Dumnidzãlu arãvdã trã aspunearea a ndriptatiljei a lui tu chirolu di tora, tsi elu s-hibã ndreptu shi si ndripteadzã atsel tsi ari pistea tu Isus.
27Atumtsea, iu easti pirifanjea? S-astimsi. Prit cai lege? Atsilui a faptilor? Nu, ma prit legea tsi caftã pistea. 28Noi minduim cã omlu si ndripteadzã prit pisti fãrã faptili a legiljei. 29Vahi nu easti Dumnidzãlu mash Dumnidzãlu a Iudeilor? Nu easti sh-a pãngãnjilor? Ie, easti sh-a pãngãnjilor. 30Dumnidzãlu easti un singur. Elu va discãbãteadzã anvãrliga-tãljeatlu prit pistea sh-niananvãrliga-tãljeatlu dit pistea. 31Atumtsea, noi u anulãm legea prit pistea? S-hibã diparti! Di contra, u nvãrtushim legea.
