Loma 1
1
1Mai ia Paulo, he kaukauna#1.1 kaukauna Eleni pologa a Keliho Iehu, ma ko he apohitolo na kalagagia ma filifilia e te Atua, ke tālakia tana Tala Lelei.
2Ko te Tala Lelei na folafola e te Atua mai te kāloā e ala i ana pelofeta, e vē ona tūhia i nā Tuhituhiga Paia. 3-4Ko te Tala Lelei e fakatatau ki tona Ataliki, to tātou Aliki ko Iehu Keliho! I tona itū faka-te-tagata, na tupuga mai ia Tavita. Kae ko te Agaga Paia#1.3-4 Agaga Paia pe ko tona lava agaga e tumu i te paia na fakamāonia ai ko Iehu ko te Ataliki o te Atua, ma e uiga kehe tona mālohi#1.3-4 na fakamāonia ai ko Iehu ko te Ataliki o te Atua, ma e uiga kehe tona mālohi pe na fakamāonia ai i he auala e uiga kehe te mālohi, ko Iehu ko te Ataliki o te Atua ina kua toe fakatū mai i te oti. 5Ko ia te na ala ai ona tuku mai te avanoa e te Atua ke kavea ai au ma apohitolo mo Keliho, kae ke takitaki ai e ia ia tagata o mālō uma, ke talitonu ma uhitaki. 6Ko te mea tēnei e aofia ai foki ma koutou iēnā i Loma, koutou iēnā kua kalaga ki ei te Atua ke kavea mo Iehu Keliho.
7Oi ko au la e tuhi atu kia te koutou uma i Loma, koutou iēnā e alofa ki ei te Atua, ma kua kalagagia e te Atua ke kavea ma ona tagata:
Ke ia te koutou te alofa tūnoa ma te fīlēmū mai te Atua to tātou Tamana ma to tātou Aliki ko Iehu Keliho.
Ko te Tatalo o te Fakafetai
8Muamua, ko au e fakafetai ki toku Atua mo koutou uma lele e ala ia Iehu Keliho, auā ko te fakatuatua o koutou kua iloa e te lalolagi kātoa. 9E molimau te Atua ko te mea e lea atu ai au e moni—te Atua e tautua au ki ei ma toku loto kātoa, e ala i te tālaki atu e au o te Tala Lelei e uiga ki tona Ataliki. E iloa e te Atua ko koutou e kō manatua pea lava 10i taimi uma e tatalo ai au. Ko au e tatalo ki te Atua, pe kāfai e tuha ai ma tona finagalo, ke mafai au oi āhiahi atu kia te koutou i te taimi nei. 11Auā ko au e fofou lahi lele ke feiloaki ma koutou, kae ke mafai ai oi maua fakatahi e kitātou he fakamanuiaga faka-te-agaga, ke mālolohi ātili ai koutou. 12Ko te uiga o taku lea atu, ke mafai kitātou ke fakamālohi tētahi ki tētahi, e ala i to tātou fakatuatua.
13Oku uho, ko au e fofou ke koutou iloa, e lahi lele nā taimi nae fia fanatu ai au oi āhi atu koutou, kae ko hēki maua lele he avanoa. Ko au e fofou ke kō maua ni tino ia te koutou mo Keliho Iehu, e vē ona maua e au i iētahi tino nukukehe. #Gāl 19.21 14Auā e iei toku tiute ki tagata uma lele, nā tino Eleni ma nā tino fakapaupau, nā tino kua akoakogia ma kilātou e hēki akoakogia. 15Ko te mea ia e naunau lele ai au, ke kō folafola atua foki te Tala Lelei kia te koutou iēnā e nonofo i Loma.
Ko te Mālohi o te Tala Lelei
16Ko au e talitonu kātoatoa ki te Tala Lelei; ko te mana tēnā o te Atua e fakaola ai kilātou uma e talitonu, muamua ko tagata Iutaia, ma vēnā foki ma tagata nukukehe. #Mlk 8.38 17Auā e fakaalia i te Tala Lelei te auala e fakalelei ai e te Atua te vā o tagata ma ia: e fakalelei e ala i te fakatuatua, mai te kāmataga ki te fakaikuga. E vē ona leamai te tuhituhiga paia, “Ko te tino e fakalelei te vā o ia ma te Atua e ala i te fakatuatua, ka ia maua te ola.”#1.17 fakalelei te vā… maua te ola pe fakalelei te vā o ia ma te Atua, ka ola ia e ala i te fakatuatua #Hap 2.4
Ko Tagata uma lele e Nofohala i mua o te Atua
18Ko te tōkahā o te Atua e fakaalia mai te lagi mo nā agahala ma uiga kino uma o tagata, ma e ala i o lātou uiga kino, kua faigatā ai ke fakailoa te meamoni. 19E fakahala kilātou e te Atua, auā ko nā mea e tatau ke iloa e uiga ki te Atua, e manino lele kia te kilātou, ona na fakailoa lava e te Atua kia te kilātou. 20Talu te gaohiga o te lalolagi e te Atua, e faigōfie lele oi iloa e tagata ko te mālohi o tona mana e hēai hona gātaaga, ma ko ia ko te Atua moni. Ko nā mea iēnei e hē kitea, kae e mafai ke iloa. E iloa ona ko nā mea kua fai e te Atua. Oi e hēai la he mea e tatau ke hē kilātou iloa ai. 21E kilātou iloa te Atua, kae e hē kilātou mafaia lele oi lea vē ake, “Ko koe ko te Atua moni.” E hē kilātou lagona lele foki he loto fakafetai ki gāluega a te Atua. Kae ko o lātou manatu e hēai lele he uiga, ma o lātou māfaufau papaku, kua tumu i te pogihā. #Efe 4.17-18 22E lea ko kilātou e popoto, kae ni tino vālelea. 23Kua hē tāpuaki ki te Atua e mamalu ma e ola pea lava, kae kua tāpuaki ki nā fakatuha na fau fakafōliga ki tagata e hē ola tūmau, pe ki nā manulele, nā manuvaefa pe ki nā manu fetolofi. #Teu 4.16-18
24Ma ko te mea ia kua tīaki ai kilātou e te Atua ke faia nā mea kino e hahau kilātou ki ei, ma ko o lātou māfaufauga kino, e fai ai e tētahi ki tētahi, nā uiga mātagā ki o lātou tino. 25E hē talitonu kilātou ki te meamoni e uiga ki te Atua, kae talia e kilātou te pepelo; e tāpuaki ma kaukauna ki nā mea na gaohi e te Atua, kae e hē tāpuaki ki te tino e a ia nā mea na gaohi ma tē e tatau ke vīkia e tagata ke pa ki te fakavavau! Amene.
26Ona e kilātou faia nā mea iēnei, kua tīaki ai kilātou e te Atua ke fai pea o lātou tuinanauga mātagā. E pa foki lava ki fafine, kua hē fia fakaaogā o lātou tino e vē ko te nātula i te vā o te fafine ma te tāulelea, kae kua fakaaogā i ni auala e hē tuha ma te nātula. 27E vēnā foki ia tāulelea, kua hē fofou ke fakaaogā o lātou tino e vē ko te nātula i te vā o te tāulelea ma te fafine, kae kua mū o lātou loto i te hahau o tētahi ki te tino o tētahi. Kua fai e iētahi tāulelea ki iētahi tāulelea nā uiga matuā mātagā lava, ma ko te mea ia ka pakū ai lava ki o lātou luga te fakahalaga e tatau mo a lātou āmio hehē.
28Ona ko nā tino iēnei kua hē fia talia e kilātou te mālamalama moni e uiga ki te Atua, kua tīaki vē ai kilātou e te Atua ma o lātou māfaufau pikopiko, kae ke fai ai pea e kilātou nā mea e hē tatau ke kilātou faia. 29Kua tumu kilātou i ho he itūkāiga uiga hē lelei, ko te āmio kino, ko te fakaloloto ma te fai o nā āmio mātagā; e tumu i te loto kino, te tāmate tino, te tauaimiha, te talapepelo ma te tau fakakino. E faitatala 30ma tau mūimui; e inoino ki te Atua, e fakamā tino, e fia hili ma gugutu; e fatufatu meakino; e hē uhitaki ki o lātou mātua; 31e hē ia te kilātou he lotofuatiaifo, e hē fakamoemoegia, ma e hē loto alolofa ma hē agalelei ki iētahi tino. 32E kilātou iloa te tūlāfono a te Atua e lea mai ko nā tino e ola i he olaga vēnei e tatau ke oti. Kae kua hē gata i te haga fai pea e kilātou o nā mea iēnei, kae e fiafia foki kinā tino e kilātou faia nā uiga iēnei.
सध्या निवडलेले:
Loma 1: TOKU
ठळक
कॉपी करा
तुलना करा
सामायिक करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Bible Society New Zealand Charitable Trust